Yika Mutuhasa Kulilongesa ha—Yikomokeso ya Yesu?

MUHASA kukomoka ha kunyingika ngwe, mikanda yili mu limi lia Ngregu yize yakuhanjika hakutwala ku mwono wa Yesu, kuyishi kutongola liji “chikomokeso.” Liji lia Ngregu (dyʹna·mis) lize akulumbununa ngwe “chikomokeso” linalumbunuka “ndundo.” (Luka 8:46) Mulihasa kulumbunuka nawa “uhashi” hanji “yitanga ya ndundo.” (Mateu 11:20; 25:15) Kulita ni mukwa-mana umwe, liji liacho mu Ngregu “linashindakenya ha mulimo ulemu uze hanalingi, chipi-chipi ndundo jize azachishile hanga alinge najo mulimo wacho. Mulimo wacho kakuusolola ngwe ndundo ja Zambi jize jinakalakala.”

Mu limi lia Ngregu, liji likwo akuvuluka ngwo (teʹras) kakulilumbununa ngwo, “chilayi cha kulutwe lia matangwa” hanji “yikomokeso.” (Yoano 4:48; Yilinga 2:19) Liji lino lia kushindakenya ha chize evwile atu waze amwene yikomokeso yacho. Kanji-kanji mbunga ni tumbaji kapwile ni kukomoka ha kumona yitanga ya ndundo ja Yesu.—Marku 2:12; 4:41; 6:51; Luka 9:43.

Mu limi lia Ngregu, liji liamuchitatu avuluka ngwo, (se·meiʹon), lize linatale ha yikomokeso ya Yesu, linalumbunuka “chilayi.” Ngwe chize ambile mukwa-mana Robert Deffinbaugh, “liji lino linashindakenya ha ulumbunwiso unene wa liji chikomokeso.” Yamba nawa ngwenyi: “Chilayi chili chikomokeso chize chinasolola umwenemwene hakutwala kuli Mwene wetu Yesu.”

Shina Yuma Yacho Yili ya Saki nyi Zambi mwe Wamuhele Ndundo Jacho?

Mbimbiliya kuyishi kulumbununa yikomokeso ya Yesu ngwe yuma ya saki hanji yize alumbile hanga apwe ni kuhehesa atu. Alioze yikomokeso ya Yesu yapwile ‘ndundo jinji ja Zambi,’ ngwe chize ajisolwele muze atuhwishile ndemoniu kuli umwe mwana lunga. (Luka 9:37-43) Shina yitanga ya ndundo ngwe yino te muyipwa yikalu kuli Zambi-Mukwa-Ndundo-Jeswe, yoze ukwete “unene wa ndundo jenyi ni ngolo jenyi ja tachi”? (Izaia 40:26) Kwamba pundu, ka!

Mikanda ya Evanjelu yinatongola unji wa 35 ya yikomokeso ya Yesu. Alioze kuyishi kusolola yikomokeso yeswe yize Yesu alingile. Chakutalilaho, mukanda wa Mateu 14:14 unambe ngwo: “Yesu yamona mbunga yinene, yaavwila keke, yawuka mieji jo.” Kutwanyingikine unji wa mieji waze awukile ha shimbu liacho.

Yitanga yino ya ndundo yapwile ni kushindakenya ngwo Yesu kapwile mwana wa Zambi, Mesaya yoze alakenyene. Mbimbiliya yinasolola pundu ngwo, ndundo ja Zambi je jamukwashile kulinga yikomokeso. Postolo Petulu kasanyikine Yesu ngwenyi, “lunga amushindakenyene kuli Zambi ni yipupu ni yipekesa ni yilayi yize alingile Zambi ku kwoko lienyi mukachi kenu, ni yenwene nunachinyingika.” (Yilinga 2:22) Ha chisuho chikwo Petulu yashindakenya nawa ngwenyi, “Amuwayishile ni maji kuli Zambi ni Spiritu Musandu ni tachi. Iye [Yesu] wendele nikulinga yipema, nikuhindwisa waze eswe aamwesene lamba kuli Ndiapu; mumu Zambi wapwile hamwe nenyi.”—Yilinga 10:37, 38.

