စာရှုသူများထံမှ မေးခွန်းလွှာ
စာရှုသူများထံမှ မေးခွန်းလွှာ
၂ ကောရိန္သု ၆:၁၄ တွင် “မယုံကြည်သောသူတို့” ဟူသောအသုံးအနှုန်းကို ပေါလုအသုံးပြုသောအခါ မည်သူတို့ကို ရည်ညွှန်းနေခြင်းဖြစ်သနည်း။
၂ ကောရိန္သု ၆:၁၄ [သမ္မာ] တွင် ကျွန်ုပ်တို့ ဤသို့ဖတ်ရ၏– “မယုံကြည်သောသူတို့နှင့်တွဲဖက်၍ မညီသောထမ်းပိုးကို မထမ်းကြနှင့်။” ကျမ်းချက်၏ရှေ့နောက်စကားကို ကျွန်ုပ်တို့လေ့လာကြည့်မည်ဆိုလျှင် ခရစ်ယာန်အသင်းတော်အဝင် မဟုတ်သူများအကြောင်း ပေါလုပြောဆိုနေကြောင်း ထင်ရှားသည်။ ဤနားလည်မှုကို အခြားကျမ်းချက်များက ထောက်ခံသည်၊ ထိုတွင် “မယုံကြည်သောသူ” သို့မဟုတ် “မယုံကြည်သောသူတို့” ဟူသည့် ပေါလုအသုံးပြုခဲ့သောအသုံးအနှုန်းကို မှတ်တမ်းတင်ထားသည်။
ဥပမာ၊ ပေါလုသည် “မယုံကြည်သောသူတို့ရှေ့၌” အချင်းချင်း တရားစွဲဆိုသည့် ခရစ်ယာန်များကို ပြင်းပြင်းထန်ထန် ပြစ်တင်ပြောဆို၏။ (၁ ကောရိန္သု ၆:၆) ဤတွင် မယုံကြည်သောသူတို့မှာ ကောရိန္သုတရားရေးစနစ်တွင် အမှုထမ်းနေကြသည့် တရားသူကြီးများဖြစ်ကြသည်။ သူ၏ဒုတိယစာစောင်တွင် ပေါလုက စာတန်သည် “မယုံကြည်သောထိုသူတို့၏ ဉာဏ်မျက်စိကို ကွယ်စေ” သည်ဟု ဖော်ပြထား၏။ ဤမယုံကြည်သူတို့၏ ဉာဏ်မျက်စိသည် သတင်းကောင်းကို မမြင်ရန် ‘ဖုံးအုပ်’ ခံရကြသည်။ အဆိုပါမယုံကြည်သူတို့သည် ယေဟောဝါ၏အမှုတော်ကိုထမ်းဆောင်ရန် စိတ်မဝင်စားကြချေ၊ အစောပိုင်းက ပေါလုရှင်းပြသကဲ့သို့ “ဘုရား[သခင်]အထံတော်သို့ ပြောင်းလဲလျှင် ထိုဖုံးအုပ်ခြင်းအကြောင်းကို ပယ်ရှင်း” လေသည်။—၂ ကောရိန္သု ၃:၁၆; ၄:၄၊ သမ္မာ။
မယုံကြည်သူအချို့သည် မတရားသဖြင့်ပြုမူ၏၊ သို့မဟုတ် ရုပ်ပုံကိုးကွယ်ကြ၏။ (၂ ကောရိန္သု ၆:၁၅၊ ၁၆) သို့ရာတွင်၊ သူတို့အားလုံးသည် ယေဟောဝါ၏ကျေးကျွန်များကို အတိုက်အခံမပြုကြပါ။ အချို့ဆိုလျှင် အမှန်တရားကို စိတ်ဝင်စားကြ၏။ လူအများသည် ခရစ်ယာန်အိမ်ထောင်ဖက်များရှိကြပြီး သူတို့နှင့် ဆက်ပေါင်းသင်းလိုကြသည်။ (၁ ကောရိန္သု ၇:၁၂-၁၄; ၁၀:၂၇; ၁၄:၂၂-၂၅; ၁ ပေတရု ၃:၁၊ ၂) သို့ရာတွင် အထက်တွင်ဖော်ပြထားသည့်အတိုင်း ‘သခင်ဘုရား၌ ယုံကြည်သောသူများ’ ဖြင့်ဖွဲ့စည်းထားသော ခရစ်ယာန်အသင်းတော်တွင် မပါဝင်သူများကို ပေါလုက “မယုံကြည်သောသူတို့” ဟူ၍ အမြဲခေါ်ဆိုသည်။—တမန်တော် ၂:၄၁; ၅:၁၄; ၈:၁၂၊ ၁၃။
