Ebikaguzo Kuruga omu Basomi Baitu

Omu 2 Abakolinso 6:14, Paulo akaba namanyisa baha obuyakozeseze ekigambo “abatarukuikiriza”?

Omu 2 Abakolinso 6:14, nihagamba ngu: “Mutetaba nabatarukuikiriza okutainganaingana.” Kakuba twetegereza ebyetoroire ekyahandiikirwe kinu, nikyeyolekera kimu Paulo akaba nabaliza abantu abaali batali kicweka ky’ekitebe Ekikristaayo. Amakuru g’ebigambo binu nigasagikwa n’enkarra ezindi eza Baibuli ezirukwoleka Paulo n’akozesa ekigambo “atarukuikiriza” rundi “abatarukuikiriza.”

Ekyokurorraho, Paulo ajumirra Abakristaayo abatwara bataahi baabo omu mbuga z’ebiragiro omu maiso ‘g’abatarukwikiriza.’ (1 Abakolinso 6:6) Hanu, abatarukwikiriza nubo abacwi b’emisango omu mbuga z’ebiragiro ez’omu Kolinso. Omu bbaruha ye eyakabiri, Paulo agamba ngu Sitaani “akaigara amaiso gamagezi gabatarukuikiriza.” Amaiso g’abatarukwikiriza nkaabo ‘gaswekeriirwe’ hali amakuru amarungi. Abatarukwikiriza abo tibaine ekibakozereho kusobora kuheereza Yahwe nk’oku Paulo akaba asoboroire ngu omutima gwabo “obugulikahindukira [Yahwe] ekyokweswekerra kiriihibwaho.”​—2 Abakolinso 3:16; 4:4.

Abatarukwikiriza abamu baali nibejumbira omu kuramya ebisisani. (2 Abakolinso 6:15, 16) Baitu nabwo, abamu hali bo tibarukuhakaniza abaheereza ba Yahwe. Abamu booleka ngu nibagonza kumanya amananu. Baingi bali omu buswere n’Abakristaayo kandi kibasemeza kuba nabo. (1 Abakolinso 7:12-14; 10:27; 14:22-25; 1 Petero 3:1, 2) Baitu, Paulo akozesa muno ekigambo “abatarukuikiriza” hali abo abatali kicweka ky’Ekitebe Ekikristaayo nk’oku tusangirwe turozere eruguru, ekinyakurumu ‘abaikiririza omu Mukama.”​—Engeso Ezabakwenda 2:41; 5:14; 8:12, 13.

Omusingi ogurukusangwa omu 2 Abakolinso 6:14 guhabura Abakristaayo omu nyikara zoona kandi gukira kukozesebwa kuha obuhabuzi oburungi hali Abakristaayo abarukuserra ow’okutaaha nauwe obuswere. (Matayo 19:4-6) Omukristaayo anyakubatiziibwe taserra ow’arataaha nauwe obuswere omu bantu abatarukwikiriza, nk’oku engeso, ebigendererwa hamu n’enyikiriza zaabo nibyahukanira kimu haby’Omukristaayo ow’amananu.

Baitu kandi, abo abarukwega Baibuli kandi nibaija omu nsorrokano z’ekitebe Ekikristaayo? Kandi abarukuheereza nk’abatebezi abatakabatiziibwe? Nabo nibabarwa nk’abatarukwikiriza? Nangwa. Abantu abaikiriize amananu kandi nibakurakurana kusobora kuhika ha rulengo rw’okubatizibwa tibasemeriire kwetwa abatarukwikiriza. (Abarumi 10:10; 2 Abakolinso 4:13) Koruneryo obw’akaba atakabatiziibwe akaba n’ayetwa “omwerinzi ayatinaga Ruhanga.”​—Engeso Ezabakwenda 10:2.

Hati, nikiba kiri ky’amagezi Omukristaayo anyakubatiziibwe kujumbira n’okutaaha obuswere n’omuntu anyakwikiriziibwe kuheereza nk’omutebezi atakabatiziibwe nk’oku obuhabuzi bwa Paulo oburukusangwa omu 2 Abakolinso 6:14 butarukumukwataho? Nangwa, eki tikiri ky’amagezi. Habwaki? Habw’obuhabuzi Paulo yahaire Abakristaayo abafaakati. Paulo akahandiika ati: “Anyina obugabe okuswerwa owagonza; kyonka omu Mukama waitu.” (1 Abakolinso 7:39) Kusigikirra ha buhabuzi obu, Abakristaayo ababatiziibwe nibatererrwa kuserra ababarataaha nabo obuswere “omu Mukama waitu.”

