Nkonko ya babadi

Mbanganyi badi Paulo ubikila ne: “badi kabayi bena kuitabuja” mu 2 Kolinto 6:14?

Tudi tubala mu 2 Kolinto 6:14 ne: “Kanudisangishi ne bantu badi kabayi bena kuitabuja.” (MML) Tuetu batangile bimpe tshidiye wakuila muaba eu, bidi bimueneka patoke ne: Paulo udi wakula bua bantu badi kabayi mu tshisumbu tshia bena Kristo. Ngumvuilu eu udi upetangana ne mvese mikuabu ya mu Bible mudi Paulo utela miaku eyi “udi kayi muena kuitabuja” anyi “badi kabayi bena kuitabuja.”

Tshilejilu, Paulo udi utandisha bena Kristo bua mudibu bafundangana ku tubadi “kumpala kua badi kabayi bena kuitabuja.” (1 Kolinto 6:6, MML) Badi kabayi bena kuitabuja badibu bakuila muaba eu mbantu badi balumbuluisha ku tubadi tua mu Kolinto. Mu mukanda wende muibidi, Paulo udi wamba ne: Satana ‘wakafofomeja mêsu a meji a badi kabayi bitabuja.’ Mêsu a badi kabayi bitabuja aba mmabuikila ‘tshilulu’ bua kabumvu lumu luimpe. Bantu aba badi kabayi bena kuitabuja ki mbalejaku dijinga nansha dikese dia kuenzela Yehowa mudimu to, bualu Paulo ukavua mumvuije kumpala ne: ‘Biakudimuka mitshima yabu kudi [Yehowa], tshilulu tshikudika tshidi tshiumushibua.’​—2 Kolinto 3:16; 4:4.

Bamue bantu badi kabayi bena kuitabuja mbaditue mu dishipa dia mikenji anyi dikukuila dia mpingu. (2 Kolinto 6:15, 16) Kadi ki mbonso batu babenga basadidi ba Yehowa to. Bamue batu basankidila bulelela. Ba bungi badi ne balume anyi bakaji bena Kristo ne batu basanka bua kusomba nabu mu dibaka. (1 Kolinto 7:12-14; 10:27; 14:22-25; 1 Petelo 3:1, 2) Kadi, misangu ya bungi Paulo udi utela miaku eyi ‘udi kayi muena kuitabuja’ bua kuakula bua bantu badi kabayi mu tshisumbu tshia bena Kristo tshienza ne ‘bena kuitabuja mu Mukalenge,’ anu mutudi baleje kulu eku.​—Bienzedi 2:41; 5:14; 8:12, 13.

Dîyi didi mu 2 Kolinto 6:14 didi dilombola bena Kristo mu nsombelu yonso ne batu badiangata misangu ya bungi bu mubelu wa meji bua bena Kristo badi bakeba muntu wa kuselangana nende. (Matayo 19:4-6) Ki mbia meji padi muena Kristo muditshipe ne mutambule ukeba wa kuselangana nende munkatshi mua bantu badi kabayi bena kuitabuja nansha, bualu malu adi bantu badi kabayi bena kuitabuja balonda, bipatshila biabu ne mayisha abu mbishilangane bikole ne bia bena Kristo balelela.

Kadi netuambe tshinyi bua bantu badi balonga Bible ne babuela mu bisangilu bia tshisumbu tshia bena Kristo? Bidi munyi bua aba badi bamanyishi ba lumu luimpe kabayi banji kutambula? Mbantu badi kabayi bena kuitabuja anyi? Tòo. Katuena mua kubikila bantu badi bitabe bulelela bua lumu luimpe ne badi benda badiunda ku kakese ku kakese batangile ku batismo bu badi kabayi bena kuitabuja to. (Lomo 10:10; 2 Kolinto 4:13) Kumpala kua Kônelio kutambulaye, bakavua bamubikila ne: “mutendeledi muakane, wakadi utshina Nzambi.”​—Bienzedi 10:2.

Nanku mbia meji bua muena Kristo mutambule kutantshilaye anyi kuselanganaye ne muntu udibu banyishile bua kuikala mumanyishi wa lumu luimpe udi kayi muanji kutambula, bualu patudi tuangata mu buondoke mubelu wa Paulo udi mu 2 Kolinto 6:14 kawena umutangila anyi? Tòo, abi ki mbia meji to. Bua tshinyi? Bualu bua mubelu wa Paulo uvua utangila bena Kristo bavua bakaji bakamba. Paulo wakafunda ne: ‘Udi mumanye mua kuya ku dibaka kudiye musue, kadi anu mu Mukalenge.’ (1 Kolinto 7:39) Bilondeshile mêyi aa, badi babela bena Kristo batambule bua kukeba muntu wa kuselangana nende anu munkatshi mua aba badi ‘mu Mukalenge.’

