Bangyufula ya Batangi

Na 2 Korinto 6:14, banani Polo ketubila ntangu yandi kesadila bangogo “bantu ya kukonda lukwikilu” (NW)?

Na 2 Korinto 6:14, beto ketanga nde: “Beno kwenda kuvukana ve ti [bantu ya kukonda lukwikilu, NW].” Kana beto tala baverse yina kele na ntwala ti na nima ya verse yai, yo kemonana pwelele nde Polo ketubila bantu yina kele ve na kati ya dibundu ya Bukristu. Baverse yankaka ya Biblia yina kemonisa mutindu Polo kusadilaka bangogo “muntu ya kukonda lukwikilu” to “bantu ya kukonda lukwikilu” kendimisa dibanza yai.

Mu mbandu, Polo kenganina Bakristu sambu bo vandaka kukwenda na tribinale na ntwala ya zuzi “yina kele mukristo ve [“muntu ya kukonda lukwikilu,” NW].” (1 Korinto 6:6) Awa, bantu yina kele Bakristu ve kele bazuzi yina vandaka kusambisa na tribinale ya Korinto. Na mukanda na yandi ya zole, Polo ketuba nde Satana mefwaka mayele ya bantu yina “ke kwikilaka ve.” “Lele” mefikaka meso ya bantu yai ya kukonda lukwikilu sambu bo mona ve nsangu ya mbote. Bantu yai ya kukonda lukwikilu memonisaka ve ata mpusa mosi ya kusadila Yehowa, sambu Polo kusonikaka ntete nde: “Lele yina yo lenda katuka, sambu yo ke katukaka konso ntangu ya muntu ke balulaka ntima” na Yehowa.​—2 Korinto 3:16; 4:4.

Bantu mingi ya kukonda lukwikilu kezitisaka ve nsiku to kesambilaka biteki. (2 Korinto 6:15, 16) Kansi, bo yonso ve keteleminaka bansadi ya Yehowa. Bankaka kesepelaka na kyeleka. Bamingi kele ti bankwelani yina kele Bakristu mpi bo kesepelaka na kuzinga ti bo. (1 Korinto 7:12-14; 10:27; 14:22-25; 1 Piere 3:1, 2) Kansi, mutindu beto mekatuka kutuba, Polo kesadila mbala na mbala bangogo “muntu ya kukonda lukwikilu” sambu na kutubila bantu yina kele ve na kati ya dibundu ya Bukristu, dibundu yina kele ti bantu ya ‘kendimaka [“kekwikilaka,” NW] na Mfumu.’​—Bisalu 2:41; 5:14; 8:12, 13.

Munsiku yina kele na 2 Korinto 6:14 kele mfunu mingi mpenza sambu na mambu yonso ya luzingu ya Bakristu mpi Biblia kevutukilaka yo mbala na mbala sambu yo kepesaka ndongisila ya mayele na Bakristu yina kesosa nkwelani. (Matayo 19:4-6) Mukristu yina mekudipesaka na Nzambi mpi mebakaka mbotika, kesosaka ve nkwelani na kati ya bantu yina kele ve Bakristu, sambu bikalulu, balukanu, mpi balukwikilu ya bantu yina ya kukonda lukwikilu kele ya kuswaswana mpenza ti yina ya Mukristu ya kyeleka.

Ebuna, inki beto lenda tuba sambu na bantu yina kelongukaka Biblia mpi kekwendaka na balukutakanu ya Bukristu? Inki beto lenda tuba sambu na bansamuni yina mebakaka ntete ve mbotika? Keti bo kele bantu ya kukonda lukwikilu? Ve. Bantu yina mendimaka kyeleka ya nsangu ya mbote mpi kesalaka ngolo sambu na kusosa kubaka mbotika, beto lenda binga bo ve nde bantu ya kukonda  lukwikilu. (Roma 10:10; 2 Korinto 4:13) Na ntwala ya kubaka mbotika, Biblia kubingaka Korneye nde yandi vandaka ‘na ntima ya kinzambi mpi yandi vandaka kusamba Nzambi.’​—Bisalu 10:2.

Sambu ndongisila ya ngolo ya Polo kupesaka na 2 Korinto 6:14 kemonana pwelele, keti yo tavanda mayele nde Mukristu yina mekudipesaka na Nzambi kundima kuvanda fianse ya muntu yina kele nsamuni ya mebakaka ntete ve mbotika? Ve, yo tavanda ve mayele. Sambu na inki? Sambu na ndongisila ya pwelele ya Polo kupesaka na Bakristu yina kuvandaka mifwidi. Polo kusonikaka nde: “Konso bakala yina ya yandi me zola, bakala yina lenda kwela yandi; kansi yo fweti vanda [kaka na Mfumu, NW].” (1 Korinto 7:39) Na kuwakana ti ndongisila yai, Biblia kesyamisa Bakristu na kusosa bankwelani kaka na kati ya bantu yina kele “na Mfumu.”

