Ambe enga kurhanguarhijka ima enga arhintajka

¿Neechani arhikuekasïni Pablu 2 Korintu 6:​14 jimbo enga úrajka uandakuani “no jakajkutiika”?

Engachi jirinhantajka 2 Korintu 6:​14 arhintasïngachi: “Asï jáma je kúrhiani imeechani engaksï no jakajkutiika”. Ambe enga antesi ka tátsekua arhijka i bersikulurhu xarhatasïndi eska Pablu imani kʼuiripuecheri uandaxapka engaksï no kúnguarhikueri anapueka. Ka májkueni ambeksï xarhatasïni máteru bersikuluecha enga jimbo Apostoli Pablu úraajka uandakuechani “no jakajkuti” o “no jakajkutiicha”.

Por ejemplu, Pablu jurhimberantasïndi kristianuechani jimbokaksï jusgadurhu pájperaxapka imeecha japarini “engaksï no jakajkutiika” (1 Korintu 6:6). Jimini, no jakajkutiicha jindeesptiksï juesiicha engaksï Korintu anapu jusgadurhu ánchikuarhienga. Pablu segundu Karakata jimbo arhiaspti eska Satanási pápkʼanhastaaspka “paraksï no úni kurhanguni ka nóksï exeni” ka, ísï jimbo, nóksï úsïndi kurhanguni ambakiti aianhperakuani. I kʼuiripuechaksï útasï no xarhatasïni eskaksï uékasïnga marhuakuni Tata Diosï Jeobani, jimboka apostoli Pablu uandaspka máru bersikuluecharhu antesi: “Joperu engachi Tata Diosï Jeobaeri xanharu jimbo jámajka, pʼenonharhisïngachi” (2 Korintu 3:​16; 4:4).

Máru no jakajkutiichaksï pekadu úsïndi oksï diosï úkatechani kómarhiani (2 Korintu 6:​15, 16). Joperu, nóksï iáminduecha kurhunhiasïndi Tata Diosï Jeobaeri marhuariichani. Jarhastiksï máru engaksï uéjka míteni jurhimbikueri ambe. Ka uánikua máteruechaksï tembuchatixati o uambuchatixati kristianu ma jingoni ka uékasïndiksï seguiriini irekani imeecha jingoni (1 Korintu 7:​12-​14; 10:27; 14:22-​25; 1 Pedru 3:​1, 2). Joperu, apostoli Pablu seguirisïndi úrani uandakuani “no jakajkuti” para imani járhati kʼuiripuechani arhikuekani engachi antesi uandaakia, engaksï no kúnguarhikuarhu jaka, jima engaksï jakajkujka “Tatani” (Ukuecha 2:​41; 5:​14; 8:​12, 13).

Ambe enga uandajka 2 Korintu 6:​14 jarhuajperata máesti para kristianuecha iámindu ambe jimbo, ka someni úrakuarhesïndi para konseju íntsaani imeechani engaksï tembuperani uékajka (Mateu 19:​4-6). Kristianu ma enga aiakukuarhekia ka itsï atakuarhini jánhaskakua jingoni uaati ambe ma ka no jámaati tembuni o uambuchani no jakajkuti ma jingoni, jimboka ambe enga ima sánderu jukaparharajka, imeeri meteecha ka imeeri jakajkukuecha nóksï májkueniiska eska kristianueri ma.

Joperu, ¿ambechi uaa uandani imeecheri ambe engaksï jorhenguarhini jaka Biblieri ambe ka engaksï kúnguarhikuarhu anapuecha jingoni jarhajka? ¿Ka aianhpiricheria engaksï nótki itsï atakuarhitini jaka? ¿Iámindu imeechaksï no jakajkutiiski? Nómbe. Imeecha engaksï jorhenguarhini jaka ambakiti aianhperakueri jurhimbikua ambe ka engaksï jánguarhintani jaka orhepani uérakuni paraksï úni itsï atakuarhini, nóchi uaaka arhiani eskaksï no jakajkutiicheska (Roma 10:10; 2 Korintu 4:​13). Por ejemplu, Korneliu ante de itsï atakuarhini tʼuini ísï mítekateesptia komu nema enga “kánikua janhanharhienga Tata Diosïni ka enga chénharhienga” (Ukuecha 10:2).

Joperu, ¿sési japirini eska kristianu ma enga itsï atakuarhikia nobiani ma jatsipiringa ka eska tembuchapiringa imani ma jingoni enga aianhpiriikia joperu nótki itsï atakuarhini jarhani, jimboka ambe enga Pablu uandajka 2 Korintu 6:​14 jimbo no imeecherisï uandani jaka? Nómbe. ¿Andi? Imani ambakiti konseju jimbo enga apostoli Pablu íntsaapka kristiana tsïndiichani. Ima karaspti: “Ima uaati né uéjki jingoni uambuchantani, joperu koru jatsisti para Tateeri chúxapati ma jingontku uambuchantani” (1 Korintu 7:​39). Ini konsejuni jingoni, kristianuecha engaksï itsï atakuarhikia pʼímarhinhaxatiksï eskaksï solu tembuchaaka o uambuchani “Tateeri chúxapati ma jingontku”.

