“Pregunta ña̱ kéʼé na̱ káʼvi tutu yóʼo”

¿Ndáana kúú na̱ káʼa̱n ta̱ Pablo xa̱ʼa̱ nu̱ú 2 Corintios 6:​14 tá ni̱ka̱ʼa̱nra “na̱ va̱ása kándíxa Ndióxi̱”?

2 Corintios 6:​14 káchiña: “Va̱ása kutáʼanndó xíʼin na̱ va̱ása kándíxa Ndióxi̱”. Texto yóʼo káʼa̱n káxiña xíʼinyó ta̱ Pablo ni̱ka̱ʼa̱nra xa̱ʼa̱ na̱ yiví na̱ kǒo ñúʼu ti̱xin congregación. Ta̱ apóstol yóʼo ni̱ka̱ʼa̱nra xa̱ʼa̱ na̱ kǒo kándíxa Ndióxi̱ nu̱ú inkaka versículo ña̱ Biblia.

Tá kúú, ta̱ Pablo ni̱nda̱ʼyi̱ra nu̱ú na̱ cristiano tá xi̱xa̱ʼa̱nna xíʼin na̱ ñanina á ku̱ʼvana nu̱ú na̱ chíñu na̱ kǒo “kándíxa Ndióxi̱” (1 Corintios 6:6). Na̱ va̱ása kándíxa Ndióxi̱ yóʼo xi̱kuu na̱ juez na̱ xi̱ndatiin ku̱a̱chi ñuu Corinto. Nu̱ú u̱vi̱ carta ña̱ ka̱ʼyí ta̱ Pablo ni̱ka̱ʼa̱nra xa̱ʼa̱ ta̱ Ndi̱va̱ʼa ña̱ nda̱kasira nu̱ú na̱ kǒo kándíxa Ndióxi̱, xa̱ʼa̱ ña̱kán kǒo kívi kunda̱a̱-inina xa̱ʼa̱ tu̱ʼun va̱ʼa. Na̱ yiví yóʼo náʼa̱na ña̱ kǒo kúni̱vína ndasakáʼnuna Jehová, saáchi ta apóstol ni̱ka̱ʼa̱nra versículo chí sa̱tá: “Soo tá ndándikóna nu̱ú Jehová, va̱ása ndásika níma̱na” (2 Corintios 3:​16; 4:4).

Sava na̱ kǒo ndásakáʼnu Ndióxi̱ kéʼéna ña̱ kǒo kúni̱ra ta ndásakáʼnuna inka Ndióxi̱ (2 Corintios 6:​15, 16). Soo su̱ví ndiʼiví na̱ yiví sási nu̱ú na̱ ndásakáʼnu Ndióxi̱ chi íyo na̱ kúni̱ kunda̱a̱-ini xa̱ʼa̱ ña̱ nda̱a̱. Ku̱a̱ʼá na̱ ndásakáʼnu Ndióxi̱ ti̱ndaʼa̱na xíʼin na̱ kǒo ndásakáʼnu miíra ta kúni̱vana koo xíʼin táʼanna (1 Corintios 7:​12-​14; 10:27; 14:​22-​25; 1 Pedro 3:​1, 2). Ta̱ Pablo ni̱ka̱ʼa̱nníra tu̱ʼun “na̱ va̱ása kándíxa Ndióxi̱” tá xi̱ka̱ʼa̱nra xa̱ʼa̱ na̱ kǒo ñúʼu ti̱xin congregación, ta na̱yóʼo va̱ása kítáʼanna xíʼin na̱ xa̱a̱ ndásakáʼnu Ndióxi̱ (Hechos 2:​41; 5:​14; 8:​12, 13).

Ña̱ káʼa̱n 2 Corintios 6:14 ndáyáʼviníña nu̱ú na̱ cristiano tá ndáka̱xinna keʼéna iin ña̱ʼa, ta ku̱a̱ʼá yichi̱ chíndeétáʼanña xíʼin na̱ kúni̱ tindaʼa̱ (Mateo 19:​4-6). Na̱ cristiano na̱ xi̱nda̱kuchi va̱ása ndáka̱xinna na̱ kǒo ndásakáʼnu Ndióxi̱ ña̱ tindaʼa̱na xíʼinna, saáchi ña̱ ndákanixi̱ní na̱yóʼo kǒo kítáʼanña xíʼin ña̱ ndákanixi̱ní na̱ cristiano na̱ nda̱a̱.

