Jondron ñan tuabare nuainbare jesukwe ¿raba dre driere mäi?

NANE kukwe ne raba mä töi mike niä Jesús nünanbare kä tibienbätä abokänbätä Biblia tä blite yekänti kukwe griegore “jondron ñan tuabare” ye kädekate ñakare jire. Kukwe keteiti griegore abokän ruäre ngwane kwitata “jondron ñan tuabare” ye abokän dý·na·mis, ye “dite” gärätä metrere (Lucas 8:46). Aune kwita raba arato “jondron nuain gare” o “jondron ñan tuabare” (Mateo 11:20; 25:15). Erudito iti, tä kukwe ne mike gare krörö ne abokän tä “jondron ñan tuabare nuainta aune bäri ütiäte di ñobiti nuainbare. Kukwe nuainta ye tä bämike di bäri kri tä kukwe ye mike nemen bare”.

Kukwe griegore mada ja erebe ye abokän té·ras, abokän ruäre ngwane kwitata “kukwe ñan tuabare” o “kukwe tä ni töi mike niä” (Juan 4:48; Hechos 2:19). Nitre tä kukwe ne erere tuin töita nemen ño ye kukwe ne tä mike gare. Bä kabre, nitre kwati Jesús kukwe nuaka aune nitre ja tötikaka kwe töi nämäne nemen ñan krütare jondron ñan tuabare nuain nämäne kwe yebätä (Marcos 2:12; 4:41; 6:51; Lucas 9:43).

Kukwe ketamäkäre griegore mada abokän keta raba jondron ñan tuabare nuainbare Jesukwebätä ye abokän sē·méi·on, o “kukwe mikakäre gare”. Kukwe ne tä “jondron ñan tuabare nuainta ye abokän dre gärätä mike gare bäri nguseta mikata gare teólogo Robert Deffinbaugh yekwe. Jondron ñan tuabare ye tä kukwe erametre mike gare nie Däkien Jesús yebätä”.

¿Kukwe nuainta ni mada ngökakäre o Ngöbö die ara?

Jondron ñan tuabare nuainbare Jesukwe ye Biblia ñan tä bämike kukwe nuainta ni mada ngökakäre o kä mikakäre juto nitre madabätä erere, ñakare aune ye abokän erametre “Ngöbö die kri krubäte ara” aune ye erere nemen gare nie Jesukwe chokali kitani käbäre monso bati itibätä erere (Lucas 9:37-43). ¿“Ngöbö die kri krubäte” nieta yei kukwe ñan tuabare ne ñan raba nemen bare ruin mäi? (Isaías 40:26.) ¡Ni raba niere ñakare jire chi!

Evangelio yebätä jondron ñan tuabare nuainbare Jesukwe ye kädekateta 35 näre, akwa jondron ñan tuabare nuainbare nuäi metrere kwe ye ñan gare. Ñodre Mateo 14:14, tä niere: Jesús ie “nitre jutuabare kwati krubäte; nitre namani tuin bobre ie, angwane ni bren nitre ye ngätäite mikaninta kwin kwe”, akwa nie ñaka nitre bren nibe mikaninta kwin kwe.

Jesús nämäne niere niara abokän Ngöbö Monsoi aune niara abokän Mesías käbämikani ye bämikani metre kwe jondron ñan tuabare nuainbare kwe yebiti. Biblia ara tä mike gare Ngöbö die ara nämäne Jesús dimike jondron ñan tuabare ye nuainne. Apóstol Pedrokwe blitabarebätä “ni brare juani Ngöbökwe rabadre era munkrä, abkokäre Ngöbökwe ja di biani ie sribi kri ñan tuabare nuenkäre bätäkä ngwarbe mun ngätäite. Niarakwe sribibare kore abko garera kuin munye” (Hechos 2:22). Mada ngwane, Pedrokwe niebare “Ngöbökwe ja di biani kri amne Ngöbökwe ja Üai deme mikani täte bätä, [Jesús] nämane näin jändrän kuin nuene amne ni bren bren nämane ja tare nike diablu ngoto täni abko mikaninta kuinta kwe. Ngöbö nämane Jesube” (Hechos 10:37,38).

Jesús nämäne dre driere ye abokän erametre ye jondron ñan tuabare nuainbare kwe ye käkwe bämikani. Marcos 1:21-27 tä mike gare, nitre kwati nämäne Jesús kukwe nuin ye käkwe kukwe drie nämäne kwe aune jondron ñan tuabare nuainbare keteiti kwe ye kani ngäbiti ño. Bersikulo 22 tä mike gare, nitre namani ‘töi ñan krütare nämäne kukwe driere ño yebätä’ aune bersikulo 27 tä mike gare, ni jökrä ‘töi namani ñan krütare’ namani üai käme juentari mento ye ngwane. Jondron ñan tuabare aune kukwe driebare Jesukwe ye käkwe mikani gare niara ara Mesías käbämikani.

