Taro na Dauwiliwili

Ena 2 Korinica 6:​14, e vakaibalebaletaki cei o Paula ena nona cavuti “ira era sa sega ni vakabauta”?

Eda wilika ena 2 Korinica 6:​14: “Kakua ni veitokani vata vakatani kei ira era sa sega ni vakabauta.” Matata mai na kena wiliki na veitikina yavolita, ni o Paula e vakaibalebaletaki ira tiko era sega ni lewe ni ivavakoso lotu Vakarisito. Tokona na vakasama oqo na veitikinivolatabu tale e so e vakayagataka kina o Paula na matavosa, “sega ni vakabauta.”

Dua na kena ivakaraitaki, na nona vakadodonutaki ira na lotu Vakarisito o Paula ni cala na nodra kauta na nodra veileqaleqati ina mataveilewai “e na matadra era sa sega ni vakabauta.” (1 Korinica 6:⁠6) Ena tikinivolatabu oqo, o ira na sega ni vakabauta, oya o ira na turaganilewa ni mataveilewai mai Korinica. Ena ikarua ni nona ivola o Paula vei ira mai Korinica, e kaya kina ni o Setani e “vakamatabokotaka na lomadra . . . , era sa sega ni vakabauta.” E vaka ni ‘puloutaki’ tu na matadra mera kua ni raica na itukutuku vinaka. Era sega ni via saumaki mera qaravi Jiova, e laurai oqo ena ka sa kaya oti vei ira o Paula: ‘Ni saumaki vua na Turaga, ena qai kau tani na ipulou.’​​—⁠2 Korinica 3:​16; 4:⁠4.

E so tale ga vei ira na sega ni vakabauta oqo era dau vakayacora na ka ca, ra qai qaravi matakau. (2 Korinica 6:​15, 16) Ia, e sega ni o ira kece era tusaqati ira na tamata i Jiova. E so era taleitaka na ka dina. E so tale, e lotu Vakarisito na watidra ra qai vinakata mera tiko vata ga. (1 Korinica 7:​12-​14; 10:27; 14:​22-​25; 1 Pita 3:​1, 2) Ena veigauna gona e vakayagataka kina o Paula na matavosa o ira era “sega ni vakabauta,” e dusi ira era sega ni lewe ni ivavakoso lotu Vakarisito me vaka sa cavuti oti, na ivavakoso era lewena ga o ira ‘era vakabauta na Turaga.’​​—⁠Cakacaka 2:​41; 5:​14; 8:​12, 13.

Na yavu ni ivakavuvuli e koto oqo ena 2 Korinica 6:​14 e idusidusi yaga ina basoga kece ni bula ni dua na lotu Vakarisito. E dau vakayagataki sara tale ga na ivakasala vakayalomatua oqo vua e dua na lotu Vakarisito e via vakawati. (Maciu 19:​4-6) O koya gona, na lotu Vakarisito e yalayala qai papitaiso oti, ena sega ni via lai vakawatitaka e dua e sega ni vakabauta, ni sega ni tautauvata na nodrau isausau, vakabauta vakalotu se na veika erau vakabibitaka. Dua na duidui levu e koto ena kedrau maliwa e dua e sega ni vakabauta kei na dua na lotu Vakarisito dina.

Ia, vakacava o ira era vulica na iVolatabu ra qai soqoni kei na ivavakoso vakarisito? Vakacava o ira na dautukutuku bera ni papitaiso? Era okati tale beka ga mera sega ni vakabauta? Sega. E sega ni dodonu me tukuni nira sega ni vakabauta o ira na ciqoma na itukutuku vinaka ni ka dina, ra qai tadolova me nodra isausau na papitaiso. (Roma 10:10; 2 Korinica 4:​13) Ni bera mada ga ni papitaiso o Konilio, a tukuni ni ‘tamata daulotu, qai rerevaka na Kalou.’​​—⁠Cakacaka 10:⁠2.

O koya gona, e sega ni okati ena ivakasala i Paula ena 2 Korinica 6:​14 e dua e dautukutuku bera ni papitaiso. Kena ibalebale beka oya ni ka vakayalomatua vua e dua na lotu Vakarisito yalayala oti me rau veivosaki kei na dua e vaka oqo, me rau na qai veiwatini? E sega. Baleta na cava? Ena vuku ni veivakaroti matata a kaya o Paula vei ira na yada lotu Vakarisito. E vola o Paula: “Sa . . . tara vua me vakawati tale kei na tagane sa vinakata ko koya; ka me ia ga kei koya sa nona na Turaga.” (1 Korinica 7:​39) Me salavata gona kei na ivakaro oqo, era uqeti na lotu Vakarisito yalayala oti mera qara ga na kedra isa ena kedra maliwa era “sa nona na Turaga.”