Kadi miaku eyi ‘mu Mukalenge’ anyi ‘mu Kristo’ idi yumvuija tshinyi? Mu Lomo 16:8-10 ne Kolosai 4:7,  Paulo udi wakula bua bantu bavua ‘mu Kristo’ anyi ‘mu Mukalenge.’ Wewe mubale mvese eyi neumone ne: bantu aba badi ‘benzejanganyi ba mudimu,’ ‘bamane kutetshibua,’ ‘bananga,’ ‘bena mudimu ba lulamatu,’ ne ‘bapika [ne Paulo].’

Kadi ndîba kayi didi muntu ulua ‘mupika mu Mukalenge’? Muntu udi ulua mupika mu Mukalenge padiye wenza ku budisuile buonso malu adi mupika ne bua kuenza ne udipidia. Yezu udi umvuija ne: ‘Biasua muntu kundonda, adipidie, ambule mutshi wende wa makenga, andonde.’ (Matayo 16:24) Muntu udi utuadija kulonda Kristo ne wenza disua dia Nzambi ne muoyo mujima padiye udilambula kudi Nzambi. Pashishe udi witaba bua kutambula ne kulua muena mudimu muanyishibue ku mêsu kua Yehowa Nzambi. * Nenku, ‘kusela mu Mukalenge’ kudi kumvuija kusela muntu ukadi muleje patoke ne: udi muena kuitabuja muditshipe bulelela: ‘mupika wa Nzambi ne wa Mukalenge Yezu Kristo.’​—Yakobo 1:1.

Muntu udi ulonga Bible ne Bantemu ba Yehowa ne udi udiunda bimpe mu nyuma ngua kuela kalumbandi. Kadi ki mmuanji kudilambula kudi Yehowa ne muditue mu nsombelu wa dimuenzela mudimu ne didifila nansha. Utshidi ne bua kushintulula malu adi akengedibua. Udi ne bua kushintulula malu manene adi atangila dilua muena Kristo muditshipe ne mutambule kumpala kua kutangila bualu bukuabu budi bushintulula nsombelu wende bu mudi bua dibaka.

Nebikale bimpe bua muena Kristo kuseselangana ne muntu udi umueneka ulonga Bible bimpe, pamu’apa ne lungenyi lua kuindila too ne padiye utambula bua kulua kuselanganaye nende anyi? Tòo. Bipatshila bia mulongi wa Bible eu bidi mua kulua kukondakana padiye umanya ne: muena Kristo mudilambule mmusue bua kuselanganabu nende, kadi neindile anu padiye utambula.

Pa tshibidilu, muntu utu wenza mudimu bu mumanyishi udi kayi muanji kutambula munkatshi mua tshikondo tshîpi, too ne padiye udiunda mutangile ku batismo. Ke bua tshinyi mubelu udi kulu eku wa kusela anu mu Mukalenge mmubelu wa meji. Kadi netuambe tshinyi bua diseselangana ne muntu ukadi mukumbaje bidimu bia kubuela mu dibaka, mukolele mu dîku dia bena Kristo, muikale ne tshisumi munkatshi mua bidimu bia bungi, kadi muikale mumanyishi udi kayi muanji kutambula? Bikala bualu mushindu’au, ntshinyi tshidi tshimupangishe bua kulambula muoyo wende kudi Yehowa? Bua tshinyi udi ne mioyo ibidi? Udi ne dielakana anyi? Nansha mudiye kayi munkatshi mua badi kabayi bena kuitabuja, katuena mua kuamba ne: udi ‘mu Mukalenge’ to.

Mubelu eu udi Paulo ufila bua dibaka udi bua diakalenga dietu. (Yeshaya 48:17) Padi aba badi bakeba kuselangana bamane kudilambula kudi Yehowa, mutshipu wabu wa dibaka udi ne tshishimikidi tshia mu nyuma tshikole. Badi balonda mêyi a muomumue ne badi ne bipatshila bia muomumue. Malu aa adi abambuluisha bikole bua kuenza dibaka dia disanka. Kabidi, padi muntu ‘usela mu Mukalenge,’ udi uleja mudiye ne lulamatu kudi Yehowa ne abi bidi bimufikisha ku dipeta masanka a kashidi, bualu ‘[Yehowa] udi udileja muena [lulamatu] kudi udi ne [lulamatu].’​—Musambu 18:25.

[Mêyi adi kuinshi]

[Tshimfuanyi mu dibeji 31]

‘[Yehowa] udi udileja muena [lulamatu] kudi udi ne [lulamatu]’