Omapulo Ovatangi

Momukanda wa 2 Ova Kolindu 6:14, ovalie Paulu ati “ovo kwehetavela”?

Paulu wahoneka momukanda wa 2 Ova Kolindu 6:14, okuti: “Muhelipakei kokanga ike na vana vehetavela.” Tyina tutanga umwe nawa onovelesikulu ononkhwavo, tumona okuti ovanthu Paulu ati kavetavela ha vomewaneno-ko.

Paulu waviyulile Ovakilisitau, mokonda ankho velitwala monombonge, okutuala omphela yavo ‘kovanthu vehetavela’. (1 Ova Kolindu 6:6) Paulu wapoia okuti ovatumini kavetavela, mokonda kavafende Huku. Momukanda wavali kova Kolindu Paulu wati, Satanasi wahika konondunge mba vana vokwehetavela. Komaiho ovanthu ovo vokwehetavela kulinga ngatyina kwahikwa notyinyanga vahamone ovipuka oviwa Huku mekevelingila komutwe wandyila. Ovanthu vokuhetavela vetupu etyi valinga vafende Siovaa. Paulu wati: “Tyina umwe akondoka ku Siovaa, otyinyanga tyipolwa-ko.” — 2 Ova Kolindu 3:16; 4:4.

Vamwe vokuhetavela valiatela kovitumino vya Huku nokufenda ovilolo. (2 Ova Kolindu 6:15, 16) Vamwe kavetavela umwe mahi tupu vehole Onombangi mba Siovaa, vehole Ondaka ya Huku. Ovanthu ovanyingi vokwelinepa velihole unene, nii vala kavasoko okuti nthiki imwe vapondola okulihenga. (1 Ova Kolindu 7:12-14; 10:27; 14:22-25; 1 Petulu 3:1, 2) Mwaina ovanthu Paulu apopia okuti, “kavetavela” ovo vana vokuheli mewaneno veheli kumwe na vana “vokutavela ku Tatekulu”. — Ovilinga 2:41; 5:14; 8:12, 13.

Etyi tyipopia 2 Ova Kolindu 6:14, tyitukwatesako unene movipuka ovinyingi tulinga, haunene tyikwatesako vana veli nokwovola ou mavelinepe nae. (Mateusi 19:4-6) Ovanthu vokwelipakula ku Siovaa avambatisalwa, tyina vahanda okunepa oo okunepwa, kavakaovola ovanthu vokuhetavela. Mokonda ovipuka vilinga omunthu ufenda Huku kavilii nevi vilinga ovanthu ovo vokuhetavela.

Ovanthu vokulongeswa Ombimbiliya veya komaliongiyo onombangi mba Siovaa, novanthu vokwehenembatilswe, navo vatiwa ovanthu vokuhetavela? Au. Ovanthu vokuli nokulongeswa Ondaka ya Huku, vena umwe nokulikwatehila opo nthiki imwe navo vambatisalwe. Ovo havoko ovokwehetavela. (Ova Loma 10:10; 2 Ova Kolindu 4:13) Pwetyi Koloneliu ankho ehenembatisalwe, watilwe “ankho ufenda Huku”. — Ovilinga 10:2.

Mwaina ine omukanda wa 2 Ova Kolindu 6:14, kaupopi omunthu wehenembatisalwe, opo omunthu wambatisalwa upondola okulinepa nou wehenembatilwe? Au. Omokonda yatyi? Omokonda yetyi Paulu apopilla ovahepe. Wahoneka okuti: “Wayovoka, upondola okunepwa nou ahanda, mahi omu Tatekulu vala.” (1 Ova Kolindu 7:39) Onondaka ombo Mbulekesa okuti omunthu wa Huku una okunepa vala mu “Tatekulu.”

Onondaka ombo okuti omu “Tatekulu nokuti, “omu Kilisitu” mbahanda okutiwi? Tyina utanga omukanda Ova Loma 16:8-10 no wo Ova Kolosu 4:7 momono okuti ovanthu Paulu apopia okuti “omu Kilisitu” no “mu Tetukulu” ankho omapanga ae, vana ankho aundapa navo movilinga vya Huku.

Onalupi omunthu akala “Omupika wa Tatekulu”? O putyina ahalingi vala ngetyi mwene ahanda. Sesusi watile: “Inkha umwe pu onwe uhanda okundandula, kapondola okukalako palae muene, una okulityindila omuti wae wemone iya atualako okundandula” (Mateusi 16:24) Omunthu ukala vala omulanduli wa Kilisitu utavelwa umwe na Huku, tyina elipakula ku Huku pahe ambatisalwa. a Ngotyo, ‘Okunepa mu Tatekulu’ okulinepa nomunthu walekesale okuti utavela ku Huku wokwelipakula akale “omupika wa Huku, na Tatekulu Sesusi Kilisitu.” — Tiaku 1:1.

Namphila ovanthu vokuna nokulongeswa Ombimbiliya veli umwe nokulikwatehila pala vapame motyili, mahi no ngotyo nkhele kavelipakulile ku Siovaa, kavayekelepo ovipuka aviho opo vemufende. Omwenyo wavo kaveupakulile pomaoko a Siovaa. Vena okulinga vali ovipuka ovikwavo. Vesukisa Okulipakula ku Siovaa avambatisalwa, tyina nkhele vehenesoke okunepa ine okunepwa.

Ine omunthu umwe uli nokulikwatehila opo nthiki imwe ambatisalwe, okuti omunthu una wambatisalwa-le upondola okuhimbika okulihanda nae tyina amambatisalwa pahe avelinepe? Au. Katyaviukile mokonda omunthu upondola pahe akuluminya vala okumbatisalwa mokonda yove.

Mwene omunthu ukala vala omuivisi apahakala ehimbwe ambatisalwa. Etyi tyapopiwa apa tyokulinepa vala mu tatekulu hatyipopio-ko vala. Pamwe omunthu umwe wekulila umwe meumbo Lionombagi mba Siovaa, una eti liokunepa oo okunepwa, wakalale omwisi kohale, mahi no ngotyo nkhele kenembatisalwe. Oityi ahambatisalelwa? Okuti una tyimwe tyimutyilika? Una tyimwe ahanoñgonokele nawa? Omunthu oo haeko watiwa owokwehetavela mahi tupu keli-ko “mu Tatekulu.”

Etyi Paulu apopia tyayemba kotyinepo, tyina tutyitavela tyitukwatesako. (Isaías 48:17) Tyina ovanthu aveho velipakula ku Siovaa, otyinepo tyavo tyikala vali nawa, vetyivili okupameka oupanga wavo na Siovaa. Vahambukwa mokonda valingila kumwe ovipuka, katyiti vala ulinga etyi, ou ulinga etyi. Tupu tyina tulinepa vala ‘mu Tatekulu’ tulekesa okuti tutavela ku Huku. ‘Vana vetavela ku Huku mavakapewa ovipuka ovinyingi oviwa.’ — Salmo 18:25.

[Okatoi]

[Olutalatu]

‘Vana vetavela ku Huku mavakapewa ovipuka ovinyingi oviwa.’