Fesili Mai le ʻAufaitau

I le 2 Korinito 6:14, LT, o ai na faasino atu i ai Paulo ina ua ia faaaogā le faaupuga, “ē lē talitonu”?

Ua tatou faitau i le 2 Korinito 6:14, e faapea: “Aua tou te amo faalēgatasi ma ē lē talitonu.” Afai e tatou te vaai i faamatalaga o loo siʻomia ai, e faaalia ai o loo tautala Paulo i tagata o ē e manino mai, e lē o ni tagata o le faapotopotoga Kerisiano. Ua lagolagoina lenei malamalamaga e isi mau o le Tusi Paia ia o loo faamauina ai le taʻua e Paulo o le faaupuga, “lē ua lē talitonu” po o “ē lē talitonu.”

O se faaaʻoaʻoga, na aʻoaʻia mamafa e Paulo ia Kerisiano ona o le ō atu i faamasinoga, “i luma o ē lē talitonu.” (1 Korinito 6:6, LT) I inei, o ē lē talitonu, o faamasino ia o loo auauna i le faia o faamasinoga i Korinito. I lana tusi lona lua, o loo taʻua ai e Paulo e faapea, o Satani “ua faatauasoina manatu o i latou o ē lē talitonu.” O na tagata lē talitonu, o loo ‘ufitia’ o latou mata mai le tala lelei. E lē o faia e nei tagata lē talitonu se gaoioiga e auauna iā Ieova, talu ai na faamatala muamua mai e Paulo e faapea: “Pe a liliu i le Alii, ona aveeseina ai lea o le ufiufi.”—2 Korinito 3:16; 4:4, LT.

O nisi tagata lē talitonu, o loo auai i soligatulafono po o le ifo i tupua. (2 Korinito 6:15, 16) Ae peitaʻi, e lē o i latou uma e tetee i auauna a Ieova. Ua faaalia e nisi le naunau fiafia i le upu moni. E toʻatele e iai a latou paaga Kerisiano ma o loo fiafia lava e nonofo faatasi ma i latou. (1 Korinito 7:12-14; 10:27; 14:22-25; 1 Peteru 3:1, 2) Ae peitaʻi, o loo faatatau ma le maumauaʻi upu a Paulo “o ē lē talitonu” i tagata na o loo taʻua i luga, e lē o auai i le faapotopotoga Kerisiano, ia e faia aʻe i ‘ē ua faatuatua i le Alii.’—Galuega 2:41; 5:14; 8:12, 13.

Ua avea le mataupu silisili i le 2 Korinito 6:14 ma taʻiala aogā mo Kerisiano i vala uma o le olaga, ma e masani lava ona sii mai ai se fautuaga atamai mo se Kerisiano o loo saʻilia se paaga faaipoipo. (Mataio 19:4-6) E lē saʻilia e se Kerisiano tuutoina atamai se paaga faaipoipo iā i latou e lē talitonu, talu ai, o tapulaa tau amio, o sini, ma talitonuga o ē e lē talitonu, e ese mamao lava mai i Kerisiano moni.

Ae faapefea i latou o ē o loo suʻesuʻe le Tusi Paia ma auaufaatasi ma le faapotopotoga Kerisiano? Ae faapefea i latou ua talaʻi e leʻi papatisoina? Po o i latou o ni tagata lē talitonu? E leai. O tagata ua talia le tala lelei o le upu moni, ma o loo agaʻigaʻi pea i luma i le papatisoga, e lē tatau ona taʻua o ni ē e lē talitonu. (Roma 10:10; 2 Korinito 4:13) A o leʻi papatisoina o ia, na taʻua Konelio o se “tagata amio Atua, ma le mataʻu i le Atua.”—Galuega 10:2.

Pe e atamai la mo se Kerisiano tuuina atu ona faia ni tuugātala ma faaipoipo atu ai i se tasi ua avea ma se tagata talaʻi e leʻi papatisoina, talu ai, e foliga mai e leʻi faasino atu le fautuaga a Paulo i le 2 Korinito 6:14 i lea tulaga? E leai, e lē atamai lenā mea. Aiseā? Talu ai ona o le fautuaga tuusaʻo a Paulo e faatatau i fafine Kerisiano ua oti a latou tane e faapea: “Ua saʻoloto o ia e faaipoipo ma lē ua loto i ai, tau lava i lē ua i le Alii.” (1 Korinito 7:39) I le ōgatusa ma lenā fautuaga, ua faalaeiauina ia Kerisiano tuuina atu ina ia saʻili ni paaga faaipoipo e tau lava o ē o “i le Alii.”

