Milagro Jesusɗe: ¿kãare kawai ɓua mauɗebena?

CHI Bibliaɗe jara ɓuu Jesús nau iujãaɗe nibasiiɗe jaraɗakau chi beɗea griegoɗe “chi milagro” baita. Chi beɗea griegoɗe jara kʉ̃ria ɓua “milagro” dý·na·mis bʉ, jãu jara kʉ̃ria ɓuu “poder” (Lucas 8:46). “Biʼia asebarii nii” mauɗe “kĩrawãrea ãrĩã ɓee asebarii”, nau siɗa jarai ɓua (Mateo 11:20; 25:15). Jari jara ɓuu kĩraka mukĩra kuitaa ãrĩã nii, jãu beɗeaba “chi ãrĩã kĩrawãrea ɓuu aseɗa baɗa jara ɓuu, mauɗe kãarea jãka asesii. Jãu ase ɓuu Dachi Akõre Jauriɗeeba”.

Maucha ɓuu chi beɗea griegoɗe té·ras, jara kʉ̃ria ɓuu “ẽbẽrarãba ne poyaa wauɗakau” maebʉrã “aude kĩrawãrea ɓuu” (Juan 4:​48, Biblia Chamí, WPS.; Hechos 2:​19). Jãu beɗeaba kawa ɓuu saka koɓeebadau chi ẽbẽrarãba jãu unubudauɗe. Ãrĩã chi Jesús kaaɗe ãda nureerã mauɗe chi ẽbẽrarã kawaɗayuswẽa kopaneesiɗau Jesusba ase nii kakua (Marcos 2:​12; 4:​41; 6:​51; Lucas 9:​43).

Chi õbeaɗebena beɗea griegoɗe sē·méi·on bʉ maebʉrã “chi kuitaabibarii”. Cha nau beɗea ʉ̃rʉbena chi kuitaa nii Robert Deffinbaughba jara ɓuu: “Kawabi ɓuu chi milagro aseɗa baɗaɗebena. Maarãba kawabibadau chi wãrabena Jesusɗebena”.

¿Jesusba aseɗa basee chi milagrorã jari magorãba asebadau kĩra makawẽebʉrã chi Dachi Akõre poderɗeeba?

Chi milagro Jesusba aseɗa baɗa Bibliaɗe koɓee, jari chi magoba ase nii kĩraka ẽbẽrarã apii ochiabii baita, Jesusba ãchi kĩraka asewẽebasii, chi poder choroma Dachi Akõreɗe unubisii. Mau kawaɗayua Jesusba jʉreta ɓoosiiɗe chi demonio kũudrãaɗebena (Lucas 9:​37-​43). Chi Bibliaba jara ɓuubʉrã Dachi Akõre ãrĩã poder bara nii, ¿bichia ijãa ɓuẽ Dachi Akõreba chi milagrorã poyaa aseebai ɓuẽ? (Isaías 40:26). ¡Makawẽma!

Aduama jomauɗe sãabe milagrorã Jesusba asesii, chi Evangeliorãɗe jara ɓuu aseɗa baɗa 30 aude. Por ejemplo, chi Bibliaba jara ɓuu Jesusba “ẽbẽrarã ãrea unusii. Maarã kĩra chuburiasiiɗeeba chi ẽpermo nuree aribiabiasii”, maka ɓumina jarawẽe ɓuu sãabe ẽbẽra ẽperma ɓee anikuasii (Mateo 14:14, Biblia Chamí, WPS.).

Poder ãrĩã bara ɓee asesii Jesusba unubiɗa baɗa wãrabena ichi Dachi Akõre Warr nii, chi Mesías Dachi Akõre jaraɗa baɗa neeburuu. Chi Bibliaɗe eɗa ɓʉ kuɓuuba unubiɗa baɗa chi poder Jesusɗeeba asekuaɗa baɗa chi milagrorã. Chi apóstol Pedroba ichiɗebena beɗeasii naka a ɓoosiiɗe: “Dachi Akõreba Jesús Nazaretɗebenamaa ẽbẽrarãba ne poyaa wauɗakau mechiu machi tãeɗe waubisii. Maka wau ɓuuɗeeba Jesusba kuitaabiasii Dachi Akõre ichi ome ɓuu. Mau machiba biꞌia kuitaa panuu” (Hechos 2:​22, Biblia Chamí, WPS.). Mau kaaɗe Pedroba jaraɗa baɗa: “Dachi Akõreba ichi Jauri mauɗe ichi poyaabarii Jesús Nazaretɗebenamaa deasii. Dachi Akõre ichi ome ɓuasiiɗeeba Jesusba ne bia wau nibasii mauɗe ẽbẽrarã jʉbawãe niiba kachirua uru panuu joma aribiabiabachii” (Hechos 10:​37, 38, Biblia Chamí, WPS.).

