Aksi fu leisiman

Soleki fa skrifi na ini 2 Korentesma 6:14, dan fu suma Paulus e taki te a e gebroiki den wortu „sma di no de na bribi”?

Na ini 2 Korentesma 6:14 wi e leisi: „No kon na ondro a srefi tyatyari nanga sma di no de na bribi.” Te wi e luku den tra vers lontu a tekst disi, dan a de krin fu si taki Paulus e taki fu sma di no de wan pisi fu a Kresten gemeente. Tra bijbeltekst pe Paulus e gebroiki den wortu „sma di no de na bribi”, e horibaka gi a fruklari disi.

Fu eksempre, Paulus e gi Kresten piri-ai fu di den ben e tyari den brada go na fesi krutu, „na fesi sma di no de na bribi” (1 Korentesma 6:6). Dyaso, den sma di no de na bribi na krutuman di e wroko na den krutubangi fu Korente. Na ini a di fu tu brifi fu Paulus, a ben taki dati Satan „breni a frustan fu sma di no de na bribi”. A gersi leki den ai fu den sma disi di no de na bribi, tapu nanga wan ’duku’, so taki den no man frustan a bun nyunsu. Den sma disi di no de na bribi, no du nowan muiti kwetikweti fu dini Yehovah, fu di Paulus ben fruklari na fesi: „Te den e drai go na Yehovah, dan a duku sa komoto.”—2 Korentesma 3:16; 4:4.

Son sma di no de na bribi e du kruktudu, noso den e anbegi falsi gado (2 Korentesma 6:15, 16). Ma a no ala sma di no de na bribi na gensman fu den futuboi fu Yehovah. Sonwan fu den e sori taki den wani sabi moro fu a waarheid. Furu fu den trow nanga wan Kresten brada noso sisa èn den de klariklari fu tan nanga a Kresten patna fu den (1 Korentesma 7:12-14; 10:27; 14:22-25; 1 Petrus 3:1, 2). Ma wi ben si na fesi kaba taki ibri tron te Paulus ben gebroiki den wortu „sma di no de na bribi,” dan a ben abi sma na prakseri di no de wan pisi fu a Kresten gemeente; wan gemeente di abi ’sma na ini di e bribi na ini Masra.’—Tori fu den Apostel 2:41; 5:14; 8:12, 13.

A gronprakseri di skrifi na ini 2 Korentesma 6:14, na wan warti sani di e yepi Kresten na ini ala afersi fu a libi. Furu tron, den gebroiki en fu gi koni rai na Kresten di e suku wan trowpatna (Mateyus 19:4-6). Wan Kresten di gi ensrefi abra na Gado èn di teki dopu kaba, e handri na wan koni fasi te a no e go suku wan trowpatna di no de na bribi; a sabi taki den markitiki, den marki di den sma dati poti gi densrefi, nanga a bribi fu den sortu sma dati de heri trafasi leki a di fu wan tru Kresten.

Ma fa a de nanga sma di e studeri Bijbel èn di e moksi densrefi nanga a Kresten gemeente? Fa a de nanga preikiman di no teki dopu ete? A de so taki den na sma di no de na bribi? Nôno. Sma di teki a waarheid fu a bun nyunsu èn di e go bun na fesi fu teki dopu, a no sma di no de na bribi (Romesma 10:10; 2 Korentesma 4:13). Bifo Kornelius ben teki dopu, den ben kari en ’wan man di e gi ensrefi na ini a dini fu Gado èn di e frede Gado’.—Tori fu den Apostel 10:2.

Te yu luku en bun, dan a rai di Paulus e gi na ini 2 Korentesma 6:14 no abi fu du nanga sma di e studeri Bijbel, èn nanga preikiman di no dopu ete. Ma efu dati de so, dan a ben o de wan koni sani gi wan Kresten di gi ensrefi abra na Gado fu hori nanga wan sma di de wan preikiman di no dopu ete, noso fu trow nanga so wan sma? Nôno, dati a no wan koni sani. Fu san ede? Fu di Paulus ben gi Kresten weduwe spesrutu rai di a ben skrifi: „A fri fu trow nanga suma a wani, soso na ini Masra” (1 Korentesma 7:39). Akruderi a rai disi, Kresten di gi densrefi abra na Gado e kisi a deki-ati fu suku trowpatna soso na mindri sma di de „na ini Masra”.

