Tlen maseualmej kinekij kimatisej

¿Ajkia inijuantij elij katli “axkineltokaj toTeko” kej kiijtok apóstol Pablo ipan 2 Corintios 6:14?

Ipan 2 Corintios 6:14 kiijtoua: “Amo ximosentilikaj iuaya se tlen axkineltoka toTeko”. Tlen apóstol Pablo kiijtok achtoui uan teipa ipan nopa capítulo, kinextia kamanaltiyaya tlen maseualmej katli amo itstokej ipan tlanechikoli. Uan ipan sekinok versículos, kampa Pablo kitekiuia nopa tlajtoli “axkineltoka toTeko” o “axkineltokaj toTeko” nojkia ya nopa kinextia.

Se neskayotl, Pablo kinajuak toikniuaj tlen achtoui siglo pampa kintlateljuiyayaj sekij toikniuaj “iixtla se tekiue tlen axtlaneltokaketl” (1 Corintios 6:6). Katli amo tlaneltokayayaj eliyayaj nopa tekiuejmej katli tlanauatiyayaj ipan tribunal tlen Corinto. Ipan nopa ompa amatlajkuiloli, Pablo kiijtoua Satanás “kintsakuilijtok inintlalnamikilis” katli amo tlaneltokaj, yeka amo uelij kikuamachiliaj nopa kuali tlamachtili. Ni maseualmej amo kinekij kitekipanosej Jehová, kiampa tikijtouaj pampa apóstol Pablo ipa kiijtojtoya kema se akajya “kiselia toueyiTeko, uajka toTeko [Jehová] kitlapouilia itlalnamikilis” (2 Corintios 3:16; 4:4).

Sekij katli amo tlaneltokaj, kichiuaj tlen amo kuali o kinueyichiuaj teotsitsij (2 Corintios 6:15, 16). Maske kiampa kichiuaj, amo nochi kinkualankaitaj Jehová itlajtoltemakauaj. Sekij kinekij momachtisej Biblia. Uan sekij mosenkajtokej iuaya se Jehová itlajtoltemajka uan nojua kinekij itstosej iuaya (1 Corintios 7:12-14; 10:27; 14:22-25; 1 Pedro 3:1, 2). Kema Pablo miakpa kitekiuik nopa tlajtoli “axkineltoka toTeko”, kamanaltiyaya tlen maseualmej katli amo mosentiliaj touaya ipan tlanechikoli, kampa nochi kineltokaj toTeko (Hechos 2:41; 5:14; 8:12, 13).

Tlen kiijtoua 2 Corintios 6:14 tlauel kinpaleuia Cristo itokilijkauaj ipan nochi tlen kinekij kichiuasej, uan nojkia tlauel kinpaleuia katli kinekij mosenkauasej (Mateo 19:4-6). Se katli motemaktilijtok uan moatsonpoliuiltijtok, kinextis tlalnamiki kema amo mosenkauas iuaya se akajya katli amo tlaneltoka pampa amo sanse moiljuiaj, amo sanse tlen mosentlalijtokej kichiuasej yon kineltokaj sanse tlamantli.

¿Tlake uelis tikijtosej tlen se maseuali katli momachtia Biblia uan mosentilia touaya, uan tlen se akajya katli ya tlajtolmoyaua maske ayamo moatsonpoliuiltia? ¿Inijuantij nojkia elij katli amo tlaneltokaj? Amo. Katli momachtiaj Biblia uan kuali tlaneltokatiauij pampa kinekij moatsonpoliuiltisej, amo kinamiki tikijtosej amo tlaneltokaj (Romanos 10:10; 2 Corintios 4:13). Kema Cornelio ayamo moatsonpoliuiltiyaya, kiixmatiyayaj kej se tlakatl katli kitlepanitayaya toTeko (Hechos 10:2).

Uajka, ¿kinamiki se Jehová itlajtoltemajka moixtokas uan mosenkauas iuaya se akajya katli tlajtolmoyaua uan ayamo moatsonpoliuiltia, pampa kej Pablo kiijtok ipan 2 Corintios 6:14 ya amo eli kej katli amo kineltokaj toTeko? Amo. Tlen Pablo kiniljuik tosiuaikniuaj katli ayokmo kipixtoyaj ininueue kiampa kinextia, ya kiijtok: “Uelis sampa monamiktis ika tlen kineki, pero san ma monamikti ika se tlakatl tlen nojkia kineltoka toueyiTeko” (1 Corintios 7:39). Ni texto kiniljuia katli moatsonpoliuiltijtokej ma mosenkauakaj iuaya se akajya “tlen nojkia kineltoka toueyiTeko”.

