Mga Pamangkot Gikan sa mga Bumalasa

Sa 2 Corinto 6:14, sin-o ang ginapatuhuyan ni Pablo sang gingamit niya ang termino nga “mga di-tumuluo”?

Sa 2 Corinto 6:14, aton mabasa: “Dili kamo magpagota sing sampihakan upod sa mga di-tumuluo.” Kon binagbinagon naton ang konteksto, maathag nga ginapatuhuyan ni Pablo ang mga indibiduwal nga indi mga miembro sang Cristianong kongregasyon. Ginasuportahan ini nga paghangop sang iban pa nga mga teksto sa Biblia diin gingamit ni Pablo ang termino nga “di-tumuluo.”

Halimbawa, ginsabdong ni Pablo ang mga Cristiano bangod sang ila pagpakigkasaba sa “atubangan sang mga di-tumuluo.” (1 Corinto 6:6) Diri, ang mga di-tumuluo amo ang mga hukom sa hukmanan sang Corinto. Sa iya ikaduha nga sulat, si Pablo nagsiling nga “ginbulag” ni Satanas “ang mga painuino sang mga di-tumuluo.” Ang mga mata sining mga di-tumuluo ‘natabunan’ amo nga nalipdan ang maayong balita. Ining mga di-tumuluo wala magpakita sing interes sa pag-alagad kay Jehova, kay ginpaathag una ni Pablo: “Kon may pagliso kay Jehova, makuha ang tabon.”—2 Corinto 3:16; 4:4.

Ang iban nga mga di-tumuluo naghimo sing pagkamalinapason ukon idolatriya. (2 Corinto 6:15, 16) Apang, indi tanan nagapamatok sa mga alagad ni Jehova. Ang iban nagapakita sing interes sa kamatuoran. Madamo ang may Cristiano nga mga tiayon kag nalipay nga magpabilin nga minyo sa ila. (1 Corinto 7:12-14; 10:27; 14:22-25; 1 Pedro 3:1, 2) Apang, pirme ginagamit ni Pablo ang termino nga “di-tumuluo” sa mga indibiduwal nga, subong sang nasambit kaina, indi mga miembro sang Cristianong kongregasyon, nga nahuman sang “mga tumuluo sa Ginuo.”—Binuhatan 2:41; 5:14; 8:12, 13.

Ang prinsipio nga makita sa 2 Corinto 6:14 isa ka mapuslanon nga giya para sa mga Cristiano sa tanan nga kahimtangan sang kabuhi kag masami ginakutlo subong maalamon nga laygay para sa mga Cristiano nga nagapangita sing palangasaw-on ukon palamanhon. (Mateo 19:4-6) Ang isa ka dedikado kag bawtismado nga Cristiano maalamon nga wala nagapili sing palangasaw-on ukon palamanhon sa mga di-tumuluo, bangod ang mga prinsipio, tulumuron, kag pagtuluuhan sang mga di-tumuluo tuhay gid sa iya sang matuod nga mga Cristiano.

Apang, kamusta naman ang mga indibiduwal nga nagatuon sing Biblia kag nagapakig-upod sa Cristianong kongregasyon? Kamusta ang di-bawtismado nga mga manugbantala? Mga di-tumuluo bala sila? Indi. Ang mga indibiduwal nga nagbaton sang kamatuoran sang maayong balita kag nagauswag padulong sa bawtismo indi dapat tawgon nga mga di-tumuluo. (Roma 10:10; 2 Corinto 4:13) Antes nabawtismuhan si Cornelio, gintawag sia nga “isa ka debotado nga tawo kag isa nga nagakahadlok sa Dios.”—Binuhatan 10:2.

Kon amo, maalamon bala para sa isa ka dedikado nga Cristiano nga makigrelasyon kag magpakasal sa isa nga ginbaton subong di-bawtismado nga manugbantala, bangod wala man naaplikar sing estrikto sa sina nga kaso ang laygay ni Pablo sa 2 Corinto 6:14? Indi, indi ina maalamon. Ngaa? Bangod sang direkta nga laygay ni Pablo sa mga Cristianong balo. Si Pablo nagsulat: “Hilway sia sa pagpamana sang luyag niya, lamang sa Ginuo.” (1 Corinto 7:39) Ginalaygayan diri ang dedikado nga mga Cristiano nga magpili sing pangasaw-on ukon pamanahon sa mga yara lamang “sa Ginuo.”

