Tuku katsiputunkgo tiku likgalhtawakgakgo

¿Tiku kalichuwinama Pablo nak 2 Corintios 6:14 akxni limaklakaskin tachuwin «tiku ni kanajlakgo»?

Nak 2 Corintios 6:14 likgalhtawakgayaw: «Ni lakxtum kakatatawilatit tiku ni kanajlakgo».Tuku pulana likgalhtawakgayaw kcapítulo akgchaxan masiya pi Pablo xkalichuwinama tiku ni makgtapakgsikgo kcongregación xla kstalaninanin Cristo. K’atanu versículos xalak Biblia apóstol limaklakaskin tachuwin «tiku ni kanajlakgo» uma kgalhmakgtaya tuku lichuwinamaw.

Akgtum li’akxilhtit, Pablo kastakyawalh kstalaninanin Cristo xlakata kalinkgolh makgapitsi xnatalankan kxlakatin «tiku ni kanajlanikgo Dios» (1 Corintios 6:6). Xlakata uma tuku lichuwinamaw, tiku ni kanajlanikgo Dios, wa jueces tiku kskujkgo ktribunal xalak Corinto. Kxlimaktiy carta Pablo lichuwinan pi Satanás, «kamalakgatsininit xtalakapastaknikan» tiku ni kanajlanikgo Dios wa xlakata «ni nakalakgchan xtaxkgakget xatlan tamakatsinin». Umakgolh latamanin ni limasiyakgonit pi skujnaniputunkgo Jehová, xlakata apóstol lichuwinalh xapulana versículos: «Akxni wi tiku lakgtaspita Jehová, makgenunikan lhakgat tuku litalakgatlapanit» (2 Corintios 3:16; 4:4).

Makgapitsi tiku ni kanajlanikgo Dios makgtlawakgo tuku nitlan o kakninanikgo tatlawamakgxtu (2 Corintios 6:15, 16). Pero ni putum lakatakikgo kskujnin Jehová. Makgapitsi katsiputunkgo tuku xaxlikana. Lhuwa na katatamakgaxtokgkgonit tiku kstalanina Cristo chu ni lamakgxtakgputunkgo (1 Corintios 7:12-14; 10:27; 14:22-25; 1 Pedro 3:1, 2). Pero Pablo limaklakaskin tachuwin «tiku ni kanajlanikgo Dios» akxni kalichuwinan tiku ni makgtapakgsikgo congregación xla kstalaninanin Cristo, chuna la pulana lichuwinaw, chu ni wa tiku tamakgtapakgsi kcongregación xla «tiku xkanajlanimakgolh Malana» (Hechos 2:41; 5:14; 8:12, 13).

Tuku lichuwinan 2 Corintios 6:14 lu kamakgtaya kstalaninanin Cristo tiku putsakgo xtastakyaw Dios chu makglhuwa limaklakaskinkan uma texto xlakata nakastakyawakan tiku tamakgaxtokgputunkgo (Mateo 19:4-6). Kstalanina Cristo tiku tamakamastaninit Dios chu tamununit nalimasiya liskgalala chu ni katiputsalh natatamakgaxtokga tiku ni kanajlani Dios, xlakata tuku lakgati, tuku tlawaputun chu tuku kanajla ni xtachuna tuku kanajla xaxlikana kstalanina Cristo.

Pero ¿tuku tlan nawanaw xlakata tiku likgalhtawakgakgo Biblia chu ankgo ktamakxtumit? ¿Chu tuku nawanaw xlakata tiku lichuwinan Dios pero ni tamununit? ¿Tlan nawanaw pi xlakan ni kanajlanikgo Dios? Ni. Tiku makgamakglhtinankgonit xaxlikana chu kstakma xtakanajlakan xlakata tlan natamunukgo ni nakalimapakuwiyaw tiku ni kanajlanikgo Dios (Romanos 10:10; 2 Corintios 4:13). Asta akxni nina xtamunu Cornelio xlilakgapaskan la tiku «xkakninani chu xkgalhini tapekua Dios» (Hechos 10:2).

Pero ¿tlan xtatamakgaxtokgli chatum kstalanina Cristo, tiku lichuwinan Dios maski nina tamununit, xlakata komo tuku lichuwinalh Pablo nak 2 Corintios 6:14 ni wa tiku kalichuwinamaka? Ni. ¿Tuku xlakata? Xlakata tastakyaw nema apóstol Pablo kamaxkilh kstalaninanin Cristo tiku xnikgonita xchixkukan. Xla tsokgli: «Tlan natatamakgaxtokga tiku xla nalakaskin, pero kajwatiya tiku kstalanina Malana» (1 Corintios 7:39). Xlakata tuku wan uma tastakyaw kamakgpuwantinikan kstalaninanin Cristo naputsakgo tiku natatamakgaxtokgkgo pero «kajwatiya tiku kstalanina Malana».

