Tlen notlajtoltiaj akin kitaj revistas

¿Akinomej kinteneujtoya Pablo ipan 2 Corintios 6:​14, ijkuak okijto “on yejuan xkineltokaj Cristo”?

Ipan 2 Corintios 6:​14, kijtoua: “Maka itlaj imiuan xmatikan on yejuan xkineltokaj Cristo”. Nikan Pablo kinteneujtoya akin xkitekichiuiliaj Jehová. Ijkon tikijtoua pampa ipan okseki tlaxeloltin apóstol Pablo noijki okitekitilti tlajtoltin “xtlaneltokaj” noso “xkineltokaj Cristo”.

Ken ipan 1 Corintios 6:6, Pablo kinchikajkanotsa tokniuan pampa kinuikayaj imikniuan ipan tribunales imixpan “on yejuan xtlaneltokaj”. Nikan kinteneujtoya jueces akin xtlaneltokaj, yejuamej nemiyaj ipan tribunal de Corinto. Noijki ipan ika ome carta tlen Pablo okijkuilo, kijtoua ika akin xtlaneltokaj, Satanás yokimixtlapacho noso “yokintlamachilispoloj para maka kasikamatiskej on kuajli tlajtojli yejuan kipantlantia iueyilis Cristo”. Akin nikan okinteneuj nion achijtsin kinekiyaj kitekichiuiliskej Jehová, pampa ipan okse tlaxelojli yejua okijto: “Ijkuak sen tlakatl kineltoka toTEKO, on tela yejuan kixtlapachoua popoliui” (2 Corintios 3:​16; 4:4).

Sekimej akin xtlaneltokaj kichiuaj tlen toTajtsin xkuelita niman kinueyichiuaj okseki tajtsitsintin (2 Corintios 6:​15, 16). San ika, xnochimej kintlauelitaj akin kitekichiuiliaj Jehová. Sekimej kinekij kimatiskej tlen melauak. Niman oksekimej, inueuentsin noso insiuauj kitekichiuilia Jehová niman xkinkauaj ipampa yejon (1 Corintios 7:​12-​14; 10:27; 14:22-​25; 1 Pedro 3:​1, 2). Maski ijkon, Pablo miyekpa okitekitilti tlajtojli akin “xtlaneltokaj” ijkuak kinteneua akin xkitechiuiliaj toTajtsin noso itech akin “tlaneltokayaj itech toTEKO” (Hechos 2:​41; 5:​14; 8:​12, 13).

Tlen kijtoua 2 Corintios 6:​14 uelis kinpaleuis nochimej akin kitekichiuiliaj toTajtsin, san ika, noijki kinpaleuiya akin kinekij nonamiktiskej (Mateo 19:​4-6). Akin yonosentemakak itech Jehová niman yonoapolakti, kasikamati ika xuelis kitlapejpenis nonamiktis iuan yakaj akin xtlaneltoka itech Jehová, pampa yejua xsan noijki ken tlanemilia niman tlaneltoka.

San ika, miyekej nomachtiaj Biblia niman yauej tlanechikoltin niman sekimej tenojnotsaj, san ika, xinoapolaktiaj, ¿uelis tikijtoskej ika yejuamej noijki xtlaneltokaj itech toTeko? Ka. Akin nomachtijtokej Biblia niman nopatlatokej pampa kinekij noapolaktiskej, xnoneki tikijtoskej ika yejuamej xtlaneltokaj itech Cristo (Romanos 10:10; 2 Corintios 4:​13). Ijkuak Cornelio xnoapolaktiaya, onoijto ika yejua “kitlakaitaya Dios niman san sekan iuan nochi ifamilia kimauistiliayaj Dios ikan nochi inyojlo” (Hechos 10:2).

Kuakon, ¿uelis tikijtoskej ika tlen okijto Pablo ipan 2 Corintios 6:14 kikauilia akin yonosentemakak itech Jehová, makistinemi noso manonamikti iuan se tenojnotsketl akin xnoapolaktia? Ka. ¿Tleka ijkon tikijtouaj? Ipampa tlen Pablo okimijli tokniuan siuakaualtsitsintin. Yejua okijto: “Uelis oksejpa nonamiktis iuan san akinon yejuan kinekis. Pero tla nonamiktis, ma kichiua iuan se yejuan kineltoka toTEKO” (1 Corintios 7:​39). Ika tlen okijto Pablo, kimelajkaijliaj tokniuan akin yonosentemakakej itech Jehová, san manonamiktikan iuan yakaj akin “kineltoka toTEKO”.