၂ ကောရိန္သု ၆:၁၄ တွင် တွေ့ရှိရသောမူသည် ဘဝအခြေအနေအမျိုးမျိုးရှိ ခရစ်ယာန်များအတွက် အဖိုးထိုက်လှသည့် လမ်းညွှန်ချက်တစ်ခုဖြစ်ပြီး အိမ်ထောင်ဖက်ရှာနေသူ ခရစ်ယာန်များ ထည့်စဉ်းစားသင့်သည့် ပညာရှိဆုံးမစကားအဖြစ် မကြာခဏ ကိုးကားဖော်ပြတတ်ကြသည်။ (မဿဲ ၁၉:၄-၆) ဆက်ကပ်အပ်နှံ နှစ်ခြင်းခံပြီးသော ခရစ်ယာန်တစ်ဦးသည် ပညာရှိစွာဖြင့် မယုံကြည်သူများထဲမှ အိမ်ထောင်ဖက်ရှာမည်မဟုတ်ပေ၊ အကြောင်းမှာ မယုံကြည်သူတို့၏ အကျင့်စရိုက်စံနှုန်းများ၊ ပန်းတိုင်များနှင့် ယုံကြည်ချက်များသည် စစ်မှန်သောခရစ်ယာန်များနှင့် အလွန့်အလွန်ကွာခြားလှ၏။
သို့သော် သမ္မာကျမ်းစာကိုလေ့လာ၍ ခရစ်ယာန်အသင်းတော်နှင့် ပူးပေါင်းနေသူတို့ကိုကော။ နှစ်ခြင်းမခံရသေးသည့် ကြေညာသူများကိုကော။ သူတို့သည် မယုံကြည်သူများလော။ မဟုတ်ပါ။ သတင်းကောင်းနှင့်ဆိုင်သော အမှန်တရားကို လက်ခံထားကြပြီး နှစ်ခြင်းခံဖို့ မှန်မှန်တက်လှမ်းနေသူများကို မယုံကြည်သူများဟု မခေါ်သင့်ပါ။ (ရောမ ၁၀:၁၀; ၂ ကောရိန္သု ၄:၁၃) ကော်နေလိ နှစ်ခြင်းမခံမီက သူ့ကို “ဘုရားတရားကြည်ညို၍ ဘုရားသခင်ကို ကြောက်ရွံ့” သူဟု ခေါ်ဆိုခဲ့ကြသည်။—တမန်တော် ၁၀:၂၊ သမ္မာ။
၂ ကောရိန္သု ၆:၁၄ ပါ ပေါလု၏ဆုံးမစကားသည် အတိအကျဆိုရလျှင် ဆက်ကပ်အပ်နှံထားသည့်ခရစ်ယာန်တစ်ဦးက နှစ်ခြင်းမခံရသေးသော ကြေညာသူဖြစ်နေပြီးသူတစ်ဦးနှင့် မေတ္တာမျှကာ လက်ထပ်ခြင်းနှင့် မသက်ဆိုင်သောကြောင့် ဤသို့လက်ထပ်လိုက်လျှင် ပညာရှိရာကျမည်လော။ ပညာရှိရာမကျချေ။ အဘယ်ကြောင့်နည်း။ ခရစ်ယာန်မုဆိုးမများအား ပေါလု တဲ့တိုးဆုံးမပေးခဲ့သော စကားများကြောင့်ဖြစ်၏။ ပေါလုဤသို့ရေးသားခဲ့သည်– ‘[သူသည်] မိမိအလိုရှိသောသူနှင့် သခင်၌သာ ထိမ်းမြားခြင်းငှာအခွင့်ရှိ၏။’ (၁ ကောရိန္သု ၇:၃၉၊ သမ္မာ) ထိုဆုံးမစကားနှင့်အညီ ဆက်ကပ်အပ်နှံပြီးသောခရစ်ယာန်များကို ‘အရှင်သခင်၌’ ရှိကြသူတို့တွင်သာ အိမ်ထောင်ဖက်ရှာရန် တိုက်တွန်းထား၏။
