Ịtọ Ẹla Bwu Ẹga nya Angị Wa Apwụ Nyahị

Owo anyị à tị́ ri “angị jẹ́ Ohe Oluhye-ka” ịlẹ ká ịPọlụ ya ẹla rụ́ ụ-ụpwụ nya 2 Ala ịKọrịntị 6:14?

2 Ala ịKọrịntị 6:14 yẹkẹẹ: “Anụ la ọ-yẹ ju lawụlẹ ọhẹ-lọhẹ bala angị jẹ́ Ohe Oluhye-ka lẹ koo!” Kori kahị kụ ẹhị yẹ ẹla ọlẹ kọ dagaga jwoo, ọ ka la gbagbịla nyori angịlẹ kị ri ụpa nya ọjịra-jịra nya angịnyị nya ịKịrayịsị ka, ịPọlụ à wẹẹ ya ẹla rụ́ lẹ. Ẹlẹwẹ pwoku ụpa nya ịBayịbụụ ịkịla ịlẹ kị ịPọlụ ya ẹla nya “angị jẹ́ Ohe Oluhye-ka” lee “ọngọ jẹ́ Ohe-ka.”

Ọ-chụ pwokwita, ịPọlụ yalibyi la angịnyị nya ịKịrayịsị nyọlẹ kị kaa kpa eje nyaa ka ịkọtụ, ‘ka ata nya angị jẹ́ Ohe Oluhye ka.’ (1 Ala ịKọrịntị 6:6) Angị jẹ́ Ohe ka ịlẹ ká ẹgẹwẹ wẹẹ ya ẹla rụ́ ri angịleje ịla ịkọtụ nya ala ịKọrịntị. Ụ-ụpwụ oheeye, ịPọlụ ya nyori Ohe Onyobyi nyị ‘kpụ alodehe ịlẹ kị myị la Ohe Oluhye ka, idu chwiichwii.’ Olegu Onyobyi ya ang ‘chị angị jẹ́ Ohe ka ịwẹ a-ahị’ hi ẹrụ ọnyịịla. Angị jẹ́ Ohe ka ịwẹ á kaa hu ẹta ẹdịyẹ nyọka gbịgba ha iJihova ka, chajị ịPọlụ da wụlẹ yẹkẹẹ: “Ụka myị́ ụka ká ọngịnyị á tị jahị nyamwụ kpata da Ọngọlahị lẹ aalẹ, apwụ ọ-chị ahị nya ukpowu ọọwa a kaa nwụla hi ọngọọwa a-ahị ụbwọọmwụ wẹẹ lẹ.”—2 Ala ịKọrịntị 3:16; 4:4.

Angị jẹ́ Ohe ka ịhyẹ kaa họ eguru-ẹla bala ọ-kaa kpụ́ ojiga. (2 Ala ịKọrịntị 6:15, 16) Ma, ị-ịwa wuu à kaa tụ́ anchẹ nya iJihova pyịpyị ka. Angịhyẹ dọmwụ kaa la irya nyọka jẹ́ ẹlịlẹhị. Ọrụ lee ahụ nya angịhyẹ nyaa ri angịnyị nya ịKịrayịsị, ọ tị kaa háa nyọka juwa balaa. (1 Ala ịKọrịntị 7:12-14; 10:27; 14:22-25; 1 iPita 3:1, 2) Ma jaabwọ kahị ya lalẹ ene, ụka lụmẹ-lụmẹ ká ịPọlụ á ya ẹla nya “angị jẹ́ Ohe ka,” angịlẹ kị ri ụpa nya ọjịra-jịra ka, ọ kaa ya ẹla rụ́ lẹ, chajị alọjịra-jịra wuu ri “angịlẹ kị myị la Ohe.”—Ụkụrwọ nya Alẹrụ 2:41; 5:14; 8:12, 13.

Ẹla ọlẹ ká ụpwụ nya 2 Ala ịKọrịntị 6:14 mẹjẹ kaa kpa angịnyị nya ịKịrayịsị ụgbẹyị ẹ-ẹpwụ nya iwe-ahụrụ wuu ọ-ọhịhị, ụka lụmẹ-lụmẹ ọ tị kaa da angịnyị nya ịKịrayịsị ịlẹ kị wẹẹ tịtọ nya ahụ lee ọrụ ụbwọ ịnyịnyị. (ỊMatiyu 19:4-6) Ọngịnyị nya ịKịrayịsị ọlẹ kọ hu ịlọmwụ ju Ohe ụ-ụbwọ bala o-hu enyi Ohe á kaa chụ ahụ lee ọrụ bwu ẹpwụ nya angịlẹ kị jẹ́ Ohe ka lẹ ka, chajị ehile ịlẹ kị kaa kpa bala ang ọlẹ kị kaa ku datị hi awụlẹ kaka kpoye.

