Atënë so azo ahunda

Na 2 aCorinthien 6:14, Paul ayeke sala tënë ti azo wa tongana lo sala kusala na atënë “azo so amä na bê pëpe”?

Na 2 aCorinthien 6:14, e diko: “I bungbi tele ti i pëpe na azo so amä na bê pëpe.” Tongana e bâ atënë so angoro ni, a yeke polele so Paul ayeke sala tënë ti azo so ayeke na yâ ti kongregation ti aChrétien pëpe. Ambeni versê nde so na yâ ni a wara atënë “zo so amä na bê pëpe” wala “azo so amä na bê pëpe”, so Paul asala kusala na ni, afa so nda ti tënë ni ayeke tongaso.

Na tapande, Paul asuku ngangu na aChrétien so ague na ngbanga na gbele “azo so amä na bê pëpe.” (1 aCorinthien 6:6). Ge, azo so amä na bê pëpe ayeke awafango ngbanga so ayeke sala kua na ada-ngbanga ti azo ti Corinthe. Na yâ ti use mbeti ti lo, Paul atene so Satan ‘asala si bibe ti ala so amä na bê pëpe aga ziba’. “Voile” akanga lê ti mara ti azo tongaso yongoro na nzo tënë. Azo so, so amä na bê pëpe, ayeke sala nzara ti sala na Jéhovah oko pëpe, teti so Paul afa nda ni kozoni: “Tongana mbeni zo achangé lege ti lo, lo ga na Seigneur, A lungula voile ni.”​—2 aCorinthien 3:16; 4:4.

Ambeni zo so amä na bê pëpe ayeke bi tele ti ala na yâ kengo-ndia wala vorongo yanda (2 aCorinthien 6:15, 16). Ye oko, a yeke ala kue pëpe si ake awakua ti Jéhovah. Ambeni ayeke sala nzara ti tâ tënë. Koli wala wali ti ambeni ayeke aChrétien, na ala yeke na ngia ti duti na ala (1 aCorinthien 7:12-14; 10:27; 14:22-25; 1 Pierre 3:1, 2). Mingi ni, Paul ayeke sala kusala na atënë “zo so amä na bê pëpe” ti fa azo so, tongana ti so a fa na nduzu ge, ayeke na yâ ti kongregation ti aChrétien pëpe; kongregation so azo ti yâ ni ayeke “azo so amä na bê na Seigneur”.​—Kusala 2:41; 5:14; 8:12, 13.

Kpengba-ndia so ayeke na 2 aCorinthien 6:14 ayeke mbeni nzoni fango lege teti ambage kue ti fini ti aChrétien, nga fani mingi, a yeke mû ni tongana wango ti ndara na aChrétien so ayeke gi koli wala wali teti mariage (Matthieu 19:4-6). Mbeni Chrétien so ayeke na ndara na so amû tele na Nzapa na awara batême awe ayeke gi pëpe koli wala wali so lo ye ti sala mariage na lo na popo ti azo so amä na bê pëpe, teti so asalango ye, aye so zo azia na gbele lo nga na atënë ti mabe ti azo so amä na bê pëpe ayeke nde mingi na ti tâ Chrétien.

Ye oko, a lingbi ti tene nyen na ndo azo so ayeke manda Bible nga ayeke bungbi oko na kongregation ti aChrétien? Ka ti ala so ayeke awafango tënë so ade ti wara batême pëpe? Ala yeke azo so amä na bê pëpe? Oko pëpe. A lingbi pëpe ti hiri azo so ayeda na tâ tënë na ayeke gue na li ni ti wara batême azo so amä na bê pëpe (aRomain 10:10; 2 aCorinthien 4:13). Kozoni na batême ti lo, a hiri Corneille, “zo so abata tënë ti Nzapa” nga zo so “akpe mbito ti Nzapa”.​—Kusala 10:2.

Tongaso, a yeke duti lege ti ndara teti mbeni Chrétien so awara batême awe ti gi ti bâ tele na ti sala mariage na mbeni zo so a yeda na lo ti ga wafango tënë so ade ti wara batême pëpe ndali ti so wango ti Paul na 2 aCorinthien 6:14 alingbi mbilimbili na lo pëpe? So ayeke lege ti ndara pëpe. Ngbanga ti nyen? Ngbanga ti wango so Paul amû polele na ndo aChrétien so ayeke awomua. Paul asû na mbeti: ‘Lo lingbi kamata koli so bê ti lo aye, me gi na yâ Seigneur.’ (1 aCorinthien 7:39). Ti gue oko na wango so, a wa aChrétien so awara batême awe ti gi koli wala wali so ala ye ti sala mariage na lo gi na popo ti ala so ayeke “na yâ Seigneur.”

