Mga Milagro ni Jesus—Matuod Ukon Sugidsugid Lamang?

“GINDALA sa iya [kay Jesucristo] sang mga tawo ang madamo nga tawo nga ginsudlan sing demonyo; kag gintabog niya ang mga espiritu paagi sa isa ka pulong, kag gin-ayo niya ang tanan nga malain ang kahimtangan.” (Mateo 8:16) “Nagmata sia [si Jesus] kag ginsabdong ang hangin kag nagsiling sa dagat: ‘Hipos! Maglinong ka!’ Kag nagtunong ang hangin, kag nagluntad ang daku nga kalinong.” (Marcos 4:39) Ano ang masiling mo sa sini nga mga pinamulong? Nagapati ka bala nga natabo gid ini, ukon para sa imo ginhimohimo lamang bala ini nga mga sugilanon?

Madamo karon ang nagaduhaduha kon bala natabo gid ang mga milagro ni Jesus. Bangod sang moderno nga pag-uswag sa siensia, subong sang teleskopyo kag mikroskopyo, paglagulad sa kahawaan kag genetic engineering, daw indi na magpati ang mga tawo sa mga report tuhoy sa mga milagro kag sa labaw sa kinaugali nga mga hitabo.

Para sa iban ang mga kasaysayan sang mga milagro ginhimohimo lamang. Suno sa manunulat sang isa ka libro nga nagapangangkon nga nag-usisa sa “matuod” nga Jesus, ang mga sugilanon tuhoy sa mga milagro ni Cristo “mga pamaagi” lamang agod ipalapnag ang Cristianismo.

Ang iban nagtamod sa mga milagro ni Jesus subong pangdaya. Kon kaisa, si Jesus mismo ang ginsumbong nga manugdaya. Suno kay Justin Martyr sang ikaduha nga siglo C.⁠E., ang mga nagmulay kay Jesus “nagtawag pa gani sa iya nga isa ka madyikero kag manugdaya sang mga tawo.” Ginsiling sang iban nga  si Jesus “wala naghimo sang mga milagro subong isa ka Judiyong propeta, kundi subong isa ka madyikero, nga ginhanas sa pagano nga mga templo.”

Kon Ano ang Imposible

Mahimo ginapakita sining mga pangduhaduha ang panguna nga rason kon ngaa daw indi magpati ang mga tawo sa mga milagro. Para sa ila, mabudlay kag imposible pa gani nga batunon nga bangod sang labaw sa kinaugali nga mga puersa natabo ang mga milagro. “Wala sing mga milagro​—⁠tapos,” siling sang isa ka pamatan-on nga nagapangangkon nga agnostiko. Ginkutlo pa niya ang ginsiling sang taga-Scotland nga pilosopo sang ika-18 nga siglo nga si David Hume, nga nagsulat: “Ang milagro kontra sa mga kasuguan sa kinaugali.”

Apang, madamo ang magahalong sa pagsiling nga imposible ang isa ka hitabo. Ang The World Book Encyclopedia naglaragway sa milagro subong “isa ka hitabo nga indi mapaathag paagi sa nahibaluan nga mga kasuguan sa kinaugali.” Suno sa sini nga kahulugan, ang paglakbay sa kahawaan, ang pagkomunikar paagi sa telepono kag radyo, kag ang paglakbay sang mga satellite mahimo ginkabig sang madamo subong “mga milagro” sang nagligad lamang nga 100 ka tuig. Indi gid maalamon nga isiling nga imposible ang mga milagro bangod indi naton ini mapaathag pasad sa ihibalo sa karon.

Kon usisaon naton ang pila ka ebidensia sa Kasulatan tuhoy sa mga milagro nga ginhimo ni Jesucristo, ano ang makita naton? Natabo gid bala ang mga milagro ni Jesus?