Angịlẹ kị tị kaa jẹ́ ịBayịbụụ bala ọ-yẹ jula angịnyị nya ịKịrayịsị bẹẹ? Angị kpa ẹrụ ọnyịịla pyẹ ịlẹ kị hu enyi Ohe lẹka tị bẹẹ? Ịwa ịnyịnyị ri angị jẹ́ Ohe ka? Ehe. Ọ́ chịla nyọka wụrụ angịlẹ kị ye ẹlịlẹhị myị, wẹẹ nwànwa bala ọ-họ ụkụrwọ jahị da enyi Ohe ohuhu nya angị jẹ́ Ohe ka lẹ ka. (Ala iRom 10:10; 2 Ala ịKọrịntị 4:13) Ene ká ịKọnịlọsị hu enyi Ohe, ị kaa wụrwọọ nya ‘ọngịnyị nya Ohe bala ọngọ kaa juhi nya Ohe.’—Ụkụrwọ nya Alẹrụ 10:2.

Lẹ nyọlẹ ká ẹla ọlẹ ká ịPọlụ ya ụ-ụpwụ nya 2 Ala ịKọrịntị 6:14 á ri ịnya Angị kpa ẹrụ ọnyịịla pyẹ ịlẹ kị hu enyi Ohe lẹka lẹ, ọ tịng tị ka pwoku kori ká ọngịnyị nya ịKịrayịsị ọlẹ ko hu enyi Ohe lẹ, á taaha nya ọngọ hu enyi Ohe lẹka? Ehe, ó pwoku ka. Ịyẹ tị́ du? Chajị nya ẹla ọgbagbịla ọlẹ ká ịPọlụ ya u-uhye nya ihu-egu ịlẹ kị ri angịnyị nya ịKịrayịsị. ỊPọlụ yẹkẹẹ: “Ọ lịlọmwụ nyọka rụrwọ ọng myị́ ọng ọlẹ kọ tọ, ma ẹ-ẹpwụ nya Ọngọlahị kem, ọ ka rwọrụ lẹ.” (1 Ala ịKọrịntị 7:39, NW ) Chajị nya ẹla ọwẹ, angịnyị nya ịKịrayịsị ịlẹ kị hu enyi Ohe kaa mwahị nya ahụ lee ọrụ “ẹ-ẹpwụ nya Ọngọlahị kem” ịnyị.

Ịyẹ à tị́ ri etu nya “ẹ-ẹpwụ nya Ọngọlahị” bala omyi ẹla ọọnamwụ ọkịla ọlẹ ko ri “ẹ-ẹpwụ nya ịKịrayịsị”? ỊPọlụ ya ẹla nya angịlẹ kị juwa “ẹ-ẹpwụ nya ịKịrayịsị” lee “ẹ-ẹpwụ nya Ọngọlahị” ụ-ụpwụ nya Ala iRom 16:8-10 bala Ala iKolosi 4:7. Kori ká wa ọgba ịwẹ, à ka yẹ nyori angịlịnyị ri, ‘angị họ ụkụrwọ tahị,’ ‘angị họ yẹẹyẹẹ ẹ-ẹpwụ nya ịKịrayịsị,’ ‘anyadahị ẹ-ẹpwụ nya ịKịrayịsị ịlẹ kị háahị,’ ‘alẹrụ ị-chịla o-hu ọkịlẹtụ ha,’ bala ‘anchẹ ị-lala ahị-ahị.’

Ụka oyina ọngịnyị à tị́ kaa ri ‘ọnchẹ ẹ-ẹpwụ nya Ọngọlahị’? O ri ụka ká ọngọọwa á kpa ọkịlẹtụ nyamwụ họ ang ọlẹ ká ọnchẹ kaa họ, ko ri ọ-ka pwa ịlọmwụ arwarụ. IJisọsị yẹkẹẹ: “Ọng myị́ ọng ọlẹ kọ juwa tịtọ kọ ka bam jẹ nya ịlẹhị-ịlẹhị lẹ aalẹ, ọngọọwa a pwa ịlọmwụ rwarụ, kọ juwa hu [okoji, NW ] nya akama ọyẹyẹ tam chụ ịlọmwụ e-egbeju kọọwa ayịdang a kẹwẹ kaka bam jẹ mẹ.” (ỊMatiyu 16:24) Ọngịnyị kaa dọmwụ nyọka dịrẹ ịKịrayịsị bala ọ-kpa ịlọmwụ keji nyọka họ irya nya Ohe ụka kọ hu ịlọmwụ ju Ohe ụ-ụbwọ ịnyị. Kori kọ họ ịnyị kpá lẹ, ọ kaa hu enyi Ohe bala o-ri ọngọ myị ẹrụ ọlẹ ká iJihova Ohe Oluhye ye myị lẹlẹ. a Lẹ ọngịnyị ọ-ka ye ahụ lee ọ-rwọrụ “ẹ-ẹpwụ nya Ọngọlahị” ri ọ-ka ye lee ọ-rụrwọ ọngọlẹ kọ mẹjẹ nyori ọ ri ọngọ myị la Ohe ịnyịlẹhị, ọngọ hu ịlọmwụ ju Ohe ụ-ụbwọ nyọka ri “ọnchẹ ọ-myị ẹrụ nya Ohe Oluhye bala ịnya Ọngọlahị iJisọsị ịKịrayịsị.”—IJemsi 1:1.

