Süsakiraka anain wayuu

¿Jaralii na manoujainsaliikana nüküjaka achiki Pablo suluʼu 2 Corinto 6:14?

Anuu tü sümakat 2 Corinto 6:14: «Nnojo wanaawain jaaʼin namaa na manoujainsaliikana». Na wayuu naashajaakana achiki Pablo naya na nnojoliikana oushikajaain süchiirua nukuwaʼipa Cristo, pansaasü tia sümaa waneirua wetsiikulo nüshajaka achiki Pablo.

Nüchiaain Pablo na anoujashiikana süka neenajirüin na anoujiraakana wanaa namaa chaa laülaapialuʼu «noʼupala na manoujainsaliikana» (1 Corinto 6:6). Na manoujainsalii nüküjaka achiki Pablo, naya na laülaashii suluʼukana tü laülaapia chapuʼukat Corinto. Suluʼu tü chiiruaajatkat karaloʼuta nüshajaka namüin na corintojeʼewaliikana, nüküjain müin nüsürütkai aaʼin Satanás nekii na manoujainsaliikana süpüla nnojoluin nayaawatüin saaʼu tü nünüikikat Maleiwa. Nnojotsü kasajatüin namüin naya wayuukana naʼyataain nümüin Jehová. Anuu nünüiki chi aluwataaushikai Pablo süchiki tia: «Mapajeʼe süsünneʼennakai aaʼin woulia tia kuluutkat waleʼejüle wachikuaʼa nünainmüin Jehová» (2 Corinto 3:16; 4:4).

Noʼutku na manoujainsaliikana, aainjashii kasa mojusü jee aʼwaajüshii maleiwayaasü (2 Corinto 6:15, 16). Eepejeʼe na nnojoliikana mojuin amüin tü naainjakat na aʼyataakana nümüin Jehová. Eeshii na kamalainkana amüin tü pütchi anakat maʼin otta eeshii na kaʼwayuusekana wayuu anoujasü jee waneepiashii naya sümaa (1 Corinto 7:12-14; 10:27; 14:22-25; 1 Pedro 3:1, 2). «Na manoujainsaliikana», müshi Pablo namüin na wayuu nnojoliikana oushikajaain süchiirua nukuwaʼipa Cristo (Aluwataaushikana 2:41; 5:14; 8:12, 13).

Anasü maʼin jülüjale naaʼin na anoujashiikana tü pütchi ashajünakat suluʼu 2 Corinto 6:14, jülüjainjatü naaʼin tia naaʼinrapa wanee kasa otta anasü jülüjale shia naaʼin na wayuu kasaaleekana (Mateo 19:4-6). Wanee wayuu aapakai naaʼin nümüin Maleiwa jee woutiisakai, nnojoishi kaʼwayuuseinjachin wayuu manoujainsat, jama naatain tü anakat sümüin, tü süchekakalü achiki jee tü sunoujakalü anain.

¿Manoujainsaliiche na wayuu ekirajaakana sünain tü Bibliakat, na aleewakana namaa na wawalayuukana otta na aküjakana pütchi sümaa nnojoluin woutiisain naya? Nnojo, nnojoishii manoulain na aapakana sümaa tü pütchi anakat maʼin jee na alüʼütkana süpüla woutiisaa (Roma 10:10; 2 Corinto 4:13). «Kanoulashi maʼin wayuukai chia nünain Maleiwa», münüshi Cornelio süpülapünaa woutiisain nia (Aluwataaushikana 10:2).

¿Anasüche nümüraajüle wanee anoujashi wanee wayuu aküjaka pütchi sümaa nnojoluin woutiisain shia? ¿Anasüche kasaarüle nia sümaa jama nnojoluin nüküjain tia Pablo suluʼu 2 Corinto 6:14? Nnojotsü anain naaʼinrüle tia wanee anoujashi. Watüjaa aaʼulu tia sutuma tü nümakat Pablo namüin na wayuu outakana aʼwayuuse wanaa sümaa nümüin: «Taashisü sukuwaʼipa süpüla kasaalüin shia nümaa chi eekai sücheküin, niainjachipejeʼe wanee wayuu nikirajakai Cristo» (1 Corinto 7:39). Nüküjain Pablo namüin na anoujashiikana, kasaalüinjanain naya namaa na wayuu nikirajakana Cristo.

¿Jamaluʼutche tü pütchikat «nümüin chi Señotkai», «nümüin Cristo» makat? Suluʼu Roma 16:8-10 otta Colosas 4:7 nüküjain Pablo nayain naya na wayuu aʼyataakana nümüin Cristo, na nuwalayuu aikana apüla nia, na waneepiakana sünain aʼyatawaa nümüin chi Señotkai jee na nüchepchiakana.

