Nabbabiyaageetu Oyshaa

PHawuloosi 2 Qoronttoosa 6:14n ‘ammanenna asata’ giidoogeeti oonee?

Naaˈˈantto Qoronttoosa 6:14y, “Ammanenna asatuura zuppetidi, giigenna oosuwaa oottoppite” yaagees. Ha xiqisiyaa yuushuwan deˈiya qofaa beˈiyo wode, PHawuloosi Kiristtaane gubaaˈiyaa yara gidenna asatubaa yootiyoogaa akeekoos. PHawuloosi “ammanennaagaa” woy “ammanenna asata” giya qaalata goˈettido hara xiqiseti hegaa qonccissoosona.

Leemisuwawu, Kiristtaaneti “ammanenna asan” pirddissanawu pirdda keetti biido gishshawu PHawuloosi eta boriis. (1 Qoronttoosa 6:6) Ha sohuwan ammanennaageeta geetettidaageeti Qoronttoosa pirdda keettatun deˈiya daannata. PHawuloosi Seexaanay “ammanenna asatu qofaa” jallissidoogaa, ba naaˈˈantto dabddaabbiyan yootiis. He ammanenna asati mishiraachchuwaa “be7enna mala” eta ayfee goozettiis. PHawuloosi, “Ooninne Godaakko simmiyo wode audenne he naxalai kichchees” yaagidi kaseti qonccisso gishshawu, he ammanenna asati Yihoowawu haggaazanawu koyiyoogaa bessibookkona.—2 Qoronttoosa 3:16; 4:4.

Ammanenna issoti issoti makkalanchchata woy eeqawu goynniyaageeta. (2 Qoronttoosa 6:15, 16) SHin, eti ubbay Yihoowawu haggaaziyaageeta eqettiya asata gidokkona. Etappe amaridaageeti tumaa eranawu koyoosona. Darotu aqo laggeti Kiristtaane, qassi eti bantta aqo laggetuppe shaahettennan deˈanawu koyoosona. (1 Qoronttoosa 7:12-14; 10:27; 14:22-25; 1 PHeexiroosa 3:1, 2) Gidoppe attin, ‘Godaa ammaniyaageeti’ deˈiyo Kiristtaane gubaaˈiyaa yara gidenna, qommoora denttidoogeetu mala asata PHawuloosi ubba sohotun ‘ammanenna asata’ yaagiis.—Oosuwaa 2:41; 5:14; 8:12, 13.

Naaˈˈantto Qoronttoosa 6:14n deˈiya maaray Kiristtaanetussi ubbawu, ubba qassi aqo oyqqanawu koyiyaageetussi loˈˈo zore. (Maatiyoosa 19:4-6) Ammanennaageeti nashshiyoobay, halchchiyoobaynne ammaniyoobay tumu Kiristtaanetuugaappe keehi dummatiyo gishshawu, bana Xoossawu sheedhdhidi xammaqettida issi Kiristtaanee ammanenna ura ekkanawu woy gelanawu koyenna.

Gidoppe attin, Geeshsha Maxaafaa xannaˈiyaanne Kiristtaane gubaaˈiyaara hashetiya uraabaa woygana danddayettii? Xammaqettennan aassiyaageeti shin? Eti ammanenna asee? Akkay. Tumaa ammanidi, qassi ayyaanaaban diccidi xammaqettanawu koyiyaageeti ammanennaageeta geetettana koshshenna. (Roome 10:10; 2 Qoronttoosa 4:13) Qornneliyoosi xammaqettanaappe kase “Xoossaa daro ammaniya [asa]” geetettiis.—Oosuwaa 10:2.

Naaˈˈantto Qoronttoosa 6:14y xammaqettennan aassiyaageetuura gayttidaba gidenna gishshawu, hegaa mala uraara wodiyaa issippe aattiyoogeenne ekkiyoogee woy geliyoogee bessiyaabee? CHii, bessiyaaba gidenna. Aybissi? PHawuloosi amˈˈe Kiristtaanetussi qoncce zoriyaa yootido gishshataassa. PHawuloosi, “Godaa ammaniya asaa wogan geliyoogaa gidoppe attin, ba dosido azinaa gelana danddayausu” yaagiis. (1 Qoronttoosa 7:39) He zoree, banttana Xoossawu sheedhdhida Kiristtaaneti “Godaa ammaniya asaa wogan” deˈiya ura ekkanaadan woy gelanaadan minttettees.

