Te bintik ya sjojkʼoyik te machʼatik ya skʼopon te june

¿Machʼatik-a te «ma ba schʼuhunejic Dios» te la yalbey skʼoplal te Pablo ta 2 Corintios 6:14?

Ta 2 Corintios 6:14 ya yal: «Ma me junuc yugo awuʼunic soc te machʼa ma ba schʼuhunejic Dios». Teme ya yichʼ kʼoponel spisil te capítulo 6, ya xchiknaj ta ilel te maba jaʼuk yak ta yalbeyel skʼoplal-a Pablo te machʼatik ayik ta yutil te congregación. Jichnix ya yakʼ ta ilel yantik versiculoetik te banti te Pablo la yalbey skʼoplal te machʼatik «ma ba schʼuhunejic Dios».

Jich bitʼil, te Pablo la stsits te jchʼuunjeletik ta skaj te la yikʼ bael te yermanotakik ta schajpanel kʼop «ta stojol te machʼatic ma ba schʼuhunejic Dios» (1 Corintios 6:6). Te machʼatik maba schʼuunejik Dios la yale: jaʼik te juecetik te ya x-aʼtejik ta tribunal o chajpajibal ta Corinto. Ta schebal carta te la stsʼibay te Pablo ya yal te «macbibil spensaric yuʼun» te Satanás te machʼatik maba schʼuunejik Dios, jaʼ yuʼun ma staik ta ilel kʼoem te lek yachʼil kʼop. Te ants winiketik-abi ma skʼan ya x-abatinik ta stojol te Jehová, te jpuk-kʼop Pablo jich yalojix ta stojolik-a: «Cʼalal ya suhtes yoʼtanic ta stojol te Cajwaltic, ya xloqʼuesbot te paqʼue» (2 Corintios 3:16; 4:4).

Ay machʼatik te maba schʼuunejik Dios ya spasik te bin chopol o te bin ma lek sok ya yichʼik ta mukʼ lokʼombaetik (2 Corintios 6:15, 16). Pero maba spisilik ya skontrainik te j-abatetik yuʼun te Jehová. Ay te machʼatik ya smulanik yaʼiyel te skʼop te Dios. Ay yantik te nujpunemik sok j-abatetik yuʼun Dios sok te ma skʼan ya yijkitay sbaik (1 Corintios 7:12-14; 10:27; 14:22-25; 1 Pedro 3:1, 2). Jaʼ yuʼun, kʼalal te Pablo la yalbey skʼoplal te machʼatik «ma ba schʼuhunejic Dios» jaʼ yak ta yalbeyel skʼoplal te machʼatik maʼyukik ta congregación te schʼuunejik te «Cajwaltic» (Hechos 2:41; 5:14; 8:12, 13).

Te bin ya yal te 2 Corintios 6:14 jaʼ jun tojobtesel ta stojol spisil te j-abatetik yuʼun Dios soknix te machʼatik ya skʼan ya xnujpunike (Mateo 19:4-6). Te machʼa yakʼojix sba ta stojol Dios sok yichʼojix jaʼ ya yakʼ ta ilel spʼijil yoʼtan te kʼalal maba ya xnujpun sok te machʼa maba schʼuunej Dios, melel maba pajal stalelik, ma pajal te bin ya spasik sok te bin schʼuunejik.

Pero ¿binwan ya xjuʼ ya kaltik ta stojol te machʼatik yakik ta snopel te Biblia sok te ya stsob sbaik sok te congregación o te jcholkʼopetik te maba yichʼojik jaʼ? ¿Yabal xjuʼ ya kaltik te maba schʼuunejik Dios? Maʼuk. Te machʼatik yakik ta snopel te lek yachʼil kʼop sok yakik ta spasel tulan yuʼun ya yichʼik jaʼ, maba jaʼukik te machʼatik maba schʼuunejik Dios (Romanos 10:10; 2 Corintios 4:13). Jich bitʼil te Cornelio te kʼalal mato yichʼoj jaʼ-ae naʼbil sba yuʼun te «xiʼoj te Diose soc [te] jun yoʼtan xchʼuunej» (Hechos 10:2).

Jich yuʼun, ¿stojilbal teme jtul j-abat yuʼun Dios te yichʼojix jaʼ ya slekolin sok ya xnujpun sok jtul jcholkʼop te maba yichʼoj jaʼ, melel maba ochem skʼoplal-a te bin la yal te Pablo ta 2 Corintios 6:14? Ma stojiluk. ¿Bin yuʼun? Melel te Pablo jich la yal ta stojol te meʼba antsetik: «Libre ay [yuʼun] ya xchaʼnuhpun xan soc te machʼa ya scʼan [...] ha nax teme ta scuenta te Cajwaltique» (1 Corintios 7:39). Ta swenta te tsitsel ini, te j-abatetik yuʼun Dios jaʼnax ya skʼan ya xnujpunik sok te machʼatik ayik «ta scuenta te Cajwaltique».