¿Ambeksï arhikuekasïni uandakuecha “Tateeri chúxapati” ka máteru uandakua enga jindeeka, “Kristuni marhuakuni”? Jimini Roma 16:​8-​10 ka Kolosasi 4:7 jimbo, Pablu uandaxapti ima kʼuiripuecheri engaksï “Kristuni” marhuakuni japka o engaksï mintsikeenga “Tatani”. Engachi arhiantajka ini bersikuluechani, exesïngachi eskaksï inde kʼuiripuecha ‘jarhuajpiriiska’ ‘erakukateecha’ ‘erachiicha engaksï kánikua xénchakateepka’ ‘imeecha engaksï sési marhuani japka’ ka imeecha engaksï ísï marhuani japka komu ‘jántspiriicha’.

¿Káni niárasïni nema marhuakuni “Tatani eska jántspiri ma”? Enga tsípiparini ka mintsita jingoni újka ambe ma eska jántspiri ma na újka ka enga ísku exekuarhijka. Jesúsi uandaspti iiri ambe: “Engareni nema uéjka chúxapuni, eska ísku exekuarhiaka, eska tarhatakuarhiaka imeeri chkarini enga jindeeka para no sési nitamakuarhini ka eskarini méntkisï chúxapaaka” (Mateu 16:24). Kʼuiripu ma ueenasïndi Tata Jesukristuni chúxapani ka úni iámindu ambe enga Tata Diosï uékajka jiáni enga aiakukuarhejka Tata Diosïni. Tátsekua, niárasïndi itsï atakuarhini ka marhuari máeni jimboka Tata Diosï Jeoba erakusïnga. a Ísï jimbo, ‘tembuchani o uambuchani Tateeri chúxapati ma jingoni’ arhikuekaasïndi eska uaaka ísï úni nemani jingoni enga xarhatakia eska sési jimbo jakajkuti máeska, ima “enga jántspikujka Tata Diosïni ka ístu Tata Jesukristuni” (Santiagu 1:1).

Kʼuiripu ma enga jorhenguarhini jarhajka Biblieri ambe Jeobaeri testiguecha jingoni ka orhepani uérani jarhani, kánikua sési úni jarhasïndi. Joperu, nótki aiakukuarhesïndi Tata Diosï Jeobani ka nótki arhisïndi eska íntskuaka imeeri tsípikuani para marhuakuni. Útasteru mójtakukuarhini jarhasïndi, ka jatsisïndi para ístu máteru ambe mójtakuni, jimboka kánikua jukaparhakua ambeeska paraka niáraaka aiakukuarheni Tata Diosïni ka itsï atakuarhini, ka jatsisti para ísï úni antede ueenani mójtakuni máteru ambe imeeri tsípikuarhu, komu tembuchani o uambuchani.

¿Sési japirini eska kristianu ma nobiani ma o nobiuni ma jatsipiringa enga jorhenguarhini japiringuia Biblieri ambe ka orhepani uérani jarhani, erokaparini eska inde kʼuiripu niárapiringa itsï atakuarhini paraksï jiájkani tembuperani? Nómbe. Jimboka jamberi úkua jukapirindi míteni sini inde kʼuiripu enga Biblieri ambe jorhenguarhini jaka itsï atakuarhiaka jimboka uékasïnga tembuchani o uambuchani ka no jimboka uékasïnga meru marhuakuni Tata Diosïni.

Sánderu sáni, ima enga Biblieri ambe jorhenguarhini jarhajka aianhpiri máesïndi enga nótki itsï atakuarhini jarhajka ma tiempujku, astaka sánderu sáni orhepani uéraaka, paraka uaaka itsï atakuarhini. Ísï jimbo, inde konseju enga jindeeka para Tateeri chúxapati ma jingontku tembuchani o uambuchani nójtsïni jukari ambe kurhachexati. Joperu, ¿ambe úpirini enga nema jatiriikia para tembuchani o uambuchani, ka enga familiarhu ma jimbo kʼuiripeka engaksï kristianueka, ka enga ióni marhuakia kúnguarhikuarhu ka enga aianhpiriika joperu nótki itsï atakuarhini jarhani? Enga ísïika, úpiringachi kurhamarhikuarhini ¿andisï nótki aiakukuarhejki Tata Diosï Jeobani? ¿Andisï erokuarhini jaki? ¿No seguru jarhaski? Nájkirukachi no uaaka uandani eska no jakajkuti máeska, nójtuchi uaaka uandani eska “Tateeri chúxapati máeska”.

Pablueri konseju para tembuperakueri ambe para juchaari sésiisti (Isaías 48:17). Engaksï tsimani kʼuiripuecha eratsetini jarhajkia tembuperani ka engaksï aiakukuarhetini jarhajkia Tata Diosï Jeobani jingoni, úsïndi eska imeecheri kompromisu sési jupindaskuarhitini jauaka Tata Diosïni jimbo. Májku ambeksï jukaparharasïndi ka májku meteechanksï uékasïndi uaani, inde ambe jarhuataasïndi parakaksï uaaka tsípikua jingoni irekani. Ístu, ‘Tateeri chúxapati ma jingontku tembuchani o uambuchani’, ma xarhatani jarhasïndi eska no jurajkusïnga Tata Diosïni Jeobani, ka inde ambe úsïndi eska ma kʼérati kóntperatechani jatsiauaka para méntkisï, jimboka ‘ima enga no méni jurajkujka Tata Diosïni imajtu no méni jurajkuati’ (Salmo 18:25).

[Nota]

[Imajeni]

‘Ima enga no méni jurajkuaka Tata Diosïni imajtu no méni jurajkuati’