Pregunta di Lector

Ta na ken Pablo ta referi ora e ta uza e palabra “incredulonan” na 2 Corintionan 6:14?

Nos ta lesa na 2 Corintionan 6:14: “No uni boso mes den yugo desigual cu incredulonan.” Si nos wak e contexto, ta bisto cu Pablo tawata papia di personanan cu claramente no tawata miembro di e congregacion cristian. E comprondemento aki ta ser apoya pa otro versiculonan di Bijbel cu ta registra Pablo su uzo di e palabra “incredulo” of “incredulonan.”

Por ehempel, Pablo a scual e cristiannan pasobra nan a bai corte “dilanti di incredulonan.” (1 Corintionan 6:6) Aki, e incredulonan tawata huesnan cu a sirbi den e sistema hudicial di Corinto. Den Pablo su di dos carta, el a declara cu Satanas “a ciega mente di esnan cu no ta kere” of di “e incredulonan” [NW]. E wowo di e incredulonan ei tawata tapa cu un “velo” y pesei nan no a mira e bon nobo. E incredulonan aki no a mustra ningun interes pa sirbi Yehova, ya cu mas prome Pablo a splica: “Ora cu un hende comberti na Señor e velo ta wordo kita.”—2 Corintionan 3:16; 4:4.

Algun incredulo a participa den maldad of idolatria. (2 Corintionan 6:15, 16) Sinembargo, no ta tur incredulo ta opone e sirbidonan di Yehova. Tin di nan ta mustra interes den e berdad. Hopi ruman cristian tin casa incredulo cu gustosamente ta keda casa cu nan. (1 Corintionan 7:12-14; 10:27; 14:22-25; 1 Pedro 3:1, 2) Sinembargo, Pablo consistentemente a aplica e palabra “incredulo” na personanan cu, manera nos a menciona ariba, no tawata parti di e congregacion cristian, ya cu e congregacion a consisti di ‘hende cu ta kere den Señor.’—Echonan 2:41; 5:14; 8:12, 13.

E principio cu nos ta haya na 2 Corintionan 6:14 ta un guia balioso pa cristiannan den tur circunstancia di bida y hopi bes e ta ser cita pa mustra cu e ta un conseho sabi pa cristiannan cu ta busca un casa. (Mateo 19:4-6) Un cristian dedica y batisa, sabiamente no ta busca un casa entre hende incredulo, ya cu e norma- y balornan moral, metanan y creencianan di hende incredulo ta hopi distinto for di esnan di un cristian berdadero.

Pero kico di personanan cu ta studia Bijbel y ta asocia cu e congregacion cristian? Kico di esnan cu ta publicadonan no batisa? Nan tambe ta incredulo? No. Nos no mester yama personanan cu a acepta e berdad di e bon nobo y cu ta progresando den direccion di bautismo, incredulo. (Romanonan 10:10; 2 Corintionan 4:13) Prome cu Cornelio a batisa, Bijbel ta yam’e “un homber deboto cu tawata teme Dios.”—Echonan 10:2.

Pues anto, lo ta sabi pa un cristian dedica busca pa enamora y casa cu un persona cu a ser acepta como un publicado no batisa, ya cu, strictamente bisa, Pablo su conseho cu ta para skirbi na 2 Corintionan 6:14 lo no ta aplica den e caso ei? No, esei no ta sabi. Dicon no? Debi na e conseho direct cu Pablo a duna relaciona cu biudanan cristian. Pablo a skirbi: “E ta liber pa casa cu ken cu e ta desea, basta ta den Señor.” (1 Corintionan 7:39) Na harmonia cu e conseho ei, cristiannan dedica ta ser anima pa busca casa solamente entre esnan cu ta “den Señor.”

Kico e expresion “den Señor” ta nifica y tambe e expresion paresido “den Cristo”? Pablo a papia di personanan cu tawata  “den Cristo” of “den Señor” na Romanonan 16:8-10 y Colosensenan 4:7. Si bo lesa e versiculonan aki, lo bo ripara cu e personanan ei ta ‘compañeronan-di-trabou’, ‘hende aproba’, ‘rumannan stima’, ‘sirbidonan fiel’ y ‘compañeronan den sirbishi’ of “co-esclabo den Señor” [NW].

Ki ora un persona ta bira un ‘esclabo den Señor’? Esei ta ora cu boluntariamente e ta haci loke un esclabo tin cu haci y ta nenga su mes. Hesus a splica: “Si un hende kier bin mi tras, lag’e nenga su mes, . . . y sigui mi.” (Mateo 16:24) Un persona ta cuminsa sigui Cristo y ta somete su mes completamente na e boluntad di Dios ora e dedica su mes na Dios. Despues di esei, e ta presenta su mes pa ser batisa y ta bira un minister ordena cu tin un posicion aproba dilanti di Yehova Dios. * Pues anto, ‘casa den Señor’ ta nifica casa cu un persona cu a demostra cu e ta realmente un creyente, un ‘esclabo dedica di Dios y di Señor Hesucristo.’—Santiago 1:1, NW.

Un persona cu ta studia Bijbel cu Testigonan di Yehova y cu ta haciendo bon progreso spiritual ta digno di elogio. Sinembargo, e no a dedica su mes ainda na Yehova y no a compromete su mes pa hiba un bida di sirbishi y sacrificio. Ainda e ta haciendo e cambionan necesario. E tin cu caba di haci e cambionan grandi cu ta envolvi den bira un cristian dedica y batisa, prome cu e cuminsa pensa riba un otro cambio grandi den bida, manera por ehempel matrimonio.

Lo ta consehabel pa un cristian busca pa enamora un persona cu aparentemente ta haciendo bon progreso den su studio di Bijbel, podise cu e intencion di warda te ora cu e persona batisa prome cu e casa cu ne? No. Pasobra e studiante di Bijbel inconcientemente lo por batisa pa e motibo incorecto si e sa cu un cristian dedica kier casa cu ne pero lo no haci esei tanten cu e no batisa.

Por lo general, un persona ta un publicado no batisa pa solamente un periodo di tempo limita, te ora cu e progresa te na e punto di bautismo. Pues e conseho menciona ariba pa casa solamente den Señor no ta irasonabel. Pero kico di un persona cu tin edad pa casa, cu a lanta den un famia cristian, y tin hopi aña activo den e congregacion y cu ta sirbi como un publicado no batisa? Wel, kico ta strob’e di entrega su bida na Yehova mediante dedicacion? Dicon e ta basila? Acaso e tin duda? Aunke e no ta un incredulo, nos no por bisa cu e ta “den Señor.”

Pablo su conseho tocante matrimonio ta pa nos beneficio. (Isaias 48:17) Ora cu ambos futuro casa a dedica nan mes na Yehova, nan compromiso na otro den matrimonio tin un fundeshi solido y spiritual. Nan ta comparti e mesun norma- y balornan moral y e mesun metanan. Esaki ta contribui masha hopi na un matrimonio felis. Ademas, door di ‘casa den Señor’, un persona ta mustra lealtad na Yehova, y esei ta hiba na bendicionnan duradero, pasobra Yehova “ta fiel pa esun cu ta fiel.”—Salmo 18:25, BPK.

[Nota]

[Plachi na pagina 31]

Yehova “ta fiel pa esun cu ta fiel”