Хығырығҷыларның сурығлары

2 Коринфтегілерге 6:14-те Павел кемні «киртініс чохтар» тіп адапча?

2 Коринфтегілерге 6:14-те піс хығырчабыс: «Киртініс чохтарнаң пір кӧлігде чӧрбеңер». Контекстті кӧрзе, Павел пу сӧснең христианскай ӧменің чардығы полбинчатхан кізілердеңер чоохтапчатханы кӧрін парча. Павел пасха даа библейскай стихтарда «киртініс чох» паза «киртініс чохтар» тіп сӧстернең тузаланча. Олар ідӧк пу сағысты киречілепчелер.

Кӧзідімге, Павел христианнарны «киртініс чохтарзар» чарғаа парчатхан ӱчӱн хырысхан (1 Коринфтегілерге 6:6). Пу стихтағы «киртініс чохтар» — Коринфтегі чарғының чарғыҷылары. Коринфтегілерге ікінҷі пічиинде Павел Сайтан киртініс чохтарның сағыстарын харасхыда тутча тіп пасча. Оларның харахтарында чахсы хабарны олардаң чазырчатхан сӱбӱрек чатчатханға тӧӧй. Хайди Павел чарыда чоохтапча, олар Иеговазар айланған ползалар, ол сӱбӱрек оларның харахтарынаң хыйа алыларҷых. Че киртініс чохтар Худайзар айланарға хынминчалар (2 Коринфтегілерге 3:16; 4:4).

Пірее киртініс чохтар сайбағлар итчелер паза чой худайларға пазырчалар (2 Коринфтегілерге 6:15, 16). Андағ даа полза, оларның прайлары Иегованың нымысчыларына тоғырланминчалар. Піреелері чахсы хабарны истерге хынчалар. Оларның санынаң кӧп кізі христианнарнаң пір хоныхта ӧрініснең чуртапчалар (1 Коринфтегілерге 7:12—14; 10:27; 14:22—25; 1 Петрның 3:1, 2). Че Павел «киртініс чох» сӧснең сыбыра христианнарның ӧмезінің чардығы полбинчатхан кізілердеңер чоохтапча. Христианнарның ӧмезіндегілерні «Хан Худайға киртінчеткеннер» тіп адапча (Илҷілернің 2:41; 5:14; 8:12, 13).

2 Коринфтегілерге 6:14-гі принцип христианнарға чуртастың прай сариларында аарлығ устағ полча. Хоных хонарға кізі таллапчатхан христианнарға пу принцип уғаа хыйға чӧп полча (Матфей 19:4—6). Чуртастарын Худайға пирін салған паза кіреске тӱскен христианнар постарына ирні алай ипчіні «киртініс чохтарның» аразында тілебинчелер. Оларның киртіністері, кӧстеглері паза чуртаста аарлыға санапчатхан нимелері саңай пасхалар.

Библияны ӱгренчеткен паза христианскай чыылығларға чӧрчеткен кізілердеңер ниме тирге чарир? Кіреске тӱспеен искірігҷілер чи? Олар киртініс чох кізілернің санындалар ба? Чох. Чахсы хабарның сынына киртініп, кіреске тӱзерге кӱстенчеткен кізілерні «киртініс чохтар» тіп адирға чарабас (Римдегілерге 10:10; 2 Коринфтегілерге 4:13). Корнилий кіреске тӱзер алнындох, «Худайны аарлаачы паза Аннаң чалтанаачы» кізі тіп адалған (Илҷілернің 10:2).

Кіреске тӱскен христианнар кіреске тӱскелек искірігҷілернең, хоных хонар ӱчӱн, таныс чӧрчетселер, хыйға полар ба? Чох, андағ тудыныс хыйға нимес. Ноға? Павел чалғыс-чарым халған христиан-ипчее мындағ кӧні чӧп пирген: «Ирі ӱреп парза, тізең, кемге хынза, ағаа парарға чарапча, итсе, Хан-пигдегі кізее» (1 Коринфтегілерге 7:39). Павелнің пу сӧстері хоостыра, кіреске тӱскен христианнарға «Хан-пигдегі кізінең» не хоных хонарға чарир.

