Ang mga Milagro ni Jesus—Tinuod o Tinumotumo?
Ang mga Milagro ni Jesus—Tinuod o Tinumotumo?
“ANG mga tawo nagdala kaniyag [Jesu-Kristo] daghang tawong gigamhan-sa-demonyo; ug gihinginlan niya ang mga espiritu pinaagi sa usa ka pulong, ug giayo niya ang tanang masakiton.” (Mateo 8:16) “Siya [Jesus] mibangon ug gibadlong ang hangin ug miingon sa dagat: ‘Hilom! Magmalinawon!’ Ug ang hangin milurang, ug miabot ang dakong kalinaw.” (Marcos 4:39) Unsay imong hunahuna niining mga pulonga? Nagtuo ka ba nga kini naghubit sa aktuwal, makasaysayanhon nga mga hitabo, o nagtuo ka ba nga kini maoy masambingayong mga estorya, tinumotumo lamang?
Daghan karon ang nagduhaduha gayod sa pagkamakasaysayanhon sa mga milagro ni Jesus. Niining panahon sa teleskopyo ug mikroskopyo, pagsuhid sa kawanangan ug pag-usab sa mga gene, morag ang mga tawo magpanuko na sa pagdawat sa mga taho bahin sa mga milagro ug labaw-sa-kinaiyanhon nga mga hitabo.
Ang uban nagtuo nga ang mga asoy sa mga milagro maoy hinanduraw o masambingayon. Sumala sa usa ka magsusulat sa usa ka libro nga nag-angkon nga nagsusi sa “tinuod” nga Jesus, ang mga estorya bahin sa mga milagro ni Kristo maoy “mga panganunsiyo” lamang aron sa pagsangyaw sa Kristiyanidad.
Ang uban nag-isip nga ang mga milagro ni Jesus maoy bug-os nga kabakakan. Usahay giakusahan si Jesus nga nanglimbong. Matod pa ni Justin Martyr sa ikaduhang siglo K.P., ang mga tigsaway kang Jesus “nagtawag pa gani kaniya nga madyikero ug manlilimbong sa katawhan.” Ang uban nag-ingon nga “wala himoa [ni Jesus] ang mga milagro ingong Hudiyohanong manalagna, kondili ingong madyikero, nga nabansay diha sa paganong mga templo.”
Paghubit sa Pagkaimposible
Maghunahuna ka tingali nga luyo sa maong mga pagduhaduha, dunay paninugdang katarongan kon nganong nagpanuko ang mga tawo sa pagtuo sa mga milagro. Nalisdan lamang sila sa pagdawat, dili pa gani makadawat, sa ideya nga ang labaw-sa-kinaiyahan nga mga puwersa maoy nagpahinabo sa maong mga milagro. “Dili gayod mahitabo ang mga milagro—dili gayod,” matod pa sa usa ka batan-on nga nag-angkon nga usa ka agnostiko. Dayon iyang gikutlo ang mga pulong sa ika-18ng siglo nga pilosopong taga-Scotland nga si David Hume, kinsa misulat: “Ang usa ka milagro maoy paglapas sa mga balaod sa kinaiyahan.”
Apan, daghan ang mabinantayon kaayo bahin sa pag-insistir nga imposible ang usa ka katingalahang hitabo. Ang The World Book Encyclopedia nag-ingon nga ang milagro maoy “usa ka hitabo nga dili ikapatin-aw pinaagi sa nailhang mga balaod sa kinaiyahan.” Sumala sa maong kahubitan, ang pagpanaw sa kawanangan, wireless nga komunikasyon, ug nabigasyon sa satelayt mopatim-aw nga morag “mga milagro” alang sa kadaghanang tawo usa lang ka siglo kanhi. Dili gayod maalamon ang pag-insistir nga ang mga milagro imposible tungod lang kay dili nato kini ikapatin-aw pinasukad sa presenteng kahibalo.
Kon susihon nato ang pipila ka ebidensiya sa Kasulatan nga nalangkit sa mga milagro nga gihimo ni Jesu-Kristo, unsay atong makaplagan? Ang mga milagro ba ni Jesus tinuod o tinumotumo?