¿Tlake kiijtosneki nopa tlajtoli “ipan toTeko” uan “iixpa toTeko”? Ipan Romanos 16:8-10 uan Colosenses 4:7, Pablo kamanalti tlen maseualmej katli itstoyaj “ipan toTeko” uan “iixpa toTeko”. Kema tijpouaj ni textos tikitaj ni maseualmej ‘tekitij ipan iteki Cristo’, ‘itstokej kuali iixpa toTeko’, elij ‘toikniuaj katli tikinikneliaj’, ‘tlapaleuiaj uan temachmej’ uan ‘kitekipanouaj toTeko touaya’.

¿Kema mochiua se akajya “itekipanojka toTeko”? Kema kichiua iteki ika nochi iyolo sanse kej se tlatekipanojketl uan ayokmo kichiua san tlen ya kineki. Jesús kiijtok: “Tlaj se akajya kineki nechtokilis, ma kitlauelkaua tlen kineki. Uan ma kitlalana ikua uan ma nechtokili” (Mateo 16:24, TNM). Se maseuali peua kitokilia Cristo kema kichiua tlen toTeotsij kineki uan kimaktilia inemilis. Teipa, moatsonpoliuiltia uan peua kitekipanoua toTeotsij kej ya kipaktia. * Yeka, kema se akajya mosenkaua iuaya se katli nojkia ‘kineltoka toueyiTeko’ kiijtosneki mosenkaua iuaya katli kinextia kuali tlaneltoka uan eli se kuali “itekipanojka toTeko Dios uan toTeko Jesucristo” (Santiago 1:1).

Se akajya katli momachtia Biblia ininuaya Jehová itlajtoltemakauaj uan kuali tlaneltokatia, tlauel kuali tlen kichiua. Maske kiampa kichijtok, ayamo kimaktilia Jehová inemilis yon mosentlalijtok kitekipanos ika nochi iyolo. Uan maske ya kipatlatok se keski tlamantli ipan inemilis, nojua moneki kipatlas sekinok tlamantli tlaj kineki motemaktilis uan moatsonpoliuiltis. Yeka, teipa moneki kiitas tlaj mosenkauas, pampa nopa nojkia kipatlas inemilis.

¿Kinamiki se Jehová itlajtoltemajka moixtokas iuaya se akajya katli nesi kuali tlaneltokatia, kichias ma moatsonpoliuilti uan teipa mosenkauas iuaya? Amo. Pampa katli momachtia Biblia amo kuali kinextis kenke kineki moatsonpoliuiltis, tlaj pampa kineki kitekipanos toTeotsij o uelis san pampa kimati nopa toikni amo mosenkauas iuaya tlaj amo moatsonpoliuiltijtok.

Miakej katli momachtiaj Biblia peuaj tlajtolmoyauaj maske ayamo moatsonpoliuiltiaj uan kema kuali tlaneltokatiauij, moatsonpoliuiltiaj. Yeka, amo tlauel ouij se kichiuas tlen kiijtoua nopa texto uan mosenkauas iuaya se katli nojkia kitekipanoua Jehová. ¿Uan tlaj se akajya moiljuia ya uelis mosenkauas, itatauaj nochipa kitekipanojtokej Jehová, nochipa yaui tlanechikoli uan tlajtolmoyaua maske ayamo moatsonpoliuiltia? Tlaj kiampa pano, ¿kenke ayamo kimaktilijtok Jehová inemilis? ¿Kitsakuilia se tlamantli? Maske tlaneltoka, amo uelis tikijtosej kuali tlaneltoka ipan toTeko.

Tlen Pablo kintlajtolmakak katli kinekij mosenkauasej tlauel techpaleuia (Isaías 48:17). Kema katli kinekij mosenkauasej ya kimaktilijtokej Jehová ininnemilis, uelis nochipa itstosej sansejko pampa kitekipanosej Jehová. Uan pampa sanse tlen kineltokaj uan tlen mosentlalijtokej kichiuasej, kinpaleuia ma itstokaj ika pakilistli. Nojkia, kema timosenkauaj ipan toTeko, tijnextiaj amo tijtlauelkauaj Jehová, uan nopa kichiuas nochipa ma techteochijto, pampa ya itstok “temachtli ika tlen teikneliaj uan tlen temachmej” (Salmo 18:25).

[Tlatsintla kiijtoua]

[Tlaixkopinkayotl]

ToTeko eli “temachtli ika tlen teikneliaj uan tlen temachmej”