«Хан-пигде» паза «Христоста» теені нимені таныхтапча? Римдегілерге 16:8—10-да паза Колосстағыларға 4:7-де Павел «Хан-пигде» алай «Христоста» чуртапчатханнардаңар пасча. Хайди ол стихтардаң кӧрінче, Павел ол кізілерні «Христосха піснең хада тоғынчатхан», «Христостың сын кізізі», «хынған харындастар», «сын нымысчылар паза хабасчылар» тіп адапча.

Хаҷан кізі Хан-пигнің нымысчызы пол парча? Позынаңар ундут салып, нымысчыдаң киректелчеткен нимелерні прай чӱрекнең итчетсе. Иисус піди чарыда чоохтапча: «Кем Минің соомҷа парарға итче, ол позынаңар ундут салзын, кірезін алып, Минің соомҷа парзын» (Матфей 16:24). Кізі, чуртазын Худайға пир салза, Христостың соонҷа пар сыхча паза позын пӱкӱлее Худайның холына пир салча. Аның соонда, ол, кіреске тӱзіп алып, Худайның кӧңніне кірчеткен нымысчы пол парча a. «Хан-пигдегі» кізі кемдір ол? Позының киртінізін іле кӧзіт пирген паза, кіреске тӱзіп алып, «Худайның паза Хан-пигібіс Иисус Христостың хулы» пол парған кізі. Андағ кізінең хоных хонғаны «Хан-пигдегі» кізінең хоных хонғаны полча (Иаковтың 1:1).

Иегованың киречілерінең хада, Библия ӱгреніп, духовнай маңнаныстар итчеткен кізілерні махтирға чарир. Че олар ам даа чуртастарын Иеговаа пир салып, прай чӱрекнең ағаа нымысчыланминчалар. Олар ам даа кирек алызығлар итчелер. Хоных хонар алнында, оларға Худайға чуртастарын пир салған, кіреске тӱскен христианнар полып аларға кирек. Анзы чуртаста иң аарлығ алтым.

Христианиннің, Библия ӱгреніп, духовнай саринаң ӧсчеткен кізінең, ол кізі кіреске тӱскен соонда, хоных хон саларбыс тіп, таныс чӧргені саба полар. Библия ӱгренчеткен кізі, анзын піл салза, саба кӧстегнең кіреске тӱзерге айабас.

Кӧбізін, кіреске тӱскелек искірігҷілер ӱр ниместең кіреске тӱсчелер, аннаңар Хан-пигде хоных хонарға киректепчеткен чахығ тың аар чахығ нимес. Христианскай сӧбіреде ӧскен, ӧменің чуртазында кӧп чыллар ӧткін айғасчатхан, че кіреске тӱскелек искірігҷі хоных хонар тусха чит парған полза чи? Андағ кізее чуртазын Иеговаа пир саларға ниме харығ полча? Ноға ол андағ алтымны идерге туртухча? Аның ікінҷілестер пар ба? Андағ кізіні киртініс чох кізі тіп полбас, че аны Хан-пигде чӧрчеткен кізі дее тіп полбас.

Павел илҷінің хоныхтаңар пирген чӧбі піске туза полча (Исайя 48:17). Хоных хонарға сағынчатхан ікі кізі, хоных хонар алнында, кіреске тӱзіп алза, оларның хонығы пик духовнай тӧстегде тӧстелер. Олар чуртас чолынҷа аннаң андар пір кӧрістіг паза пір кӧстегліг парарлар. Анзы хоныхта часкалығ поларға полысча. Ағаа хоза, Хан-пигде хоных хончатхан кізілер Иеговаа киртістіг полчатханнарын кӧзітчелер. Иегова, тізең, киртістіг кізее киртістіг полча, аннаңар анзы мӧгі алғастарға ағылча (Псалом 18:25).

[Сноска]

[Хоос]

Киртістіг кізее Иегова киртістіг.