Te ʼu Fehuʼi ʼa Te Kau Lautohi
Te ʼu Fehuʼi ʼa Te Kau Lautohi
Ia 2 Kolonito 6:14, ko ai ʼaē neʼe palalau kiai ia Paulo ʼi tana fakaʼaogaʼi te kupuʼi palalau “te hahai e mole tui”?
ʼE tou lau fēnei ia 2 Kolonito 6:14: “Aua [takotou] pipiki tahi mo te hahai e mole tui.” Kapau ʼe tou vakaʼi te koga tohi ʼaē neʼe toʼo ai, ʼe tou mahino ai ʼe palalau ai ia Paulo ki te hahaʼi ʼe mole kau ki te kokelekasio faka Kilisitiano. Ko te mahino ʼaia ʼe lagolago kiai te tahi ʼu vaega faka Tohi-Tapu ʼe nātou fakahā ai te fakaʼaogaʼi e Paulo ia te kupuʼi palalau “ko he tahi ʼe mole tui” peʼe ko “te hahai e mole tui.”
Ohage la, ʼe fakatonutonuʼi e Paulo te kau Kilisitiano he neʼe ʼolo ʼo telepinale “ia muà o he hahai e mole tui.” (1 Kolonito 6:6) ʼI henī, ko te hahaʼi heʼe tui ʼaia ʼe ko te kau tuʼi fakamāu ʼaē neʼe gāue ʼi te ʼu telepinale ʼi Kolonito. ʼI tana lua tohi, ʼe fakahā ai e Paulo ko Satana kua ina “fakakivi . . . te u fakakaukau a te hahai e mole tui.” Ko te ʼu mata ʼo te ʼu hahaʼi ʼaia ʼe mole tui kua ʼuʼufi ke mole nātou sio ki te logo lelei. Ko te ʼu hahaʼi heʼe tui ʼaia ʼe mole nātou fia tauhi kia Sehova, koteʼuhi ki muʼa atu neʼe fakamahino fēnei e Paulo: “Ka haga he tahi [“kia Sehova,” MN ] pea e too kehe te kie.”—2 Kolonito 3:16; 4:4.
Ko ʼihi hahaʼi heʼe tui ʼe nātou meʼa noaʼi te lao peʼe nātou tauhi tamapua. (2 Kolonito 6:15, 16) Kae ʼe mole fakafeagai fuli te hahaʼi ʼaia ki te kau kaugana ʼa Sehova. Ko ʼihi ʼe nātou fia fai ki te moʼoni. ʼE kaugamālie ia nātou ʼe ʼohoana mo te kau Kilisitiano, pea ʼe nātou fiafia ʼi te hoko atu ʼo tanatou nofo ʼohoana. (1 Kolonito 7:12-14; 10:27; 14:22-25; 1 Petelo 3:1, 2) Kae ohage ko tona fakahā ʼi ʼaluga, ʼe fakapipiki tuʼumaʼu e Paulo ia te kupu “ko he tahi ʼe mole tui” ki te hahaʼi ʼaē ʼe mole kau ki te kokelekasio faka Kilisitiano, ia “te hahai [ʼaē ʼe] tui ki te Aliki.”—Gaue 2:41; 5:14; 8:12, 13.
Ko te pelesepeto ʼaē ʼe maʼu ia 2 Kolonito 6:14 ʼe maʼuhiga moʼo takitaki te kau Kilisitiano ʼi te ʼu potu fuli ʼo te maʼuli, pea ʼe tukui fakaʼaogaʼi moʼo fai he tokoni fakapotopoto ki te kau Kilisitiano ʼaē ʼe nātou kumi honatou hoa. (Mateo 19:4-6) Ko te Kilisitiano ʼaē kua foaki tona maʼuli kia Sehova pea mo papitema, ʼe mole faiga ke ina kumi hona hoa ia nātou ʼaē ʼe mole tui, koteʼuhi ko tanatou ʼu pelesepeto, te ʼu meʼa ʼaē ʼe nātou tui kiai pea mo tanatou ʼu fakatuʼutuʼu, ʼe kehekehe ʼaupito mo te ʼu fakatuʼutuʼu ʼa te Kilisitiano moʼoni.