Soo ¿ndáaña ka̱ʼa̱nyó xa̱ʼa̱ na̱ káʼvi Biblia tá xáʼa̱nna xíʼinyó reunión? ta ¿ndáaña kivi ka̱ʼa̱nyó xa̱ʼa̱ na̱ publicador na̱ ta̱ʼán ndakuchi? ¿Á na̱ va̱ása kándíxa Ndióxi̱ kúú na̱yóʼo? Va̱ásaví. Na̱ xa̱a̱ ki̱xáʼa kándíxa ña̱ nda̱a̱ ta saátu kéʼéna ña̱ʼa ña̱ va̱ʼa ña̱ ndakuchina na̱yóʼo kǒo kívi ka̱ʼa̱nyó xa̱ʼa̱na ña̱ va̱ása kándíxana Ndióxi̱ (Romanos 10:10; 2 Corintios 4:​13). Tá kúma̱ní ndakuchi ta̱ Cornelio, ni̱ka̱ʼa̱nna xa̱ʼa̱ra ña̱ “xi̱ndasakáʼnura Ndióxi̱” (Hechos 10:2).

Tá iin na̱ cristiano na̱ xa̱a̱ nda̱kuchi xíkana ta tindaʼa̱na xíʼin iin na̱ publicador na̱ ta̱ʼán ndakuchi, ¿á va̱ása kíʼvi ña̱ ni̱ka̱ʼa̱n ta̱ Pablo nu̱ú 2 Corintios 6:​14 xíʼin na̱yóʼo ña̱ tindaʼa̱na xíʼin iin na̱ kǒo kándíxa Ndióxi̱? Va̱ása. ¿Nda̱chun? Ta Pablo ta̱xira consejo ndaʼa̱ ná cristiana na̱ ni̱xi̱ʼi̱ yi̱i̱. Yóʼo ni̱ka̱ʼa̱n káxira: “Ña̱ tindaʼa̱ñá xíʼin nda̱a̱ ndáaka ta̱a ta̱ kúni̱ miíñá, soo xíniñúʼu koora discípulo ta̱ Jesús” (1 Corintios 7:​39). Consejo yóʼo káʼa̱nña xíʼin na̱ xa̱a̱ nda̱kuchi ña̱ ná nandukúna “discípulo ta̱ Jesús” ña̱ tindaʼa̱na xíʼinna.

¿Ndáaña kúni kachi “discípulo ta̱ Jesús”? Nu̱ú Romanos 16:​8-​10 xíʼin Colosenses 4:​7, ta̱ Pablo ni̱ka̱ʼa̱nra xa̱ʼa̱ na̱ yiví na̱ kándíxa ta̱ “Cristo”. Tá káʼviyó versículo yóʼo, kúnda̱a̱-iniyó ña̱ kúúna na̱ ‘ndásakáʼnura’ na̱ ‘nda̱kaxinra’ na̱ ‘káchíñu nu̱úra’ xíʼin na̱ ‘nda̱kú ini xíʼinra’.

¿Ama xáa̱na ndúuna na̱ “discípulo ta̱ Jesús”? Tá xáa̱na kéʼéna ña̱ kútóo Ndióxi̱ ta kǒo kéʼékana ña̱ kutóo miína. Ta̱ Jesús ka̱chira: “Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína, ta ná kundisona yitu̱n tú sáxo̱ʼvi̱ miína ta ná ndakundeéna kundiku̱nna yi̱ʼi̱” (Mateo 16:24). Na̱ yiví kixáʼana ndíku̱nna ta̱ Cristo ta saá kixáʼana kéʼéna ña̱ káʼa̱n Ndióxi̱ ta ndátaxina miína ndaʼa̱ra. Ta saá ndákuchina ta kixáʼana káchíñuna nu̱ú Jehová Ndióxi̱. a Ña̱kán ña̱ tindaʼa̱na xíʼin “discípulo ta̱ Jesús” kúni̱ kachiña ña̱ tindaʼa̱na xíʼin iin na̱ ndixa náʼa̱ ña̱ káchíñuna “nu̱ú Ndióxi̱ ta saátu nu̱ú tátayó Jesucristo” (Santiago 1:1).

