Salsaludsod Dagiti Agbasbasa

Iti 2 Corinto 6:14, siasino dagiti tuktukoyen ni Pablo idi inusarna ti termino a “di manamati”?

Iti 2 Corinto 6:14, mabasatayo: “Dikay agbalin a di agkaasmang a naisangol kadagiti di manamati.” No usigentayo ti konteksto, nabatad a dakdakamaten ni Pablo dagiti indibidual a nalawag a saan a kameng ti kongregasion Kristiano. Daytoy a pannakaawat ket suportaran ti dadduma a bersikulo ti Biblia a nakailanadan ti panangusar ni Pablo iti termino a “di manamati” wenno “dagiti di manamati.”

Kas pagarigan, binabalaw ni Pablo dagiti Kristiano gapu iti ipapanda iti ‘saklang dagiti di manamati.’ (1 Corinto 6:6) Ditoy, dagiti di manamati isuda dagiti agtaktakem iti pangukoman ti Corinto. Iti maikadua a suratna, kuna ni Pablo a ni Satanas “binulsekna ti pampanunot dagiti di manamati.” Dagiti mata dagiti kasta a di manamati ket ‘naabbungotan’ manipud iti naimbag a damag. Dagitoy a di manamati awan ti interesda nga agserbi ken ni Jehova, yantangay immunan nga inlawlawag ni Pablo: “Inton adda panagturong ken Jehova, ti abbungot maikkat.”​—2 Corinto 3:16; 4:4.

Nairaman iti kinakillo wenno idolatria ti dadduma a di manamati. (2 Corinto 6:15, 16) Ngem saan nga amin ket bumusbusor kadagiti adipen ni Jehova. Adda dagidiay interesado iti kinapudno. Adu kadakuada ti nakaasawa iti Kristiano ket naragsakda nga agtalinaed iti dennada. (1 Corinto 7:12-14; 10:27; 14:22-25; 1 Pedro 3:1, 2) Nupay kasta, ti panangusar ni Pablo iti termino a “di manamati” ket kanayon a tumukoy kadagiti indibidual a, kas nadakamat itay, saan a paset ti kongregasion Kristiano, a buklen “dagiti manamati iti Apo.”​—Aramid 2:41; 5:14; 8:12, 13.

Ti prinsipio a masarakan iti 2 Corinto 6:14 ket napateg a mangiwanwan kadagiti Kristiano iti amin a kasasaad ti biag ken masansan a naadaw tapno mangipaay iti nainsiriban a balakad kadagiti Kristiano nga agtarigagay a makiasawa. (Mateo 19:4-6) Nainsiriban no ti maysa a dedikado, bautisado a Kristiano ket saan a makiasawa kadagiti di manamati, yantangay naidumada unay kadagiti pudno a Kristiano no maipapan iti prinsipio, kalat, ken patpatien.

Ngem komusta ngay dagiti indibidual nga agad-adal iti Biblia ken makitimtimpuyog iti kongregasion Kristiano? Komusta dagidiay di bautisado nga agibumbunannag? Maibilangda kadi a di manamati? Saan. Dagiti indibidual a nangipangag iti kinapudno ti naimbag a damag ken rumangrang-ay agturong iti bautismo ket saan a rumbeng a maawagan kas di manamati. (Roma 10:10; 2 Corinto 4:13) Sakbay ti bautismona, naawagan ni Cornelio kas “napeklan a tao ken maysa a managbuteng iti Dios.”​—Aramid 10:2.

Gapuna, nainsiriban kadi a ti maysa a dedikado a Kristiano makiayan-ayat ken makiasawa iti maysa a naanamongan kas di bautisado nga agibumbunannag, yantangay no an-anagen, ti balakad ni Pablo a nailanad iti 2 Corinto 6:14 ket saan nga agaplikar iti dayta a kaso? Saan a nainsiriban dayta. Apay a saan? Maigapu iti direkta a balakad ni Pablo mainaig kadagiti balo a Kristiano. Insurat ni Pablo: “Isu siwayawaya a makiasawa iti siasinoman a kayatna, isuna laeng ta iti Apo.” (1 Corinto 7:39) Maitunos iti dayta a balakad, naidagadag kadagiti dedikado a Kristiano a makiasawada isuna laeng ta “iti Apo.”

