Tau Huhu Mai he Tau Tagata Totou

Ia 2 Korinito 6:14, ko hai ne hagaao a Paulo ki ai he magaaho ne fakaaoga e ia e tau kupu “lautolu kua nakai tua”?

Ia 2 Korinito 6:14, kua totou e tautolu: “Aua neke hahamo a mutolu mo e nakai tatai fakalataha mo lautolu kua nakai tua.” Ka onoono a tautolu ke he kakano, kua vagahau moli a Paulo ke he tau tagata takitokotaha ne nakai fai vala moli he fakapotopotoaga Kerisiano. Ko e fakamaamaaga nei kua lalago ai he falu kupu he Tohi Tapu ne fakamau e fakaaoga ha Paulo he tau kupu “ia kua nakai tua” po ke “lautolu kua nakai tua.”

Ma e fakatai, kua akonaki fakalahi e Paulo e tau Kerisiano he o atu ke he hopoaga “ki mua he tau tagata nakai tua.” (1 Korinito 6:6) He tuaga nei, ko e tau tagata nakai tua e tau ikifakafili ne fekafekau he hopoaga i Korinito. He tohi ke uaaki hana, ne tohi e Paulo ko Satani kua ‘fakapouli e tau manatu ha lautolu kua nakai tua.’ Ko e tau mata he tau tagata kua nakai tua nei ne kua “ufiufi” ke he tala mitaki. Ko lautolu nei kua nakai tua ne nakai fai tauteaga ke fekafekau ki a Iehova, ne fakamaama e Paulo fakamua: “Ka hoko ke he vaha ke mafoki ai ke he Iki [Iehova], ti uta kehe ai e ufiufi.”​—2 Korinito 3:16; 4:4.

Falu tagata nakai tua ne putoia ke he mahani kolokolovao po ke tapuaki tupua. (2 Korinito 6:15, 16) Pete ia, nakai totoko oti ai ke he tau fekafekau ha Iehova. Falu kua fakakite e fiafia ke he kupu moli. Tokologa ne ha ha ai e tau hoa Kerisiano ti kua fiafia ke nonofo mo lautolu. (1 Korinito 7:12-14; 10:27; 14:22-25; 1 Peteru 3:1, 2) Pete ia, ne tumau a Paulo ke fakaaoga e tau kupu “ia kua nakai tua” ke he tau tagata takitokotaha, tuga ne tokutoku i luga, ne kua nakai fai vala he fakapotopotoaga Kerisiano ne ha ha ai ‘a lautolu ne tua ke he Iki.’​—Gahua 2:41; 5:14; 8:12, 13.

Ko e matapatu fakaakoaga ia 2 Korinito 6:14 ko e takitakiaga uho ma e tau Kerisiano ke he tau fahi oti he moui mo e fa mahani ke fatiaki ka foaki e fakatonuaga iloilo ma e tau Kerisiano hane kumi hoa he fakamauaga. (Mataio 19:4-6) Ko e Kerisiano tukulele kua papatiso ne fakailoilo he nakai kumi hoa he fakamauaga ki a lautolu e tau tagata kua nakai tua, ha ko e tau mena uho, tau foliaga, mo e tau talitonuaga he tau tagata kua nakai tua ne kehekehe mamao mai he Kerisiano moli.

Ka e kua mogoia e tau tagata takitokotaha ne fakaako e Tohi Tapu mo e fakalataha ke he fakapotopotoaga Kerisiano? Ka e kua a lautolu ko e tau tagata fakailoa nakaila papatiso? Ko e tau tagata kua nakai tua kia a lautolu? Nakai. Ko e tau tagata takitokotaha ne kua talia e kupu moli he tala mitaki mo e hane tupu tolomaki atu ke he papatisoaga kua nakai lata ke fakahigoa ko e tau tagata kua nakai tua. (Roma 10:10; 2 Korinito 4:13) Ato papatiso a Konelio ne fakahigoa a ia “ko e tagata mahani-Atua, mo e matakutaku ke he Atua.”​—Gahua 10:2.

Kua iloilo kia mogoia, ma e Kerisiano tukulele ke kumi fakamahaniaga mo e fakamauaga ke he tagata ne kua talia ke eke mo tagata fakailoa nakaila papatiso, ka talahau fakakikili, ko e fakatonuaga ha Paulo ne fakamau ia 2 Korinito 6:14 kua nakai hagaao ke he tuaga nei? Nakai, kua nakai pulotu e mena ia. Ko e nakai pihia he ha? Kakano ha ko e fakatonuaga fakahako ne talahau e Paulo hagaao ke he tau takape Kerisiano. Ne tohi e Paulo: ‘Ti toka noa ai a ia ke mau mo e tane kua loto ki ai, ka kia lata mo e Iki.’ (1 Korinito 7:39) Ke fakalautatai mo e fakatonuaga ia, ko e tau Kerisiano ne kua tukulele kua fakamalolo ke kumi e tau hoa ma e fakamauaga ki a lautolu hokoia ni “kia lata mo e Iki.”