Yikomokeso ya Yesu te yinalite ni sango jize apwile ni kwambujola. Mukanda wa Marku 1:21-27 unasolola yize mbunga evwile muze apanjikile malongeso ja Yesu ni chikomokeso chimwe chize alingile. Mukanda wa Marku 1:22 unambe hakutwala kuli mbunga ngwo, “O alishimwokene ha longeso lienyi,” versu 27 ngwo, “Atu eswe akomokene” mumu lia kuhuma Ndemonio. Kashika, yikomeso yize Yesu alingile ni sango jize apwile ni kwambujola, yinatwehe shindakenyo ngwetu, Yesu kapwile Mesaya yoze alakenyene.

Yesu te keshi kuliamba wika ngwenyi, kali Mesaya, alioze ndundo jize Zambi amuhele, chize ajisolwele mu yikomokeso ni yize yitanga yenyi yapwile ni kusolola yahanyine shindakenyo ngwo, kali Mesaya. Muze amuhulile hakutwala ku chiteli chenyi ni yoze wamuhele wata wacho, Yesu yakumbulula ngwenyi: “Shindakenyo yize nguli nayo yinahiana yize ya Yoano. Mumu yitanga yize anguhele Tata, hanga ngukayimanunune, yitanga yiyene nakulinga, kuyakushindakenya hali yami ngwo, Tata hanangutumu.”—Yoano 5:36.

Yuma Yize Yinasolola Ngwo Yikomokeso ya Yesu Yalingiwile

Mumu liaka twatamba kupwa ni shindakenyo ngwetu, yikomokeso ya Yesu yalingiwile lume, chikwo nawa yili yamwenemwene? Tutalenu yuma yimwe yize yinatwehe shindakenyo yacho.

Yesu te keshi kulinangamisa muze apwile ni kulinga yikomokeso. Alioze kapwile ni kuhalisa Zambi ha chikomokeso cheswacho chize apwile ni kulinga. Chakutalilaho, shimbu te kanda achiwuka umwe kapuputa, Yesu yasolola ngwenyi, kuwuka chacho te machilinga “hanga akasolole yitanga ya Zambi muli iye.”—Yoano 9:1-3; 11:1-4.

Yesu kanalisa chinji ni atu waze akulinga wika yuma hanga asoloke, akwa-tufutafuta ni waze akutayiza ngwo, mahasa kuwuka akwo ha kwalembela. Yesu kanda kama achizachisa yipanda-panda ni yuma yikwo yipi hanga akomwese atu. Iye te keshi kuzachisa tuponya waze atu akumona ngwe asandu, ka. Tala yize Yesu alingile hanga awuke tupuputa aali. Mbimbiliya yinambe ngwo, “Yesu, se haavwila keke, yasa minwe ha meso jo; hazehene yalaula ku meso, mba yamukaula.” (Mateu 20:29-34) Yesu kapwile ni kuwuka atu chakuhona kuzachisa mahamba hanji yipanda-panda. Yikomokeso ya Yesu yapwile ni kusoloka zwalala, kanji-kanji kapwile ni kuyilingila ha mbunga. Kulisa ni yimbanda a musono, Yesu kakapwile ni kuzachisa ngoma, chisapu hanji perfume mba awuke atu.—Marku 5:24-29; Luka 7:11-15.

Ha mashimbu amwe, Yesu kapwile ni kuhanjika hakutwala ku ufulielo uze apwile ni kusolola atu waze te akuwuka. Alioze nyi umwe kasolwele ufulielo, chino te kuchishi kumukinda kulinga yikomokeso. Muze apwile mu Kafwanaume ku Ngalileya, “yaneha kuli iye akwa andemoniu anji; Yesu yatuhwisa maspiritu ni liji lienyi, yawuka waze eswe ayijile.”—Mateu 8:16.

Yesu kalingile yikomokeso hanga ahwise kapinda wa atu, hi mumu lia kuvwisa umwe kuwaha ko. (Marku 10:46-52; Luka 23:8) Iye te keshi kulinga yikomokeso hanga azukeko yimwe yize azangile.—Mateu 4:2-4; 10:8.

Shina Yikomokeso Yize yili mu Mikanda ya Evanjelu Yalingiwile Lume?