“Godaa ammaniya asaa wogan” deˈiya ura giyoogee woygiyoogee? PHawuloosi Roome 16:8-10​ninne Qolasiyaasa 4:7n yootido ammaniyaageeti hegaa mala asata. Neeni ha xiqiseta nabbabiyo wode, he asati ‘issippe oottiyaageeta,’ ‘galatettidaageeta,’ ‘siiqo ishantta,’ ‘ammanettiya oosanchchata,’ qassi ‘ta mala ashkkarata’ geetettidoogaa akeekaasa.

Issi uri “Godaa oosuwan ashkkara” gidiyoy awudee? I bana yeggi bayidi, ashkkari oottiyoobaa ba dosan oottiyo wode hegaadan hanees. Yesuusi hagaadan giis: “Tana kaallanau koyiya urai de7ikko, bana yeggi bayo; yaatidi ba masqqaliyaa tookkidi, tana kaallo.” (Maatiyoosa 16:24) Issi uri Xoossay koyiyoobaa oottiyoonne bana Xoossawu sheedhdhiyo wode, Kiristtoosa kaalliyoogaa doommees. Yaatidi I xammaqettees; hegee qassi I Xoossaara dabbotanaadan oottees. * Yaatiyo gishshawu, “Godaa ammaniya asaa wogan geliyoogaa” woy ekkiyoogaa giyoogee, ammaniyoogaa tumuppe bessidanne bana Xoossawu sheedhdhidi A “ailleenne Godaa Yesuus Kiristtoosa [aille]” gidida aqo lagge dooriyoogaa giyoogaa.—Yaaqooba 1:1.

Yihoowa Markkatuura Geeshsha Maxaafaa xannaˈiyaanne ayyaanaaban dicciya uri loˈˈobaa oottees. SHin, I bana Yihoowawu sheedhdhibeennanne ba deˈuwan awu oottanawu qaalaa gelibenna. Qassi, koshshiyaaban laamettiiddi deˈees. I aqo oyqqanawu qoppanaappe kase, ba deˈuwan laamettidi bana Yihoowawu sheedhdhida Kiristtaane gidana koshshees.

Issi Kiristtaanee Geeshsha Maxaafaa xinaatiyan dicciiddi deˈiya ura gelanawu woy ekkanawu wodiyaa issippe aattiiddi, geella xammaqettosaara aqo oyqqanawu halchchiyoogee bessiyaabee? CHii. Geeshsha Maxaafaa xannaˈiya uri xammaqettidi sohuwaara bana Yihoowawu sheedhdhida Kiristtaaniyaa gelanaagaa woy ekkanaagaa erikko, I xannaˈanawu koyiyo gaasoy bala gidana danddayees.

Darotoo issi uri xammaqettana gakkanaashin xammaqettennan aassiyo wodee guutta. Yaatiyo gishshawu, Godaa ammaniya asa wogan deˈiya ura xallaa ekkanaadan woy gelanaadan zoridoogee bessiyaaba. Gidoppe attin, issi uri ekkanawu woy gelanawu gakkida, Kiristtaane keettan diccida, daro layttawu gubaaˈiyan minni haggaazida xammaqettennan aassiyaagaa gidikko shin? Yaanikko, I ba deˈuwaa Yihoowawu sheedhdhennaadan diggidabay aybee? I ayssi haganaa sugii? I siriyoobi deˈii? I ammanenna ura gidana xayikkonne, “Godaa ammaniya asaa wogan” deˈees gaana danddayettenna.

Aqo oyqqiyoogaara gayttidaagan PHawuloosi zoridobay nuna goˈˈiyaaba. (Isiyaasa 48:17) Aqo oyqqanawu koyiya naaˈˈu asati banttana Yihoowawu sheedhdhidaageeta gidana koshshees. Hegee eti Yihoowaara dabbotaa minttidoogaappe denddidaagan eta aqo deˈoy minnanaadan oottees. Eti nashshiyoobaynne halchchiyoobay issi mala. Hegee eti bantta aqo deˈuwan ufayttanaadan oottees. Hegaa bollikka, issi uri ‘Godaa ammaniya asaa wogan geliyoogan’ woy ekkiyoogan, Yihoowawu ammanettiyoogaa bessees; qassi ‘Yihooway baayyo ammanettiyaageetuyyo ammanettiyaagaa’ gidiyo gishshawu, hegee merinaa anjjuwaa demissees.—Mazamure 18:25.

[Tohossa qofata]

[Misiliyaa]

‘Yihooway baayyo ammanettiyaageetuyyo ammanettiyaagaa’