¿Bin ya skʼan ya yal te kʼalal la yichʼ alel «ta scuenta te Cajwaltique» o «ta stojol Cristo»? Ta Romanos 16:8-10 sok Colosenses 4:7, te Pablo la yalbey skʼoplal te machʼatik ayik «ta stojol Cristo» o «ta scuenta Cajwaltic». Kʼalal ya jkʼopontik te versiculoetik-abi, ya kiltik te jaʼnix jich ya yichʼik albeyel: ‹jmohlolcotic ta aʼtel›, ‹jun yoʼtan›, ‹quermanotic te cʼux ta coʼtantic›, ‹yaʼtelimbeyej yaʼtel Dios› sok ‹jmohlol ta aʼtel ta scuenta Cajwaltic›.

¿Bin-ora jtul ants winik ya xkʼot ta jmojloltik o joytik ta aʼtel «ta scuenta Cajwaltic»? Jaʼ te kʼalal sok spisil yoʼtan ya spas te bin ya spas jtul j-abat sok ya spʼaj te bin ya smulan spasel. Te Jesús jich la yal: «Teme ay machʼa ya scʼan ya stʼunon, acʼa sloqʼues sba ta yoʼtan, acʼa sqʼuech bahel scruz [steʼ, TNM] soc acʼa stʼunon» (Mateo 16:24). Te machʼa ya yakʼ sba ta stojol Dios, jich ya x-och ta jchʼuunjel yuʼun Cristo sok ya xjajch spas te skʼanojel yoʼtan te Diose. Ta patil, ya yichʼ jaʼ sok ya x-och ta j-abat yuʼun Dios. * Jaʼ yuʼun, teme ay machʼa ya xnujpun ‹ta scuenta te Cajwaltique› jaʼ ya skʼan ya yal te ya xnujpun sok te machʼa yakʼojix ta ilel te jaʼ smelelil j-abat yuʼun Jehová te yakʼojix skuxlejal ta stojol Dios sok ta stojol te Kajwaltik Jesucristo (Santiago 1:1).

Te machʼa yak ta snopel te Biblia sok te testigoetik yuʼun Jehová sok te yak ta spasel tulan yuʼun ya x-abatin ta stojol te Dios, kʼax lek te jich yak ta spasele. Pero mato yakʼoj skuxlejal ta stojol te Jehová sok mato yaloj ta jamal te ya yakʼ skuxlejal ta spasbeyel yaʼtel te Jehová. Yakto ta spasel tulan ta sjelontesel te skuxlejal yuʼun jich ya xjuʼ ya yakʼ sba ta stojol te Dios sok ya yichʼ jaʼ, spisil ini jaʼme te bin nail ya skʼan ya spas teme yak ta snopel te ya xnujpune.

¿Snujpʼbal te jtul j-abat yuʼun Dios ya xjajch slekolin te machʼa yaktonax ta snopel te Biblia, sok te ya smaliy te ya yichʼ jaʼ swenta ya xnujpun sok? Maʼuk. Melel ma xchiknaj ta ilel te bin-nix yuʼun ya skʼan ya yichʼ jaʼ-a te machʼa yak ta snopel te Bibliae, melel snaʼoj te jtul j-abat yuʼun Dios ma xjuʼ ya xnujpun sok te machʼa maba yichʼoj jaʼe.

Te jcholkʼop te mato yichʼoj jaʼ te ya spas tulan ta schʼitesel te schʼuunel yoʼtane, ya sta yorail te ya yichʼ jaʼ. Jaʼ yuʼun, maba wokoluk ta chʼuunel te jaʼnax ya skʼan ya xnujpunotik ta swenta te Kajwaltike. ¿Jaxan teme ay machʼa ayix yaʼbilal yuʼun ya xnujpun, te chʼiem ta jun familia te jaʼ j-abatetik yuʼun Dios, te ma schʼay te tsoblejetik sok ya schol skʼop Dios spisil-ora, pero mato yichʼoj jaʼ? Teme jiche, ¿bin yuʼun te mato yakʼoj skuxlejal ta stojol te Jehová? ¿Bin yuʼun te xchebet yoʼtan? ¿Aytobal bin ma kʼoem ta yoʼtan? Manchukme ma xjuʼ ya kaltik te maba schʼuunej Dios, jaʼnix jich ma xjuʼ ya kaltik te ay «ta scuenta te Cajwaltique».

Ya jtatik lekilal yuʼun te consejo la yal te Pablo ta stojol te machʼatik ya skʼan ya xnujpunike (Isaías 48:17). Teme yakʼoj sbaik ta stojol Jehová te machʼatik ya skʼan ya xnujpunike, ayme yip ya xkʼot te snujpunelik, melel lek ya yil sbaik sok te Diose. Teme pajal lek stalelik sok teme pajal te bin snopoj ya spasik, jichme ya sta stseʼelil yoʼtanik. Jaʼnix jich ya kakʼtik ta ilel te jun koʼtantik ta stojol te Jehová teme ya xnujpunotik «ta scuenta te Cajwaltique», sok ya jtatik utsilaletik ta sbajtelkʼinal, melel teme jun koʼtantik ta stojol te Diose jaʼnix jich jun yoʼtan ta jtojoltik (Salmo 18:25).

[Nota]

[Foto]

Teme jun koʼtantik ta stojol te Diose jaʼnix jich jun yoʼtan ta jtojoltik