Fan̈ontanian̈any Pamaky

Azovy ma tiany Paoly koran̈iny, izy koa fa nivolan̈a “tsy pino” amy 2 Korintianina 6:14 ao in̈y?

Karaha ty koran̈iny 2 Korintianina 6:14: “Aza man̈eky han̈ano lazioga araiky aminolo tsy pino.” Hita mazava tsara baka amy volan̈a man̈odidin̈y fa olo tsy an̈isany fiangonan̈a olo tiany Paoly koran̈iny iô. Misy andininteny hafa ahitan̈a volan̈a “tsy pino” io koa mankamarin̈y zen̈y.

Ohatra ziô, nanariny Paoly mare iro Kristianin̈y aby io tsy handeha hitsarain̈a “man̈oloan̈a olo tsy pino”. (1 Korintianina 6:6) Iro olo pitsara tamy tribinaly ta Korinto tan̈y tiany Paoly koran̈iny amy tsy pino io. Nikoran̈iny Paoly tamy taratasinany faharoe fa Satana ‘mampajamba sain̈inolo tsy pino.’ Karaha misy lamba mandrakotro amy masonolo tsy pino aby io, ke manjary tsy mazava amindro vaovao tsara. Iro tsy man̈iry hanompo Jehovah foeky, fotony karaha efa nikoran̈iny Paoly in̈y: ‘Izikoa fa misy olo mimpody amy Jehovah, adoso i lamba mandrakotro io.’​—2 Korintianina 3:16; 4:4.

Sasany amindro tsy pino aby io olo pandika lalàn̈a na panompo sampy. (2 Korintianina 6:15, 16) Fa tsy iro jiaby manohitry panompony Jehovah. Sasany amindro io lian̈a amy fahamarin̈ana. Maro amindro io koa manambady Kristianin̈y fa tsy manan̈a eritreritry hisaraka zen̈y foeky. (1 Korintianina 7:12-14; 10:27; 14:22-25; 1 Petera 3:1, 2) Fa Paoly izikoa fa mikoran̈a momba olo ‘tsy pino’, karaha tan̈abon̈abo tarỳ, olo tsy an̈isany fiangonan̈a kristianin̈y raha tiany koran̈iny. Fotony “olo mino Tompo” mahaforon̈o fiangonan̈a kristianin̈y.​—Asan’ny Apostoly 2:41; 5:14; 8:12, 13.

Toro lalan̈a hita amy 2 Korintianina 6:14 ao io ten̈a tsara. Izio baka afaka mitaridalan̈a Kristianin̈y amy fiain̈anandro jiaby. Matetiky izio koran̈iny izikoa fa misy Kristianin̈y araiky mitady vady. (Matio 19:4-6) Misy jery Kristianin̈y araiky vita fanokan̈anten̈a ndreky batisa, izikoa tsy mandeha mitady vady olo tsy pino. Tsy mitovy foeky baka tanjon̈o ndreky finoan̈a avio fitondranten̈anolo tsy pino ndreky ninolo ten̈a Kristianin̈y.

Karakory ndraiky olo araiky izikoa mianatra Baiboly ndreky miaraka amy fiangonan̈a kristianin̈y, na koa pitory tsy vita batisa? Tsy pino koa ma iro io? Ehe. Olo koa efa nan̈eky vaovao tsara sady man̈ano fandrosoan̈a firaka amy batisa, efa tsy kahian̈a tsy pino eky. (Romanina 10:10; 2 Korintianina 4:13) Talohany batisanany, Kornelio ho Baiboly lelahy “pivavaka be sady navozo Zan̈ahary.”​—Asan’ny Apostoly 10:2.

Izikoa zen̈y, tsy tafiditry aminolo koran̈iny Paoly amy 2 Korintianina 6:14 ao dikanizen̈y izy. Ke hendry ma Kristianin̈y araiky vita fanokan̈anten̈a izikoa miaraka aminolo niken̈y ho pitory tsy vita batisa ndreky manambady izy? Tsy fahendrena raha karaha zen̈y izikoa zahan̈a torohevitry mivantan̈a namezany Paoly iro man̈angy kristianin̈y maty vady aby io. Ho izy: “Izy afaka manambady lan̈iany olo tiany, fa mila amy Tompo ao fo.” (1 Korintianina 7:39) Zen̈y mahavy Kristianin̈y vita fanokan̈anten̈a ampirisihin̈y hitady vady “amy Tompo ao fo.”