Mikanda yiwana ya Evanjelu ye yakusolola umwenemwene hakutwala ku yikomokeso ya Yesu. Shina twatamba lume kujikijila ha yize mikanda yacho yakwamba hakutwala ku yikomokeso ya Yesu? Ewa.

Ngwe chizechene hitwamona, Yesu kalingile yikomokeso yenyi ha mbunga, homa haze hapwile atu anji. Mikanda yitangu ya Evanjelu yapwile kusoneka ha mashimbu waze amwe a kuli atu jacho te achili ni mwono. Mukanda Os Milagres e a Ressurreição unambe chino hakutwala kuli waze asonekene mikanda ya Evanjelu ngwo: “Nyi twamba ngwetu, atu waze asonekene mikanda ya Evanjelu kalumbile yuma yize Yesu alingile, acho tunaapatwila ni uhenge. . . . O kasele tachi hanga asoneke wika yize Yesu alingile.”

A-Yunda waze apwile ni kulimika ni akwa-Kristu te keshi kuhamika hakutwala ku yikomokeso yize Yesu alingile. O kapwile wika ni kulihula kulihi ndundo ja Yesu japwile ni kukatuka. (Marku 3:22-26) Atu akwo waze ejile hanyima no kakahashile kuhamika yikomokeso ya Yesu. Alioze ku sekulu yitangu ni ya yamuchiali kwapwile mikanda yinji yize yapwile ni kuhanjika ha yikomokeso ya Yesu. Kashika, mutuhasa kwamba ngwetu, kuli yuma yinji yize yakusolola ngwo, yikomokeso ya Yesu yalingiwile lume.

Lunga Yoze Walingile Yikomokeso

Nyi twalihulikila wika ha yize atu akwamba hakutwala ku yikomokeso ya Yesu, acho kutuchi kuhasa kuhengwola kanawa yikomokeso yacho. Muze asonekene yikomokeso ya Yesu, akwa kusoneka mikanda ya Evanjelu kasolwele Yesu ngwe mutu yoze ukwete keke, chikwo nawa wakulihulumba hali akwo.

Tutalenu yize Yesu alingile muze mukwa mbumba amwichile hanga amuwuke. Mukwa mbumba ngwenyi: “Nyi mupala, muhasa kungupemesa. Yesu yamuvwila keke yolola kwoko lienyi, yamusa minwe ngwenyi, Ngunapale; pwako mupema. Hazehene mbumba yiyimukatuka, iye yapema.” (Marku 1:40-42) Hachino, Yesu yasolola ngwenyi, keke ye yamutwalile kuzachisa ndundo ja Zambi hanga alinge yikomokeso.

Yika yalingiwile muze Yesu alitakanyine ni atu waze te anayi ni kufunda umwe mu limbo lia Naine? Mukweze yoze te anayi ni kufunda kapwile mwana wa wika kuli tuliwa. Alioze muze Yesu amwene tuliwa “yamuvwila keke, yamba kuli iye ngwenyi, Kanda ulila.” Hachino, yahindwisa mwanenyi.—Luka 7:11-15.

Chuma chimwe chize mutuhasa kulilongesa ha yikomokeso ya Yesu chili chino: Yesu kapwile ni kulinga yikomokeso mumu lia “keke,” kapwile ni kuyilinga hanga akwase atu. Alioze yikomokeso yacho kuyishi ya kulumba. Mukanda wa A-Hepreu 13:8 unambe ngwo: “Yesu Kristu chimuwika apwa, ni zau, ni musono, ni ndo ku miaka ya mutolo.” Haliapwila Yesu kanayulu mu malilu ngwe mwanangana, chikwo nawa kali ni uhashi unji wa kuzachisa ndundo ja Yehova hanga alinge yikomokeso yinji kuhiana muze apwile hano hashi. Kwasala hakehe Yesu mazachisa ndundo jacho hanga awuke atu waze akwononokena Yehova. Yela ja Yehova mawahilila chinji ha kukukwasa hanga unyingike nawa chize mwono wa kulutwe lia matangwa muukapwa.

[Chizulie]

Yikomokeso ya Yesu yapwile ‘ndundo jinji ja Zambi

[Chizulie]

Yesu kapwile ni kuvwila akwo keke