Fesili Mai te Kau Fai‵tau

I te 2 Kolinito 6:14, ko oi ne fakasino ki ei a Paulo i ana pati “tino sē tali‵tonu”?

E fai‵tau tatou penei i te 2 Kolinito 6:14: “Ke mo a ma se paleni koutou i te otou ‵kau fakatasi mo tino sē tali‵tonu.” Kafai e onoono ki te manatu kātoa, e mautinoa me e faipati a Paulo ki tino kolā e se aofia eiloa i te fakapotopotoga Kelisiano. E ‵lago eiloa ki te manatu tenei a nisi fuaiupu i te Tusi Tapu kolā ne fakaaoga ei ne Paulo a pati “te tino sē talitonu” io me ko “tino sē tali‵tonu.”

E pelā eiloa mo te polopolokiga ne Paulo a Kelisiano kolā ne ‵tu ki te fono “ke fakamasino ne tino sē tali‵tonu.” (1 Kolinito 6:6) I te tulaga tenei, a tino sē tali‵tonu ko famasino i te fono tulafono a te kau Kolinito. I te lua o ana tusi, ne fai atu a Paulo me i “tino sē tali‵tonu . . . ko oti ne fakapouli olotou mafaufau” ne Satani. Ko oti ne ‵pono a mata o tino sē tali‵tonu penā ki se “veli” ke se lavea ne latou te tala ‵lei. A tino sē tali‵tonu konei ne seki ga‵sue eiloa o fai se mea ke tavini atu latou ki a Ieova, me ne fai muamua mai a Paulo: “Kafai e ‵fuli atu se tino ki a Ieova, ko tapale ei a te veli kea‵tea.”—2 Kolinito 3:16; 4:4.

E fai ne nisi tino sē tali‵tonu a amioga ma‵sei io me ifo ki tupua. (2 Kolinito 6:15, 16) Kae e se ko latou katoa e ‵teke ki tavini a Ieova. Ne fakaasi mai ne nisi tino a te fiafia ki te munatonu. E tokouke i a latou ne a‵vaga mo tino Kelisiano kae fia‵fia ke ‵nofo tasi mo latou. (1 Kolinito 7:12-14; 10:27; 14:22-25; 1 Petelu 3:1, 2) Kae ne fakasino atu faeloa ne Paulo a te pati “tino sē tali‵tonu” ki tino taki tokotasi, kolā ne taku mai i luga, me e se ne vaega o te fakapotopotoga Kelisiano, kolā e aofia fua i ei a “tino tali‵tonu ki te Aliki.”—Galuega 2:41; 5:14; 8:12, 13.

A te akoakoga fakavae i te 2 Kolinito 6:14 se fakatakitakiga tāua eiloa mō Kelisiano i feitu katoa o te olaga kae ne masani o fai sāle pelā me se manatu fakatonutonu poto mō Kelisiano kolā e salasala ki se avaga. (Mataio 19:4-6) Se mea poto eiloa māfai e se ‵sala atu se Kelisiano tukugina atu kae papatiso ki se avaga mai tino sē tali‵tonu, ona ko te ‵kese ‵mao o fakamoemoega, talitonuga mo mea e fakatāua ne tino sē tali‵tonu mo Kelisiano ‵tonu.

Kae pefea la a tino kolā e suke‵suke ki te Tusi Tapu kae ‵kau fakatasi mo te fakapotopotoga Kelisiano? Kae pefea a tino talai seki papatiso? E mata, a latou ne tino sē tali‵tonu? Ikai. A tino kolā ko oti ne talia ne latou te munatonu o te tala ‵lei kae ko gasolo malielie atu ki mua i te papatisoga e se ‵tau o taku pelā me ne tino sē tali‵tonu. (Loma 10:10; 2 Kolinito 4:13) A koi tuai o papatiso ne taku a Konelio ki se “tagata lotu telā e mataku ki te Atua.”—Galuega 10:2.

Tela la, e mata se mea poto mō se Kelisiano tukugina atu ke fai famau kae avaga mo se tino telā ko oti ne fai mo fai se tino talai seki papatiso, ona ko te mea e se fakasino ‵tonu atu a pati a Paulo i te 2 Kolinito 6:14 ki tino penā? Ikai, e sē se faiga poto. Kaia? Ona ko pati fakatonutonu ne fai atu ne Paulo e uiga ki fāfine Kelisiano ko ‵mate olotou avaga. Ne tusi atu a Paulo: “Ko saoloto ei a ia o avaga ki so se tino e manako a ia ki ei, kae ke avaga fua i te Aliki.” (1 Kolinito 7:39) E ‵tusa mo pati fakatonutonu konā, ne fakamalosi atu ki Kelisiano tukugina atu ke a‵vaga fua “i te Aliki.”

