Aha do na Boi Taboto sian Mukjizat na Dibahen Jesus?

Tikki manjaha Bibel, songgot do ra rohamuna dung mamboto dang adong hape dipakke hata “mukjizat” di bahasa aslina lao manaringoti akka ulaon ni Jesus tikki di tano on. Bahasa Junani mukjizat i ma (dyʹna·mis) na boi diterjemahon gabe “huaso”. (Lukas 8:46) Manang boi do diterjemahon gabe “kesanggupan”. (Mateus 11:20) Menurut sahalak pakar, bahasa Junani i “patuduhon adong huaso na balga, i ma huaso sian Debata na mambahen makana boi terjadi peristiwa na luar biasa i”.

Bahasa Junani na asing (teʹras) biasana diterjemahon do gabe “tanda halongangan”. (Johannes 4:48; Ulaon ni Apostel 2:19) Sian hata on, boi ma taboto songon dia pengaruhna tu akka halak na mangida mukjizat i. Biasana, dung diida akka halak dohot akka sisean mukjizat ni Jesus, longang do roha ni nasida.​—Markus 2:12; 4:41; 6:51; Lukas 9:43.

Bahasa Junani na patoluhon (se·meiʹon) lapatanna “tanda”. Sahalak pakar na margoar si Robert Deffinbaugh mandok, “Mukjizat i dang holan peristiwa na mambahen asa longang roha. Alai tanda do i na paboahon taringot Jesus.”

Holan Sulap do I Manang Huaso sian Debata?

Dang adong didok Bibel, holan sulap do mukjizat ni Jesus i na dibahen lao menghibur akka halak. Alai “huaso ni Debata na massai balga” do i, songon na hea masa tikki diusir Jesus suru-suruan na jahat sian sahalak dakdanak. (Lukas 9:37-43) Pasti dang maol di Debata mangulahon i, alana Pargogo na So Hatudosan do Ibana. Bibel mandok, “Massai balga situtu do huasona jala massai gogo situtu do Ibana.”​—Jesaya 40:26.

Adong hira-hira 35 mukjizat ni Jesus na dipaboa di Injil. Alai dang dipaboa sadia godang do sebenarna mukjizat na dibahen Jesus. Misalna, Mateus 14:14 mandok, “Diida [Jesus] ma massai godang halak disi. Asi ma rohana mangida nasida jala dipamalum ma akka na marsahit.” Dang taboto piga halak na dipamalum Jesus tikki i.

Akka mukjizat na dibahen Jesus patuduhon tutu do ibana Anak ni Debata, i ma Messias na Dijanjihon i. Takkas do dipaboa di Bibel, na diurupi tondi parbadia ni Debata do Jesus makana boi dibahen ibana mukjizat. Didok apostel Petrus do, ‘Na sinuru ni Debata do Jesus i. Takkas do i tarida marhite akka tanda halongangan na binahen ni Debata marhite-hite ibana di tonga-tongamuna, songon naung diboto hamu.’ (Ulaon ni Apostel 2:22) Di tikki na asing, didok si Petrus do muse, ‘Na dipillit Debata do Jesus marhite tondi parbadia. Dilehon Debata do tu ibana huaso. Didalani ibana do sude luat i lao mangulahon na denggan. Jala dipamalum ibana do sude na dirajai Sibolis, ai Debata do na mandongani ibana.’​—Ulaon ni Apostel 10:37, 38.

Adong do hubungan ni mukjizat na dibahen Jesus tu barita na uli na dipasahat ibana. Dipaboa do di Markus 1:21-27 taringot songon dia perasaan ni akka halak dung mambege ajaran ni Jesus jala mangida mukjizat na dibahen ibana. Markus 1:22 mandok, “Longang do roha ni nasida mambege ibana tikki mangajari.” Jala di ayat 27, “longang” do tong roha ni ni nasida tikki dipalao Jesus suru-suruan na jahat. Jadi ajaran ni Jesus dohot mukjizat na dibahen ibana gabe bukti na patuduhon tutu do ibana Messias na Dijanjihon i.

Dang holan sian hata dohot sian pambahenan dipatudu Jesus molo ibana Messias. Alai sian akka mukjizat na dibahen Jesus pe, boi do tarida huaso ni Debata. On patuduhon toho do ibana Messias. Tikki adong na manukkun tu Jesus ise na manuru ibana jala ise na mangalehon huaso tu ibana lao mambahen mukjizat, didok Jesus do, “Uppetting do na hupaboa sian na dipaboa si Johannes [Pandidi]. Ai ulaon na dilehon Ama i lao pasidungokku, akka i do na huulahon. Jala on ma na patuduhon Ama i do na manuru au.”​—Johannes 5:36.

Akka Bukti na Patuduhon Toho do Terjadi Akka Mukjizat ni Jesus I

Aha do buktina dang dibahen-bahen mukjizat ni Jesus i, jala toho do i terjadi?

Dang hea Jesus pasangappon dirina sandiri tikki mambahen mukjizat. Alai sai dipastihon ibana do asa mukjizatna i parohon sangap dohot pujian tu Debata. Contohna sebelum pamaluppon sahalak bawa na buta, didok Jesus dibahen ibana pe mukjizat i “asa idaon ni akka jolma do aha na boi diulahon Debata marhite ibana”.​—Johannes 9:1-3; 11:1-4.

