Pregunta di Lektor

Ta na ken Pablo ta referí ora e ta usa e palabra “inkrédulonan” na 2 Korintionan 6:14?

Nos ta lesa na 2 Korintionan 6:14: “No uni boso mes den yugo desigual ku inkrédulonan.” Si nos wak e konteksto, ta bisto ku Pablo tabata papia di personanan ku klaramente no tabata miembro di e kongregashon kristian. E komprondementu aki ta ser apoyá pa otro versíkulonan di Beibel ku ta registrá Pablo su uso di e palabra “inkrédulo” òf “inkrédulonan.”

Por ehèmpel, Pablo a skual e kristiannan pasobra nan a bai korte “dilanti di inkrédulonan.” (1 Korintionan 6:6) Aki, e inkrédulonan tabata huesnan ku a sirbi den e sistema hudisial di Korinto. Den Pablo su di dos karta, el a deklará ku Satanas “a siega mente di esnan ku no ta kere” òf di “e inkrédulonan” [NW]. E wowo di e inkrédulonan ei tabata tapá ku un “velo” i p’esei nan no a mira e bon nobo. E inkrédulonan aki no a mustra ningun interes pa sirbi Yehova, ya ku mas promé Pablo a splika: “Ora ku un hende kombertí na Señor e velo ta wòrdu kitá.”—2 Korintionan 3:16; 4:4.

Algun inkrédulo a partisipá den maldat òf idolatria. (2 Korintionan 6:15, 16) Sin embargo, no ta tur inkrédulo ta oponé e sirbidónan di Yehova. Tin di nan ta mustra interes den e bèrdat. Hopi ruman kristian tin kasá inkrédulo ku gustosamente ta keda kasá ku nan. (1 Korintionan 7:12-14; 10:27; 14:22-25; 1 Pedro 3:1, 2) Sin embargo, Pablo konsistentemente a apliká e palabra “inkrédulo” na personanan ku, manera nos a menshoná ariba, no tabata parti di e kongregashon kristian, ya ku e kongregashon a konsistí di ‘hende ku ta kere den Señor.’—Echonan 2:41; 5:14; 8:12, 13.

E prinsipio ku nos ta haña na 2 Korintionan 6:14 ta un guia balioso pa kristiannan den tur sirkunstansia di bida i hopi bes e ta ser sitá pa mustra ku e ta un konseho sabí pa kristiannan ku ta buska un kasá. (Mateo 19:4-6) Un kristian dediká i batisá, sabiamente no ta buska un kasá entre hende inkrédulo, ya ku e norma- i balornan moral, metanan i kreensianan di hende inkrédulo ta hopi distinto for di esnan di un kristian berdadero.

Pero kiko di personanan ku ta studia Beibel i ta asosiá ku e kongregashon kristian? Kiko di esnan ku ta publikadónan no-batisá? Nan tambe ta inkrédulo? Nò. Nos no mester yama personanan ku a aseptá e bèrdat di e bon nobo i ku ta progresando den direkshon di boutismo, inkrédulo. (Romanonan 10:10; 2 Korintionan 4:13) Promé ku Cornelio a batisá, Beibel ta yam’é “un hòmber deboto ku tabata teme Dios.”—Echonan 10:2.

Pues anto, lo ta sabí pa un kristian dediká buska pa namorá i kasa ku un persona ku a ser aseptá komo un publikadó no-batisá, ya ku, estriktamente bisá, Pablo su konseho ku ta pará skirbí na 2 Korintionan 6:14 lo no ta apliká den e kaso ei? Nò, esei no ta sabí. Dikon nò? Debí na e konseho direkto ku Pablo a duna relashoná ku biudanan kristian. Pablo a skirbi: “E ta liber pa kasa ku ken ku e ta deseá, basta ta den Señor.” (1 Korintionan 7:39) Na armonia ku e konseho ei, kristiannan dediká ta ser animá pa buska kasá solamente entre esnan ku ta “den Señor.”

