وقىرمانداردىڭ ساۋالدارى
وقىرمانداردىڭ ساۋالدارى
2 قورىنتتىقتارعا 6:14 تە پاۋىل ‹سەنبەيتىندەر› دەگەن ٴسوزدى كىمگە قاتىستىرىپ ايتقان؟
2 قورىنتتىقتارعا 6:14 تە (سىلتەمەدە) بىلاي دەپ وقيمىز: «سەنبەيتىندەرمەن بىرگە «ٴبىر قامىتتى كيمەڭدەر». ەگەر كونتەكسكە قارايتىن بولساق، پاۋىلدىڭ ماسىحشىلەر قاۋىمىنا جاتپايتىن ادامدار جايىندا ايتىپ تۇرعانى انىق كورىنەدى. بۇل پاۋىلدىڭ «سەنبەيتىن» نەمەسە «سەنبەيتىندەر» دەگەن سوزدەردى قولدانعان باسقا تارماقتاردان دا كورىنەدى.
مىسالى، پاۋىل ماسىحشىلەرگە «سەنبەيتىندەردىڭ سوتىنا» جۇگىنگەندەرى ٷشىن قاتاڭ سوگىس بەرگەن (1 قورىنتتىقتارعا 6:6). بۇل جەردە سەنبەيتىندەر دەپ قورىنت قالاسىنىڭ سوتىنداعى سۋديالاردى ايتىپ تۇر. پاۋىل ٶزىنىڭ ەكىنشى حاتىندا شايتان سەنبەيتىندەردىڭ سانالارىن ‹سوقىر قىلىپ قويعانىن› ايتقان. مۇنداي سەنبەيتىندەردىڭ كوزدەرىن ىزگى حاباردى كورمەيتىندەي ەتىپ «پەردە» جاۋىپ تۇر. پاۋىل بۇرىنىراقتا تۇسىندىرگەندەي، ‹يەمىزگە بەت بۇرعاندا «پەردە» الىنىپ تاستالار› ەدى، ٴبىراق سەنبەيتىندەردىڭ ٸس-ارەكەتتەرىنەن ولاردىڭ ەحوباعا قىزمەت ەتكىسى كەلمەيتىندىكتەرى كورىنەدى (2 قورىنتتىقتارعا 3:16؛ 4:4).
سەنبەيتىندەردىڭ كەيبىرەۋلەرى زاڭسىزدىق پەن پۇتقا تابىنۋمەن اينالىسادى (2 قورىنتتىقتارعا 6:15، 16). الايدا ولاردىڭ بارلىعى دا ەحوبانىڭ قىزمەتشىلەرىنە قارسىلىق كورسەتە بەرمەيدى. كەيبىرەۋلەرى شىندىققا قىزىعۋشىلىق بىلدىرەدى. كوبىسىنىڭ جارى ٴماسىحشى جانە ولار بىرگە تۇرا بەرۋگە دايىن (1 قورىنتتىقتارعا 7:12—14؛ 10:27؛ 14:22—25؛ 1 پەتىر 3:1، 2). دەگەنمەن پاۋىل ادەتتە «سەنبەيتىندەر» دەگەن ٴسوزدى جوعارىدا ايتىلىپ كەتكەندەي، ‹يەمىزدىڭ قاۋىمىنىڭ› مۇشەسى بولىپ تابىلاتىن ماسىحشىلەردىڭ قاتارىنا جاتپايتىندارعا قاتىستى قولدانعان (ەلشىلەردىڭ ىستەرى 2:41؛ 5:14؛ 8:12، 13).
2 قورىنتتىقتارعا 6:14 تە جازىلعان پرينسيپ ماسىحشىلەر ٷشىن ٶمىردىڭ بارلىق سالاسىندا ماڭىزدى جانە ٴجيى وزىنە جار ىزدەپ جۇرگەن ماسىحشىلەر ٷشىن دانا كەڭەس رەتىندە كەلتىرىلەدى (ماتاي 19:4—6). ٶمىرىن قۇدايعا باعىشتاعان، شومىلدىرۋ راسىمىنەن وتكەن ٴماسىحشى دانالىق تانىتىپ، قۇلىقتىلىق نورمالارى، ماقساتتارى جانە نانىمدارى شىنايى ماسىحشىلەردەن مۇلدەم وزگەشە سەنبەيتىندەردىڭ اراسىنان وزىنە جار ىزدەمەيدى.
