Jesús ñi afmatufalchi dungu ñi femün, ¿chem quimeltueimu?

Biblia mu ñi huirintucungeel ti afmatun dungu ñi femün Jesús, griego quehun mu huirintuculelai ti palabra feipilelu “afmatun dungu”. Quiñeque mu pünengequei ti palabra dyʹna·mis, tüfa feipilei “pepiluhun” (Lucas 8:46). Ca feipiafui “adümuhun” ca “afmatun dungu” (Mateo 11:20; 25:15). Quiñe quim huentru feipi: “Tüfachi palabra cüpa feipilei ti afmatun dungu ca inei ñi nehuen mu femngei feichi afmatun dungu, tüfa ta Chau Ngünechen ñi nehuen mu cüpai”.

Ca quiñe palabra griego quehun feipilelu afmatun dungu tüfa ta teʹras (Juan 4:48; Hechos 2:19). Tüfa pengeli ñi chum duameleteu feichi pu che pefilu ti afmatun dungu. Fentren rupa tati pu che afmatulquefeyu chem ñi femün Jesús (Marcos 2:12; 4:41; 6:51; Lucas 9:43).

Cangelu palabra fei ta se·meiʹon. Quiñe quim huentru feipi: “Tüfachi palabra doi cüme pengeli chem am quiñe afmatun dungu. Ti afmatun dungu pengeli ti rüf dungu ta Ñidol Jesús meu” pi tüfachi huentru.

¿Ngünencan dungu müten cam Chau Dios mu cüpai?

Jesús ñi afmatun dungu re ngünencan müten no ñi ayüumayafiel tati pu che. Doi mai pengeli Chau Dios ñi fütra nehuen, fei tüfa pengeli tremoltufilu quiñe hueche huentru conhuecüfülelu (Lucas 9:37-43). Chau Ngünechen com nehuen niei, ¿femnoafulu cai tüfachi dungu? Biblia feipi: “Fütra pepiluhun niei” (Isaías 40:26).

Biblia mu ti lifru Mateo, Marcos, Lucas, Juan nütramcai 35 afmatun dungu ñi femün Jesús. Huelu tüfa quiñeque dungu müten. Mateo 14:14 pengeli Jesús ñi pefiel fentren che, “rume cutranpiuqueyefi engün, fei tremoltufi com pu cutran”. Huelu feipilai tunten cutran tremoltufi.

Jesús feipi Chau Ngünechen ñi Fotümngen, ti Mesías feipicünungelu ñi cüpayal. Feimu ti afmatun dungu pengeli ñi rüfngen tüfachi dungu. Biblia feipi Chau Ngünechen ñi nehuen mu, Jesús femi afmatun dungu. Ti apostol Pedro feipi: “Jesús ti Nazaret che meu, Chau Ngünechen femi fütraque afmatun dungu tamün adquiñ meu. Femngechi pengeli fei tañi huercüfiel, chumngechi tamün quimnieel” (Hechos 2:22, Traducción del Nuevo Mundo [TNM]). Ca rupa Pedro feipi, Jesús lloulu Chau Ngünechen ñi nehuen “huall mapu püle cümeque dungu femi, ca tremoltufi tati pu che ñi cutrancanieteu ti Huecüfü. Chau Ngünechen mülerquei Jesús engu” (Hechos 10:37, 38).

Jesús tañi femün afmatun dungu nüucülequefui tañi quimeltun mu. Marcos 1:21-27 pengeli ñi chumün tati pu che allcütulu Jesús ñi quimeltun ca ñi pefiel quiñe afmatun dungu. Ti versiculo 22 pengeli tati pu che afmatulehuei quisu tañi quimeltun mu. Ti versiculo 27 mu ca femngechi afmatulehueingün pefilu ñi huemünentufiel quiñe huesa püllü. Jesús ñi afmatun dungu ca tañi quimeltun quimfalcünui tañi Mesías ngen.

Jesús re feipilai müten ñi Mesías ngen, doi mai pengeli tüfa tañi femün ca tañi feipin mu ca tati afmatun dungu ñi femün Chau Ngünechen ñi nehuen mu. Ramtucangelu tañi ineingen ca inei ñi elueteu pepiluhun, llicanon mu feipi: “Iñche ñi nieelchi dungu doi fali Juan ñi huldungun mu. Tañi Chau feipieneu ñi chem chumal. Feimu tañi femün meu quimfali tañi Chau ñi huercüeteu” (Juan 5:36, TNM).

¿Rüfngepei mai ti afmatun dungu ñi femün Jesús?

¿Chumngechi quimafuiñ ñi rüfngen tati afmatun dungu ñi femün Jesús? Inaduamaiñ quiñeque dungu.

Jesús femlu afmatun dungu, ayülafui ñi quisu saquingeal, doi mai püramyefi ta Chau Ngünechen. Quiñe rupa petu ñi tremoltunofiel quiñe trauma huentru, feipi ñi femal ti afmatun dungu pu che ñi peal Chau Dios ñi pepiluhun (Juan 9:1-3; 11:1-4).

