Кӕсджыты фарстытӕ

2 Коринфӕгтӕм 6:14 Павел «ӕнӕуырнӕгты» тыххӕй куы дзырдта, уӕд кӕй кой кодта?

2 Коринфӕгтӕм 6:14 мах кӕсӕм: «Ма ӕркъул кӕнут уӕ сӕртӕ искӕйы ӕфсондзы бын ӕнӕрӕстытимӕ [«ӕнӕуырнӕгтимӕ», НФ]». Стих кӕцӕй ист у, уыцы скъуыддзагмӕ ӕнӕхъӕнӕй куы ӕркӕсӕм, уӕд зыны, Павел чырыстон ӕмбырдӕй чи нӕу, уыдоны кой кӕй кодта. Уымӕн ма бӕлвырдгӕнӕнтӕ ис Библийы ӕндӕр стихты дӕр, уыцы бынӕтты дӕр Павел пайда кӕны дзырдтӕй «ӕнӕуырнӕг» кӕнӕ «ӕнӕуырнӕгтӕ».

Зӕгъӕм, Павел чырыстӕттӕн уайдзӕф кӕны, сӕ хъаст «ӕнӕуырнӕджыты размӕ» кӕй хастой, уый тыххӕй (1 Коринфӕгтӕм 6:6, НФ). Ам ӕнӕуырнджытӕ сты тӕрхоны лӕгтӕ — Коринфы тӕрхондӕтты кусджытӕ. Павел йӕ дыккаг фыстӕджы фыссы, зӕгъгӕ, Сайтан «ӕнӕуырнджытӕн... бакуырм кодта сӕ зонд». Ахӕм ӕнӕуырнджыты цӕстытӕ ӕмбӕрзт сты — хорз хабар нӕ зонынц. Цӕмӕн у афтӕ? Павел загъта: «Куы аздӕхынц Хицаумӕ, уӕд уыцы ӕмбӕрзӕн ист ӕрцӕуы». Ӕмӕ уыдоны та нӕ фӕнды Иегъовӕмӕ аздӕхын, лӕггад ын кӕнын (2 Коринфӕгтӕм 3:16; 4:4).

Ӕнӕуырнджытӕй иуӕй-иутӕ сты закъонхалджытӕ ӕмӕ гуымирытӕн кувджытӕ (2 Коринфӕгтӕм 6:15, 16, НФ). Фӕлӕ уыдонӕй алчи Иегъовӕйы лӕггадгӕнджыты ныхмӕ нӕ цӕуы. Иуӕй-иуты сӕ фӕнды ӕцӕгад базонын. Бирӕтӕн сӕ цардӕмбӕлттӕ сты Ӕвдисӕнтӕ ӕмӕ амондджынӕй цӕрынц семӕ, хицӕн кӕныны фӕнд сӕм нӕй (1 Коринфӕгтӕм 7:12—14; 10:27; 14:22—25; 1 Петры 3:1, 2). Фӕлӕ Павел йӕ фыстӕджыты дзырд «ӕнӕуырнӕг»-ӕй пайда кӕны, уӕлдӕр куыд загътам, афтӕмӕй чырыстон ӕмбырдӕй чи нӕу, уыдоны кой кӕнгӕйӕ. Чырыстон ӕмбырдмӕ та хауынц, Хицау кӕй уырны, ахӕмтӕ (Куыстытӕ 2:41; 5:14; 8:12, 13).

2 Коринфӕгтӕм 6:14 цы уагӕвӕрд ис, уый чырыстӕттӕн ахсджиаг зондамынд у сӕ царды алы фӕзилӕны дӕр. Арӕх ӕй ӕрхӕссынц, цардӕмбал ссарын кӕй фӕфӕнды, уыцы чырыстӕттӕн (Матфейы 19:4—6). Нывонддзырд чи радта ӕмӕ донаргъуыд чи райста, уыцы чырыстон йӕхицӕн, кӕй зӕгъын ӕй хъӕуы, ӕмкъай ӕнӕуырнджыты ’хсӕн нӕ агурдзӕн, уымӕн ӕмӕ уыдон ӕцӕг чырыстӕттӕй тынг хицӕн кӕнынц се ’гъдау, сӕ динӕй ӕмӕ царды цӕмӕ тырнынц, уымӕй.