Ko e heigoa e kakano he talahauaga “kia lata mo e Iki” mo e talahauaga ne tata ki ai ‘ke he  Keriso’? Ne tutala a Paulo ke he tau tagata takitokotaha ‘ke he Keriso’ po ke “kia lata mo e Iki” ia Roma 16:8-10 mo e Kolose 4:7. Ka totou e koe e tau kupu ia, to kitia e koe ko lautolu ia ko e ‘tau eke gahua fakalataha,’ ‘lautolu kua polamitaki,’ ‘tau matakainaga fakahele,’ ‘tau fekafekau fakamoli,’ mo e ‘tau fekafekau fakalataha.’

Ko e magaaho fe he taha ka eke mo ‘fekafekau ke he Iki’? To tupu e mena ia ka taute fakamakai e ia e gahua kua lata he fekafekau mo e fakatikai ni e ia a ia. Fakamaama e Iesu: “Ko e tagata ka fia mui mai kia au, aua neke omaoma a ia kia ia, ka e nikiti a hana satauro, mo e mui mai ai kia au.” (Mataio 16:24) Kua kamata e tagata ke mui ke he Keriso mo e foaki katoatoa a ia ke he finagalo he Atua he magaaho ka fakatapu e ia a ia ke he Atua. Ka mole ia, ti foaki e ia a ia ke papatiso mo e eke mo fekafekau fakauku ti talia e tuaga ki mua ha Iehova ko e Atua. * Ti, ke ‘mau kia lata mo e Iki’ kua kakano ke mau mo e tagata ne kua fakatata ko e tagata kua talitonu moli a ia, “ko e fekafekau [ne tukulele] he Atua mo e Iki ko Iesu Keriso.”​—Iakopo 1:1.

Ko e tagata hane fakaako e Tohi Tapu mo e Tau Fakamoli a Iehova mo e hane holo mitaki ki mua fakaagaga kua lata ke nava ki ai. Pete ia, kua nakaila tukulele e ia a ia ki a Iehova mo e foaki e ia a ia ke he moui fekafekau mo e aga foaki. Kua hane fa e taute agaia e ia e tau hikihikiaga kua lata. Kua lata ia ia ke fakaoti katoatoa e tau hikihikiaga lalahi ne kua putoia he eke mo Kerisiano tukulele mo e papatiso ato manamanatu ke he taha hikiaga lahi foki he moui, tuga e fakamauaga.

Ko e tomatomaaga mitaki nakai ma e Kerisiano ke kumi fakamahaniaga mo e tagata ne hihiga ke holo mitaki ki mua he hana fakaakoaga Tohi Tapu​—liga mo e amaamanakiaga ke fakatalitali ato papatiso a ia to mau mo ia? Nakai. Ko e tau fatuakiloto he tagata fakaako Tohi Tapu kua liga fakaligoa ka iloa e ia ko e taha e Kerisiano tukulele kua manako ke mau mo ia ka e nakai mau ato papatiso a ia.

Ke he laulahi he tau magaaho, na fai fakakaupaaga ni e magaaho he eke e tagata mo tagata fakailoa nakaila papatiso, ato hokotia a ia ke papatiso. Ti ko e fakatonuaga i luga ke mau ni kia lata mo e Iki kua fai kakano uho. Ka e kua mogoia e tagata kua hokotia tuai ke he tau tau kua lata ke mau, ne tupu hake he magafaoa Kerisiano, kua hakahakau i loto he fakapotopotoaga ke he loga e tau tau, ti kua eke mo tagata fakailoa nakaila papatiso? Ka pihia, ko e heigoa ne taofi aki a ia mai he foaki e moui hana ki a Iehova ke he tukuleleaga? Ko e ha ne tehatehaua ai a ia? Kua fai fakauaua kia a ia? Ha kua ai ko e tagata nakai kua tua a ia, kua nakai lata ke totoku a ia “kia lata mo e Iki.”

Ko e fakatonuaga ha Paulo ke he fakamauaga kua aoga ma tautolu. (Isaia 48:17) Magaaho ka tukulele tokoua e tau momoui he tau hoa kua amaamanaki ke mau ki a Iehova, ko e foaki katoatoa ha laua ko e taha ke he taha he fakamauaga kua mau niva, ko e fakaveaga fakaagaga. Kua tatai e tau mena uho mo e tatai e tau foliaga ha laua. Kua lahi mahaki e putoiaaga he mena nei ke he fakafetuiaga fiafia. Mua atu, he ‘mau kia lata mo e Iki,’ kua fakakite he taha e mahani fakamoli ki a Iehova, mo e to takitaki he mena ia ke he tau monuina tukulagi, ha kua ‘mahani fakamoli a koe [Iehova] kia ia kua mahani fakamoli.’​—Salamo 18:25.

[Matahui Tala]

[Fakatino he lau 31]

‘Mahani fakamoli a koe [Iehova] kia ia kua mahani fakamoli’