Yiwusyo Yakutyochela kwa Ŵakuŵalanga

Pa 2 Akolinto 6:​14, Paulo Jwasasile ya Ŵandu Ŵangakulupilila, Ana Pelepa Jwasalaga ya Ŵani?

Lilemba lya 2 Akolinto 6:​14 likusati, “Mkasimkamulana ni ŵandu ŵangakulupilila.” Patuŵalasile ngani josope mpaka tuyiwone kuti Paulo jwasalaga ya ŵandu ŵanganaŵa mumpingo Ŵachiklistu. Yeleyi yikukamulana ni yaŵaŵechete Paulo m’Malemba gane pakusala ya maloŵe gakuti “ŵangakulupilila” kapena “jwangakulupilila.”

Mwachisyasyo, Paulo ŵakalamwisye Aklistu ŵaŵajigalilaga Aklistu achimjawo ku makoti ga “ŵandu ŵangakulupilila.” (1 Akolinto 6:6, NWT.) Ŵangakulupilila ŵakwasala palilembali ali ŵakulamulila ŵaŵakamulaga masengo ku koti ja ku Kolinto. M’chikalata chakwe chaŵili, Paulo jwasasile ya ŵandu ŵangakulupilila kuti jemanjaji ngakukulupilila ligongo nganisyo syawo asiŵisile m’chipi Satana. Meso ga ŵandu ŵangakulupililaŵa agawunichile kuti akamanyilila ngani syambone. Ŵandu ŵangakulupililaŵa ngakusalosya mtima wakusaka kumtumichila Yehofa. Yeleyi yikukamulana ni yaŵaŵechete Paulo. Jwalakwe jwatite, “Nambo naga mundu agalawuchile kwa Ambuje, chakuliwunichilacho chikusatyoka.”​—2 Akolinto 3:16; 4:4.

Ŵangakulupilila ŵane ŵangapikanila malamusi soni akusatumichila milungu jawunami. (2 Akolinto 6:​15, 16) Nambotu ngaŵa kuti ŵangakulupilila wosope akusalimbana ni ŵakutumichila ŵa Yehofa. Ŵane akusasaka kupikanila usyesyene. Ŵajinji mwa jemanjaji achiŵamkwawo ali Aklistu nambope akusakunda kupitilisya kuŵa mu ulombelawo. (1 Akolinto 7:​12-​14; 10:27; 14:22-​25; 1 Petulo 3:​1, 2) Ndaŵi syejinji Paulo jwakamulichisyaga masengo maloŵe gakuti “jwangakulupilila” kapena “ŵangakulupilila” pakusala ya ŵandu mpela ŵeleŵa, ŵanganaŵa mumpingo wa Chiklistu. Ŵandu ŵakusaŵa mu mpingowu akusaŵa ‘ŵakusakulupilila mwa Ambuje.’​—Masengo 2:​41; 5:​14; 8:​12, 13.

Mfundo ja pa 2 Akolinto 6:​14, jili jakamuchisya kwa Aklistu mu yosope yakusatenda paumi wawo. Nambosoni lilembali akusalikamulichisya masengo pakusaka kwakamuchisya Aklistu ŵakusaka mundu jwakulombana najo. (Mateyu 19:​4-6) Mklistu juŵalipeleche ni kubatisidwa, pakulosya kuti asagwile mwalunda nganaŵa alombene ni mundu jwangakulupilila. Yili myoyo ligongo ndamo, yakulinga soni yikulupi ya ŵandu ŵangakulupilila yikusaŵa yakulekangana ni ya Aklistu ŵasyesyene.

Nambi uli naga mundujo akulijiganya Baibulo soni akusasimanikwa pamisongano ja mpingo? Nambi uli naga mundujo ali jwakulalichila jwangabatisidwa? Ana nikuti ali m’gulu ja ŵandu ŵangakulupilila? Iyayi. Ŵandu ŵakulijiganya usyesyene soni akwawula pasogolo ni chakulinga chakuti abatisidwe, ngatukusosekwa kwakolanga kuti ali ŵangakulupilila. (Aloma 10:10; 2 Akolinto 4:​13) Koneliyo mkanabatisidwe, jwamanyikaga kuti jwaliji jwakulipeleka soni “ŵamjogopaga Mlungu.”​—Masengo 10:2.

Mwakamulana ni yeleyi, yaŵaŵechete Paulo pa 2 Akolinto 6:​14 ngayikusala ya ŵandu ŵali ŵakulalichila ŵangabatisidwa. Nambo ana mpaka luŵe lunda kwa Klistu juŵalipeleche kwa Yehofa kuŵa pachitomelo kapena kulombana ni jwakulalichila jwangabatisidwa? Iyayi, lwelelo ngaŵa lunda. Tukuŵecheta myoyo ligongo lya maloŵe gaŵaŵechete Paulo pakwamba ya achakongwe ŵamasije ŵali Ŵachiklistu. Paulo jwalembile kuti, “Jwamkongwejo komboleka kulombedwa ni jwamlume jwalijose jwakulukosi kwakwe, naga ali mklistu [kapena kuti alombele mwa Ambuje].” (1 Akolinto 7:​39) Mwakamulana ni yeleyi, Mklistu juŵalipeleche akusosekwa kulombana ni mundu jwali mwa Ambuje.