Tikki mambahen mukjizat Jesus, dang songon tukkang sulap manang akka halak na jotjot mambahen mukjizat di jamanta saonari ibana. Dang hea Jesus menghipnotis halak, mangoto-otoi, mambahen pertunjukan na spektakuler, mamakke mantra, manang mambahen penyembuhan iman songon na dibahen akka agama saonari. Dang porsea Jesus tu takhayul jala dang hea dipakke ibana jimat. Parrohahon ma songon dia cara ni Jesus pamaluppon dua bawa na buta. Bibel mandok, “Gabe asi ma roha ni Jesus, dung i dijama ibana ma mata ni nasida. Laos di tikki i, boi ma nasida marnida jala diihutton nasida ma ibana.” (Mateus 20:29-34) Tikki mambahen mukjizat, dang dibahen Jesus ritual, pameran, manang acara na istimewa. Jala biasana di jolo ni godang halak do dibahen ibana mukjizat. Asing ni i, dang dibahen Jesus pencahayaan khusus, penataan panggung, manang perlengkapan panggung. Alai molo akka mukjizat songon na dibahen akka halak di jamanta saonari, dang boi i direkam asa unang adong halak na mangida songon dia prosesna.​—Markus 5:24-29; Lukas 7:11-15.

Tikki pamaluppon sasahalak, olo do sipata dipaboa Jesus alani haporseaon ni halak i do makana boi ibana malum. Alai molo tung pe hurang haporseaon ni sasahalak, tetap do olo Jesus pamaluppon ibana. Contohna tikki di Kapernaum na di Galilea, “diboan ma tu Jesus godang na sinonggopan ni suru-suruan na jahat. Marhite hata sakkababa, diusir ibana ma akka suru-suruan na jahat i jala dipamalum do sude na marsahit i”.​—Mateus 8:16.

Dibahen Jesus pe mukjizat lao mangurupi akka halak do, dang na lao patuduhon na jago ibana. (Markus 10:46-52; Lukas 23:8) Jala dang hea Jesus mangalului uttung tikki mambahen mukjizat.​—Mateus 4:2-4; 10:8.

Boi do Dihaporseai na Didok di Akka Bukku Injil?

Boi do tajaha taringot akka mukjizat na dibahen Jesus di opat bukku Injil. Alai adong do bukti na boi paposson rohatta memang tutu do hea terjadi akka mukjizat ni Jesus i? Adong.

Songon naung dipaboa nakkin, godang do halak na mangida tikki dibahen Jesus mukjizat. Jala mangolu dope akka halak i tikki disurat opat bukku Injil. Didok do di bukku The Miracles and the Resurrection, “Dang toho molo tadok na dibahen-bahen nasida cerita mukjizat lao manabunihon fakta sejarah jala lao mempromosihon agama ni nasida. Jujur do sude panurat ni akka bukku Injil i.”

Adong do halak Jahudi na so lomo rohana tu halak Kristen. Alai nang pe songon i, porsea do nasida memang toho do terjadi mukjizat na dibahen Jesus na disuratton di Injil i. Holan na so porsea do nasida sian Debata do huaso ni Jesus lao mambahen mukjizat i. (Markus 3:22-26) Di pudian ni ari, adong do tong akka halak na so porsea tu mukjizat ni Jesus, alai dang boi dibuktihon nasida i. Justru di abad na parjolo dohot paduahon M, adong do akka bukku na patuduhon memang toho do terjadi mukjizat na dibahen Jesus. Jadi boi do tahaporseai akka hatorangan na disurat di akka bukku Injil i.

Boasa Olo Jesus Mambahen Mukjizat?

Molo naeng taboto taringot akka mukjizat ni Jesus, dang sae holan mangalului fakta na patuduhon memang toho do terjadi akka mukjizat i. Alana dipaboa do tong di akka bukku Injil boasa olo Jesus mambahen akka mukjizat i. Dipaboa do disi, alani asi ni rohana do makana olo Jesus mambahen mukjizat. On patuduhon na parduli do ibana tu akka halak jala lomo rohana mangurupi nasida.

Contohna hea ma adong sahalak na marsahit kusta mandapotton Jesus jala mangelek asa dipamalum. Didok ibana, “Molo olo ho, boi do au malum bahenonmu.” Asi ma roha ni Jesus mangida ibana. Disurdukkon Jesus ma tanganna jala dijama ma ibana. Didok Jesus, “Olo do au! Malum ma ho.” Satokkin i, malum ma sahitna i. (Markus 1:40-42) Sian contoh on, boi ma taida alani asi ni rohana do makana olo Jesus mambahen mukjizat.

Di tikki na asing, pajuppang do Jesus dohot akka halak na mamboan bakke ni na mate sian kota Nain. Anak sasada ni ina na mabalu do na mate i. Bibel mandok, “Tikki diida [Jesus] ina na mabalu i, asi ma rohana. Didok ma, ‘Unang be sai tangis ho.’” Dung i dipahehe Jesus ma anakna i.​—Lukas 7:11-15.

Pasti las do rohatta mamboto boasa olo Jesus mambahen mukjizat. Alani asi ni rohana do i jala lomo rohana mangurupi halak. Alai dang holan sejarah i. Heber 13:8 mandok, “Dang muba anggo Jesus Kristus, songon i nattoari, songon i saonari, laos songon i do ibana sahat tu saleleng ni lelengna.” Saonari nungnga mamaretta Jesus gabe raja di surgo. Lao bahenonna do unggodang mukjizat sian na hea na dibahen ibana najolo tikki di tano on. Satokkin nai, pamalumon ni Jesus ma sude halak na mangoloi Debata. Las do roha ni Saksi Jahowa mangurupi hamu mamboto taringot on.

[Gambar]

Sian akka mukjizat na dibahen Jesus, boi ma tarida “huaso ni Debata na massai balga”

[Gambar]

Halak na lambok roha do Jesus