‘အရှင်သခင်၌’ ဟူသောအသုံးအနှုန်းအပြင် ယင်းနှင့်ဆက်စပ်သည့် “ခရစ်တော်၌” ဟူသည့်အသုံးအနှုန်းတို့၏ အဓိပ္ပာယ်ကား အဘယ်နည်း။ ရောမ ၁၆:၈-၁၀ [သမ္မာ] နှင့် ကောလောသဲ ၄:၇ [သမ္မာ] တို့တွင် “ခရစ်တော်၌” သို့မဟုတ်‘အရှင်သခင်၌’ရှိနေကြသူတို့အကြောင်း ပေါလုပြောပြသည်။ ထိုအခန်းငယ်များကို သင်ဖတ်ရှုကြည့်ပါက ထိုသူတို့သည် ‘လုပ်ဖော်ဆောင်ဖက်ချင်း၊’ ‘မျက်နှာသာရထားသူများ၊’ ‘ချစ်မြတ်နိုးရသော ညီအစ်ကိုများ၊’ ‘တည်ကြည်ကြသော ဓမ္မအမှုဆောင်များ’ နှင့် ‘ကျွန်ချင်းများ’ ဖြစ်ကြသည်ကို တွေ့ရှိပေမည်။
လူတစ်ဦးသည် အဘယ်အချိန်တွင် ‘အရှင်သခင်၌ကျွန်’ ဖြစ်လာသနည်း။ မိမိကိုယ်ကို ငြင်းပယ်ပြီး ကျွန်တစ်ဦး လုပ်ဆောင်ရမည့်အမှုကို တလိုတလားလုပ်ဆောင်သည့်အချိန်တွင်ဖြစ်သည်။ ယေရှုဤသို့ရှင်းပြသည်– “ငါ၌ဆည်းကပ်လိုသောသူဖြစ်လျှင် ကိုယ်ကိုငြင်းပယ်ပါစေ။ ကိုယ့်လက်ဝါးကပ်တိုင်ကိုထမ်း၍ ငါ့နောက်သို့လိုက်ပါစေ။” (မဿဲ ၁၆:၂၄၊ သမ္မာ) လူတစ်ဦးသည် ဘုရားသခင်ထံ မိမိကိုယ်ကို ဆက်ကပ်အပ်နှံသောအခါ ခရစ်တော်နောက် စတင်လိုက်လျှောက်ပြီး ဘုရားသခင့်အလိုတော်ကို အပြည့်အဝလက်အောက်ခံပါသည်။ ၎င်းနောက် သူသည် နှစ်ခြင်းခံလိုက်ရာ ယေဟောဝါဘုရားသခင်ရှေ့ မျက်နှာသာရအနေအထားရှိသည့် ခန့်အပ်ခံဓမ္မအမှုဆောင်တစ်ဦး ဖြစ်လာလေသည်။ * ထို့ကြောင့် ‘အရှင်သခင်၌ ထိမ်းမြား’ ခြင်းဟူသည် ဆက်ကပ်အပ်နှံထားသော “ဘုရားသခင်နှင့် အရှင်ယေရှုခရစ်၏ကျွန်၊” ယုံကြည်သူတစ်ဦးအမှန်ပင်ဖြစ်ကြောင်း ဖော်ပြထားသူတစ်ဦးအား ထိမ်းမြားခြင်းကိုဆိုလိုပေသည်။—ယာကုပ် ၁:၁။
ယေဟောဝါသက်သေများနှင့် သမ္မာကျမ်းစာလေ့လာနေပြီး ဝိညာဉ်ရေးတွင် ကောင်းကောင်းတိုးတက်နေသူတစ်ဦးကို ချီးမွမ်းထိုက်ပေသည်။ သို့သော် သူသည် ယေဟောဝါထံ မိမိကိုယ်ကို မအပ်နှံသေးချေ၊ ကိုယ်ကျိုးစွန့်၍ အမှုတော်ဆောင်ခြင်းဘဝ၌ မိမိအသက်တာကို မြှုပ်နှံမထားရသေးချေ။ သူသည် လိုအပ်သလို ပြောင်းလဲမှုပြုနေဆဲဖြစ်သည်။ အိမ်ထောင်ပြုခြင်းကဲ့သို့သော ဘဝပြောင်းလဲမှုကြီးနောက်တစ်ခုကို သူမစဉ်းစားမီ ဆက်ကပ်အပ်နှံ နှစ်ခြင်းခံခရစ်ယာန်တစ်ဦးဖြစ်လာရန် ပြုပြင်ပြောင်းလဲမှုကြီးများကို သူအကုန်အစင်ပြုဖို့လိုသေးသည်။
နှစ်ခြင်းခံပြီးနောက်မှ လက်ထပ်မည်ဟူသည့် ရည်ရွယ်ချက်ဖြင့် ကျမ်းစာလေ့လာနေသူ၊ ကောင်းစွာတိုးတက်နေပုံရသူတစ်ဦးနှင့် ခရစ်ယာန်တစ်ဦး ရည်းစားထားသင့်ပါသလော။ မထားသင့်ပေ။ ဆက်ကပ်အပ်နှံထားသူ ခရစ်ယာန်တစ်ဦးသည် မိမိအား ထိမ်းမြားလိုသော်လည်း မိမိနှစ်ခြင်းခံပြီးမှ ထိမ်းမြားမည်ကို ကျမ်းစာသင်သားသိထားပါက သူ၏ရည်ရွယ်ချက်ကို ဝေခွဲမရဖြစ်သွားနိုင်သည်။