Kae e feafeaʼi kia nātou ʼaē ʼe nātou ako te Tohi-Tapu pea mo nātou fakatahi mo te kokelekasio faka Kilisitiano? E feafeaʼi kia nātou ʼaē kua fai faka mafola kae mole heʼeki nātou papitema? Ko nātou koa ko he ʼu hahaʼi ʼe mole tui? Kailoa ia. Ko te hahaʼi ʼaē kua nātou tali te moʼoni ʼo te logo lelei pea mo nātou tuputupu ʼo aʼu ki te papitema ʼe mole tonu ke fakahigoaʼi ia nātou ko he hahaʼi ʼe mole tui. (Loma 10:10; 2 Kolonito 4:13) ʼI muʼa ʼo te papitema ʼo Kolonelio, neʼe fakahigoaʼi ia ia “ko he tagata tauhilotu mo teki ki te Atua.”—Gaue 10:2.
Kae ʼe fakapotopoto koa ki he Kilisitiano kua papitema ke hoko atu hana fakatahi pea mo ʼohoana mo he tahi kua fai faka mafola kae mole heʼeki papitema, ʼuhi pe heʼe mole faka ʼuhiga kiai ia te tokoni ʼa Paulo ʼaē ʼe tuʼu ia 2 Kolonito 6:14? Kailoa ia, ʼe mole ko he aga fakapotopoto ʼaia. Koteā tona tupuʼaga? ʼUhi ko te tokoni fakahagatonu ʼaē neʼe fai e Paulo ki te kau vitua Kilisitiano. Neʼe tohi fēnei e Paulo: “ ʼE ʼāteaina ia ke ʼohoana mo he tahi ʼe loto ki ai, kae ʼi te ʼAliki pe.” (1 Kolonito 7:39, MN ) ʼO mulimuli ki te tokoni ʼaia, ʼe fakaloto mālohiʼi te kau Kilisitiano ʼaē kua foaki tonatou maʼuli ke nātou kumi pe honatou ʼohoana ia nātou ʼaē kua nonofo “ ʼi te ʼAliki.”
Koteā koa te faka ʼuhiga ʼo te palalau “ ʼi te ʼAliki” pea mo te palalau ʼe fakapipiki kiai ʼaē ko te “ia Kilisito”? Ia Loma 16:8-10 pea mo Kolose 4:7, ʼe palalau ia Paulo ki te ʼu hahaʼi kua nātou nonofo “ia Kilisito” peʼe “i te Aliki.” Kapau ʼe koutou lau te ʼu vaega ʼaia, ʼe koutou tokagaʼi anai ko nātou ʼaia ʼe ‘ko he ʼu kaugā gāue,’ ‘ko he ʼu hahaʼi kua fakamoʼoni,’ ‘ko he ʼu tēhina ʼofaina,’ ‘ko he kau faifekau agatonu,’ pea mo ‘ko he ʼu kaugā popūla.’
Ko te temi fea ʼaē ʼe liliu ai he tahi ko he ‘popūla ʼi te ʼAliki’? ʼE hoki hoko te faʼahi ʼaia mokā ina fai te meʼa ʼaē ʼe tonu ke fai e he tagata popūla pea mo fakafisi kia ia totonu. ʼE fakamahino fēnei e Sesu: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” (Mateo 16:24, MN ) Ko he tahi ʼe ina kamata muliʼi ia Kilisito pea mo fakalogo ki te finegalo ʼo te ʼAtua mokā ina foaki ia ia totonu ki te ʼAtua. Hili ʼaia, pea ʼe ina foaki ia ia totonu ʼi te papitema pea mo liliu ai ko he minisi kua fakanofo pea mo fakamoʼoni ki ai ia Sehova ʼAtua. * Koia ko te ‘ ʼohoana ʼi te ʼAliki’ ko tona faka ʼuhiga ko he ʼohoana mo he tahi kua ina fakahā moʼoni ko ia ko he tahi ʼe tui, kua ina foaki ia ia ke liliu ko he “kaugana a te Atua mo te Aliki ko Sesu Kilisito.”—Sakopo 1:1.
