Ciũria Kuuma Kũrĩ Athomi

Thĩinĩ wa 2 Akorintho 6:14, Paulo aaragia ũhoro wa andũ arĩkũ rĩrĩa aaugire andũ “matarĩ etĩkia”?

Tũthomaga ũũ thĩinĩ wa 2 Akorintho 6:14: “Mũtikohanio ũrĩa gũtagĩrĩire icoki-inĩ rĩmwe na andũ matarĩ etĩkia.” Tũngĩrora ciugo iria ithiũrũrũkĩirie mũhari ũcio, no tuone atĩ Paulo aaragia ũhoro wa andũ arĩa matakoragwo marĩ gĩcunjĩ gĩa kĩũngano gĩa Gĩkristiano. Ũndũ ũcio nĩ ũnyitĩtwo mbaru nĩ mĩhari ĩngĩ ya Bibilia ĩrĩa Paulo ahũthĩrĩte ciugo “mũndũ ũtarĩ mwĩtĩkia” kana “andũ matarĩ etĩkia.”

Kwa ngerekano, Paulo nĩ aaheire Akristiano mũkaana mũrũmu wĩgiĩ gũthiĩ igooti-inĩ “mbere ya andũ matarĩ etĩkia.” (1 Akorintho 6:6) Mũhari-inĩ ũcio, “andũ matarĩ etĩkia” nĩ arĩa maatuanagĩra ciira magooti-inĩ thĩinĩ wa Korintho. Thĩinĩ wa marũa ma kerĩ ma Paulo, aaugire atĩ Shaitani nĩ “atumumarĩtie meciria ma arĩa matetĩkĩtie.” Maitho ma andũ ta acio matetĩkĩtie, ‘mahumbĩrĩtwo na taama’ matikone ũhoro ũrĩa mwega. Andũ acio matetĩkĩtie mationanagia wendi wa gũtungatĩra Jehova, tondũ Paulo aambĩte kuuga atĩ “hĩndĩ ĩrĩa mũndũ agarũrũkĩra Jehova, taama ũcio nĩ weheragio.”—2 Akorintho 3:16; 4:4.

Andũ amwe matetĩkĩtie nĩ meingĩragia ngomanio-inĩ itagĩrĩire kana thĩinĩ wa uuni-watho. (2 Akorintho 6:15, 16) O na kũrĩ ũguo, ti othe makararagia ndungata cia Jehova. Amwe ao nĩ makenagio nĩ ũhoro wa ma. Aingĩ ao makoragwo mahikanĩtie na Akristiano na nĩ makenagĩra gũikarania nao. (1 Akorintho 7:12-14; 10:27; 14:22-25; 1 Petero 3:1, 2) O na kũrĩ ũguo, Paulo ahũthĩrĩte ciugo “mũndũ ũtarĩ mwĩtĩkia” kaingĩ akĩaria ũhoro wa andũ arĩa matakoragwo marĩ gĩcunjĩ gĩa kĩũngano gĩa Gĩkristiano, o ta ũrĩa hekũgwetetwo, kĩrĩa gĩkoragwo gĩthondeketwo nĩ “arĩa meetĩkagia Mwathani.”—Atũmwo 2:41; 5:14; 8:12, 13.

Ũtaaro ũrĩa ũrĩ thĩinĩ wa 2 Akorintho 6:14 nĩ wa bata mũno ũtũũro-inĩ wothe wa Akristiano, na nĩ ũhũthagĩrũo kaingĩ kũheana ũtaaro harĩ Akristiano arĩa maretha mũndũ wa kũhikania nake. (Mathayo 19:4-6) Mũkristiano wĩyamũrĩire Jehova na akabatithio, ahũthagĩra ũũgĩ na njĩra ya kwaga gwetha mũndũ wa kũhikania nake gatagatĩ-inĩ ka andũ arĩa matarĩ etĩkia, tondũ mĩtugo, mĩoroto, na mawĩtĩkio ma arĩa matarĩ etĩkia nĩ ngũrani mũno na ma Mũkristiano wa ma.

Ĩ nao andũ arĩa merutaga Bibilia na nĩ manyitanagĩra na kĩũngano gĩa Gĩkristiano? Ĩ ahunjia arĩa matarĩ abatithie? Hihi acio nĩ amwe a andũ arĩa matarĩ etĩkia? Aca. Andũ arĩa metĩkĩrĩte ũhoro wa ma na nĩ marerutanĩria gũkinyĩra kũbatithio, matiagĩrĩire gwĩtwo andũ matarĩ etĩkia. (Aroma 10:10; 2 Akorintho 4:13) Korinelio atanabatithio, eetagwo mũndũ wĩrutĩire na ‘weetigĩrĩte Ngai.’—Atũmwo 10:2.

Hihi no ũkorũo ũrĩ ũndũ wa ũũgĩ harĩ Mũkristiano wĩyamũrĩire Jehova kwambĩrĩria ũrata na kũhikania na mũhunjia ũtarĩ mũbatithie, atĩ tondũ ũtaaro wa Paulo ũrĩa ũrĩ thĩinĩ wa 2 Akorintho 6:14 ndũrahutia mũhunjia ũcio ũtarĩ mũbatithie? Aca, ũcio ti ũndũ wa ũũgĩ. Nĩ kĩĩ? Nĩ ũndũ wa ũtaaro wa ĩmwe kwa ĩmwe ũrĩa Paulo aaheire atumia Akristiano a ndigwa. Aandĩkire ũũ: “No ahikĩre mũndũ o wothe angĩenda, thĩinĩ wa Mwathani tu.” (1 Akorintho 7:39) Kũringana na ũtaaro ũcio, Akristiano arĩa meyamũrĩire Jehova mekĩragwo ngoro methe mũndũ wa kũhikania nake o “thĩinĩ wa Mwathani tu.”