Ana maloŵe gakuti “mwa Ambuje” gakugopolela chichi? Pa Akolose 4:7 Paulo jwamkolasile Tukiko kuti ali “mjetu jwakunonyelwa ni jwakutumichila jwakulupichika, nipo soni jwamasengo mjetu mwa Ambuje.”

Ana ni ndaŵi japi jele mundu akusaŵa “jwamasengo . . . mwa Ambuje”? Yeleyi yikusatendekwa pandaŵi jele mundujo atandite yele jwamasengo akusatenda soni paliliŵalile msyene. Yesu jwatite, “Mundu jwakusaka kunguya une, akuŵajilwa kuliliŵalila msyene, nipo atwichile msalaba wakwe ni kunguya.” (Mateyu 16:24) Mundu palipeleche kwa Mlungu akusatanda kumkuya Klistu soni akusatenda yakusasaka Mlungu. Kaneko jwalakwe akusabatisidwa, mwamti yeleyi yikusamtendekasya kuti aŵe paunasi wambone ni Yehofa Mlungu. a Myoyo kulombela mundu jwali Mklistu yikugopolela kulombana ni mundu jwali jwakulupilila soni juŵalipeleche kuŵa “jwakutumichila jwa Mlungu ni Ambuje Yesu Klistu.”​—Yakobo 1:1.

Mundu pakulijiganya Baibulo ni ŵa Mboni sya Yehofa soni pakwawula pasogolo, akusaŵa kuti akutenda chindu chakusosekwa. Nambo jwalakwe akusaŵa kuti nganaŵe kulipeleka kwa Yehofa soni nganaŵe kumsalila kuti chachimtumichila jwalakwe kwa umi wakwe wosope. Yikusaŵa kuti jwalakwe akuchenga yindu yine paumi wakwe. Pakusaŵa yindu yejinji yakuti achenje kuti alipeleche ni kubatisidwa. Myoyo akusosekwa kutenda yeleyi mkanaŵe kutendasoni chindu chine champaka chichenje umi wakwe, mpela ulombela.

Ana mpaka luŵe lunda kwa Mklistu juŵabatisidwe kuŵa pachitomelo ni mundu jwakulijiganya Baibulo soni jwakwawula pasogolo ni chakulinga chakuti chalombane pachachibatisidwapo? Iyayi, lwelelu nganiluŵa lunda. Yakulinga ya mundu jwakulijiganya Baibulo mpaka yisokonechele naga ali amanyilile kuti pana Mklistu jwam’batisidwe jwachachimlomba pachachibatisidwapo.

Ndaŵi syejinji mundu akusaŵa jwakulalichila jwangabatisidwa kwakandaŵi kamnono, kaneko akusabatisidwa. Myoyo lilamusi lyakuti tulombeleje mwa Ambuje nganiliŵa lyakukandapasya yindu. Nambi uli kuŵa pachitomelo ni mundu jwayiche pamsingu wakuti mpaka alombele, juŵakulile m’liŵasa lya Mboni, jwaŵele ali mkusongana mwakutamilichika kwa yaka yejinji soni ali jwakulalichila jwangabatisidwa? Naga yili myoyo aganichisye ayi. Ana ni chichi chachikumlekasya kulipeleka kwa Yehofa? Ligongo chichi akuchelewa? Ana yipali yakukayichila? Yili yisyene kuti mundu jwelejo ali jwakulupilila, nambo naga Mklistu akulombana ni mundu jweleju nikuti ngakulombela “mwa Ambuje.”

Yaŵaŵechete Paulo pakwamba ya ulombela yili yakutukamuchisya. (Yesaya 48:17) Myoyo ŵandu ŵakusaka kulombana aŵeje ŵakuti wosope ŵalipeleche kwa Yehofa. Yeleyi yichakamuchisya kola liŵasa lyakulimba ligongo wosope chachiŵa kuti ali paunasi wambone ni Yehofa. Jemanjaji akusakola yakulinga yakulandana yayikusakamuchisya kuti asangalaleje mu ulombela wawo. Myoyo naga mundu ‘akulombela mwa Ambuje’ akusalosya kuti ali jwakulupichika kwa Yehofa. Yeleyi yikusamkamuchisya kuti apochele upile ligongotu ‘[Yehofa] ali jwakulupichika kwa ŵandu ŵali ŵakulupichika kwa jwalakwe.’​—Masalimo 18:25.

[Maloŵe ga Mwiŵanda]

[Chiwulili pa peji 31]

‘[Yehofa] ali jwakulupichika kwa ŵandu ŵali ŵakulupichika kwa jwalakwe.’