Saray Milagro nen Jesus​—Katuaan Odino Istorya Labat?

“INYAKAR da’d sikato [si Jesu-Kristo] so amayamay a sinelepan day demonyos; et pinapaway to’ray espiritu ed sakey a salita, tan pinaabig to’ray mabeblay.” (Mateo 8:16) “Binmangon tan binano to [nen Jesus] so dagem, tan inkuan to ed dayat, Deen ka, agka onggagalaw. Et say dagem tinmunda, tan agawa so baleg a linak.” (Marcos 4:39) Antoy nikuan yo ed saratan a balikas? Kasin panisiaan yo a dedeskribien na saratan so aktual tan maawaran ya agawgawa, odino moriaen yo iratan bilang masimbolikon istorya, a gawagawa lambengat na isip?

Dakel natan so pirmin manduaruwa nipaakar ed inkamaawaran na saray milagro nen Jesus. Diad sayan panaon na teleskopyo tan mikroskopyo, panagbaroy ed liwang tan genetic engineering, ompatnag ya agla napanisiaan iray nibabalita a mamilagron gawa tan madibinon pakelaw.

Ipapasen na arum ya imahinasyon odino simboliko labat iray salaysay nipaakar ed saray milagro. Unong ed autor na sakey a libro a mangibabagan nansukimat ed “peteg” a Jesus, saray istorya nipaakar ed milmilagro nen Kristo et “pakana” lambengat pian nikayat so Inkakristiano.

Momoriaen na arum iray milagro nen Jesus bilang sigpot a panamalingo. Aminsan et inakusaan a mismo si Jesus bilang managpalikdo. Unong ed si Justin Martyr nen komaduan siglo K.P., saray manag-akusa ed si Jesus so “anawag ni ingen ed sikato bilang managsalamangka tan managpalikdo na totoo.”  Inkuan na arum ya “agginawa [nen Jesus] iray milagro to bilang sakey a Judion propeta, noagta bilang sakey a managsalamangka, ya impasal ed saray templo na pagano.”

Impanguker ed Salitan “Imposible”

Nayarin iisipen yo a diad saratan a panduaruwa et wala so manunan rason no akin a mairap a panisiaan na totoo iray milagro. Basta ipapasen da labat a mairap, imposible ni ingen, a naawat so ideyan saray labas nin natural a puersa et makapawala na ontan iran milagro. “Anggapo ‘tay milagro!” so inkuan na sakey a kalangweran ya ipapasen toy inkasikaton agnostiko. Insan to inaon iray balikas ya insulat na pilosopon taga-Scotland nen koma-18 a siglo a si David Hume: “Say milagro et sumlang ed saray ganggan na palsa.”

Balet, dakel so maal-alwar nipaakar ed pangibaga ran imposible so sakey a makapakelaw ya ebento. Tinukoy na The World Book Encyclopedia so milagro bilang “sakey ya ebento ya agnipaliwawa panamegley na saray kabat lan ganggan na palsa.” Unong ed satan ya impanguker, ompatnag a say panagbaroy ed liwang, komunikasyon panamegley na radyo-telepono, tan nabigasyon panamegley na satellite et “milagro” la parad maslak a totoo diad apalabas labat a siglo. Seguradon agmakabat so pangibagan imposible iray milagro lapu lambengat ta agtayo nipaliwawa iratan unong ed kaplesan a pikakabat tayo.

No usisaen tayo so pigaran Makasulatan ya ebidensya a misiglaotan ed saray milagron ginawa nen Jesu-Kristo, anto so naamtaan tayo? Kasin peteg ya agawa iray milagro nen Jesus odino istorya labat?