¿Tlenon okijtosnek Pablo ijkuak okijto akin “kineltoka toTEKO”, niman ijkuak okijto akin “kineltoka Cristo”? Ipan Romanos 16:​8-​10 niman Colosenses 4:7, Pablo tlajtoua intech akin “kineltoka Cristo” niman “kineltoka toTEKO”. Ijkuak tikinamapouaj yejuin tlaxeloltin tikitaj ika yejua okijto ‘notlasokaikniuj itechkopa toTeko’, ‘otekit ipampa Cristo Jesús’, ‘Dios miyekpa okitak ika kineltoka Cristo’ niman ‘yejuan nochipa kuajli kitekipanoua Dios’.

¿Kemanon peua se “kitekipanoua Dios”? Ijkuak ika nochi iyojlo kichiua itekiyo ken se tlakeuajli niman kinektika tlajyouis. Ijkon tikijtouaj pampa Jesús okijto: “Tla yakaj kineki nouan yas, ma kelkaua nochi on tlen más kitlajsojtla, ma nemi listo para tlajyouis noso mikis nopampa, niman kemaj ma uajla nouan” (Mateo 16:24). Ijkuak se nosentemaka itech Jehová peua kichiua ken Cristo niman kitlakamati tlen kijtoua Biblia. Sakin noapolaktia niman peua kichiua tlen kitlajtlani toTajtsin Jehová, ijkuakon nochiua se itekipanojkauj. a Kuakon, Pablo okijto ika se itekipanojkauj toTajtsin san noneki nonamiktis iuan yakaj akin yemelak kineltoka toTeko niman itekitkauj “Dios niman toTEKO JesuCristo” (Santiago 1:1).

Melak techyolpaktia ijkuak tikitaj ika yakaj nomachtia Biblia imiuan iteixpantijkauan Jehová niman peua nopatlatiuj. San ika, yejua xnosentemaka itech Jehová niman xkijlia ika kineki kitekichiuilis niman tlajyouis ipampa. Kanaj yejua nonekis kipatlas seki tlemach ipan inemilis niman ijkon kiteititis ika kineki kichiuas ken Cristo, niman sakin nosentemakas itech Jehová niman noapolaktis, ijkuakon uelis kinemilis tla nonamiktis iuan yakaj akin kitekichiuilia Jehová.

¿Kuajli yeskia tla se akin kichiua ken Cristo kistinemi iuan yakaj akin kemach chikaujtok itlaneltokil niman kinemilia nonamiktis iuan hasta ijkuak yonoapolakti? Ka. Pampa akin nomachtijtika Biblia xkimatis tleka yemelak kineki noapolaktis tla akin iuan kistinemi, yokijli ika nonamiktiskej hasta ijkuak yonoapolakti.

Tikchiaj ika se akin nomachtijtika Biblia matenojnotsa niman sakin ijkuak yokichikauj itlaneltokil manoapolakti. Ika yejon, melak kuajli tlen Pablo okijto, ika san noneki nonamiktiskej imiuan akin tlaneltokaj itech toTeko. ¿Kuajli yeskia tla se akin onoskalti imiuan iteixpantijkauan Jehová niman nochipa yauj tlanechikoltin, kineki nonamiktis maski ok xnoapolaktia? Tla ijkon panoua, ¿tleka ok xnoapolaktia? ¿Tleka xkineki? ¿Kanaj ometlamati? Maski yejua xteuan itech on ‘yejuan xkineltokaj Cristo’, san ika, noneki kiteititis ika yemelak “kineltoka toTEKO”.

Melak tepaleuiya tlen okijto Pablo itech namiktilistli (Isaías 48:17). Ijkuak omemej kinekij nonamiktiskej niman kitekichiuilijtokej Jehová, yejuin kichiua kuajli manoyekanakan niman manouikakan iuan toTajtsin. Pampa san noijki tlen kinemiliaj niman tlen kinekij kichiuaskej, yejon kinpaleuis manemikan ika inyojlo. Niman ijkuak ‘timonamiktia iuan yakaj akin kineltokaj toTeko’ tikteititia ika timelajkanemi itech Jehová niman yejua mitsteochiuas, pampa Biblia kijtoua itech Jehová: “Tejua nochipa tikchiua on tlen tikprometeroua intech on yejua nochipa mitstlakamatij” (Salmo 18:25).

[Nota]

[Tlaixkopinajli]

“Tejua nochipa tikchiua on tlen tikprometeroua intech on yejua nochipa mitstlakamatij”