Se a te uiga o te tugapati “i te Aliki” mo te tugapati tai ‵pau ko te “i a Keliso”? Ne faipati a Paulo ki tino “i te Aliki” io me “i a Keliso” i te Loma 16:8-10 mo te Kolose 4:7. Kafai e faitau koe ki fuaiupu konā, ka lavea ne koe me i tino konā ne ‘taina ga‵lue,’ ‘ne tino toaga,’ ‘ne taina pele,’ ‘ne tavini fakamaoni,’ mo “pologa.”

Ko te taimi fea e fai ei se tino mo “pologa i te Aliki”? E tupu te mea tenā māfai ko loto fiafia a ia o fai a mea e fai ne se pologa kae se toe mafaufau ki a ia eiloa. Ne fai mai a Iesu: “So se tino e fia tautali mai i a au, ke se toe mafaufau ki a ia eiloa, kae ke amo tena pou fakasaua kae tumau i te tautali mai i a au.” (Mataio 16:24) E kamata se tino o tautali i te Keliso māfai ko fakalogo katoatoa a ia ki te faiga o te loto o te Atua kae fai tena tukuatuga ki te Atua. Ka oti ko fai ei tena papatisoga kae fai a ia mo fai se faifeau faū telā ko talia ne Ieova te Atua ke tu atu i ana mua. * Tela la, a te ‘avaga i te Aliki’ e fakauiga ki te avaga ki se tino telā ko oti ne fakaasi ‵tonu mai ne ia me i a ia se tino talitonu, “se pologa [tukugina atu] a te Atua mo te Aliki ko Iesu Keliso.”—Iakopo 1:1.

E ‵tau eiloa o fakamālō atu ki te tino telā e sukesuke ki te Tusi Tapu mo Molimau a Ieova kae gasolo faka‵lei ki mua i te feitu faka-te-agaga. Kae ko te tino tenā e seki fai ne ia tena tukuatuga ki a Ieova io me talia ke ola a ia i se olaga tavini kae talia so se mea faiga‵ta. Koi galue eiloa a ia o fai a ‵fuliga e manakogina. E ‵tau o ‵fuli katoatoa a ia ke mafai o fai mo Kelisiano tukugina atu kae papatiso, a koi tuai o mafaufau ki te suā vaega tāua o te olaga, e pelā mo te avaga.

E mata, se mea ‵lei mō se Kelisiano ke fai famau mo se tino telā ko gasolo eiloa ki mua i tena akoga faka-te-Tusi Tapu—kāti mo te manatu ke faka‵tali ke oti a ia ne papatiso ko avaga ei lāua? Ikai. E mafai o fai ei ke ‵numi te tino akoga māfai ko iloa ne ia me isi se Kelisiano tukugina atu e fia avaga ki a ia kae e se mafai o fai penā vaganā ke oti a ia ne papatiso.

E masani o fai se tino mo fai se tino talai seki papatiso mō se taimi toetoe fua, ke oko ki te taimi e papatiso ei a ia. Tela la, a pati fakatonutonu ke avaga fua i te Aliki e sē se mea faigata. Kae e a, te fai famau ki se tino telā ko matua ‵lei, ne puti aka i te kāiga Kelisiano, e galue malosi i te fakapotopotoga mō se fia tausaga, kae koi fai loa pelā me se tino talai seki papatiso? Ia, se a te mea e taofi ei a ia mai te tuku atu o tena olaga ki a Ieova? Kaia e fakatalave ei a ia? E mata, koi fakalotolotolua a ia? E tiga loa e se aofia a ia i tino sē tali‵tonu, kae e se mafai o taku a ia me se tino “i te Aliki.”

A pati fakatonutonu a Paulo ki te avaga ne fai mō te ‵lei o tatou. (Isaia 48:17) Kafai ko oti ne tukugina atu ki a Ieova se tokolua kolā ka avaga, ka ma‵losi atu lā tautoga ne fai i te fakaipoipoga me e fakavae eiloa ki mea faka-te-agaga. E ‵pau lā tulaga mo lā fakamoemoega. E aoga ‵ki eiloa te mea tenei ki te mauaga o se olaga avaga fiafia. E se gata i ei, a te ‘avaga i te Aliki,’ e fakaasi atu i ei ne te tino tena fakamaoni ki a Ieova, kae iku atu i ei ki fakamanuiaga tumau, me i “a [Ieova] e alofa tumau ki te tino telā e alofa tumau” ki a ia.—Salamo 18:25.

[Fakamatalaga fakaopoopo]

[Ata]

“A [Ieova] e alofa tumau ki te tino telā e alofa tumau” ki a ia