Au Uianga a te Aronga Tatau

Ia 2 Korinetia 6:14, koai ma ta Paulo e taiku ra iaia e taangaangara i te tuatua “aronga akarongo kore ra”?

Ia 2 Korinetia 6:14, te tatau ra tatou: “Auraka kotou e kapitiia ma te tau kore i te aronga akarongo kore ra.” Me akara tatou i te katoaanga o te tuatua, kua papu e te tuatua ra a Paulo ki te aronga e kare tikai e tuanga no te putuputuanga Kerititiano. Kua turuia teia marama anga e tetai au irava Pipiria ke mai tei rekoti i ta Paulo taangaanga anga i te tuatua “tangata akarongo kore” me kare te “aronga akarongo kore ra.”

Ei akaraanga, kua akaapa a Paulo i te au Kerititiano no te aere anga ki te akavaanga “ki mua katoa oki i te aroaro o te aronga akarongo kore ra.” (1 Korinetia 6:6) I konei, te aronga akarongo kore ko te au akava ia te tavini ra i roto i te akatereanga akavaanga o Korinetia. I roto i te rua o tana reta, kua tata a Paulo ia Satani e kua ‘akapoiri i te au manako o te aronga akarongo kore.’ Kua ‘araiia’ te au mata o taua aronga akarongo kore ra mei te tuatua meitaki. Kare roa teia aronga akarongo kore i akaari ana i te inangaro kia tavini ia Iehova, mei te mea e kua akataka mai ana a Paulo i mua ana: “Kia ariu ra te tangata [“kia Iehova,” NW] ra, e kiriti keia ïa taua arai ra.”​—2 Korinetia 3:16; 4:4, NW.

Kua piri atu etai aronga akarongo kore i roto i te ravenga kino me kare te akamori itoro. (2 Korinetia 6:15, 16) Inara, kare te katoatoa e patoi ana i te au tavini o Iehova. Kua akaari etai i te inangaro i roto i te tuatua mou. E manganui e e au tokorua Kerititiano to ratou e kua mataora i te nooanga kia ratou. (1 Korinetia 7:12-14; 10:27; 14:22-25; 1 Petero 3:1, 2) Inara, kua akono putuputu a Paulo i taua tuatua “tangata akarongo kore ra” ki te aronga, tei taikuia i mua akenei, e kare e tuanga no te putuputuanga Kerititiano, tei ki i te “aronga ra i akarongo i te Atu.”​—Angaanga 2:41; 5:14; 8:12, 13.

Te kaveinga tei kiteaia ia 2 Korinetia 6:14 e aratakianga puapinga tikai no te au Kerititiano i roto i te au turanga o te oraanga e kua putuputu i te taikuia e ko te ako anga kite pakari no te au Kerititiano te kimi ra i tetai tokorua akaipoipo. (Mataio 19:4-6) Kare tetai Kerititiano papetito, akatapuia ma te pakari ra e kimi atu i tetai tokorua akaipoipo i rotopu i taua aronga akarongo kore ra, mei te mea ra e e tuke tikai te au turanga puapinga, te au akakoroanga, e te au irinaki a te aronga akarongo kore mei te aronga o tetai Kerititiano mou ra.

Inara, akapeea ra, no te aronga te apii ra i te Pipiria e te kapiti ra ki te putuputuanga Kerititiano? Akapeea te aronga e au papuritia e kare i papetitoia ake? E aronga akarongo kore ainei ratou? Kare. Ko te aronga tei ariki i te tuatua meitaki o te tuatua mou e te tere meitaki ra ki mua ki te papetitoanga kare e tau kia kapikiia e e aronga akarongo kore ra. (Roma 10:10; 2 Korinetia 4:13) I mua ake i tona papetitoanga kua kapikiia a Korenelio e “tangata akono i te Atua, e mataku oki aia i te Atua.”​—Angaanga 10:2.

I reira, e mea kite pakari ainei, no tetai Kerititiano akatapuia i te aruaru i tetai pirianga e te akaipoipo anga ki tetai tangata e kua arikiia ei papuritia kare i papetitoia, mei te mea ra, i te tuatuaanga tika tikai, kare te ako anga tei rekotiia ia 2 Korinetia 6:14 e tau ana ki taua turanga ra? Kare, kare te reira i te mea kite pakari. No teaa ra? No te ako tika tikai ta Paulo i oronga no runga i te au Kerititiano takaua. Kua tata a Paulo: “Kua matara aia kia akaipoipo ki tana i anoano ra kia tau ra i te Atu.” (1 Korinetia 7:39) Kia rotai ki taua akoanga, te raurauia ra te au Kerititiano akatapuia kia kimi i te au tokorua akaipoipo i rotopu ua i te aronga “tei tau ra i te Atu.”