Jesús ñi femün trürlai tati pu calcu, pu mago ca pu curandero ñi femün. Jesús turpu pünelafui hipnotismo, trucos, conjuros ca fillque dungu ñi re afmatulafiel pu che. Ca duamlafui supersticiones ca reliquias. Ngüneduamnge ñi ñom piuquengen Jesús ñi tremoltufiel epu trauma. “Jesús fente ñi cutranpiuqueyefiel, fampuhuli ñi cuhu fei engu ñi nge mu. Feimeu müten pelotuingu, ca inaeyu” (Mateo 20:29-34, TNM). Jesús chumlai rume ñi afmatulafiel pu che. Fentren che peeyu ñi femün ti afmatun dungu. Huelu feichi pu che ñi femün afmatun dungu fantepu mu, quimngequelai ñi rüfngen cam ñi rüfngenon (Marcos 5:24-29; Lucas 7:11-15).

Ñi femün Jesús afmatun dungu ñi quelluafiel tati pu che, quiñeque mu saquifi tañi feyentulen engün. Huelu feyentunofule rume quiñe che, femquefui ti afmatun dungu. Capernaúm huaria mu mülelu cüpalelngei fentren che conhuecüfülelu. Dungulu müten Jesús huemünentufi pu huesaque püllü, cafei tremoltufi com pu cutran (Mateo 8:16).

Ñi femün afmatun dungu Jesús, ayüfui ñi rüf quelluafiel tati pu che duamnielu, tati pu re lelimequelu no (Marcos 10:46-52; Lucas 23:8). Cafei femlai afmatun dungu ñi quisutu cümelcahual müten (Mateo 4:2-4; 10:8).

¿Manelfalngepei mai ñi chem pin ta Biblia?

Ti lifru Mateo, Marcos, Lucas, Juan nütramcai Jesús tañi femün afmatun dungu. ¿Maneluhuafuiñ ñi chem pin tüfachi meli lifru? Maneluhuafuiñ llemai.

Fentren che pefi ta Jesús ñi femün afmatun dungu. Fei engün petu mongelequefui huirintucungelu tati pu hunenque evangelio. Quiñe lifru feipi ñi manelfalngen tati pu huirintuculu ti pu evangelio: “Feipingelayafui tati pu huentru huirintucufilu ti evangelio ñi huirintucuel fentren afmatun dungu femngechi ñi quimngenoal tati rüf dungu ñi rupan cam ñi amultucual ti religion. Fei engün rüf ayüniefui ñi huirintucual chem ñi rupan” (The Miracles and the Resurrection [Los milagros y la resurrección]).

Pu judio caiñetuquefilu pu cristiano, rüf rupalai tüfachi afmatun dungu pilaingün. Doi mai feyentulaingün Jesús ñi femün afmatun dungu Chau Dios ñi nehuen mu (Marcos 3:22-26). Caquelu che no rume, feingelai ti afmatun dungu pilafui. Huelu mai doi pataca tripantu rupalu Jesús ñi femün afmatun dungu, pu che amulei ñi nütramcamequen ta tüfa. Felei llemai, feyentuafiyiñ pu evangelio Jesús ñi femün afmatun dungu.

Jesús ñi chumngen

Re ngüneduamlayafuiñ chem pengelquei Jesús ñi femün afmatun dungu. Pu evangelio nütramcalu ñi femün Jesús, pengeli tañi cutranpiuqueyechequen, tañi cüme piuquengen ca tañi duamtuchequen.

Ngüneduamaiñ chumngechi Jesús quellufi quiñe leproso. “Pifulmi eimi, tremoltuafen tañi cutran meu” pieyu ta Jesús. Jesús cutranpiuqueyefi, fampuhulelfi ñi cuhu, fei feipifi: “Ayülen tami tremotual. ¡Tremotunge!”. Feimeu müten tremotui ti huentru (Marcos 1:40-42). Femngechi Jesús pengeli ñi femün afmatun dungu tañi cutranpiuqueyechen mu.

Ca rupa Jesús pei ñi yeniengen quiñe la ñi rüngalmengeal, tüfa quiñe hueche quiñe lantu domo ñi quiñen püñeñ. Jesús cutranpiuqueyefi ti lantu domo, fülcontufi, fei feipifi: “Ngelai tami ngümayal”. Fei huiñomongeltuñmafi ñi püñeñ (Lucas 7:11-15).

¡Müna yafültucuqueiñmu tüfachi nütram! Quimeltuqueiñmu Jesús ñi quellufiel ta che fente tañi cutranpiuqueyechen. Tüfachi afmatun dungu re epeu müten no. Biblia feipi: “Cuifi, famülque ca rumel meu Jesucristo caletuquelai” (Hebreos 13:8, TNM). Famülque mu ngüneniemequei huenu mu, niei Chau Ngünechen ñi nehuen ca pepicaucülei ñi femal doi fütraque afmatun dungu. Pichiñma mu cümelcayafi com tati pu feyentulelu, pu Dunguquelu Ineingen Jehová ayühunquechi quimeltuleluhuayiñ tüfachi maneluhun.

[Adentun]

Jesús ñi afmatun dungu pengeli Chau Ngünechen ñi fütra nehuen

[Adentun]

Jesús rume cutranpiuqueyechequefui