Enọ rẹ Ihwo ri Se Ẹbe Avwanre Nọre

Amono yen “ihwo ri keferi” ri Pọl ta ota kpahen vwẹ 2 Kọrẹnt 6:​14 na?

Vwẹ 2 Kọrẹnt 6:​14, avwanre de se: “Ovwan vẹ ihwo ri keferi gba-a.” A da nabọ ni ota na fiotọ, o phẹnre dẹn nẹ Pọl ta ota kpahan ihwo re dia ẹbẹre ọvo rẹ ukoko rẹ Inenikristi na-a. Ẹruọ nana gbare kidie ẹkpo ri Baibol efa ri Pọl da reyọ ota na ohwo yẹrẹ “ihwo ri keferi” vwo ruiruo rhọnvwephiyọ.

Kerẹ udje, Pọl ghwọku Inenikristi ri kpo “ẹguare rẹ ihwo ri je segbuyota.” (1 Kọrẹnt 6:6) Vwẹ ẹdia nana iguẹdjọ rẹ aguare ri Kọrẹnt yen ihwo ri keferi yẹrẹ ihwo ri vwo esegbuyota-a. Vwẹ ileta rivẹ ri Pọl siri ọ tare nẹ, eshu “rhu ẹro rẹ udu rẹ ihwo ri segbuyota-a.” A vwẹ “oga” rhurhu ẹro rẹ ihwo tiọyen ri jẹ esegbuyota evwo na, rere ayen vwo jẹ iyẹnrẹn esiri na ẹmrẹ. Ihwo ri jẹ esegbuyota evwo na je rhe jowọ rẹ ayen vwọ ga Jihova-a, kidie Pọl djere fiotọ jovwo re nẹ, “ọke rẹ ohwo de hirhe oma ku Ọrovwohwo na ke si oga na no.”​​—2 Kọrẹnt 3:​16; 4:4.

Ihwo evo ri jẹ esegbuyota evwo na muọghọ kẹ urhi na-a, ayen ga eghẹnẹ rẹ efian. (2 Kọrẹnt 6:​15, 16) Ẹkẹvuọvo, ọ dia ayen eje yen vwọsua idibo ri Jihova-a. Evo dje omavwerhovwẹn phia kpahen uyota na. Buebun rayen vwo eya yẹrẹ eshare re dia Inenikristi, ayen je guọnọ dia orọnvwe rayen. (1 Kọrẹnt 7:​12-​14; 10:27; 14:​22-​25; 1 Pita 3:​1, 2) Ẹkẹvuọvọ, vwo nene obo ra ta ota kpahen vwẹ obenu jovwo re, ọke buebun yen Pọl vwọ vwẹ ohwo ro “je segbuyota” vwo djisẹ rẹ ohwo rọ dia ẹbẹre ọvo rẹ ukoko rẹ Inenikristi na-a, re dia ihwo “ri segbuyota” na.​—Iruo rẹ Iyinkọn Na 2:​41; 5:​14; 8:​12, 13.

Odjekẹ rọhẹ 2 Kọrẹnt 6:​14 na pha ghanghanre kẹ Inenikristi eje, marho vwọ kẹ Inenikristi re guọnọ rọvwọn. (Matiu 19:​4-6) Rọ vwọ dianẹ ẹro re vwo nẹ emu, obo ra vwọ tua vẹ oborẹ Inenikristi segbuyota fẹnẹ ọ rẹ ihwo ri segbuyota-a na, ọyen emu rẹ aghwanre rẹ Onenikristi rọ vwomakpahotọ ji bromaphiyame re vwo jẹ ohwo ọtiọyen ẹrọvwọn.

Kẹ, a je sa rọvwọn ohwo ro yono Baibol na ro ji kpo emẹvwa rẹ Inenikristi? Kẹ ighwoghwota ri ji bromaphiyame-e vwo? Ayen ihwo ri vwo esegbuyota-a? Ẹjo. Ofori nẹ e se ihwo ri rhiabọreyọ uyota na ri ji yerẹn te ẹdia rẹ omaebrophiyame ihwo ri jẹ esegbuyota evwo-o. (Rom 10:10; 2 Kọrẹnt 4:​13) Tavwen Kọniliọs ki bromaphiyame, e sere ohwo ro muọghọ okokodo je “djẹ oshọ rẹ Ọghẹnẹ.”​—Iruo rẹ Iyinkọn Na 10:2.

Kẹ, a sa tanẹ ọyen emu rẹ aghwanre rẹ Onenikristi rọ vwomakpahotọ re vwọ kọnphiyọ je rọvwọn ohwo rọ dia oghwoghwota ro ji bromaphiyame-e, kidie nẹ ọ dia ihwo tiọna yen Pọl ta ota kpahen vwẹ 2 Kọrẹnt 6:​14 na-a? Ẹjo, Ọyena dia emu rẹ aghwanre-e. Diesorọ? Fikirẹ odjekẹ ri Pọl vwọ kẹ Inenikristi re dia eyauku. Pọl de si: “Aye na kọ sa rọvwọ ohwo ọfa ro jere, ẹkẹvuọvo vwẹ . . . Ọrovwohwo.” (1 Kọrẹnt 7:​39) Vwo nene odjekẹ ri Baibol yena, a vwẹ uchebro kẹ Inenikristi re vwomakpahotọ re nẹ ayen rọvwọn “vwẹ . . . Ọrovwohwo” ọvo.