Na cava na ibalebale ni matavosa “sa nona na Turaga,” se “sa nei Karisito,” e dua tale na matavosa e via tauvata kaya? O Paula e cavuti  ira “sa nei Karisito” ena Roma 16:​8-​10, (NW) se “bobula ni Turaga” ena Kolosa 4:​7, (NW). Ke da wilika na veitikinivolatabu oqo, eda raica ni o ira oqo ‘era itokani vakacakacaka,’ ‘era vakadonui,’ ‘era wekada lomani,’ ‘era italatala yalodina,’ ‘era itokani bobula.’

Ena gauna cava e okati kina e dua me “bobula ni Turaga”? Ena gauna e tu vakarau kina me cakava na ka ena cakava e dua na bobula, oya me kua ni murilomana ga. E kaya o Jisu: “Kevaka e dua sa via muri au, me kakua ni muria na lomana, ia me colata na nona kauveilatai, ka muri au.” (Maciu 16:24) E tekivu muri Karisito e dua qai vakamalumalumu me cakava vakatabakidua na loma ni Kalou ena gauna e yalataka kina na nona bula vua na Kalou. Ni cakava oti oya, sa rawa ni papitaiso, me lesi me italatala e vakadonui ena mata ni Kalou o Jiova. * Ni tukuni gona na ‘vakawati ga ena Turaga,’ e kena ibalebale me vakawatitaki ga e dua sa vakaraitaka ni dua dina e tiko ena vakabauta, e “bobula” yalayala “ni Kalou kei na Turaga ko Jisu Karisito.”​​—⁠Jemesa 1:​1, VV.

Ke dua gona sa vuli iVolatabu kei ira na iVakadinadina i Jiova, e dodonu me vakacaucautaki, vakauasivi ke sa toso vinaka tiko vakayalo. Ia, ni se bera ni yalayala vei Jiova, me solia na nona bula ina cakacaka ni Kalou, e se gadrevi vua e so na veiveisau. Ena vinakati me cakava taumada e so na veisau lelevu ina nona bula me rawa kina ni yalayala qai papitaiso me lotu Vakarisito. E sega gona ni kena gauna vua me via lai vavaca tale e dua na ikalawa levu ni bula, oya na vakawati.

Ia, vakacava ke dua sa toso vinaka tiko na nona vuli iVolatabu, e ka vakayalomatua beka vua na lotu Vakarisito yalayala oti me vosaki koya ena vakasama me rau na qai vakawati ni sa papitaiso oti? E sega. E rawa ni buawa vua e vuli iVolatabu na vu dina ni nona via papitaiso ke sa kila tiko ni dua sa yalayala oti e via vakawatitaki koya, ia ena qai vakavatukana ga ke papitaiso rawa.

Vakavuqa ni sega soti ni dede na gauna e okati kina e dua me dautukutuku bera ni papitaiso, ena tadolova sara na ikalawa ni papitaiso. Kena ibalebale ni sega ni dredre na kena muri na ivakaro sa cavuti oti mai, oya me vakawati ga ena Turaga. O koya gona, vakacava na veivosaki kei na dua e susu ena vuvale lotu Vakarisito sa tiko ena itaba ni vakawati, sa dua na gauna balavu na nona vakaitavi vakalevu tu mai ena ivavakoso, ia se dautukutuku bera ni papitaiso tiko ga? Na taro e tarogi oqo, na cava e vakataotaka tiko na nona yalataka na nona bula vei Jiova? Na cava e lomalomaruataka tiko? E vakatitiqa beka? Macala ni sega ni rawa ni tukuni ni sega ni vakabauta o koya e vaka oqo, ia e sega tale ga ni rawa ni tukuni ni “sa nona na Turaga.”

Ena vinaka ke muri na ivakasala i Paula me baleta na vakawati. (Aisea 48:17) Ni rau yalataka na nodrau bula vei Jiova o rau na vakarau vakawati, ena qaqaco vinaka kina na nodrau veidinadinati, ni yavutaki ena veika vakayalo na nodrau vakawati. E tautauvata na veika erau sauva, vaka kina na nodrau rai me baleta na veika e bibi ena nodrau bula. Ena veivuke sara vakalevu oqo ena nodrau marautaka na nodrau bula vakawati. Me kena ikuri, ni dua e ‘vakawati ga ena Turaga,’ e vakaraitaka na nona yalodina vei Jiova, ena rawa tale ga ni na kalougata tawamudu kina, ni “na vakaraitaka na yalodina [o Jiova] vua sa yalodina.”​​—⁠Same 18:​25, NW.

[iVakamacala e ra]

[iYaloyalo ena tabana e 31]

“[E]na vakaraitaka na yalodina [o Jiova] vua sa yalodina”