Eaa oki te aiteanga o te tuatua tei “tau ra i te Atu” e tetai atu tuatua “i te Mesia nei”? Kua tuatua a Paulo no te aronga “i te Mesia nei” me kore “i te Atu nei” ia Roma 16:8-10 e Kolosa 4:7. Me tatau koe i taua au irava ra, ka kite mai koe i taua aronga ra e e ‘au oa rave  angaanga,’ ‘au tangata akatikaia ïa,’ ‘au taeake akaperepere ïa,’ ‘au orometua tuatua-mou,’ e te ‘au taeake tavini.’

Akapeea tetai e riro mai ei e “tavini i roto i te Atu”? Ka tupu te reira me puareinga ua aia i te rave i ta te tavini ka rave e kia akaruke aia iaia uaorai. Kua akataka mai a Iesu e: “Ko tei inangaro i te aru mai iaku, e akaruke aia iaia uaorai, e rave i tana [“rakau tamamae,” NW], ka aru mai ei iaku.” (Mataio 16:24) Ka akamata tetai tangata i te aru ia Karaiti e i te kauraro takiri iaia uaorai ki te anoano o te Atua me akatapu aia iaia uaorai ki te Atua. I muri akera, ka oronga aia iaia uaorai no te papetitoanga e kua riro mai ei orometua akataoongaia ma tetai turanga arikiia i mua i te Atua ko Iehova. * I na, i reira, te aiteanga e kia ‘akaipoipo tei tau ra i te Atu’ koia oki kia akaipoipo ki tetai tangata tei akaari mai e e tangata irinaki tikai aia, ko tetai “tavini [akatapuia] no te Atua, e no te Atu ra no Iesu Mesia.”​—Iakobo 1:1.

Ko tetai tangata te apii ra i te Pipiria ki te Au Kite o Iehova e te tere meitaki ra ki mua i te pae vaerua ka tau kia akameitakiia. Inara, kare ake rai aia i akatapu ake iaia uaorai kia Iehova e kua tuku atura iaia uaorai ki tetai oraanga tavinianga e te atinga. Te rave ra rai aia i te au tauianga umuumuia. Ka anoanoia aia i te akaoti i te au tauianga maata, tei o mai i te akariro anga ei Kerititiano akatapuia, tei papetitoia i mua ake ka akamanako atu ei i tetai tauianga maata o te oraanga, mei te akaipoipoanga ra.

E mea tau ainei no tetai Kerititiano kia aruaru i tetai aereanga ma tetai tangata te akaraanga e te tere meitaki ra i tana apii Pipiria—penei ma te manakonako anga e ka tiaki kia papetitoia aia i mua ake ka akaipoipo ei iaia? Kare. Ka oripu ua mai te au akakoroanga a te tangata apii ra i te Pipiria me kite mai aia e te inangaro ra tetai Kerititiano akatapuia i te akaipoipo iaia inara kare aia e rave i te reira kia papetito roa ia aia.

No te maataanga o te taime, ka riro mai tetai tangata e papuritia kare i papetitoia no tetai tuatau e poto ua te taime, e tere meitaki ua atu aia ki te taime o te papetitoanga. No reira kare te ako anga i runga akenei kia akaipoipo tei tau i te Atu ra e mea tau koreia. Inara, akapeea ra, me kua tae te mataiti o tetai tangata kia akaipoipo, kua utuutuia i roto i tetai ngutuare tangata Kerititiano, kua maroiroi i roto i te putuputuanga no etai au mataiti, e te tavini ra ei papuritia kare i papetitoia ake? I na, eaa te tapu ra iaia i te oronga anga i tona oraanga kia Iehova na roto i te akatapuanga? Eaa oki aia i tapupu ei? E au manako ekoko anga ainei tona? Mei te mea ra e kare aia e ko tetai tangata akarongo kore ra, kare e rauka kia tuatuaia aia e tei “tau ra i te Atu.”

Ta Paulo ako anga no runga i te akaipoipoanga ei puapinga rai ia no tatou. (Isaia 48:17) Me kua akatapu kapiti te nga tokorua ka akaipoipo ia raua uaorai kia Iehova, ta raua koreromotu anga ki tetai e tetai i roto i te akaipoipoanga ra, e tango ketaketaia i te pae vaerua i roto i te akaipoipoanga. Aiteite to raua au turanga tau e e aiteite te au akakoroanga. Te akatupu maata atura teia ki tetai pirianga mataora tikai. Pera katoa, na te ‘akaipoipo anga kia tau ra i te Atu,’ te akaari ra tetai i te tu tiratiratu kia Iehova, e te taki atura te reira ki te au akameitakianga ope kore, no “te tangata tiratiratu ra, e tiratiratu katoa [a Iehova].”​—Salamo 18:25.

[Tataanga Rikiriki i Raro]

[Tutu i te kapi 31]

“Te tangata tiratiratu ra, e tiratiratu katoa [a Iehova]”