လူတစ်ဦးသည် နှစ်ခြင်းခံနိုင်သည့်အဆင့်မရောက်မီ တိုးတက်နေသည့်တိုင် နှစ်ခြင်းမခံရသေးသော ကြေညာသူဖြစ်နေချိန်မှာ အများအားဖြင့် တစ်ခဏသာဖြစ်သည်။ ထို့ကြောင့် အရှင်သခင်ဘုရား၌သာ ထိမ်းမြားရမည်ဟူသော အထက်ပါဆုံးမစကားသည် တရားလွန်တောင်းဆိုခြင်းမဟုတ်ပေ။ သို့သော် အိမ်ထောင်ပြုနိုင်သည့် အသက်အရွယ်ရောက်သူတစ်ဦးသည် ခရစ်ယာန်မိသားစုတွင် ကြီးပြင်းလာကာ အသင်းတော်တွင် အချိန်အတန်ကြာ တက်ကြွလှုပ်ရှားခဲ့ပြီး နှစ်ခြင်းမခံသေးသည့် ကြေညာသူဖြစ်မည်ဆိုလျှင်ကော။ ထိုသို့ဖြစ်မည်ဆိုလျှင် သူ့ကို အဘယ်အရာက တားဆီးနေသဖြင့် မိမိ၏အသက်တာကို ယေဟောဝါထံ မဆက်ကပ်ရသနည်း။ အဘယ်ကြောင့် သူတွန့်ဆုတ်နေသနည်း။ သံသယဝင်နေ၍လော။ ထိုသူသည် မယုံကြည်သူတစ်ဦး မဟုတ်သော်လည်း ‘အရှင်သခင်ဘုရား၌’ ရှိသူဟု မခေါ်ဆိုနိုင်ပါ။
ထိမ်းမြားခြင်းနှင့်ပတ်သက်သည့် ပေါလု၏ဆုံးမစကားသည် ကျွန်ုပ်တို့အကျိုးအတွက်ဖြစ်ပေသည်။ (ဟေရှာယ ၄၈:၁၇) အိမ်ထောင်ဖက်လောင်းနှစ်ဦးစလုံးသည် ယေဟောဝါထံဆက်ကပ်အပ်နှံထားသူများဖြစ်လျှင် တစ်ဦးအပေါ်တစ်ဦးထားရှိသည့် အိမ်ထောင်မင်္ဂလာကတိကဝတ်သည် ခိုင်မြဲသည့် ဝိညာဉ်ရေးအုတ်မြစ်အပေါ်ဖြစ်မည်။ ၎င်းတို့တွင် တူညီသောစံနှုန်းများနှင့် တူညီသောပန်းတိုင်များရှိကြမည်။ ယင်းက ပျော်ရွှင်သော ပေါင်းဖက်မှုဖြစ်စေမည်။ ထို့အပြင်၊ ‘အရှင်သခင်ဘုရား၌ ထိမ်းမြားခြင်း’ အားဖြင့် ယေဟောဝါအပေါ် တည်ကြည်ကြောင်းဖော်ပြသည်၊ သို့ပြုခြင်းက ကောင်းချီးအမြဲခံစားရဖို့ အကြောင်းရှိစေသည်၊ အကြောင်းမှာ ယေဟောဝါသည် “တည်ကြည်သောသူအား တည်ကြည်မှုပြတော်မူမည်” ဖြစ်၍တည်း။—ဆာလံ ၁၈:၂၅၊ ကဘ။
[အောက်ခြေမှတ်ချက်]
^ အပိုဒ်၊ 10 ပေါလု အစအဦး ရည်ညွှန်းရေးသားသည့် ဝိညာဉ်တော်ဖွား ခရစ်ယာန်များအတွက်ဆိုလျှင် ‘အရှင်သခင်၌ ကျွန်’ တစ်ဦးဖြစ်ဖို့ သူတို့သည် ဘုရားသခင်၏သားများနှင့် ခရစ်တော်၏ညီတော်များအဖြစ် ဝိညာဉ်တော်သွန်းလောင်းပေးမှုကို ခံပြီးသူများ ဖြစ်ကြရမည်။
[စာမျက်နှာ ၃၁ ပါ ရုပ်ပုံ]
ယေဟောဝါသည် “တည်ကြည်သောသူအား တည်ကြည်မှုပြတော်မူမည်”