Ọ baba nyọka da ọngọnyị kọ juwa jẹ́ ịBayịbụụ bala Alibeenu nya iJihova bala ọ-wẹẹ nwà ẹ-ẹpwụ nya ẹla nya Ohe ọlẹẹkwaa. Ma, ó hu ịlọmwụ ju iJihova ụ-ụbwọ bala o-hu ọhịhị nyamwụ ha nyọka gbịgba ha iJihova lẹka. Ọ wẹẹ yẹ ang ịbaba da ẹ-ẹpwụ nya ọhịhị nyamwụ wẹẹ. Ang ịkpọnchị ịhyẹ juwa ịlẹ ká ọngịnyị baba nyọka yẹda ọ-ọhịhị nyamwụ ene kọ ka hu enyi Ohe. Lẹ ọ baba nyọka họ ọọwa kpá ene kọ ka kụ irya nya ọyẹda ọkpọnchị ọkịla lala ahụ oyeye lee ọrụ ọrwọrwọ.

Ọ ka pwoku nya ọngịnyị nya ịKịrayịsị ọ-ka taaha nya ọngọlẹ kọ juwa nwànwa ẹ-ẹpwụ nya ịBayịbụụ ọjẹ́jẹ nyamwụ, la irya nyọka dayị gbee kọ ka hu enyi Ohe kpá ene kị ka ye awụlẹ? Ehe. Irya ọlẹ ká ọngọọwa la nyọka ri ọngịnyị nya ịKịrayịsị ka kpịlahị myị́ kori kọ jẹ́ nyori ọngọhẹ ọlẹ kọ hu enyi Ohe lẹ, nyị wẹẹ tịtọ nyọka ye ọwa, ma nyị́ ka jẹ́-ẹ họ ịnyị ka gbee kọọwa nyị ka hu enyi Ohe.

Ụka lụmẹ-lụmẹ, ọngịnyị á kaa ri ọngọ kpa ẹrụ ọnyịịla pyẹ tata ene kọ kaa nwà ka hu enyi Ohe ka. Lẹ, ẹla ọlẹ ká ịBayịbụụ ya wẹ nyị ye ahụ lee ọ-rwọrụ ẹ-ẹpwụ nya Ọngọlahị á lujwo la ọ-kpakpa ka. Ma ányị ọ tị́ ka la ẹ-ẹga nya ọngọlẹ kọ nwà ahụ lee ọrụ lẹ, kị tị kpọọ nwà ẹ-ẹpwụ nya ugbiyegu nya angịnyị nya ịKịrayịsị, kọ kaa wẹ ọjịra-jịra lụka ọtata lẹ, bala o-ri ọngọ kpa ẹrụ ọnyịịla pyẹ? Ịyẹ à tị́ woo kpa la o-hu ọhịhị nyamwụ ju iJihova ụ-ụbwọ gbalẹ-gbalẹ? Ịyẹ tị́ du kọ lọọ ujwo? Ọ la ịwẹẹ ọdada ịhyẹ? Ịlẹhị lẹ, ọ myị la Ohe, ma áhị ka jẹ́-ẹ ya nyị juwa “ẹ-ẹpwụ nya Ọngọlahị” lẹka.

Ẹla ọlẹ ká ịPọlụ mẹjẹ u-uhye nya awụlẹ oyeye ri ọ-chajị nya apyobwuna nyahị ịnyị. (Ayịsaya 48:17) Ụka ká angị imiiye ịlẹ kị wẹẹ tịtọ nyọka ye awụlẹ á ri angịlẹ kị hu ịlaa ju iJihova ụ-ụbwọ ene lẹ, eje ọchịchị nyaa nyọka yụbwọ chị awụlẹ gboyi myị́ oyi kaa yé ẹga ya ẹta yeji. Ị la ehile ookpokpo ọlẹ kị wẹẹ kpa bala ọ-wẹẹ ku ang ookpokpo ịnyịnyị. Ang ịwẹ kaa dụbwọ ká ugbiyegu ka chị ọkẹkẹnị. Da ọọwa u-uhye, bwula o-ye ahụ lee ọ-rwọrụ “ẹ-ẹpwụ nya Ọngọlahị,” ọngịnyị kaa mẹjẹ nyori o ju iJihova ihi, ọọwa tị kaa kpa ahị ọwawa o-gboyi myị́ oyi wẹ ọngịnyị, chajị iJihova “kaa họ kpẹẹkpẹẹ ẹ-ẹga nya angị la kpẹẹkpẹẹ” ẹ-ẹga nyamwụ.—Eje Ọnyịịla 18:25.

[Ẹla Ọdawụlẹ ọla Eji]

[Ifoto]

IJihova “kaa họ kpẹẹkpẹẹ ẹ-ẹga nya angị la kpẹẹkpẹẹ ẹ-ẹga” nyamwụ