Na̱ yiví na̱ sakúaʼa xa̱ʼa̱ tu̱ʼun Ndióxi̱ xíʼin na̱ testigo Jehová ta ndákundeéna kéʼéna ña̱ kúni̱ra xíniñúʼu chikaa̱na ndee̱ xíʼin na̱yóʼo. Soo na̱yóʼo, kúma̱níva ndataxina miína ndaʼa̱ Jehová ta xa̱ʼa̱ ña̱yóʼo kúma̱ní keʼéna ndiʼi ña̱ kúni̱ Ndióxi̱ keʼéna. Soo na̱yóʼo xa̱a̱ ki̱xáʼavana sándakoona ña̱ va̱ása va̱ʼa xi̱keʼéna tá ya̱chi̱, ta saátu xíniñúʼu sandákoona inkaka ña̱ʼa, chi ndáyáʼviní ña̱ keʼéna ña̱yóʼo ña̱ va̱ʼa xa̱a̱na nduuna cristiano na̱ ndixa ta ndakuchina, siʼna ña̱yóʼo xíniñúʼu keʼéna tá ndákanixi̱nína ña̱ tindaʼa̱na.

Tá iin na̱ cristiano kixáʼana kakana xíʼin iin na̱ sa̱kán kíxáʼa káʼvi Biblia, ta kúni̱na kundatuna ña̱ ná ndakuchi na̱yóʼo saáví tindaʼa̱na, ¿á va̱ʼa keʼéna ña̱yóʼo? Va̱ása. Saáchi tá ndakuchi na̱yóʼo kǒo kunda̱a̱ káxi-inina á xa̱ʼa̱ ña̱ kúʼvi̱-inina xínina Jehová kúúña á xa̱ʼa̱ ña̱ kúni̱ kuitína tindaʼa̱na kúúña, chi kúnda̱a̱-inina na̱ xíka xíʼinna kǒo tindaʼa̱na xíʼinna nda̱a̱ ná ndakuchina.

Na̱ káʼvi yóʼo kúvana publicador na̱ ta̱ʼán ndakuchi, soo kuaʼnu loʼokana xíʼin tu̱ʼun Ndióxi̱ saáví xa̱a̱na ndakuchina. Xa̱ʼa̱ ña̱kán ndáyáʼviní consejo ña̱ káʼa̱n ña̱ xíniñúʼu tindaʼa̱na nu̱ú Ndióxi̱. Tá iin na̱ va̱lí nani ka̱kuna sakúaʼana xa̱ʼa̱ Ndióxi̱ ta kúúna iin publicador xa̱a̱ ku̱a̱ʼá ku̱i̱ya̱ soo ta̱ʼán ndakuchina, ¿ndáaña koo xíʼinna tá kúnina tindaʼa̱na? Tásaá kúúña, ¿Nda̱chun ta̱ʼán ndataxina miína ndaʼa̱ Jehová? ¿Nda̱chun xíka inina? ¿Á kǒo kándíxana ña̱ nda̱a̱ kúúña? Na̱yóʼo kándíxavana Ndióxi̱ soo va̱ása kivi ka̱ʼa̱nyó ña̱ nda̱kú íyo inina xíʼinra.

Consejo ña̱ ni̱ka̱ʼa̱n ta̱ Pablo xa̱ʼa̱ ña̱ va̱ʼa miívayó kúúña (Isaías 48:17). Tá u̱vi̱ na̱ yiví ndákanixi̱nína ña̱ tindaʼa̱na ta xa̱a̱ nda̱taxina miína ndaʼa̱ Ndióxi̱, ña̱ kúni̱na keʼéna yóʼo iin ña̱ va̱ʼava kúúña saáchi iin káchi ndásakáʼnuna Jehová, ta inkáchi íyo ña̱ ndákanixi̱nína keʼéna, ta xa̱ʼa̱ ña̱yóʼo si̱íní koona tá ná tindaʼa̱na. Tá ná tindaʼa̱na nu̱ú Ndióxi̱ na̱ʼa̱na ña̱ nda̱kú íyo inina xíʼin Jehová ta saátu ku̱a̱ʼání bendición ndakiʼinna, saáchi na̱ nda̱kú íyo ini xíʼin Ndióxi̱ nda̱kú koo inira xíʼinna (Salmo 18:25).

[Nota]

[Na̱ʼná]

Na̱ nda̱kú íyo ini xíʼin Ndióxi̱ nda̱kú koo inira xíʼinna