A Ongasireng Er A Jesus Ngklemerang Ma Lechub E Ngdelbochel El Tekoi?

“EA BOCHA le kebesengei e ar chad a chilteklterir ar betok el blekall rar mekngit el reng el mer ngii; me nguleba chomelekoi loldik rar mekngit el reng, el ulemekungil tirikal rokui el smecher.” (Matteus 8:​16) “Ma Jesus a mlo dechor e dilu el kmo, ‘Eolt, bo mchelellakl; chedesaoch, bo meiusech!’ Me ng di mlo diak a eolt e mo meiusech.” (Markus 4:​39) Ngua ngera osengem el kirel aika el tekoi? Kau ke oumerang el kmo ngmesaod er a tekoi el mera el dilubech, ma lechub e ke omdasu el kmo ngdi mle cheldecheduch me tirke el chad er ngii ma tekoi el dilubech a di okesiu el tekoi, el di delbochel el tekoi?

Ngbetok a rechad er a chelecha el taem el diak el sal loumerang el kirel aike el ongasireng el lurruul a Jesus er a irechar. Chelecha el taem el ngar er ngii a rua telescope el dousbech el omes a btuch, ma microscope el dousbech el omes a mekekerei el klekedall, ma omesuub er a melidiul, ma omengituuk er a genes er a rechad, a mla rulleterir a rechad el mo diak loumerang a ongasireng el tekoi ma aike el dilubech el tekoi el kmal mesisiich el diak el sebechir a redi chad el remuul.

A rebebil a omdasu el kmo aike el tekoi er a ongasireng a di delbochel el uldasu ma lechub e ngkora di tekoi el olechotel a kmung ngerang. Ngar er a tekingel a chad el meluches er a book el ngii a lekong osiik er a “mera” el Jesus a kmo, aike el cheldecheduch el kirel a ongasireng el lurruul a Jesus a diak lengerang e ngbai di “klekedall er a makit” el ua longesuseu el mo omerk er a tekoi er a Klekristiano.

A rebebil a omes aike el ongasireng el lurruul a Jesus el ua leblulak el tekoi. A lebebil er a taem e te kuk melekoi el kmo a Jesus a di mle ngii el meruul a cheleblad el tekoi. A Justin Martyr er a ongeru el dart el rak C.E., a melekoi el kmo tirke el osiik a kngtil a Jesus “a dirrek el lulemekedong er ngii el kmo ngchad er a olai e mengeuid el omulak er a rechad.” A rebebil a melekoi el kmo a Jesus “a dimlak loruul a ongasireng el uai leprofet er a Judea, e ngbai ngii a chad er a olai el milsuub el ngar er a templo er a rediak el Kristiano el chad.”

 Belkul a Diak el Sebechel el Tekoi

A ltang sebechem el kora melatk el kmo, a ikrel aika el tekoi el diak el sal loumerang er ngii a rechad, e ngngar er ngii a kmal ungil el uchul ma rechad a diak el sorir el oumerang a ongasireng el tekoi. Te metik er ngii el meringel, e dirrek el diak el sebechir el mo kongei er a uldasu el kmo aike el diak lemeues el klisiich a sebechel el mo oureor el remuul a ongasireng el tekoi.” A ongasireng el tekoi a diak el sebechel el duubech​—e merekong,” ngmillekoi a ta el kekerei el chad el ngii a diak loumerang el kmo a Dios a mera el ngar er ngii. Ngdirrek el millekoi a tekingel a chad el kiliei er a ongeteruich ma ongeai el dart el rak el chad er a Scotland el mesuub a uldasu el ngklel a Dave Hume el milluches el kmo: “A ongasireng a omtok er a llechul a lukel a klengar.”

Nguaisei, engdi a rebetok el chad a dirrek el kora bekikl el dmu el kmo a tekoi el dilubech a kmal dimlak el mera el mle sebechel el duubech. A The World Book Encyclopedia a melekoi er a ongasireng el kmo “a tekoi ma lechub e ngomeruul el diak el sebechel el mesaod el oeak a llach er a lukel a klengar.” Me ngngoeak tiaikid el lomesodel, e a mo suebek er a melidiul, ma cheldecheduch lokiu a diak lemeues el seng, ma bekall er a melidiul, a tekoi el betok el chad a omes el ua ble “longasireng” er a dart el rak ra mla memong. Me ngkmal diak el ungil a domdasu e dolekoi el kmo a ongasireng diak el sebechel el tekoi e le ngdiak el sebeched el smaod el okiu a di klemedengei el dolab er a chelecha el taem.

A lsekum e kede merritel a bebil er a olechotel a bades er a Biblia el mesaod a ongasireng el lurruul a Jesus Kristus, e ngera kede mo metik? A ongasireng el lurruul a Jesus ngklemerang ma lechub e ngdelbochel el tekoi?