ٴبىراق كيەلى كىتاپتى زەرتتەپ، ماسىحشىلەردىڭ قاۋىمدارىنا كەلىپ جۇرگەندەر جايلى نە دەۋگە بولادى؟ شومىلدىرىلماعان جاريالاۋشىلار تۋرالى شە؟ ولاردى سەنبەيتىندەر دەۋگە بولا ما؟ جوق. ىزگى حاباردىڭ شىندىعىن قابىلداپ، رۋحاني ٶسىپ، شومىلدىرۋ راسىمىنەن ٶتۋ ٷشىن تالاپتانىپ جۇرگەندەردى سەنبەيتىندەر دەۋ دۇرىس ەمەس (ريمدىكتەرگە 10:10؛ 2 قورىنتتىقتارعا 4:13). شومىلدىرۋ راسىمىنەن وتپەي تۇرىپ-اق كورنەل «شىن جۇرەكتەن قۇدايدى قاستەرلەيتىن» ادام دەپ اتالعان (ەلشىلەردىڭ ىستەرى 10:2).
ولاي بولسا، پاۋىلدىڭ 2 قورىنتتىقتارعا 6:14 تە جازىلعان كەڭەسى ٴدال بۇل جاعدايعا كەلمەيتىندىكتەن، ٶزىن قۇدايعا باعىشتاعان ماسىحشىلەردىڭ شومىلدىرۋ راسىمىنەن وتپەگەن جاريالاۋشىلارمەن جاقىن قارىم-قاتىناس دامىتىپ، ۇيلەنگەندەرى دانالىققا جاتا ما؟ جوق، بۇل دانالىققا جاتپايدى. نەگە؟ سەبەبى پاۋىلدىڭ جەسىر قالعان ماسىحشىلەرگە ارنالعان كەڭەسى بار. ول: «كىمگە تيەم دەسە دە ٶز ەركى، تەك ەكەۋى دە يەمىزبەن تىعىز بايلانىستا تۇرسىن»،— دەپ جازعان (1 قورىنتتىقتارعا 7:39). وسى تارماقتا ٶمىرىن قۇدايعا باعىشتاعان ماسىحشىلەرگە وزدەرىنە جاردى تەك قانا ‹يەمىزبەن تىعىز بايلانىستا تۇرعانداردىڭ› اراسىنان ىزدەۋگە كەڭەس بەرىلەدى.
«يەمىزبەن تىعىز بايلانىستا» دەگەن تىركەس نەنى بىلدىرەدى؟ پاۋىل ريمدىكتەرگە 16:8—10 دا جانە قولوستىقتارعا 4:7 دە وسىنداي ماسىحشىلەر جايلى ايتقان. بۇل تارماقتاردى وقىساق، بۇلار ‹ٴماسىحتىڭ قىزمەتىندەگى ارىپتەستەر›، ‹سەنىمى دالەلدەنگەندەر›، ‹سۇيىكتى باۋىرلاستار›، ‹ادال كومەكشىلەر› ٵرى ‹يەمىزگە بىرگە قىزمەت ەتۋشىلەر› ەكەنىن كورەمىز.
قاشان ادام «يەمىزگە بىرگە قىزمەت ەتۋشى» بولادى؟ بۇل ول ٶز ەركىمەن ٶمىر سۇرۋدەن باس تارتىپ، قۇل سياقتى ارەكەت ەتۋگە دايىن بولعاندا بولادى. يسا: «ماعان ەرىپ شاكىرتىم بولعىسى كەلگەن اركىم ٶز ەركى بويىنشا ٶمىر ٴسۇرۋىن قويسىن، ٵرى ايقىشىن ارقالاعان كىسىدەي ازاپتى ولىمگە دايىن بولىپ مەنىڭ جولىممەن ٴجۇرسىن!» — دەپ تۇسىندىرەدى (ماتاي 16:24). ٶمىرىن قۇدايعا باعىشتاعان كەزدە، ادام ٶزىن-ٶزى تولىعىمەن قۇدايدىڭ ەركىن ورىنداۋعا باعىندىرىپ، ٴماسىحتىڭ ىزىمەن ٴجۇرۋدى باستايدى. بۇدان سوڭ ول شومىلدىرۋ راسىمىنەن ٶتىپ، قۇقىلى تۇردە ەحوبا قۇدايدىڭ ماقۇلداۋىنا يە بولعان قىزمەتشىسى بولادى a. ولاي بولسا، ‹يەمىزبەن تىعىز بايلانىستاعى› ادامعا ۇيلەنۋ دەگەن قۇدايعا شىن سەنەتىنىن كورسەتكەن، ٶزىن «قۇدايدىڭ جانە يەمىز ٴماسىحتىڭ باسىبايلى قىزمەتشىسى» بولۋعا باعىشتاعان ادامعا ۇيلەنۋدى بىلدىرەدى (جاقىپ 1:1).