¿Tuku wamputun tachuwin «kajwatiya tiku kstalanina Malana» chu tachuwin «tiku Cristo tlan akxilha»? Anta kRomanos 16:8-10 chu Colosenses 4:7, Pablo kalichuwinan latamanin «tiku Cristo tlan akxilha» o «kajwatiya tiku kstalanina Malana». Akxni likgalhtawakgayaw umakgolh versículos, akxilhaw pi umakgolh latamanin litaxtukgo “skujnin”, “tiku tlan ka’akxilhkan”, “natalan tiku kapaxkikan”, chu “kskujnin Malana”.

¿Tuku kilhtamaku litaxtu chatum lataman «kskujni Malana»? Akxni xatapaxuwan tlawa tuku chatum skujni xlitlawat chu lakgmakgan tuku xla lakgati. Jesús wan: «Komo wi tiku kistalaniputun, akstu kalakgmakganka, chu katiyalh xkiwi nema makgapatinan chu chuntiya kakistalanilh» (Mateo 16:24). Chatum lataman tsuku stalani chu skujnani Cristo akxni tamakamastani Dios. Alistalh tamunu chu litaxtu chatum skujni tiku Jehová tlan akxilha. a Wa xlakata «kajwatiya tiku kstalanina Malana» natatamakgaxtokgkan kilhchanima natatamakgaxtokgkan chatum tiku limasiyanita pi xlikana «kskujni Dios chu Malana Jesucristo» (Santiago 1:1).

Lataman tiku katakgalhtawakgama xtatayananin Jehová chu stakma xtakanajla minini nawaniyaw pi tlan tuku tlawama. Pero nina tamakamastani Jehová chu nina skujnani chuna la xlilat. Chuntiya lakgpalima xlatamat chu chuntiyaku nalakgpali atanu nema lu xlakaskinka xlakata tlan kstalanina Cristo nalitaxtu chu natamunu, chu alistalh nalilakpuwan atanu talakgpalit nema nakgalhi kxlatamat, la tamakgaxtokgat.

¿Tlan xwa pi chatum kstalanina Cristo xlakpuwa xlitatawilat natlawa tiku uku kgalhtawakgama Biblia chu tasiya pi stakma xtakanajla, pero nakgalhkgalhi asta akxni natamunu xlakata tlan natatamakgaxtokga? Ni. Komo chuna xtlawalh ni liwana xkatsika tuku xlakata tamunuma xlakata katsiya pi kstalanina Cristo tatamakgaxtokgputun, pero ni katitamakgaxtokgkgolh komo nina tamunu.

Tiku limakgalhtawakgemaka Biblia, pulana lichuwinan Dios maski nina tamununit, asta akxni tlakg tatliwakglha xtakanajla chu tamunu. Wa xlakata tastakyaw kajwatiya natatamakgaxtokgkan tiku kstalanina Malana lu xlakaskinka. ¿Tuku nala komo tiku tamakgaxtokgputun, staknit k’akgtum familia xla kstalaninanin Cristo, chu akglhuwata kata makgtayanan kcongregación chu lichuwinan Dios pero ni tamununit? Komo chuna lama ¿tuku tlawanit pi ni natamakamastani Jehová? ¿Tuku xlakata makgapalama? ¿Wi tamasiy nema tuwa makgkatsi nakanajla? Maski nila wanaw pi ni kanajlani Dios na nila wanaw pi «kstalanina Malana».

Xtastakyaw Pablo xlakata tamakgaxtokgat lu xlakaskinka kimpalakatakan (Isaías 48:17). Akxni tiku tamakamastanikgonit Jehová lakpuwamakgo natamakgaxtokgkgo, tuku lakpuwamakgo natlawakgo tlan nakakitaxtuni xlakata kgalhikgo xtamakgtay Jehová. Watiya tuku kanajlakgo, tuku tlawaputunkgo chu uma nakamakgtaya xlakata xatapaxuwan natawilakgo ktamakgaxtokgat. Nachuna, «akxni kajwatiya tiku kstalanina Malana» natatamakgaxtokgaw limasiyaniyaw Jehová pi ni makgxtakgaw chu uma nakinkaliminiyan lhuwa tasikulunalin, xlakata “tiku ni namakgxtakgnan wix na ni katimakgxtakgti” (Salmo 18:25).

[Nota nema wi kpágina]

[Picture]

“Tiku ni namakgxtakgnan wix na ni katimakgxtakgti”