Chi milagrorã asebachii Jesusba jãuba unubia basii ichia jaradeabachii jãu wãrabena ɓoosii. Marcos 1:21-27 jara ɓuu saka duaneesii chi ẽbẽrarã jari ichia jaradeɗeka ɓoosii kĩraka mauɗe ichia milagro asesiiba. Chi versículo 22ba jara ɓuu ichia jaradea ɓuuɗe chi ẽbẽrarã kawaɗawẽa koɓeesiɗau, mauɗe chi versículo 27ɗe jara ɓuuba kawaɗawẽa koɓeesiɗau chi demonio awara jirataaruu unusiɗauɗe. Ichi poderba ase basii Jesusba ichia kawabiaburuuɗe unubia basii ichíturu chi Mesías jarapeɗaaɗa baɗa neeburuuɗebena.

Maaɗaba Jesusba ichi asesiiɗeeba mauɗe jaradea ɓoosiiɗeeba unubisii ichi chi Mesiasbʉ. Mauɗe ichia milagro asesiiɗe, unubisii chi poder Dachi Akõreɗeeba naka asebachii. Jarasiɗauɗe ichi Mesiaswẽebasii mauɗe milagro aseebai ɓoosii, ichia panausia perayuswẽa: “Mʉa jaraburuu aude biʼia ɓuu Juanba [chi Bautizakuabarii], jaraɗaɗeebiɗa, chi mʉ Akõreba aseɗe bʉeɗa baɗa, cha mʉa asebarii, mauba unubi ɓuu chi Akõreba mʉ bʉeɗa baɗa” (Juan 5:36).

¿Saka kuitaa panaa chi milagrorã Jesusɗe wãrabena ɓoosii?

Kawaɗaika sakayua kuitaa panuu chi milagrorã Jesusɗe wãrabena ɓoosii.

Jesusba milagrorã asesiiɗe kʉ̃riawẽebasi ichiɗebena chi ẽbẽrarãba jarabiyu. Ichia kʉ̃ria ɓoosii chi ẽbẽrarãba biʼia jarabiyuaburu Jeowaɗebena chi milagro aseburuuɗe. Mukĩra dauba unuɗakaa nii curai naeɗe ichia jaraɗa baɗa “maumaarã dau pãriu adausii ichiɗeeba Dachi Akõreba ne wauruu ẽbẽrarãba unuɗamera” (Juan 9:1-3; 11:1-4, Biblia Chamí, WPS.).

Jesusba jaibana kĩraka aseebasii, jauri kachirua kĩraka asewẽa, ni akawawẽa biɗa aseebasii, jari magorã mauɗe curanderorã abadauɗeebiɗa ãyaa asesia, Jesusba adauwẽebasia jaiduma mauɗe nejaraɗebena aseebasii. Chi dau pãriu niɗau omeerãmaa curasiiɗe biʼia ãrĩã ɓeedu asesia, mauɗe Bibliaba jara ɓuu ichia “kĩra chuburiasii maabae chi maarã dau wausii. Ara makʉɗe unu kopaneesiɗauɗe Jesús baara wãsiɗau” (Mateo 20:​29-34, Biblia Chamí, WPS.). Jesusba ritual aseebapeɗa mauɗe kari akʉwẽepeɗa ni akawa asekuawẽebasia. Jãu milagrorã asesii ãrĩã ẽbẽrarã daaɗe. Jesusba jaiduma mauɗe aoko ɓeeyu siɗa adauwẽebapeɗa, kiɗuarã maka ɓee adauwẽe baɗa basia. Mau kãyabãra, chi milagrorã iɗibea ase nuɓuuɗebena mauba kawaɗawẽe chi wãrabena ɓoosii (Marcos 5:​24-​29; Lucas 7:​11-​15).

Mauɗe ɓoosia Jesusba jarasii ichia anikuasii mau fe ãrĩã bara ɓoosii mauɗe chi ẽbẽra fe wãʼãe niimina ichia aniyua. Ichi puuru Capernaum Galileaɗebena ɓoosiiɗe “ẽbẽrarãba, ãrea ẽpermo nuree Jesusmaa eneesiɗau. Mauɗe Jesusba jaraaruuba chi jai kachiruarã joma duabʉikasii mauɗe ẽpermo nuree joma aribiabiasii” (Mateo 8:​16, Biblia Chamí, WPS.).

Jesusba chi milagro ase ɓoosii chi ẽbẽrarã aiɗakuayua, milagro aseebasia ẽbẽrarã unuɗai baitaburu (Marcos 10:​46-​52; Lucas 23:​8). Jesusba milagro asesiiɗe ara ichi baita makawãebʉrã chi nejarra kakuaburu aseebasii (Mateo 4:​2-4; 10:8).

¿Wãrabena ɓubaaka chi Evangeliorãba jarabadauɗe?

Kuitaa panuura chi milagrorã Jesusba aseɗa baɗa chi kimare Evangelioba jara ɓuuɗebena kakua. ¿Ijãaɗai ɓuẽ chi Evangelioɗe jara ɓuu? Maerã.