Фӕлӕ цы зӕгъӕн ис, Библи чи ахуыр кӕны ӕмӕ чырыстон ӕмбырдмӕ чи цӕуы, уыдонӕй? Ӕнӕаргъуыд хъусынгӕнджытӕй та? Уыдон ӕнӕуырнджытӕ сты? Нӕ. Хорз хабар йӕ зӕрдӕмӕ чи айста ӕмӕ донаргъуыд райсынмӕ бӕрӕг къахдзӕфтӕ чи кӕны, уыдоны ӕнӕуырнджытӕ схонӕн нӕй (Ромӕгтӕм 10:10; 2 Коринфӕгтӕм 4:13). Корнилий цалынмӕ донаргъуыд нӕ райста, уӕдмӕ дӕр ӕй зыдтой «хорзнамысджын ӕмӕ Хуыцауӕй тӕрсӕг» лӕгӕй (Куыстытӕ 10:2).

Цымӕ раст уаид, аргъуыд чырыстон ӕнӕаргъуыд хъусынгӕнӕгимӕ куы ӕмбӕлид ӕмӕ йемӕ йӕ цард баиу кӕныныл куы архаид, кӕд Павел 2 Коринфӕгтӕм 6:14 цы уынаффӕ радта, уый бӕлвырдӕй ахӕм хъуыддагмӕ нӕ хауы, уӕддӕр? Нӕ, уый зондджын ми нӕ уаид. Цӕуылнӕ? Уымӕн ӕмӕ чырыстон сылгоймӕгтӕй идӕдз чи у, уыдоны тыххӕй Павел комкоммӕ загъта: «Сӕрибар у мой скӕнынмӕ, кӕмӕ йӕ фӕнды, уымӕ, ӕрмӕст Хицауы мидӕг» (1 Коринфӕгтӕм 7:39). Куыд уынӕм, афтӕмӕй, аргъуыд чырыстон йӕхицӕн цардӕмбал хъуамӕ агура ӕрмӕстдӕр «Хицауы мидӕг».

Цы нысан кӕны «Хицауы мидӕг» ӕмӕ уый ӕнгӕс дзырдбаст «Чырыстийы мидӕг»? Ромӕгтӕм 16:8—10 ӕмӕ Колоссӕгтӕм 4:7 Павел дзуры, «Чырыстийы мидӕг» кӕнӕ «Хицауы мидӕг» чи уыд, уыдоны тыххӕй. Ацы стихтӕ куы бакӕсӕм, уӕд фендзыстӕм, уыцы  адӕймӕгтӕ кӕй сты «Чырыстийы мидӕг фӕлтӕрд», «уарзон ӕфсымӕртӕ», «иузӕрдион кусджытӕ» ӕмӕ «ӕмкусджытӕ Хицауы мидӕг».

Адӕймаг ӕмкусӕг кӕнӕ цагъар «Хицауы мидӕг» кӕд свӕййы? Цагъар цы фӕаразы, уый барвӕндонӕй куы фӕаразы ӕмӕ йӕхиуыл куы бавдисӕн кӕны, уӕд. Йесо ӕмбарын кӕны: «Кӕд искӕйы фӕнды Мӕн фӕстӕ цӕуын, дӕхиуыл ӕвдисӕн бакӕн ӕмӕ райс дӕ дзуар ӕмӕ рацу Мӕ фӕстӕ» (Матфейы 16:24). Адӕймаг Хуыцауӕн нывонддзырд куы ратты, Чырыстийы фӕдыл цӕуын уӕд райдайы, ӕмӕ Хуыцауы фӕндон ӕххӕст кӕнынӕн дӕр йӕхи ӕгасӕй уӕд ратты. Уый фӕстӕ донаргъуыд райсы, Иегъовӕ Хуыцау ӕй йӕ лӕггадгӕнӕгӕй снысан кӕны ӕмӕ Хуыцауы хорзӕх ссары *. Уӕдӕ «Хицауы мидӕг мой скӕнын» амоны, дӕ цард ахӕмимӕ баиу кӕнын, ӕцӕг уырнӕг кӕй у, уый йӕ хъуыддӕгтӕй кӕмӕн зыны, ома «Хуыцауы ӕмӕ Хицау Йесо Чырыстийы [аргъуыд] цагъар» чи у (Иаковы 1:1).