ʼE tonu ke vikiʼi ia ia ʼaē ʼe ina ako te Tohi-Tapu mo te kau Fakamoʼoni ʼa Sehova pea mo tuputupu ʼi te faʼahi fakalaumālie. Kae ʼe mole heʼeki ina foaki ia ia totonu kia Sehova pea mo fai hana fakapapau ʼe ina fakaʼaogaʼi anai tona maʼuli ki te tauhi pea mo maʼuli faka sakilifisio. ʼE kei lolotoga fai te ʼu fetogi ʼi tona maʼuli. ʼE tonu muʼa ke ina fakahoko katoa te ʼu fetogi maʼuhiga ʼaē ʼe fakapipiki ki te liliu ko he Kilisitiano kua foaki tona maʼuli pea mo papitema, ʼi muʼa ʼo tana fakakaukauʼi atu he tahi ʼu fetogi maʼuhiga ʼi tona maʼuli, ohage ko te ʼohoana.
ʼE fakapotopoto anai koa ki he tēhina peʼe ko he tuagaʼane ke hoko atu hana fakatahi mo he tahi ʼe hage mai ʼe tuputupu ʼi tana ako te Tohi-Tapu, kae ʼe fia talitali muʼa ke hoki papitema pea hoki ʼohoana leva mo ia? Kailoa ia. ʼE feala pe ke mole mahino lelei ki he tahi ʼe kei ina ako te Tohi-Tapu, mo kapau ʼe ina ʼiloʼi ʼe fia ʼohoana he Kilisitiano mo ia kae ʼe fakatalitali muʼa ke hoki papitema.
ʼI te agamāhani, ko he tahi kua fai faka mafola kae mole heʼeki papitema ʼe fakatalitali siʼisiʼi muʼa, ke feala hana tuputupu pea hoki papitema leva. Koia ko te tokoni ʼaē ʼe tuʼu ʼi ʼaluga ʼo ʼuhiga mo te ʼohoana ʼi te ʼAliki pe ʼe ko he tokoni fakapotopoto. Kae e feafeaʼi la ki he fakatahi mo he tahi neʼe lahilahi ake ʼi he famili Kilisitiano, pea mo gāue mālohi ʼi te kokelekasio lolotoga he temi fualoa, pea mo gāue fai faka mafola kae mole heʼeki papitema? Kapau ko ia ʼaia, koteā koa ʼaē ʼe ina tāʼofi ia ia ke ina foaki tona maʼuli kia Sehova? Koteā ʼaē ʼe ina tuʼaniaʼi? ʼE ʼi ai koa he ʼu meʼa ʼe lotolotolua kiai? Logola ʼe ko he tahi kua tui, kae ʼe mole feala ke ʼui ʼe ko he tahi kua nofo “i te Aliki.”
Ko te tokoni ʼa Paulo ʼo ʼuhiga mo te ʼohoana ʼe ʼaoga kia tatou. (Isaia 48:17) Ko he ʼu Kilisitiano ʼe toko lua ʼe nā ʼamanaki ʼohoana kae kua nā foaki tonā maʼuli kia Sehova, ʼe nā maʼu toko lua ia te fakatafito fakalaumālie mālohi ki tanā fakapapau ʼohoana. ʼE tatau te ʼu pelesepeto mo te ʼu fakatuʼutuʼu ʼaē ʼe nā mulimuli kiai. ʼE tokoni lahi te faʼahi ʼaia ki he nofo ʼohoana fiafia. Pea tahi ʼaē meʼa, ʼi tanā ‘ ʼohoana ʼi te ʼAliki,’ ʼe nā fakahā ai tanā agatonu kia Sehova, pea ʼe iku ai ki he ʼu tapuakina heʼegata, koteʼuhi “ ʼaki ia ia ʼaē ʼe faitotonu, [ko Sehova] ʼe faitotonu anai [kia ia].”—Pesalemo 18:25.
[Kiʼi nota]
^ Maʼa te kau Kilisitiano fakanofo ʼaē neʼe ʼuluaki faitohi kiai ia Paulo, ko te liliu ko he ‘popūla ʼi te ʼAliki’ neʼe toe fakapipiki kiai tonatou fakanofo ke nātou liliu ko he ʼu foha ʼo te ʼAtua pea mo tēhina ʼo Kilisito.
[Paki ʼo te pasina 31]
“ ʼAki ia ia ʼaē ʼe faitotonu, [ko Sehova] ʼe faitotonu anai [kia ia]”