¿Kasa naaʼinrajatka wanee wayuu nüchepchiale nia Señotkai? Naaʼinrajatü süka naaʼin nümüiwaʼa tü aʼyatawaa eʼitaanaka najapuluʼu, nnojotsü naaʼinrüin tü nüchekakat neʼe nümüiwaʼa. Anuu nünüiki Jesús: «Chi achekakai süchiki tekirajüin nia, nnojotsü naaʼinrüinjatüin tü nüchekakat neʼe nümüiwaʼa. Müinjatü nülüʼüjakai saaʼin tü wunuʼu akachennakalü anain wayuu sümaa nuushikajaain süchiirua takuwaʼipa» (Mateo 16:24). Chi wayuu aapakai naaʼin nümüin Maleiwa, oushikajaashi süchiirua nukuwaʼipa Cristo jee oonooshi sümaa nünüiki Maleiwa. Woutiisashi nia mapa jee aneekünüshi nia nutuma Jehová süpüla niʼyataainjachin nümüin. a Tü pütchikat kasaalüinjatü «shia nümaa […] wanee wayuu nikirajakai Cristo» makat, kasaalüinjatü shia nümaa wanee wayuu jaʼyaka saaʼu nukuwaʼipa nunoujain nünain Maleiwa maluʼulu, nüchepchia nia Maleiwa jee nüchepchia nia chi Señotkai Jesucristo (Santiago 1:1).

Anasü maʼin tü naainjakat na wayuu ekirajaakana sünain tü Bibliakat namaa na aküjaliikana pütchi nüchiki Jehová jee na akooʼomüinrakana nanoula. Mayaainjeʼe müin nakuwaʼipa, nnojoyülia naapüin naaʼin nümüin Jehová jee nnojoyülia naküjain nümüin naʼyataweein nümüin jaʼitairü sülatüin kasa kapüleesü namüin. Ayatüsiaʼaya nanoutuin nakuwaʼipa jee naaʼinrüin waneirua kasa choʼujaaka süpüla naapüinjatüin naaʼin nümüin Maleiwa jee woutiisain naya. Kasaaleere nia, eeshi süpüla kasaalüin nia süchikijee naaʼinrüin süpüshuaʼa tia.

¿Anasüche nümüraajüle wanee anoujashi wanee wayuu ekirajaaka sünain tü Bibliakat jee naʼatapajüin woutiisain shia süpüla kasaalüin nia sümaa? Nnojotsü anain tia süka nnojoleerüin sütüjaanüin aaʼu jamüin woutiisaka tia wayuukat.

Wanee wayuu aküjakai pütchi sümaa nnojoluin woutiisain nia, nnojoishi nia kakaliainjachin sünain ekirajawaa sünain tü Bibliakat otta woutiiseechi nia sükooʼomüinraapa nunoula. Müsüjeseʼe anain maʼin tü nüküjakat Pablo süchiki kasaalüinjachin wanee anoujashi sümaa wanee wayuu nikirajakai Cristo. ¿Anasüche kasaarüle wanee anoujashi kakaliaichikai aküjain pütchi sümaa nnojolin woutiisain nia mayaainjeʼe nikirajünatüjülin sünain tü Bibliakat natuma na wayuu kachooinkana nia? Shiale nüneeküin kasaalüinjachin nia, ¿jamüshi nnojoikaʼa woutiiseein nia? ¿Kasa ataʼülaka nukuwaʼipa? ¿Kasa wainmajaka atuma naaʼin? Mayaainjeʼe nnojoluin manoulain nia, nnojoishi nia nikirajanain Cristo.

Nüküjain Pablo süchiki tü naaʼinrajatkat wanee wayuu kasaaleere nia, aneerü nukuwaʼipa wanee wayuu naapaale sümaa tia (Isaías 48:17). Jamüshiijaʼa kasaaleere piamashii wayuu aʼyataakana nümüin Jehová, aneerü maʼin nakuwaʼipa jee icheerü maʼin nanoula. Süka wanaawain tü nakuwaʼipakat jee tü naʼyataweekalü anain nümüin Jehová, talateerü maʼin naaʼin sümaa kasaalüin naya. Jaʼyeerü saaʼu wakuwaʼipa waneepiain waya nümaa Jehová kasaarüle waya sümaa wanee wayuu nikirajaka Cristo jee aneerü maʼin wakuwaʼipa watta kaʼi, süka jamüin, waneepieechi wamaa Maleiwa süka waneepiain waya nümaa (Salmo 18:25).

[Pütchi]

[Ayaakuaa]

‹Waneepieechi wamaa Maleiwa süka waneepiain waya nümaa›