ەحوبا كۋاگەرلەرىمەن كيەلى كىتاپتى زەرتتەپ، رۋحاني جەتىستىكتەرگە جەتىپ جاتقان ادام ماقتاۋعا لايىق. ٴبىراق ول ٵلى ٶزىن ەحوباعا باعىشتاعان جوق جانە جانقيارلىقپەن قىزمەت ەتۋ جولىنا تۇسكەن جوق. ول قاجەتتى وزگەرىستەردى ەندى جاساپ جاتىر. ومىرىندە ۇيلەنۋ سياقتى ۇلكەن وزگەرىس جاساۋدى ويلانباس بۇرىن، ول باعىشتالۋ جانە شومىلدىرۋ راسىمىنەن ٶتۋ ٴتارىزدى ودان دا ماڭىزدى وزگەرىس جاساۋى كەرەك.
ٴماسىحشىنىڭ كيەلى كىتاپتى زەرتتەپ، جاقسى جەتىستىكتەرگە جەتىپ جاتقان سياقتى كورىنگەن ادامعا، مۇمكىن شومىلدىرۋ راسىمىنەن وتكەن سوڭ، ۇيلەنۋ نيەتىمەن جاقىن قارىم-قاتىناس دامىتۋ دانالىققا جاتا ما؟ جوق. ٶمىرىن قۇدايعا باعىشتاعان ٴماسىحشىنىڭ وزىنە ۇيلەنگىسى كەلەتىنىن، ٴبىراق شومىلدىرۋ راسىمىنەن وتپەيىنشە ۇيلەنبەيتىنىن تۇسىنسە، كيەلى كىتاپتى زەرتتەپ جۇرگەن ادامنىڭ نيەتى بۇزىلا باستاۋى مۇمكىن.
ادەتتە ادام شومىلدىرۋ راسىمىنەن وتپەگەن جاريالاۋشى بولىپ ۇزاق ۋاقىت جۇرە بەرمەيدى. سوندىقتان تەك يەمىزبەن تىعىز بايلانىستاعى اداممەن نەكە قۇرۋ قول جەتپەيتىن نارسە ەمەس. ال ۇيلەنەتىن جاسقا جەتكەن، ٴماسىحشى وتباسىندا وسكەن جانە كوپ جىلدان بەرى قاۋىم ىستەرىنە بەلسەندى اتسالىسىپ جۇرگەن، ٴبىراق شومىلدىرۋ راسىمىنەن وتپەگەن جاريالاۋشى جايىندا نە دەۋگە بولادى؟ مۇنداي جاعداي بولسا، وعان ٶمىرىن ەحوباعا باعىشتاۋعا نە كەدەرگى بولىپ ٴجۇر؟ ول نەگە كىدىرەدى؟ ونىڭ كۇمانداناتىن نارسەلەرى بار ما؟ ول قۇدايعا سەنبەيتىن بولىپ ەسەپتەلمەگەنىمەن، «يەمىزبەن تىعىز بايلانىستا» تۇرعان ادام دا ەمەس.
پاۋىلدىڭ ۇيلەنۋگە قاتىستى بەرگەن كەڭەسى ٴبىزدىڭ پايدامىز ٷشىن بەرىلگەن (يشايا 48:17). بولاشاق جۇبايلار ومىرلەرىن ەحوباعا باعىشتاعان بولسا، ولاردىڭ نەكەلەرىنىڭ بەرىك رۋحاني نەگىزى بولادى. ولاردىڭ باعالايتىن نارسەلەرى دە، ماقساتتارى دا ٴبىر بولادى. بۇل نەكەنىڭ باقىتتى بولۋىنا ەداۋىر سەپتىگىن تيگىزەدى. ونىڭ ۇستىنە، ‹يەمىزبەن تىعىز بايلانىستا تۇرعان› ادامعا ۇيلەنگەندە، ٴماسىحشى ەحوباعا دەگەن ادالدىعىن كورسەتەدى جانە ماڭگىلىك باتاعا يە بولادى، سەبەبى ‹شەكسىز بەرىلگەن ادامعا [ەحوبا دا] شەكسىز بەرىلگەندىگىن كورسەتەدى› (زابۋر 18:25، جد [17:26]).
[سىلتەمە]
a پاۋىل حاتىن العاش جولداعان مايلانعان ماسىحشىلەر ٷشىن «يەمىزگە بىرگە قىزمەت ەتۋشى» بولۋ، سونىمەن قاتار قۇدايدىڭ ۇلدارى جانە ٴماسىحتىڭ باۋىرلارى رەتىندە مايلانۋدى بىلدىرەدى.
[31-بەتتەگى سۋرەت]
شەكسىز بەرىلگەن ادامعا ەحوبا دا شەكسىز بەرىلگەندىگىن كورسەتەدى›