Jesús ñan niebare jerekäbe niara abokän Mesías; kukwe niebare kwe ye namani bämikani erametre dre niebare kwe aune dre nuainbare kwe yebiti, jondron ñan tuabare nuainbare kwe Ngöbö diebiti yebiti namani bämikani arato. Di medenbiti nämäne jondron jökrä ye nuainne ye rüere ñäkäbare ngwane töi kwatibebiti niebare kwe: “Kukwe tä tikwe, ne bäri kwin Juan [Bautistakwe] blitabare ye krake, ñobätä ñakare angwane ti Rünkwe sribi biani tie, ne tikwe mikadre krüte jai käre. Sribi ne ara ti tä nuainne, angwane sribi ne ara köböite Ngöbökwe ti juani nüke gare nitre ie” (Juan 5:36, NGT).

Kukwe ruäre tä bämike kukwe ne nakaninkä metre

¿Dre tä mike gare metre ta nie jondron ñan tuabare nuainbare Jesukwe ye erametre nakaninkä? Kukwe ruäre tä bämike kukwe ne nakaninkä metre ye ani mike gare jai.

Jondron ñan tuabare nuainbare Jesukwe ye ngwane, Jesukwe ñan ­nitre töi mikani jabätä. Ngöbö aibe käikitadrekä aune aibe mikadre ütiäte ye Jesukwe käre ja töi mikani nuainne jondron ñan tuabare keteitire keteitire nuainbare kwe yebiti. Ñodre ni iti okwä bukere mikakäreta kwin ye känenkri, mikani gare metre ta kwe ni ye mikaita kwin kwe ne kwe “Ngöbö diebti sribi kri ñan tuabare rabadre bare abkokäre” (Juan 9:1-3; 11:1-4).

Jesukwe ñan ja ngwanbare nitre ilusionista, mago aune nitre ja ketaka chokabe erere, ñaka hipnotismo, truco, jondron bätäkä ngwarbe, conjuros o jondron mada mada ye nuainbare jire kwe. Arato kukwe keta kabre ja ketakäre chokabe mikata täte nitrekwe bätä jondron mikata ngöböre jai ye ñan aibiti jondron ñan tuabare ye nuainbare kwe. Töi ñobiti nitre nibu okwä bukere mikaninta kwin kwe ye mike ñärärä: “Nitre nibu ye rababa ruentari tare Jesuye —mikata gare nete⁠—, käkwe kise mikaba okwäbtä. Ye btäräbe kä rababa tuen kuin batibe ietre angwane, rikaba siba Jesube.” (Mateo 20:29-34). Ñaka ja di käräbare kwe jondron ngwarbe ie, ñaka jondron bätäkä ngwarbe nuainbare kwe, ñaka nitre töi mikani jabätä kwe. Jondron ñan tuabare ye nuainbare kwe nitre jökrä okwäbiti, bä kabre nitre kwati krubäte ngwärekri. Ñaka ñotra, jondron o kukwe bätäkä ngwarbe ye mikani kwe. Jondron ñan tuabare nuainta kä nengwane nieta ye abokän nie ñan raba erametre tä nakainkä (Marcos 5:24-29; Lucas 7:11-15).

Ruäre ngwane, Jesús nämäne jondron ñan tuabare nuainne nitre kräke aune nitre ye nämäne tödeka kwetre bämike ño ye nükani gare ie. Akwa arato, nire ñan nämäne tödeke ye ñan nämäne ketebätä jondron ñan tuabare ye nuainne kräke. Niara nämä juta galilea kä Capernaumkwe te ngwäne, “ni kwati nämäne ja tare nike üai käme kisete jänikani Jesu känti angwane, Jesu nikani üai käme ye juentari mento. Arato, ni bren ño ño Jesukwe mikaninta kuinta jökrä” (Mateo 8:16).

Jondron ñan tuabare nuainbare kwe yebiti tö namani nitre nämäne dre ribere bökän jai ye bienta ie, ñaka nitre töi mikakäre töi niä jabätä (Marcos 10:46-52; Lucas 23:8). Arato Jesús ñan käkwe jondron ñan tuabare ye nuainbare jondron ribekäre jai (Mateo 4:2-4; 10:8).

¿Dre nie raba kukwe tä niebare Evangelio yebätä?

Jondron ñan tuabare nuainbare Jesukwe ye namani bare ño ño ye raba kwen nie Evangelio ketabäkä yebätä. ¿Kukwe tärä nie tö ngwankäre kukwe mikata gare ne ie? Jän, kukwe tärä tö ngwankäre nie.