Ciugo “thĩinĩ wa Mwathani” na “thĩinĩ wa Kristo” ciugĩte atĩa? Paulo nĩ arĩtie ũhoro wa andũ arĩa marĩ “thĩinĩ wa Mwathani” kana “thĩinĩ wa Kristo” thĩinĩ wa Aroma 16:8-10 na Akolosai 4:7. Ũngĩthoma mĩhari ĩyo, nĩ ũkuona atĩ andũ ta acio ‘marutithanagia wĩra hamwe,’ ‘magetĩkĩrĩka,’ ‘makendwo,’ ‘magatungata marĩ na wĩhokeku,’ na ‘nĩ ndungata.’

Mũndũ atuĩkaga ‘ndungata thĩinĩ wa Mwathani’ rĩ? Atuĩkaga rĩrĩa eka ũrĩa ndungata yagĩrĩirũo nĩ gwĩka ĩyendeire na erega nĩguo atuĩke mũrũmĩrĩri wa Jesu. Jesu aatarĩirie ũũ: “Mũndũ o wothe angĩenda kũnũmĩrĩra, nĩ erege na oe mũtĩ wake wa kũnyarirĩrũo na anũmagĩrĩre.” (Mathayo 16:24) Mũndũ ambagĩrĩria kũrũmĩrĩra Kristo na gwĩka wendi wa Ngai biũ rĩrĩa eyamũrĩra Ngai. Thutha ũcio, akabatithio na agatuĩka ndungata ĩrĩ na mũrũgamo mwega mbere ya Jehova Ngai. * Kwoguo no tuuge atĩ, kũhikania kana ‘kũhika thĩinĩ wa Mwathani tu,’ nĩ kũhikania na mũndũ wonanĩtie biũ atĩ nĩ mwĩtĩkia, wĩyamũrĩire Jehova, na nĩ “ngombo ya Ngai na ya Mwathani Jesu Kristo.”—Jakubu 1:1.

Mũndũ ũreruta Bibilia na Aira a Jehova, na nĩ arerutanĩria gũkũra kĩĩroho nĩ areka ũndũ mwega. O na kũrĩ ũguo, ndarĩ areyamũrĩra Jehova na akambĩrĩria gũtũũra ũtũũro wa kũmũtungatĩra na kwĩima. No arathiĩ na mbere gwĩka mogarũrũku marĩa marabatarania. Arabatara kwamba kũrĩkia gwĩka mogarũrũku macio nĩguo atuĩke Mũkristiano wĩyamũrĩire Jehova na abatithio, ataneciria gwĩka ũgarũrũku ũngĩ mũnene ũtũũro-inĩ, ta wa kũingĩra thĩinĩ wa kĩhiko.

Hihi no ũkorũo ũrĩ ũndũ wa ũũgĩ harĩ Mũkristiano kwambĩrĩria ũrata na mũrutwo wa Bibilia ũrerutanĩria gũkũũra kĩĩroho, hihi akabanga kũmweterera ambe abatithio nĩguo amũhikĩre? Aca. Mũrutwo ũcio wa Bibilia no akorũo akĩruta arĩ na muoroto mũũru angĩmenya atĩ harĩ Mũkristiano wĩyamũrĩire Jehova ũrenda kũmũhikĩra, no etereire ambe abatithio.

Kaingĩ, mũndũ aikaraga arĩ mũhunjia ũtarĩ mũbatithie o gwa kahinda kanini, nginya akũre kĩĩroho ũndũ ekwagĩrĩra kũbatithio. Kwoguo ũtaaro ũcio wa kũhikania na mũndũ ũrĩ thĩinĩ wa Mwathani tu nĩ wa bata. Ĩ angĩkorũo mũndũ nĩ akinyĩtie mĩaka ya kũingĩra thĩinĩ wa kĩhiko, arereirũo famĩlĩ-inĩ ya Aira a Jehova, nĩ akoretwo na kĩyo thĩinĩ wa kĩũngano kwa ihinda rĩa mĩaka ĩigana ũna, na atungataga arĩ mũhunjia ũtarĩ mũbatithie? Angĩkorũo nĩguo-rĩ, nĩ kĩĩ kĩgirĩtie akorũo eyamũrĩire Jehova? Arahũthĩrĩria nĩkĩ? Hihi arĩ na nganja? O na gũtuĩka ti mũndũ ũtarĩ mwĩtĩkia, ndangĩrũo atĩ nĩ mũndũ ũrĩ “thĩinĩ wa Mwathani.”

Ũtaaro ũcio wa Paulo wĩgiĩ kĩhiko nĩ wa gũtũguna. (Isaia 48:17) Rĩrĩa andũ erĩ marenda kũhikania makorũo meyamũrĩire Jehova, ũrata wao thĩinĩ wa kĩhiko, ũkoragwo na mũthingi mũrũmu. Makoragwo na mĩtugo na mĩoroto ĩhaanaine. Ũndũ ũcio nĩ ũtũmaga makorũo na kĩhiko kĩrĩ na gĩkeno. Rĩrĩa mũndũ ahikania kana ‘ahika thĩinĩ wa Mwathani tu,’ onanagia atĩ nĩ mwĩhokeku harĩ Jehova, na ũndũ ũcio nĩ ũmũrehagĩra irathimo cia gũtũũra, tondũ ‘harĩ mũndũ mwĩhokeku, Jehova akoragwo arĩ mwĩhokeku.’—Thaburi 18:25.

[Kohoro ka magũrũ-inĩ]

 

“Harĩ mũndũ mwĩhokeku, wee [Jehova] ũkoragwo ũrĩ mwĩhokeku”