Ania ti kaipapanan ti ebkas nga “iti Apo” ken ti nainaig nga ebkas a “ken Kristo”? Tuktukoyen ni Pablo dagiti indibidual nga adda “ken Kristo” wenno “iti Apo” iti Roma 16:8- 10 ken Colosas 4:7. No basaenyo dagita a bersikulo, maammuanyo a dagiti kasta nga indibidual ket isu dagiti ‘katrabahuan,’ “naanamongan,” ‘dungdungnguen,’ “matalek a ministro,” ken ‘pada nga adipen.’

Kaano a ti maysa agbalin nga ‘adipen iti Apo’? Maaramid dayta no situtulok nga itungpalna ti nasken nga aramiden ti maysa nga adipen ken tallikudanna ti bagina. Inlawlawag ni Jesus: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak.” (Mateo 16:24) Sumurot ken ni Kristo ti maysa a tao ken naan-anay nga ipasakupna ti bagina iti pagayatan ti Dios no idedikarna ti bagina iti Dios. Kalpasanna, agpabautisar ken agbalin nga ordinado a ministro nga addaan iti naanamongan a takder iti imatang ni Jehova a Dios. * No kasta ngarud, ti ‘pannakiasawa iti Apo’ kaipapananna ti pannakiasawa iti maysa a nangibatad nga isu ket pudno a manamati, maysa a dedikado nga “adipen ti Dios ken ni Apo Jesu-Kristo.”​—Santiago 1:1.

Makomendaran ti maysa a makipagad-adal iti Biblia kadagiti Saksi ni Jehova ken rumangrang-ay iti naespirituan. Kaskasdi, saanna pay nga indedikar ti bagina ken ni Jehova tapno agbiag nga agserbi ken agsakripisio. Mangar-aramid pay laeng kadagiti napateg a panagbalbaliw. Nasken nga an-anayenna nga aramiden dagiti kangrunaan a panagbalbaliw a nairaman iti panagbalin a dedikado, bautisado a Kristiano sakbay a panunotenna ti sabali pay a dakkel a panagbalbaliw iti biagna, kas iti panagasawa.

Nasayaat kadi a makiayan-ayat ti Kristiano iti maysa nga agparang a narang-ay ti panagadalna iti Biblia​—nalabit nga addaan panggep nga aguray agingga a mabautisaran sakbay a makiasawa kenkuana? Saan. Mabalin a maapektaran ti motibo ti maysa nga agad-adal iti Biblia no ammona nga adda dedikado a Kristiano a mayat a makiasawa kenkuana kalpasan ti bautismona.

Kaaduanna nga ababa laeng a tiempo nga agserbi ti maysa kas di bautisado nga agibumbunannag agingga nga agpabautisar. Gapuna, nainkalintegan ti nadakamat a balakad a pannakiasawa laeng iti Apo. Ngem no ngay ti maysa ket nakagtengen iti edad a mabalinnan ti mangasawa, napadakkel iti maysa a Kristiano a pamilia, nabayag metten nga aktibo iti kongregasion, ken agserserbi kas di bautisado nga agibumbunannag? No kasta ti kasasaad, ania ngarud ti manglaplapped kenkuana a mangidedikar iti biagna ken ni Jehova? Apay a bumdeng? Agduadua kadi? Nupay saan a maibilang a di manamati, isu ket saan a maibilang nga adda “iti Apo.”

Pagimbagantayo ti balakad ni Pablo mainaig iti panagasawa. (Isaias 48:17) No agpada a dedikado ken ni Jehova ti agayan-ayat, ti katulaganda ket addaan iti natibker, naespirituan a pundasion. Agpada dagiti prinsipio ken kalatda. Dakkel ti maitulongna dayta iti naragsak a relasionda kas agassawa. Kanayonanna, no ti maysa ‘makiasawa iti Apo,’ maipakitana ti kinasungdo ken ni Jehova ket mangibunga dayta kadagiti manayon a bendision, ta “iti daydiay nasungdo agtignaykanto [ni Jehova] a sisusungdo.”​—Salmo 18:25.

[Footnote]

[Ladawan iti panid 31]

“Iti daydiay nasungdo agtignaykanto [ni Jehova] a sisusungdo”