Ekigambo “omu Mukama waitu” n’ekirukukisisana “omu Kristo” nibimanyisa ki? Paulo abazaaho abantu abaali bali “omu Kristo” rundi “omu Mukama” omu Abarumi 16:8-10 n’omu Abakolosai 4:7. Kakuba osoma enkarra ezi, noija kurora ngu abantu nkaabo nibabazibwaho, ‘nk’abakozi hamu naitwe,’ ‘abarukusiimwa,’ ‘abaisemu abarukugonzebwa,’ ‘abesigwa,’ kandi ‘abairu bataahi baitu.’

Ni di omuntu obw’afooka “mwiru omu Mukama waitu”? Eki kibaho obw’akora ebintu omwiru oby’asemeriire kukora kandi obw’ayerekesa wenka. Yesu n’asoborra ati: “Omuntu obwayenda okuija enyuma yange, ayeyangise wenka, ayetweke omutigwe ankuratire.” (Matayo 16:24) Omuntu atandika kukuratira Kristo n’okukora Ruhanga eby’agonza obw’ayehayo hali Ruhanga. Hanyuma, aikiriza kubatizibwa kandi afooka muheereza ow’arukusiimwa omu maiso ga Yahwe Ruhanga. * Nahabweki, ‘kuswera omu Mukama waitu’ nikimanyisa kutaaha obuswere n’omuntu anyakwolekere ngu mwikiriza ow’amananu, kandi anyakwehaireyo kuba “omuiru rubale wa Ruhanga na Mukama waitu Yesu Kristo.”​—Yakobo 1:1.

Omuntu ow’arukwega Baibuli n’Abakaiso ba Yahwe kandi ow’arukukurakurana omu by’omwoyo n’asiimwa. Baitu, naaba atakehaireyo hali Yahwe n’okuhayo obwomeezi bwe kumuheereza n’okwefeereza. Naaba akyaliyo n’akora empindahinduka ezirukwetaagisa. Asemeriire kubanza kukora empindahinduka ez’amaani ezirukwetaagisa kusobora kufooka Omukristaayo anyakwehaireyo kandi yabatizibwa, atakatekeriizeeho kukora encwamu ezindi ez’amaani kandi ezirahindura obwomeezi bwe, nk’okutaaha obuswere.

Ky’amagezi Omukristaayo kujumbira omuntu owarukwega Baibuli kandi n’akurakurana, n’ekigendererwa ky’okumulinda abatizibwe nukwo ataahe nauwe obuswere? Nangwa. Ebigendererwa by’omwegi nibisobora kuhinduka kakuba akimanya ngu Omukristaayo anyakwehaireyo n’agonza kutaaha nauwe obuswere baitu ngu tikirukwija kubaho kuhikya amazire kubatizibwa.

Ekirukukirayo obukuru kiri ngu omuntu aheereza nk’omutebezi ow’atakabatiziibwe kumara akasumi, kuhikya obw’akurakurana akahika ha rulengo rw’okubatizibwa. Nahabweki obuhabuzi obuturozere eruguru oburukukwata ha kuswera omu Mukama waitu nibwetegerezebwa kurungi. Baitu kandi, kakuba omuntu aba ahikize emyaka y’okutaaha obuswere, akuliire omu ka ey’Abakristaayo, aikaire n’ayejumbira omu ntekaniza z’ekitebe kumara emyaka, kandi n’aheereza nk’omutebezi atakabatiziibwe? Baitu, kiki ekimutangire kuhayo obwomeezi bwe hali Yahwe? Habwaki n’atiina? Nakyagurukyagurukya? N’obukiraaba ngu tarukubarwa nk’ow’atarukwikiriza, titusobora kugamba ngu ali “omu mukama waitu.”

Obuhabuzi bwa Paulo oburukukwata ha buswere nibutugasira. (Isaya 48:17) Abaswerangaine boona obubarukuba behaireyo hali Yahwe, obuswere bwabo nibutandikira ha musingi ogw’eby’omwoyo ogugumire. Nibebembeza engeso n’ebigendererwa ebirukusisana. Kinu kireeta okusemererwa kw’amaani omu ka. Ekindi, omuntu ‘obw’aswera omu Mukama waitu,’ ayoleka ngu mwesigwa hali Yahwe, kandi eki kirugamu emigisa ey’erukwikaraho habwokuba ‘hali omwesigwa [Yahwe] arayeyolekaga mwesigwa.’​—Zabuli 18:25.

[Obugambo obuli hansi]

[Ekisisani]

‘Hali omwesigwa [Yahwe] arayeyolekaga mwesigwa.’