Ino ma dikany “amy Tompo” ao, ndreky volan̈a mifandray aminany “amy Kristy” io? Olo “amy Kristy” na “amy Tompo” raha tiany Paoly koran̈iny, amy Romanina 16:8-10 ndreky Kolosianina 4:7 ao. Izikoa vakinao andininy aby io, ho hitanao fa olo aby io ho izy “piaramiasa”, “ankasitrahin̈y”, ‘olo ten̈a tian̈a’, “panompo atokisan̈a”, avio “piaramanompo.”

Ombian̈a ma olo araiky manjary “panompo amy Tompo” zen̈y? Lera izy man̈ano raha tokony hataony panompo, ke man̈ano izio antsitrapo, ke efa tsy man̈ano raha tiany fo. Karaha ty baka han̈azavany Jesosy izio: “Izikoa misy olo mila han̈araka zaho, izy tsy mila man̈eky ain̈inany, baka io izy mila mitondra hazofijalian̈anany, ke han̈araka zaho fo.” (Matio 16:24) Olo araiky izikoa fa manokanten̈a amy Zan̈ahary, efa manomboko man̈araka Kristy ndreky man̈eky han̈ano sitrapony Zan̈ahary fo. Izy baka io man̈eky hatao batisa, ke manjary panompo avoatokan̈a sady ankasitrahiny Zan̈ahary Jehovah. a Safe “manambady amy Tompo” zen̈y, manambady olo araiky efa nan̈aboaka fa pino marin̈y, na koa olo efa nanokanten̈a nan̈ano “panompony Zan̈ahary ndreky panompony Jesosy Kristy Tompo.”​—Jakoba 1:1.

Izikoa olo araiky miaraka mianatra Baiboly amy Vavolombelon̈o Jehovah ndreky man̈ano fandrosoan̈a, izy ten̈a mendriky derain̈y. Fa izy fo mbala tsendriky nanokanten̈a tamy Jehovah, ke nampan̈anten̈a hanompo izy amy fiain̈ananany jiaby. Mbala vo manomboko fo izy ziô, amindro fan̈ovoan̈a mila hatao. Izy mila man̈ano fan̈ovoan̈a maventy, amy zen̈y izy hanjary Kristianin̈y vita fanokan̈anten̈a ndreky batisa. Afaranizen̈y izy vo tokotro handiniky raha hafa maventy amy fiain̈ana, karaha ataony vadian̈a.

Ke mety basy izikoa Kristianin̈y araiky miaraka aminolo efa karaha mandroso tsara amy fianaran̈a Baiboly, ke miambin̈y izy vita batisa zay iro vo mifanambady? Ehe, tsy mety. Izikoa baka hainolo io fa misy Kristianin̈y vita fanokan̈anten̈a tihanambady izy, manjary tsy ten̈a ho hay ino antony manosiky izy tihanjary Kristianin̈y. Tsy mety hanambady izy Kristianin̈y io, izikoa izy tsy vita batisa.

Matetiky, betibetiky pitory tsy vita batisa efa vita batisa edy, fotony baka izy tihandroso. Ke tsy sarotro arehan̈a torohevitry mila manambady amy Tompo io. Akory fo basy izikoa olo araiky efa amy taon̈o hahafahan̈a manambady, tombo tan̈aty fianakavian̈a kristianin̈y, mazoto mare an̈ivony fiangonan̈a tan̈atiny taon̈o maro, fa izy fo mbala pitory tsy vita batisa? Izikoa zen̈y, nino ma raha misakana izy tsy hanokanten̈a amy Jehovah? Nan̈ino izy misalasala? Nan̈ino izy tsy resy lahatra? Olo karaha zen̈y sady tsy an̈isany olo “amy Tompo”, fa ndray zen̈y, sady tsy an̈atinolo tsy pino.

Ten̈a mahatsara atsika torohevitriny Paoly momba vadian̈a. (Isaia 48:17) Izikoa olo aroe efa nanokanten̈a tamy Jehovah, mieritreritry han̈ano fivadiany, ho fatatra tsarabe fifan̈ikian̈a handeha ataondro io. Mitovy baka tanjon̈ondro ndreky fitondranten̈andro, ke zen̈y hahavy iro ho sambatra. Izikoa olo araiky ‘manambady amy Tompo’, ho hita tsarabe fa izy tsy mivadiky amy Jehovah. Ke Jehovah hitahy izy, fotony ‘Jehovah tsy mivadiky aminolo tsy mivadiky aminany.’​—Salamo 18:25.

[Lamariky amy pazy ambany]

[Sary]

‘Jehovah tsy mivadiky aminolo tsy mivadiky aminany’