Адӕймаг Иегъовӕйы Ӕвдисӕнтимӕ Библи кӕй ахуыр кӕны ӕмӕ йӕ уырнындзинад кӕй фидар кӕны, уый раппӕлинаг хъуыддаг у. Фӕлӕ уый нырма Иегъовӕйӕн нывонддзырд нӕ ратта ӕмӕ удуӕлдайӕ лӕггад кӕнын йӕ царды фӕндаг нӕма сси. Уый ныр дӕр ма ивы, йӕ царды йӕ цытӕ хъӕуы фӕивын, уыдӕттӕ. Цалынмӕ царды ахӕм ахсджиаг къахдзӕф скӕна,— бинонты хъуыддаг бакӕна,— уӕдмӕ йӕ хъӕуы ноджы ахсджиагдӕр къахдзӕфтӕ скӕнын: нывонддзырд раттын ӕмӕ донаргъуыд райсын.

Цымӕ раст уаид чырыстон, Библи ӕнтыстджынӕй чи ахуыр кӕны, ахӕм нӕлгоймагимӕ (сылгоймагимӕ) куы ӕмбӕлид ӕмӕ куы хъуыды кӕнид, зӕгъгӕ, донаргъуыд куы райса, уӕд нӕ къухтӕ ӕрфысдзыстӕм? Нӕ, уый раст нӕ уаид. Библи чи ахуыр кӕны, уый куы зона, ӕмӕ аргъуыд хъусынгӕнӕджы йӕ цард уыимӕ баиу кӕнын фӕнды, фӕлӕ цалынмӕ донаргъуыд райса, уӕдмӕ йӕм ӕнхъӕлмӕ кӕсдзӕн, уӕд гӕнӕн ис ӕмӕ ӕрмӕст уый тыххӕй дӕр архайа донаргъуыд райсыныл.

Фылдӕр хатт адӕймаг ӕнӕаргъуыд хъусынгӕнӕг вӕййы цыбыр рӕстӕджы дӕргъы, цалынмӕ донаргъуыд нӕ райсы, уӕдмӕ. Ӕмӕ уымӕ гӕсгӕ уынаффӕ, бинонтӕ скӕнут ӕрмӕстдӕр Хицауы мидӕг, зӕгъгӕ, зын ӕххӕстгӕнӕн нӕу. Фӕлӕ цы зӕгъӕн ис, чырыстон бинонты ’хсӕн чи схъомыл, бирӕ азты дӕргъы ӕмбырды хъуыддӕгты ӕнӕзивӕгӕй чи архайы ӕмӕ ӕнӕаргъуыд хъусынгӕнӕг дӕр чи у, ахӕм адӕймагӕй? Ахъуыды кӕнӕм, Иегъовӕйӕн йӕ цард цӕуылнӕ нывонд кӕны? Цӕуылнӕ хӕссы уымӕ йӕ ныфс? Дызӕрдыг истӕуыл кӕны, мыййаг? Кӕд ӕнӕуырнӕг нӕу, уӕддӕр дзы уый зӕгъӕн нӕй, ӕмӕ «Хицауы мидӕг» ис.

Павел ӕмкъайады фӕдыл цы уынаффӕ радта, уый нӕ пайдайӕн у (Исай 48:17). Сӕ цард баиу кӕнынмӕ чи хъавы, уыдон кӕд сӕхи Иегъовӕйӕн снывонд кодтой, уӕд кӕрӕдзийӕн цы дзырд раттой, уымӕн уыдзӕн фидар, монон бындур. Уыдон сты уыцы иу ӕгъдауыл хӕст, царды сын ис ӕмхуызон нысӕнттӕ. Уый стыр ахъаз у, цӕмӕй бинонтӕ амондджынӕй цӕрой. Уымӕй уӕлдай ма, бинонтӕ «Хицауы мидӕг» чи скӕны, уыцы адӕймаг равдисы, Иегъовӕйыл иузӕрдион кӕй у, ӕмӕ уый та хӕссы ӕнусон арфӕдзинӕдтӕ. Ацы хъуыддаг уымӕн афтӕ у, ӕмӕ «иузӕрдион адӕймагыл [Иегъовӕ] у иузӕрдион» (Псалом 18:25, НД [17:26]).

[Фиппаинаг]

[Ныв 31 фарсыл]

«Иузӕрдион адӕймагыл [Иегъовӕ] у иузӕрдион».