O le ā le uiga o le faaupuga “ua i le Alii” ma le isi faaupuga e fesootaʻi i ai, o “iā Keriso”? I le Roma 16:8-10 ma le Kolose 4:7 o loo talanoa ai Paulo e faatatau i tagata o ē o “iā Keriso” po o “i le Alii.” Afai e te faitauina nei fuaiupu, o le a e iloa ai o na tagata o ni ē  na ‘galulue faatasi,’ ‘ua taʻuleleia,’ ‘o uso pele,’ ‘auauna faamaoni,’ ma ‘o ē na auauna faatasi.’

O lē fea taimi e avea ai se tasi ma “auauna faatasi i le Alii”? Pe afai e loto malie e faia galuega e faia e se auauna, ma e lē toe pule o ia iā te ia lava. Ua faamatala mai e Iesu e faapea: “Ai se tasi e fia mulimuli mai ia te aʻu, aua neʻi usiusitai o ia iā te ia, a ia ave e ia lona satauro, i le mulimuli mai ai iā te aʻu.” (Mataio 16:24, LT ) E amata e se tasi ona mulimuli iā Keriso ma usiusitai atoatoa atu i le finagalo o le Atua pe a tuuina atu o ia lava i le Atua. Mulimuli ane, ona papatisoina ai lea o ia ma avea o se faifeʻau faatasi ma se tulaga faamaonia i luma o Ieova le Atua. * O lea la, o le ‘faaipoipo tau o lē ua i le Alii,’ o lona uiga, o le faaipoipo atu lea i se tasi ua faaalia o ia moni o se tagata talitonu, ma ua uma ona tuuina atu o se “auauna a le Atua ma le Alii o Iesu Keriso.”—Iakopo 1:1.

E ao foʻi ona faamālō atu i se tagata o loo suʻesuʻeina le Tusi Paia ma Molimau a Ieova, ma o loo lelei lona agaʻigaʻi i luma faaleagaga. Ae peitaʻi, e leʻi tuuina atu o ia iā Ieova ma taʻutino atu o le a ola e tusa ma le auaunaga ma lē toe usiusitai ai o ia iā te ia lava. O loo tauivi pea o ia e faia ni suiga talafeagai. E manaʻomia ona ia faia ni suiga atoatoa ina ia avea o se Kerisiano ua tuuina atu ma papatisoina, a o leʻi ulu atu i se isi suiga tele o le olaga, e pei o le faia o se faaipoipoga.

Pe e fautuaina le faia e se Kerisiano o ni tuugātala ma se tasi o loo lelei lona agaʻigaʻi i luma i lana suʻesuʻega faale-Tusi Paia atonu ma le manatu e faatali seʻi oo ina papatiso lea tagata ona faatoʻā lua faaipoipo lea? E leai. Pe afai e iloa e se tagata suʻesuʻe o le Tusi Paia o loo iai se Kerisiano tuuina atu o loo fia faaipoipo iā te ia, ae e lē mafai ona seʻiloga ua uma ona papatisoina o ia, e ono mafai la ona suia le māfuaaga e faia ai lana suʻesuʻega.

O le tulaga masani, o le tagata lea, o se tagata talaʻi e leʻi papatisoina mo na o sina taimi, seʻi vaganā ua agaʻigaʻi i luma ma ua papatisoina. O lea la, e lē leaga le fautuaga ia faaipoipo tau o lē ua i le Alii. Ae faapefea pe afai o se tasi ua oo i tausaga e mafai ona faaipoipo ai, o se na tausia aʻe i se aiga Kerisiano, ma ua tele tausaga o auai i le faapotopotoga, ma o se tagata talaʻi e leʻi papatisoina? Ia, ae o le ā le mea o taofia ai o ia mai le tuuina atu o lona ola iā Ieova? Aiseā e faatalatū ai? Pe e iai ni ona masalosaloga? E ui e lē o ia o se tagata e lē talitonu, ae e lē mafai ona taʻua o ia e faapea, “ua i le Alii.”

O le fautuaga a Paulo e faatatau i faaipoipoga, e mo lo tatou lelei. (Isaia 48:17) Pe afai ua tuuina atu uma e paaga e toʻalua o loo faamoemoe e faaipoipo o la ola iā Ieova, o le a mautū la le faavae faaleagaga o la laʻua tautoga i le faaipoipoga. E tutusa mea la te fiafia i ai ma o la sini. E matuā tele se sao o lenei mea i le fiafia ma le autasi o le faaipoipoga. E lē gata i lea, o le ‘faaipoipo tau o lē ua i le Alii,’ ua faaalia ai e se tasi lona faamaoni iā Ieova ma iʻu ai i le tele o faamanuiaga e oo i le faavavau, auā ‘e amio alofa Ieova’ i lē ua faamaoni.—Salamo 18:25.

[Faamatalaga pito i lalo]

[Ata i le itulau 31]

‘E amio alofa Ieova’ i lē ua faamaoni