Mga Pakiana Tikang ha mga Magbarasa

Ha 2 Korinto 6:14, hin-o an gin-uunabi ni Pablo han gin-gamit niya an mga pulong nga “mga diri magtinoohon”?

Ha 2 Korinto 6:14, aton mababasa: “Diri kamo magpas-an han yugo upod han mga diri magtinoohon.” Kon aton kitaon an konteksto, matin-aw nga hi Pablo naghihisgot mahitungod han mga indibiduwal nga matin-aw nga diri mga membro han Kristiano nga kongregasyon. Ini nga pagsabot ginsusuportahan han iba nga mga bersikulo ha Biblia nga nagrekord han paggamit ni Pablo han mga pulong nga “diri magtinoohon” o “mga diri magtinoohon.”

Pananglitan, ginsaway gud ni Pablo an mga Kristiano tungod han ira pagkadto ha korte “han mga diri matinoohon.” (1 Korinto 6:6) Dinhi, an mga diri magtinoohon mga hukom nga nagtatrabaho ha korte han Korinto. Ha iya ikaduha nga surat, hi Pablo nagsiring nga “an mga hunahuna hini nga diri magtinoohon ginbuta” ni Satanas. An mga mata han sugad nga mga diri magtinoohon ‘natatabonan’ salit diri hira nakita ha maopay nga sumat. Ini nga mga diri magtinoohon waray magpakita hin interes ha pag-alagad kan Jehova, tungod kay antes pa hito hi Pablo nagsiring: “Kon san-o nga an tawo magsunod ha Ginoo, makukuha an tabon.”—2 Korinto 3:16; 4:4.

May-ada mga diri magtinoohon nga nahidadabi ha karaotan o idolatriya. (2 Korinto 6:15, 16) Kondi, diri ngatanan nakontra ha mga surugoon ni Jehova. An iba nagpapakita hin interes ha kamatuoran. Damu an may-ada Kristiano nga mga padis ngan disidido nga magpabilin ha pakig-upod ha ira. (1 Korinto 7:12-14; 10:27; 14:22-25; 1 Pedro 3:1, 2) Kondi, pirme ginagamit ni Pablo an termino nga “diri magtinoohon” ha mga indibiduwal, nga sugad han gin-unabi na, diri bahin han Kristiano nga kongregasyon, nga ginkukompuwesto han ‘mga natoo ha Ginoo.’—Buhat 2:41; 5:14; 8:12, 13.

An prinsipyo ha 2 Korinto 6:14 usa nga birilhon nga giya para ha mga Kristiano ha ngatanan nga kahimtang ha kinabuhi ngan agsob nga ginkukotar sugad nga maaramon nga sagdon ha mga Kristiano nga namimiling hin maarasawa. (Mateo 19:4-6) An usa nga dedikado, bawtismado nga Kristiano maaramon nga diri namimiling hin maarasawa dida ha mga diri magtinoohon, tungod kay an mga suruklan ha moral, mga tumong, ngan mga gintotoohan han mga diri magtinoohon naiiba gud ha kanan totoo nga Kristiano.

Kondi, kumusta man an mga indibiduwal nga nag-aaram han Biblia ngan nakig-upod ha Kristiano nga kongregasyon? Kumusta man adton diri-bawtismado nga mga magwarali? Hira ba mga diri magtinoohon? Diri. An mga indibiduwal nga kumarawat na han kamatuoran han maopay nga sumat ngan padayon nga nag-uuswag ngadto ha pagpabawtismo diri sadang tawagon nga mga diri magtinoohon. (Roma 10:10; 2 Korinto 4:13) Antes han iya bawtismo, gintawag hi Cornelio nga “maampoon ngan mahadlukon ha Dios.”—Buhat 10:2.

Kon sugad, maaramon ba para ha usa nga dedikado nga Kristiano nga makipagtrato ngan mangasawa ha usa nga ginkarawat na sugad nga diri-bawtismado nga magwarali, tungod kay ha istrikto nga pagkayakan, an sagdon ni Pablo nga nakasurat ha 2 Korinto 6:14 diri maiaaplikar hito nga kahimtang? Diri, diri ito maaramon. Kay ano nga diri? Tungod han direkta nga sagdon ni Pablo may kalabotan ha Kristiano nga mga balo. Hi Pablo nagsurat: ‘Mahimo hiya mangasawa han iya karuyag; kondi ha Ginoo la.’ (1 Korinto 7:39) Uyon hito nga sagdon, an dedikado nga mga Kristiano ginsasagda nga mamiling hin maarasawa dida la ha mga tawo nga aada ‘ha Ginoo.’