San den wortu „na ini Masra” èn sosrefi den wortu „na ini Krestes” wani taki?  Na ini Romesma 16:8-10 nanga Kolosesma 4:7, Paulus e taki fu sma di ben de „na ini Krestes”, noso sma di ben de „na ini Masra”. Te yu e leisi den vers disi, yu sa si taki den sma disi na ’kompe-wrokoman’, ’sma di Krestes feni bun’. Den na ’lobi brada’, ’getrow dinari’, èn den na ’kompe srafu’.

O ten wan sma e kon tron wan „srafu ini Masra”? Dati na te a sma de klariklari fu du san wan srafu musu du èn te a no e teri ensrefi moro. Yesus e fruklari: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka” (Mateyus 16:24). Te wan sma gi ensrefi abra na Gado, dan a e bigin waka baka Krestes èn a e saka ensrefi dorodoro fu du a wani fu Gado. Baka dati, a e teki dopu, èn a e tron wan sma di kisi a wroko fu preiki èn wan sma di Yehovah Gado feni bun. * Sobun, fu ’trow na ini Masra’ wani taki fu trow nanga wan sma di buweisi taki a e bribi trutru, èn taki a gi ensrefi abra leki wan „srafu fu Gado èn fu Masra Yesus Krestes”.—Yakobus 1:1.

Wan sma di e studeri Bijbel nanga Kotoigi fu Yehovah èn di e go na fesi na yeye fasi, musu kisi prèise. Ma a no gi ensrefi abra na Yehovah ete, èn a no pramisi ete fu dini Yehovah en heri libi langa èn fu de klariklari fu gi ensrefi dorodoro. A musu tyari prenspari kenki kon ete. A musu bigin luku san na den bigi kenki di a musu tyari kon fu tron wan Kresten di gi ensrefi abra na Gado èn di teki dopu, fosi a e bigin prakseri fu tyari wan tra bigi kenki kon na ini en libi, soleki fu trow.

A ben o de wan koni sani gi wan Kresten fu hori nanga wan bijbelstudenti di e studeri bun, so taki a kan trow nanga en baka te a teki dopu? Nôno. Efu wan bijbelstudenti sabi taki wan dopu Kresten wani trow nanga en soso te a teki dopu, dan a no ben o de krin fu si moro nanga sortu marki a bijbelstudenti wani teki dopu.

Furu tron, a de so taki wan sma e tan wan preikiman di no dopu ete fu wan syatu pisi ten nomo fu di te fu kaba a sa go na fesi èn teki dopu. Sobun, a no musu de wan muilek sani fu hori wisrefi na a rai fu san wi ben taki kaba, di e sori taki wan Kresten musu trow soso na ini Masra. Ma fa a de dan nanga wan sma di doro a yari fu trow, di kweki na ini wan Kresten osofamiri, di e wroko makandra nanga a gemeente wan langa pisi ten kaba, èn di e dini leki wan preikiman di no dopu ete? We, san hori a sma disi fu no gi en libi abra na Yehovah? Fu san ede a e draidrai fu du dati? A e tweifri? Aladi a no de wan sma di no de na bribi, toku wi no kan taki dati a de „na ini Masra”.

A rai di Paulus ben gi wi di abi fu du nanga a trowlibi, na gi a bun fu wi (Yesaya 48:17). Te ala tu sma di wani trow gi densrefi abra na Yehovah, dan a trowlibi fu den abi wan steifi fondamenti na yeye fasi. Den e hori densrefi na den srefi markitiki, èn den abi den srefi marki na ini a libi. Disi na wan bigi yepi fu abi wan koloku trowlibi. Boiti dati, te wan sma e ’trow na ini Masra’, dan a e sori taki a de loyaal na Yehovah, èn dati meki a sa kisi trutru blesi, fu di „nanga wan sma di de loyaal, [Yehovah] sa handri na wan loyaal fasi”.—Psalm 18:25.

[Futuwortu]

[Prenki na tapu bladzijde 31]

„Nanga wan sma di de loyaal, [Yehovah] sa handri na wan loyaal fasi”