Kiko e ekspreshon “den Señor” ta nifiká i tambe e ekspreshon paresido “den Kristu”?  Pablo a papia di personanan ku tabata “den Kristu” òf “den Señor” na Romanonan 16:8-10 i Kolosensenan 4:7. Si bo lesa e versíkulonan aki, lo bo ripará ku e personanan ei ta ‘kompañeronan-di-trabou,’ ‘hende aprobá,’ ‘rumannan stimá,’ ‘sirbidónan fiel’ i ‘kompañeronan den sirbishi’ òf “ko-esklabo den Señor” [NW].

Ki ora un persona ta bira un ‘esklabo den Señor’? Esei ta ora ku boluntariamente e ta hasi loke un esklabo tin ku hasi i ta nenga su mes. Hesus a splika: “Si un hende kier bin mi tras, lag’é nenga su mes, . . . i sigui mi.” (Mateo 16:24) Un persona ta kuminsá sigui Kristu i ta someté su mes kompletamente na e boluntat di Dios ora e dediká su mes na Dios. Despues di esei, e ta presentá su mes pa ser batisá i ta bira un minister ordená ku tin un posishon aprobá dilanti di Yehova Dios. * Pues anto, ‘kasa den Señor’ ta nifiká kasa ku un persona ku a demostrá ku e ta realmente un kreyente, un ‘esklabo dediká di Dios i di Señor Hesukristu.’—Santiago 1:1, NW.

Un persona ku ta studia Beibel ku Testigunan di Yehova i ku ta hasiendo bon progreso spiritual ta digno di elogio. Sin embargo, e no a dediká su mes ainda na Yehova i no a komprometé su mes pa hiba un bida di sirbishi i sakrifisio. Ainda e ta hasiendo e kambionan nesesario. E tin ku kaba di hasi e kambionan grandi ku ta enbolbí den bira un kristian dediká i batisá, promé ku e kuminsá pensa riba un otro kambio grandi den bida, manera por ehèmpel matrimonio.

Lo ta konsehabel pa un kristian buska pa namorá un persona ku aparentemente ta hasiendo bon progreso den su studio di Beibel, podisé ku e intenshon di warda te ora ku e persona batisá promé ku e kasa kuné? Nò. Pasobra e studiante di Beibel inkonsientemente lo por batisá pa e motibu inkorekto si e sa ku un kristian dediká ke kasa kuné pero lo no hasi esei tanten ku e no batisá.

Por lo general, un persona ta un publikadó no-batisá pa solamente un periodo di tempu limitá, te ora ku e progresá te na e punto di boutismo. Pues e konseho menshoná ariba pa kasa solamente den Señor no ta irasonabel. Pero kiko di un persona ku tin edat pa kasá, ku a lanta den un famia kristian, i tin hopi aña aktivo den e kongregashon i ku ta sirbi komo un publikadó no-batisá? Wèl, kiko ta strob’é di entregá su bida na Yehova mediante dedikashon? Dikon e ta vasilá? Akaso e tin duda? Ounke e no ta un inkrédulo, nos no por bisa ku e ta “den Señor.”

Pablo su konseho tokante matrimonio ta pa nos benefisio. (Isaias 48:17) Ora ku ámbos futuro kasá a dediká nan mes na Yehova, nan kompromiso na otro den matrimonio tin un fundeshi sólido i spiritual. Nan ta kompartí e mesun norma- i balornan moral i e mesun metanan. Esaki ta kontribuí masha hopi na un matrimonio felis. Ademas, dor di ‘kasa den Señor,’ un persona ta mustra lealtat na Yehova, i esei ta hiba na bendishonnan duradero, pasobra Yehova “ta fiel pa esun ku ta fiel.”—Salmo 18:25, BPK.

[Nota]

[Plachi na página 31]

Yehova “ta fiel pa esun ku ta fiel”