Ano an kahulogan han mga pulong nga ‘ha Ginoo’ ngan han may-kalabotan nga mga pulong nga “kan Kristo”? Hi Pablo naghisgot mahitungod han mga indibiduwal nga “kan Kristo” o “ha Ginoo” ha Roma 16:8-10 ngan Kolosas 4:7. Kon imo basahon ito nga mga bersikulo, hibabaroan mo nga an sugad nga mga tawo mga  “kabulig hin pagbuhat,” mga “pinakamaopay,” mga “bugto nga hinigugma,” mga “matinumanon nga ministro,” ngan mga “igkasi-uripon.”

San-o an usa nagigin “igkasi-uripon ha Ginoo”? Kon kinaburut-on nga ginbubuhat niya an kinahanglan buhaton han usa nga uripon ngan iginlilirong an iya kalugaringon. Hi Jesus nagsaysay: “Kon may tawo nga buot magsunod ha akon, maglirong ha iya la ngahaw, ngan pas-anon an iya krus, ngan sumunod ha akon.” (Mateo 16:24) An usa nga tawo nagtitikang ha pagsunod kan Kristo ngan ha bug-os nga pagpasakop han iya kalugaringon ha kaburut-on han Dios kon iya igindidedikar an iya kalugaringon ha Dios. Katapos hito, iya iginhahatag an iya kalugaringon para ha bawtismo ngan nagigin ordinado nga ministro nga may inuyonan nga relasyon kan Jehova nga Dios. * Kon sugad, an ‘pag-asawa ha Ginoo’ nangangahulogan hin pag-asawa ha usa nga nagpapakita na nga totoo hiya nga tumuroo, dedikado nga “uripon han Dios ngan han Ginoo Jesu-Kristo.”—Jakobo 1:1.

Angay kumendasyonan an usa nga tawo nga nag-aaram han Biblia upod ha mga Saksi ni Jehova ngan nag-uuswag ha espirituwal. Kondi, waray pa niya idedikar an iya kalugaringon ngadto kan Jehova ngan waray pa niya ipahinungod an iya kalugaringon ha kinabuhi han pag-alagad ngan pagsakripisyo. Naghihimo pa gihapon hiya hin ginkikinahanglan nga mga pagbag-o. Kinahanglan niya kompletuhon an daku nga mga pagbag-o nga nahiuupod ha pagin dedikado, bawtismado nga Kristiano antes maghunahuna hin usa pa nga daku nga pagbag-o ha kinabuhi, sugad han pag-asawa.

Maaramon ba para ha usa nga Kristiano an pakipagtrato ha usa nga baga hin nag-uuswag ha iya pag-aram ha Biblia—bangin ha intensyon nga hulaton tubtob nga mabawtismohan hiya antes hira magpakasal? Diri. An mga motibo han usa nga estudyante ha Biblia bangin mawurok kon maaram hiya nga an usa nga dedikado nga Kristiano naruruyag magpakasal ha iya kondi mapakasal la kon bawtismado na hiya.

Kasagaran na, ha sulod hin limitado la nga panahon an pagin diri-bawtismado nga magwarali han usa nga indibiduwal, tubtob nga mag-uswag hiya ngadto ha bawtismo. Salit makatadunganon an sagdon ha igbaw nga mag-asawa ha Ginoo la. Kondi, kumusta man an pakipagtrato ha usa nga aada na ha pangidaron nga mahimo na mag-asawa, nagdaku ha Kristiano nga pamilya, aktibo ha kongregasyon ha sulod hin damu ka tuig na, ngan nag-aalagad sugad nga diri-bawtismado nga magwarali? Bueno, ano an nagpupugong ha iya ha pagdedikar han iya kinabuhi ngadto kan Jehova? Kay ano nga nag-aalang hiya? May-ada ba hiya mga pagruhaduha? Bisan kon diri hiya usa nga diri matinoohon, diri hiya masisiring nga aada “ha Ginoo.”

An sagdon ni Pablo mahitungod ha pag-asawa para ha aton kaopayan. (Isaias 48:17) Kon igindedikar na han duha nga karaslon an ira kalugaringon ngadto kan Jehova, an ira panumpa ha usa kag usa ha pag-asawa may-ada marig-on ngan espirituwal nga pundasyon. Pariho an ira mga suruklan ha moral ngan mga tumong, ngan nakakabulig gud ini ha malipayon nga pag-asawa. Dugang pa, pinaagi ha ‘pag-asawa ha Ginoo,’ ipinapakita han usa an pagkamaunungon kan Jehova, ngan nagriresulta ito ha nagpapadayon nga mga bendisyon, tungod kay “ha usa nga maunungon [hi Jehova] magios ha pagkamaunungon.”—Salmo 18:25, NW.

[Footnote]

[Retrato ha pahina 31]

“Ha usa nga maunungon [hi Jehova] magios ha pagkamaunungon”