Inki kele ntendula ya bangogo “na Mfumu,” mpi ‘na Kristu’ yina kewakana ti yo? Polo ketubila bantu yina kuvandaka ‘na Kristu’ to “na Mfumu” na Roma 16:8-10 mpi na Kolosai 4:7. Kana nge tanga baverse yai, nge tamona nde bantu yai kele ‘bampangi na beto na kisalu,’ ‘bayina ya kemonikaka nde bo kele ngolo,’ ‘bampangi ya beto kezolaka,’ ‘bampangi ya beto lunga tula ntima,’ mpi bampika ‘yina beto kesalaka ti bo.’

Inki ntangu muntu kekumaka mpika yina ‘kesadilaka Mfumu’? Ntangu yandi kesalaka na luzolo yonso mambu yina mpika fwete sala mpi ntangu yandi kekudibuyaka. Yezu ketendula nde: “Kana muntu zola kwisa kulanda mono, yandi [fwete kudibuya, mpi kubaka nti na yandi ya mpasi, NW], yandi kwisa kulanda mono.” (Matayo 16:24) Muntu kebandaka na kulanda Kristu mpi kulemfuka mbotembote na Nzambi na ntangu yandi kekudipesaka na Nzambi. Na nima, yandi takudipesa sambu na kubaka mbotika mpi na kukota na ndonga ya baministre yina Yehowa Nzambi kendimaka. * Yo yina, ‘kukwela na Mfumu’ ketendula kukwela muntu yina ya memonisaka pwelele nde yandi kele Mukristu ya kyeleka, muntu ya mekudipesaka yina “ke sadilaka Nzambi ti Mfumu Yesu Kristo.”​—Yakobo 1:1.

Beto fwete sikisa muntu yina kelonguka Biblia ti Bambangi ya Yehowa mpi ya keyela mbote na kimpeve. Kansi, yandi mekudipesa ntete ve na Yehowa mpi na luzingu mosi ya kisalu mpi ya bibansa. Yandi ke na kusala ntete bansoba yina mefwana. Yandi fwete manisa na kusala bansoba yina kele mfunu sambu na kukuma Mukristu ya mekudipesa na Nzambi mpi ya mebaka mbotika na ntwala ya kuyindula na kusala nsoba yankaka ya nene na luzingu, mu mbandu, kusosa kukwela.

Keti yo tavanda mayele nde Mukristu kukuma fianse ya muntu yina kemonana nde yandi keyela mbote na kulonguka na yandi ya Biblia, mbala yankaka ti ngindu ya kukinga nde beno takwelana na ntangu yandi tabaka mbotika? Ve. Lukanu ya longoki ya Biblia takuma kisakasaka kana yandi kezaba nde Mukristu mosi ya mekudipesaka kezola kukwela yandi, kansi Mukristu yango kekinga nde bo takwelana tii kuna yandi tabaka mbotika.

Mbala mingi, muntu kevandaka nsamuni ya mebaka ntete ve mbotika kaka na mwa nsungi mosi ya nkufi, tii kuna ya yandi tayela mpi tabaka mbotika. Yo yina, ndongisila ya beto mekatuka kutadila ya kukwela kaka na Mfumu kele ya mayele mpenza. Ebuna, inki beto lenda tuba kana muntu kele ti bamvula ya kukwela, bo mesansaka yandi na dibuta ya Bakristu, yandi mesalaka mwa bamvula na dibundu, mpi ntangu yai yandi mekuma nsamuni ya mebaka ntete ve mbotika? Kana yo kele mpidina, inki kekangisaka yandi nzila na kudipesa na Yehowa? Sambu na nki yandi kekukaka ve na kubaka lukanu? Keti yandi kevandaka ti badute? Ata yandi kele ve muntu ya kukonda lukwikilu, beto lenda tuba ve nde yandi kele “na Mfumu.”

Ndongisila ya Polo kupesaka sambu na makwela kele sambu na mambote na beto. (Yezaya 48:17) Kana bantu zole yina mekudipesaka na Yehowa kezola kukwelana, lusilu ya makwela ya bo mepesana tavanda ti fondasio mosi ya ngolo na kimpeve. Bo kele ti bikalulu mpi balukanu ya mutindu mosi. Dyambu yai tasala nde makwela na bo kuvanda ya kyese. Dyaka, ‘kukwela na Mfumu’ kemonisaka kwikama yina muntu kevandaka na yo na Yehowa, mpi yo kenataka balusakumunu yina kezingaka mingi mpenza, sambu Yehowa “ke zolaka bantu yina ke zolaka” yandi.​—Nkunga 18:26.

[Noti na nsi ya lutiti]