Ninina erere, jondron ñan tuabare nuainbare Jesukwe ye nuainbare kwe nitre kwati okwäbiti, aune nitre ye nämäne nire Evangelio ruäre tikabare ye ngwane. Nitre kukwe tikaka ja ngwani ño töi bobre yebätä tärä The Miracles and the Resurrection (Los milagros y la resurrección) tä ne niere: “Nitre Evangelio tikaka ne rüere ñäkädre mikakäre gare niaratre ñan kukwe metre tikabare ñakare aune tö namanintre teológia mikabätä gare ye ñaka kwin jire chi. [...] Niaratre käkwe ja di ngwani kukwe nakaninkä ño ye erere tike aune mike gare töi bobrebiti”.

Nitre judío ja mikaka kristianismo rüere ye ñaka käkwe ñäkäbare jondron ñan tuabare nuainbare Jesukwe abokän raba kwen nie Evangelio yebätä. Akwa di meden köböire jondron ñan tuabare ye nuainbare Jesukwe yebrä rüere ñäkäbare kwetre (Marcos 3:22-26). Arato nitre mada ja mikaka kukwe ne rüere ja känenkäre ñan ñäkäbare jondron ñan tuabare nuainbare Jesukwe ye rüere. Ñakare aune: Siklo ketebu ni känenkri yete kukwe keta kabre mikani gare jondron ñan tuabare nuainbare Jesukwe yebätä. Metrere, kukwe keta kabre tärä nie tö ngwankäre kwatibe kukwe mikata gare Evangeliobätä jondron ñan tuabare nuainbare Jesukwebätä yei.

Ni brare käkwe jondron ñan tuabare nuainbare

Jondron ñan tuabare nuainbare Jesukwe ye ñan raba nemen täte kukwe mikadre gare biti ta aibebätä ngwane. Jondron ñan tuabare nuainbare Jesukwe bätä Evangelio tä blite ye tä mike gare metre ta nie Jesús ye töi kwin keta kabre aune ni mikaka tuin bobre krubäte jai, nitre nünanka niara näire ye tädre kwin yebätä töi nämäne kwatibe.

Ni iti bren lepra kisete nikani Jesús känti kukwe keteiti ribekäre kisere ie yebätä ani ja kite: “Ma tö ti mikaita kuinta ne ngwane, makwe ti mikata kuinta”. Namani “ruentari tare” kri Jesuye, käkwe kise mikani ni yebti, bti niebare kwe ie: Ma rabata kuinta, ie ti tö nibi, aisete gwängwarbe ma bike nebeta kuinta. Ye btäräbe ni kwata ngütüete ngrabare lebra kisete ye kwata namaninta kuinta jökrä ngrabare. (Marcos 1:40-42). Jesukwe bämikani kukwe yebiti ni mada nämäne ruentari tare ie ye nämäne dimike Ngöbö ja di biani ie yebiti jondron ñan tuabare ye nuainne.

¿Bati ni iti doboi mika nikani juta Naín te ben Jesús ngätäni jite ye ngwane dre namani bare? Ni krütani ye abokän monso bati, monso ngörabe meri kän muko krütani yekwe. Meri ye namani ruentari tare kri Jesuye, käkwe niebare ie: Ma bobre, ngäbäkre krüta tare makän ne abko, akwa makwe ñan müai jakän”. Ye bitikäre meri ngobo ye mikaninta nire kwe (Lucas 7:11-15).

Kukwe keteiti ni töi mikakäre jäme nemen gare nie jondron ñan tuabare nuainbare Jesukwe nebätä ye abokän Jesús ie ‘ni mada nämäne ruentari tare’ aune nämäne ja di ngwen nitre mada dimike. Akwa metrere kukwe ne ñan kukwe mikakäre gare jerekäbe. “Jesukristo abko nämanena jändrin, ara tä mtare amne ara tädi kärekäre”, mikata gare Hebreos 13:8 yekwe. Nengwane ta gobrane Rei kwrere kä kwinbätä aune niara tä juto biare ja di biani Ngöbökwe ie jondron ñan tuabare nuainkäre ye mikakäre nemen bare bäri kri niara nämäne kä tibienbätä ye kräke. Gwäune ja di biani Ngöbökwe ie yebiti nitre kä tibienbätä ja ngwanka metre ye mikaita kwin kwe. Nitre testiko Jehovakwe käkwe mä dimikai kä jutobiti ja kite kukwe kwin tä ja känenkäre nebätä.

[Üai]

Jondron ñan tuabare nuainbare Jesukwe ye käkwe mikani gare “Ngöbö ye abokän dite krubäte”

[Üai]

Jesukwe töi kwin keta kabre bämikani