Perguntas ki leitoris ta faze

Na 2 Coríntios 6:14, di kenha ki Polu staba ta pâpia kantu el uza palavra ‘diskrenti’?

Na 2 Coríntios 6:14, nu ta lé: ‘Ka nhos faze union dizigual ku diskrentis.’ Si nu analiza kes versíklu antis i dipôs, ta fika klaru ma Polu staba ta pâpia di kes algen ki ka ta faze párti di kongregason. Kel ideia li sta di akordu ku otus versíklu di Bíblia ki ta prova modi ki Polu uza kel palavra ‘diskrenti’ ô ‘diskrentis.’

Pur izénplu, Polu koriji kes kriston ki leba ses irmon pa tribunal ‘dianti di diskrentis.’ (1 Coríntios 6:6) Na kel kazu li, kes diskrenti éra kes juís di tribunal di Korintu. Na se sugundu karta, Polu fla ma Satanás ta ‘sega menti di diskrentis’. Odju di kes diskrenti staba ku un ‘véu’ pa es ka odja kes notísia sábi. Kel-li krê fla ma kes diskrenti ka mostra ninhun interesi na sirbi Jeová, pamodi Polu dja flaba ma ‘óras ki un algen ta volta pa Jeová, kel véu ta tradu.’ — 2 Coríntios 3:16; 4:4.

Alguns diskrenti ta faze kuzas kóntra lei ô idolatria. (2 Coríntios 6:15, 16) Má, é ka tudu diskrenti ki é kóntra sérvus di Jeová. Alguns ta mostra interesi pa verdadi. Txeu di es é kazadu ku algen ki ta sirbi Jeová i es ta xinti kontenti di sta kazadu ku es. (1 Coríntios 7:12-14; 10:27; 14:22-25; 1 Pedro 3:1, 2) Nton, sima dja nu odjaba antis, Polu sénpri ta uza kel palavra ‘diskrenti’ pa pâpia di pesoas ki ka ta faze párti di kongregason ô di kes algen ki ta ‘kridita na Sinhor’. — Atos 2:41; 5:14; 8:12, 13.

Kel prinsípiu ki nu ta atxa na 2 Coríntios 6:14 ta djuda kes ki ta sirbi Deus na txeu ária di ses vida, i tanbê el é un bon konsedju pa kes ki krê kaza. (Mateus 19:4-6) Un algen ki é batizadu i ki ten sabedoria ka ta djobe un diskrenti pa kaza ku el, pamodi prinsípius, obijetivus i kuzas ki el ta kridita na el é diferenti di un kriston verdaderu.

I kes ki ta studa Bíblia i ki ta sisti runion? I kes ki é publikador má ki inda ka batiza? Es é diskrenti? Nau. Kes algen ki seta verdadi di notísias sábi i sta kontinua ta faze prugrésu pa batiza, ka debe txomadu di diskrenti. (Romanos 10:10; 2 Coríntios 4:13) Antis di Kornéliu batiza, el txomadu di ‘ómi relijiozu i ki tinha grandi ruspetu pa Deus’. — Atos 10:2.

Kel konsedju ki Polu da na 2 Coríntios 6:14 ka ta aplika óras ki un algen ki é batizadu namora ô kaza ku un otu algen ki é publikador má ki inda é ka batizadu. Má si un kriston faze kel-li el sta mostra sabedoria? Nau. Pamodi? Pamodi kel konsedju ki Polu da di manera klaru pa viúvas ki ta sirbi Deus. Polu skrebe: ‘El sta livri pa el kaza ku kenha ki el krê, má sô na Sinhor.’ (1 Coríntios 7:39) Di akordu ku kel konsedju li, un algen ki é batizadu debe kaza sô ku kes ki sta ‘na Sinhor.’

Kuzê li kes palavra ‘na Sinhor’ i ‘na Kristu’ krê fla? Polu pâpia na Romanos 16:8-10 i na Colossenses 4:7 sobri kes ki staba ‘na Kristu’ ô ‘na Sinhor.’ Si nu lé kes versíklu, nu ta odja ma es éra ‘kolaborador,’ ‘kel ki Kristu aprova,’ ‘irmon ki N krê txeu,’ ‘sérvu di Deus fiel,’ i ‘skravu’.

Modi ki un algen ta bira ‘skravu na Sinhor’? Kel-li ta kontise óras ki di livri vontadi el ta aji sima un skravu i el ta nega se kabésa. Jizus fla: ‘Si algen krê ser nha sigidor, el debe nega se kabésa, panha se staka di tortura i sigi-m sénpri.’ (Mateus 16:24) Un algen ta kumesa ta sigi Kristu óras ki el ta faze vontadi di Deus i el ta da se vida pa Deus. Dipôs el ta batiza i kel-li ta pô-l ta ten un bon amizadi ku Jeová. * Nton, ‘kaza na Sinhor’ krê fla kaza ku un algen ki dja mostra klaru ma el é krenti, un algen ki é ‘skravu di Deus i di Sinhor Jizus Kristu’. — Tiago 1:1.

Kes algen ki sta studa Bíblia ku Tistimunhas di Jeová i ki sta faze kel ki é dretu, meste ser elojiadu. Má, inda es ka da ses vida pa Jeová i nen es ka promete uza ses vida na sirvisu di Jeová. I inda es sta ta faze alguns mudansa. Antis di es pensa na kaza es meste faze kes mudansa na ses vida pa es pode bira un kriston batizadu.

Ta sérba bon un kriston namoraba un algen ki sta ta faze prugrésu na se studu di Bíblia, ku intenson pa spéra ti ki kel algen batiza pa el kaza ku el? Nau. Intenson di kel algen ki sta studa Bíblia pode fika konfuzu si el fika ta sabe ma kel kriston krê kaza ku el, má sô el ta kaza ku el dipôs ki el batiza.

Normalmenti un algen ta bira un publikador pa poku ténpu, i dipôs el ta batiza. Nton kel konsedju ki sta di riba, di kaza sô na Sinhor, é un bon konsedju. I si un algen dja tene idadi pa kaza, el kriadu na un família di Tistimunha di Jeová, i pa txeu ténpu el ta partisipa sénpri na atividadis di kongregason ma el é un publikador ki inda é ka batizadu? Na kel situason li, kuzê ki sta ta inpidi-l di batiza? Pamodi ki el sta ta izita? El tene algun dúvida? Kel algen li é ka un diskrenti, má nu ka pode pâpia di el sima ki el sta ‘na Sinhor.’

Konsedju ki apóstlu Polu da sobri kazamentu é pa nos ben. (Isaías 48:17) Óras ki kes dôs algen ki krê kaza dja da ses vida pa Jeová, ses kazamentu ta ten un bazi firmi na sentidu spritual. Es ta ten mésmu prinsípiu i mésmu obijetivu. I kel-la ta djuda-s ten un kazamentu filís. I tanbê si nu ‘kaza sô na Sinhor’ nu sta ta mostra lialdadi pa Jeová i kel-li ta da-nu benson pa tudu ténpu, pamodi ‘ku algen lial, [Jeová] ta aji ku lialdadi’. — Salmo 18:25.

[Nóta di rodapé]

 [Fotu na pájina 31]

‘Ku algen lial [Jeová] ta aji ku lialdadi’