Atënë “na yâ Seigneur”, nga mbeni so ague oko na ni “na yâ Christ”, aye ti tene nyen? Paul asala lani tënë ti azo so ayeke “na yâ Christ” wala “na yâ Seigneur” na aRomain 16:8-10 nga na aColossien 4:7. Tongana mo diko aversê so,  mo yeke bâ ande so azo so ayeke ‘afon zo na kusala’, ‘azo so a bâ so ala lingbi’, ‘aita so a ndoye ala mingi,’ ‘atâ zo ti kusala’ nga ‘afon zo boi’.

Na ngoi wa mbeni zo ayeke ga “boi na yâ Seigneur”? Lo yeke ga ni na ngoi so, na bê ti lo kue, lo yeke sala ye so mbeni boi ayeke sala, na lo ke tele ti lo mveni. Jésus afa nda ni: “Tongana mbeni zo aye ti ga na peko ti Mbi, a lingbi lo ke tele ti lo mveni, lo yô [keke ti pasi, NW ] ti lo, na lo ga na peko ti Mbi.” (Matthieu 16:24). Mbeni zo ayeke to nda ti mû peko ti Christ nga ti zia tele ti lo kue na gbe ti ye so Nzapa aye na ngoi so lo mû tele ti lo na Nzapa. Na pekoni, lo yeke mû tele na batême na lo ga wakua so a hiri lo na kusala na so ayeke na mbeni dutingo so a yeda na ni na gbele Jéhovah Nzapa. * Tongaso, ti sala mariage “na yâ Seigneur” aye ti tene ti sala mariage na mbeni zo so afa na gigi polele so lo yeke tâ wamabe, mbeni zo so amû tele ti lo ti ga “boi ti Nzapa na ti Seigneur Jésus Christ”.​—Jacques 1:1.

Zo so ayeke manda Bible na aTémoin ti Jéhovah na ayeke gue na li ni nzoni na lege ti yingo alingbi na gonda. Ye oko, ade lo mû tele ti lo na Jéhovah pëpe nga ade lo zia tele ti lo pëpe na yâ kusala so ahunda gbanzingo ye na tele. Lo ngbâ ti sala akota gbiango ye. Kozoni ti bi bê ti lo na ndo mbeni kota ye nde so ayeke gbian fini ti lo, tongana mariage, a hunda na lo ti sala akota gbiango ye kue so andu gango mbeni zo so amû tele na Nzapa, Chrétien so awara batême awe.

A yeke lege ti ndara teti mbeni Chrétien ti gi ti bâ tele na mbeni zo so lo bâ so lo yeke gue na li ni nzoni na yâ mandango Bible ti lo, peut-être na bibe ti ku juska lo wara batême awe si lo sala mariage na lo? Oko pëpe. Tongana mbeni wamandango Bible ahinga so mbeni Chrétien so awara batême awe aye ti sala mariage na lo, me gi na peko ti batême ti lo, li ti lo alingbi ti ga kirikiri na ndo atâ ye so ayeke pusu lo ti mû batême.

Mingi ni, mbeni zo ayeke duti wafango tënë so ade ti wara batême pëpe gi teti kete ngoi, kozoni si lo gue na li ni ti si na batême. Tongaso, wango ti sala mariage gi na yâ Seigneur so a mû ni na yâ ti aparagraphe so ahon ayeke tâ na lege ni. Ye oko, zo so alingbi na ngu ti mariage awe, so lo kono na yâ ti sewa so ayeke ti aChrétien, lo yeke sala kua na yâ kongregation teti angu mingi nga lo yeke sala kusala tongana wafango tënë so ade ti wara batême pëpe, ti lo a yeke tongana nyen? Tongana a yeke tongaso, ye wa ayeke kanga lege na lo ti mû fini ti lo na Jéhovah? Ngbanga ti nyen lo ngbâ ti ku? Lo yeke na kite na bê ti lo? Atâa so lo yeke pëpe mbeni zo so amä na bê pëpe, a lingbi pëpe ti tene so lo yeke “na yâ Seigneur.”

Wango ti Paul na ndo mariage ayeke teti nzoni ti e (Esaïe 48:17). Tongana azo use so aye ti sala mariage amû tele ti ala na Jéhovah awe, yanga so ala yeke mû na popo ti ala na yâ mariage ayeke na mbeni gunda ni so akpengba na lege ti yingo. Akpengba-ndia ti nzoni salango ye nga aye so ala zia na gbele ala ayeke oko. So ayeke kota ye so alingbi ti sala si mariage ti ala ayeke na ngia. Na ndo ni, na salango mariage “na yâ Seigneur”, mbeni zo ayeke fa dutingo be-biani ti lo na Jéhovah, na a yeke ga na adeba nzoni so aninga, teti ‘Jéhovah asala ye na be-biani na zo so ayeke be-biani.’​—Psaume 18:25, NW.

[Kete tënë na gbe ni

[Foto na lembeti 31]

‘Jéhovah asala ye na be-biani na zo so ayeke be-biani’