Naa jarasiɗau kĩra chi milagrorã Jesusba asesii jomaurã ẽbẽrarã daaɗe baɗa, ãrĩã jãarãɗebena chokae nureasiɗau ɓʉsiɗauɗe chi Evangelio. Chi kartaba Chi milagrorã mauɗe chi biupeɗaaɗa waya piradruɗaiɗebena, chi ɓʉsiɗaurãba wãrabena ɓʉpeɗaaɗaɗebena naka a ɓuu: “Poyaa jarawẽebai ɓua chi Evangeliorã ɓʉpeɗaaɗaɗebenaba ãchi kʉ̃risiaɗebena adauɗapeɗa ɓʉsiɗau chi milagrorãɗebena chi ẽbẽrarã Dachi Akõreɗeburu ijãabiɗayuaburu. [...] Ãchia kʉ̃ria panasii jaraɗayua chi wãrabena ɓuuɗebena”.

Chi judiorãba bustaɗawẽe baɗa chi Jesusba kawabia niiɗebena akawa jaraɗaabasia chi libro Evangelioɗe kuɓuu setaa jara ɓoosii. Ãchi jarasiɗau chi jãu milagroɗebena Dachi Akõreɗewẽebasii, junebenaɗeeburu basii (Marcos 3:​22-​26). Maaɗakare ẽbẽra aɓauba jarawẽebasii chi milagro Jesusɗe setaaɗebena ɓoosii. Mauɗe Jesús biuɗakare ãrĩã beɗeasiɗau Jesusba chi milagro aseɗaɗebena. Mauɗeeburu wãrabenáturu kawa duanua cha ɓuu Evangelioɗebenaba Jesús aseɗa baɗa wãrabena ɓoosii.

Chi mukĩraba chi milagro aseɗa baɗa

Chi milagrorã Jesusba aseɗa baɗaɗebena aude kawabaraaɗai. Chi Evangeliorãba beɗeabudauɗe chi milagro Jesusɗe, chi biʼia ɓuu mukĩra niiɗebena jarayua, ẽbẽra ãrĩã kʉ̃ria nibapeɗa chuburiabachii, ichi ãrĩãturu preocupabachii jomaurã ẽbẽrarã ichi aɗu nureerã kakua biʼia duanaɗayua.

Jesús nibasiiɗe chi mukĩra lepra unibasii ichi kakuaɗe nauba wiɗisii: “‘Bichiba kʉ̃ria ɓuubʉrã, mʉ poyaa aribiabiiʼ. Jesusba miichuburi nii unuɗaɗeeba ichi jua ʉ̃rʉ kuɓuuruuɗe jarasii: ‘Maka wau kʉ̃ria ɓuu. ¡Aribiáse!ʼ” (Marcos 1:​40-​42, Biblia Chamí, WPS.). Nau aseburuuba Jesusba unubisii chi poder Dachi Akõreɗeeba milagro ase ɓoosii, ichi ãrĩã preocupaɗa basii ẽbẽrarã kakua maabea aiɗa kʉ̃ria nii baɗa.

¿Kãare pasasaa chi ẽbẽrarãba odoemaa panuuɗe chi ẽbẽra biuɗa baɗa ʉaɗayua wãurimaa duanasii chi puuru Nainɗebena? Chi biuɗa baɗa kũudrãa basii, warr aɓaburu nibaɗa pẽdrãa niiɗe. “Dachi Mechiu Jesusba chi pẽdrãa miichuburi unupeɗa naka jarasii: ‘Waa jẽarã́seʼ”. Ara nauɗe piradrubisii chi warr (Lucas 7:​11-​15, Biblia Chamí, WPS.).

Dachia kawaɗai ɓuu chi jãu milagro aseɗaɗebena Jesús ãrĩã chuburiakuaɗa basii ẽbẽrarã kakua maabea aiɗa kʉ̃riaɗa basii. Makarã jãu milagrorã yataɗeeɗebenaburu wãʼãe basii. Bibliaba naka a ɓuu: “Jesucristo june ãyaa ɓuakau. Nuiɗa nibaɗa kĩra iɗi biɗa maka nii, mauɗe ewaricha maka nibai” (Hebreos 13:8, Biblia Chamí, WPS.). Iɗibea Jesusba gobernamaa ɓuu Rey kĩraka ʉtʉ bajãaɗe mauɗe ichia biʼia kawa ɓuu saka chi poder Dachi Akõreɗeeba milagro aseyu aude mechibena aseyu chi milagrorã ase nibasii nama iujãaɗe nibasiiɗe. Ara kaita uru ɓuu chi jãu milagrorã aseyu chi ẽbẽrarã ũribaba nureerã ome anibiakuayua. Chi Jeowa ɗebena Jaranũrẽrãba ãrĩã aiɗakuaɗapeɗa kawabiɗayua chi milagrorã Jesusba aseyuɗebena.

[Foto]

Jesusba milagrorã asesiiɗe unubisii chi “poder Dachi Akõreɗe”

[Foto]

Jesús ẽbẽra ãrĩã kʉ̃ria nibapeɗa chuburiabachii mauɗe ichi ãrĩãturu preocupabachii jomaurã ẽbẽrarã ichi aɗu nureerã kakua