Die yen ota na, “vwẹ . . . Ọrovwohwo” yẹrẹ “vwẹ . . . Kristi” mudiaphiyọ? Vwẹ Rom 16:​8-​10 vẹ Kọlose 4:​7, Pọl da ta ota kpahen ihwo re herọ “vwẹ . . . Ọrovwohwo” na yẹrẹ “vwẹ . . . Kristi”. Wo de se awọreta yena, wọ cha mrẹvughe nẹ ayen iruiruo re wian kuẹgbe, rẹ ivun rayen vwerhen Kristi, re dia ‘imoni eghanghanre’ kugbe [“eviẹn vwevunrẹ Orovwori,” NW ] ri vwobọ vwẹ “iruo rẹ Ọrovwohwo na.”

Ọke vọ yen ohwo sa vwọ dia ‘ọviẹn vwevunrẹ Ọrovwori na’? Ohwo sa dia ọviẹn vwevunrẹ Ọrovwori na siẹrẹ ọ da vwomakpotọ ru oborẹ ọviẹn ruẹ ọ da je sen oma rọyen. Jesu da ta: “Ohwo da guọnọ nẹ ọye nene uvwe, e jọ sen oma rọye re o mu agbagba [“urhe rẹ oja,” NW ] rọye re o nene uvwe.” (Matiu 16:24) Siẹrẹ ohwo de ru ọhọre rẹ Ọghẹnẹ je vwomakpahotọ kẹ, ọyena mudiaphiyọ nẹ o nene Jesu. Ọyena da wan nu, ko che bromaphiyame, ọnana me rhe nẹrhẹ o vwo uvi rẹ oyerinkugbe vẹ Jihova Ọghẹnẹ. a Ọtiọyena, ra vwọ rọvwọn “vwẹ . . . Ọrovwohwo” mudiaphiyọ a vwọ rọvwọn ohwo ro djerephia nẹ ọyen vwo esegbuyota, rọ je vwomakpahotọ vwọ dia “odibo rẹ Ọghẹnẹ kugbe Ọrovwavwanre Jesu Kristi.”​—Jems 1:1.

Ofori nẹ a kpẹvwẹ kohwo kohwo rọ vẹ Iseri ri Jihova yono Biabol na rọ je yan obaro. Ẹkẹvuọvo, ọ je rhe vwomakpahotọ je vwẹ eronvwọn evo vwọ ze vwọ kẹ ẹga rẹ Ọghẹnẹ-e. O ji ruẹ ewene vwẹ akpeyeren rọyen. Ofori nẹ o ru ewene eje a guọnọre rere ọ sa vwọ dia Onenikristi rọ vwomakpahotọ ji bromaphiyame tavwen o ki roro kpahen orọnvwe.

Ofori Onenikristi vwọ kọnphiyọ ohwo rọ yan phiaro vwẹ uyono ri Baibol rọyen, jẹ o ji rhi bromaphiyame-e​​—vẹ ẹwẹn rọ vwọ hẹrhẹ te ọke rọ de bromaphiyame nu ọ rọvwọn? Ẹjo. Ohwo ra vwẹ Baibol yono na se mu ẹwẹn phiyọ uyono na siẹrẹ ọ da riẹn nẹ Onenikristi rọ vwomakpahotọ re cha rọvwọn siẹrẹ o de ghwe bromaphiyame nu.

Ọke buebun na, ọmọke yen ohwo vwọ dia oghwoghwota ro ji bromaphiyame-e tavwen ro ki yerin tẹdia rẹ omaebrophiyame. Ọtiọyena uchebro ra vwọ rọvwọn vwevunrẹ Ọrovwori na shephiyọ dẹn. Ẹkẹvuọvo, ọ da rha dia ohwo ra ghẹrẹ ghwanre vwẹ ukoko na, ro muomaphiyọ iruo rẹ ẹga na, ro tedje rẹ orọnvwe re, jẹ ọ jehẹ oghwoghwota ro ji bromaphiyame-e vwo? Ọ da dia ọtiọyen, diesorọ o ji rhi bromaphiyame-e? Die yen nẹrhẹ o siomauko? O vwo ẹwẹn ivivẹ? Dede nẹ o vwo esegbuyota, jẹ a cha sa tanẹ ọ herọ “vwẹ . . . Ọrovwohwo” na-a.

Avwanre yen mrẹ erere vwo nẹ uchebro ri Pọl vwọ phia kpahen orọnvwe na cha. (Aizaya 48:17) Ọ da dianẹ ihwo ivẹ re guọnọ rọvwọn na vwomakpahotọ kẹ Jihova re, ọnana cha nẹrhẹ orọnvwe rayen ghwotọ fikirẹ uvi rẹ oyerinkugbe rẹ ayen vẹ Jihova vwori. Emuọvo yen ghanre kẹ ayen ihwo ive na, orọnvwọn ọvo yen ayen je vwọ tua. Ọnana cha nẹrhẹ ayen vwo omavwerhovwen. Vwọ vrẹ ọyena, e dje evun-ẹfuọn phia kẹ Jihova siẹrẹ a da rọvwọn “vwẹ . . . Ọrovwohwo” na, ọnana ghwa ebruphiyọ rọ tọn cha, kidie “ohwo ro vwo ẹguọnọ esiri ọye [Jihova] dje ẹguọnọ esiri . . . kẹ”.​—Une rẹ Ejiro 18:25.

[Eta rehẹ obotọ na]

[Uhoho]

“Ohwo ro vwo ẹguọnọ esiri ọye [Jihova] dje ẹguọnọ esiri . . . kẹ”