Naa Vhuṱolo Ha Yesu Ndi Ngoho Kana Ndi Lungano?

VHATHU “vha ḓisa vhanzhi vha mimuya mivhi ha ene [Yesu Kristo], a pandela mimuya mivhi nga u amba hawe, a fhodza vhoṱhe vha lwalaho.” (Mateo 8:16) “Ene [Yesu] a vuwa a kaidza ḓumbu, a amba na maḓi a ri: Fhumula, U ri ‘tshete’! Huno ḓumbu ḽa fhumula, ha vha na u dzika huhulu.” (Marko 4:39) Ni nga ri mini malugana na zwo ambiwaho afho nṱha? Naa ni a tenda uri ndi mafhungo a vhukuma, kana naa ni humbula uri ndi nganea dza vhathu vha pfanyisedzo kana ngano?

Vhathu vhanzhi vha a timatima vhukuma nga ha vhuṱolo ha Yesu. Tshifhinga tshine ra khou tshila khatsho tshine tsha vha na zwivhonelatsini na zwivhonelakule, vhane vha fhufha muyani na vhainzhiniara, tshi ita uri vhathu vha timatime nga ha vhuṱolo na mishumo i mangadzaho ya Mudzimu.

Vhaṅwe vha humbula uri mafhungo a vhuṱolo ndi ngano kana ndi mafhungo a pfanyisedzo. U ya nga muṅwali wa bugu ine ya amba uri u ḓivha zwavhuḓi nga ha Yesu wa “vhukuma,” o sumbedza uri mafhungo a vhuṱolo ha Kristo a sokou vha ‘khunguwedzo’ ya u engedza Vhakriste.

Vhaṅwe vha dzhia vhuṱolo ha Yesu hu vhufhura. Yesu u dovha a vhonwa mulandu wa u vha na vhukwila. U ya nga Justin Martyr wa ḓana ḽa vhuvhili ḽa miṅwaha C.E., u sumbedza uri vhasasaladzi vha Yesu “vho ita na u mu vhidza mudzia-manditi na mufhuri wa vhathu.” Vhaṅwe vha amba uri Yesu “ho ngo ita  vhuṱolo hawe sa muporofita wa Muyuda, fhedzi sa mudzia-manditi, we a hu gudela thembeleni dza vhuhedeni.”

Zwine u sa Konadzea ha Tshithu zwa Amba Zwone

Ni nga kha ḓi tenda uri khamusi hu na tshiitisi tshi pfalaho tsha uri vhathu vha timatime nga u ralo malugana na vhuṱolo. Vha sokou pfa zwi tshi vha konḓela u tenda uri maanḓa a fhiraho nungo dza muthu a a shuma. Muṅwe muswa we a vha a sa tendi uri Mudzimu u hone o ri: “Vhuṱolo a vhu sokou bvelela nga hone huṋe.” Nga zwenezwo a redza maipfi a muḓivhi wa pfunzo dza maṱali wa ḓana ḽa vhu-18 ḽa miṅwaha ane a bva Scotland ane a pfi David Hume, we a ṅwala u ri: “Vhuṱolo ndi u tshinyadza milayo ya mupo.”

Naho zwo ralo, vhanzhi vho vha vha tshi ḓo ṱhogomela vhukuma malugana na u tenda uri huna zwiṅwe zwithu zwi sa konadzei. The World Book Encyclopedia i vhidza vhuṱolo “sa tshiitea tshine tsha nga si kone u ṱalutshedzwa nga milayo ya mupo i ḓivheaho.” Nga yeneyo ṱhaluso, zwithu zwi fhufhaho muyani, ṱhingo dza muyani, na satellite navigation zwo vha zwi tshi ḓo vha zwi “vhuṱolo” maḓanani a miṅwaha o fhelaho. Vhukuma ndi vhutsilu u amba uri vhuṱolo a vhu konadzei nga ṅwambo wa uri ri nga si kone u vhu ṱalutshedza u ya nga nḓivho yashu.

Arali ra ṱolisisa vhuṅwe vhuṱanzi ha Maṅwalo vhune ha amba nga ha Yesu Kristo, ri ḓo wana mini? Naa vhuṱolo ha Yesu ndi ngoho kana ndi lungano?