Ano ang kahulugan sang ekspresyon nga “sa Ginuo” kag sang may kaangtanan nga ekspresyon nga “kay Cristo”? Ginapatuhuyan ni Pablo ang mga indibiduwal nga  yara “kay Cristo” ukon “sa Ginuo” sa Roma 16:8-10 kag Colosas 4:7. Kon basahon mo ini nga mga teksto, makita mo nga sila mga “masigkamanugpangabudlay,” “kalahamut-an,” ‘hinigugma nga mga utod,’ ‘matutom nga mga alagad,’ kag mga “masigkaulipon.”

San-o ang isa mangin ‘ulipon sa Ginuo’? Matabo ina kon kinabubut-on na niya nga himuon ang dapat himuon sang isa ka ulipon kag sikwayon ang iya kaugalingon. Si Jesus nagpaathag: “Kon ang bisan sin-o luyag magsunod sa akon, isikway niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mateo 16:24) Nagasugod ang isa ka tawo sa pagsunod kay Cristo kag sa pagpasakop sing bug-os sa kabubut-on sang Dios kon magdedikar sia sa Dios. Masunod, magapabawtismo sia kag mangin ordenado nga ministro nga may kalahamut-an nga tindog sa atubangan ni Jehova nga Dios. * Kon amo, ang ‘pagpamana sa Ginuo’ nagakahulugan sing pagminyo sa isa nga may pamatuod nga isa gid sia ka tumuluo, isa ka dedikado nga “ulipon sang Dios kag ni Ginuong Jesucristo.”—Santiago 1:1.

Ang isa ka tawo nga nagatuon sing Biblia upod sa mga Saksi ni Jehova kag nagauswag sing maayo sa espirituwal dalayawon. Apang, wala pa sia makadedikar kay Jehova kag makapanumpa nga mag-alagad kag magsakripisyo sa bug-os niya nga kabuhi. Ginahimo pa niya ang kinahanglanon nga mga pagbag-o. Dapat niya anay himuon ang bug-os nga mga pagbag-o agod mangin dedikado kag bawtismado nga Cristiano antes magplano sang isa pa ka daku nga pagbag-o sa iya kabuhi, subong sang pagminyo.

Maalamon bala para sa isa ka Cristiano nga makignobyo sa isa nga daw nagauswag man sa iya pagtuon sa Biblia—ayhan sa tuyo nga maghulat tubtob nga mabawtismuhan sia antes magpakasal sa iya? Indi. Mahimo nga magumon ang motibo sang isa ka estudyante sa Biblia kon nakahibalo sia nga mapakasal lamang sa iya ang isa ka dedikado nga Cristiano kon mabawtismuhan sia.

Masami nga ang isa ka indibiduwal mangin di-bawtismado nga manugbantala sa malip-ot lamang nga tion, tubtob nga mag-uswag sia padulong sa bawtismo. Gani makatarunganon ang laygay nga magminyo lamang sa Ginuo. Apang, kamusta naman kon ang isa yara na sa husto nga pangidaron, nagdaku sa isa ka Cristianong pamilya, nangin aktibo sa kongregasyon sa pila na ka tuig, kag isa ka di-bawtismado nga manugbantala? Ti, ano ang nagapugong sa iya sa pagdedikar sang iya kabuhi kay Jehova? Ngaa nagapangalag-ag sia? Nagaduhaduha bala sia? Bisan pa indi sia di-tumuluo, indi sia matawag nga yara “sa Ginuo.”

Para sa aton kaayuhan ang laygay ni Pablo tuhoy sa pag-asawahay. (Isaias 48:17) Kon ang magnobyohanay nagdedikar kay Jehova, ang ila panumpa sa isa kag isa sa pag-asawahay may mabakod nga pundasyon sa espirituwal. Pareho ang ila mga prinsipio kag tulumuron. Daku ang mabulig sini agod mangin malipayon ang ila pag-asawahay. Isa pa, paagi sa pagminyo sa Ginuo, ginapakita sang isa nga mainunungon sia kay Jehova, kag nagadul-ong ini sa walay katapusan nga mga pagpakamaayo, kay “sa mainunungon magapanghikot [si Jehova] sing mainunungon.”—Salmo 18:25.

[Nota]

[Retrato sa pahina 31]

“Sa mainunungon magapanghikot [si Jehova] sing mainunungon”