Kuzê ki nu pode prende ku kes milagri di Jizus

TALVÊS bu ta fika dimiradu di sabe ma kel stória di Bíblia sobri vida di Jizus na Téra nunka ka uza kel palavra gregu ki ta siginifika “milagri”. Kel palavra gregu (dyʹna·mis), ki alvês ta traduzidu pa ‘milagri’, krê fla ‘puder’. (Lucas 8:46) Tanbê el pode ser traduzidu pa ‘kapasidadi’ ô ‘óbras poderozu’. (Mateus 11:20; 25:15) Sima un studiozu fla, kel palavra gregu li “ta distaka kel óbra poderozu ki fazedu i prinsipalmenti kel puder ki el fazedu ku el. El ta splika modi ki puder di Deus uzadu.”

Otu palavra gregu, ki é teʹras, txeu bês ta kustuma traduzidu pa ‘sinal’ ô ‘milagri’. (João 4:48; Atos 2:19) Kel palavra li ta distaka modi ki kes algen ki sta ta odja ta xinti. Txeu bês, kes monti di algen i disiplus di Jizus ta fikaba spantadu óras ki es ta odjaba kes milagri ki el ta fazeba. — Marcos 2:12; 4:41; 6:51; Lucas 9:43.

Ten más otu palavra gregu, ki é se·meiʹon, ki ta uzadu pa pâpia di milagris ki Jizus faze i el ta siginifika ‘sinal’. Un studiozu, ki txoma Robert Deffinbaugh, fla: “Kel palavra li ta konsentra na un siginifikadu más fórti di milagri.” El fla tanbê: “Un sinal é un milagri ki ta djuda-nu ntende verdadi sobri nos Sinhor Jizus.”

Kes milagri ben di Deus mê ô es éra sô truki?

Di akordu ku kel ki Bíblia ta fla, kes milagri di Jizus ka éra truki di majia sô pa divirti algen. Jizus faze kes milagri la ‘ku kel grandi puder di Deus’, sima kantu el poi un dimóni ta sai di un mininu. (Lucas 9:37-43) Kel Deus Tudu-Poderozu, ki ten ‘grandi inerjia’, ka ta konsigi faze milagris sima kes-li? (Isaías 40:26) É klaru ki el ta konsigi!

Kes Ivanjélhu ta pâpia di uns 35 milagri ki Jizus faze. Má Bíblia ka ta fla kantu milagri ki el faze. Pur izénplu, Mateus 14:14 ta fla: ‘El [Jizus] odja un monti di algen; i el xinti péna di es i el kura kes ki staba duenti.’ Kel testu li ka ta fla kantu algen ki el kura na kel momentu.

Kes milagri ki Jizus faze mostra klaru ma el éra Fidju di Deus, kel Misías ki staba pa ben. Bíblia ta mostra klaru ma kel puder ki Jizus uza pa faze milagri ta binha di Deus. Apóstlu Pedru fla kel-li sobri Jizus: ‘El foi un ómi ki Deus mostra nhos através di óbras poderozu, ku milagris i kes sinal ki Deus faze na nhos meiu através di el, sima nhos sabe.’ (Atos 2:22) Pedru tanbê fla ma ‘Deus skodje-l ku spritu santu i puder; i el anda pa tudu kel zóna ta faze bondadi i ta kura tudu kes ki Diabu tinha injuriadu, pamodi Deus staba ku el.’ — Atos 10:37, 38.

Kes milagri ki Jizus ta fazeba tinha aver ku mensaji ki el ta pregaba. Marcos 1:21-27 ta mostra modi ki kes monti di algen reaji kantu Jizus inxina-s i el faze un milagri. Marcos 1:22 ta fla ma kes monti di algen ‘fika spantadu ku se manera di inxina’ i versíklu 27 ta fla ma kes algen fika ‘spantadu’ kantu el poi un dimóni ta sai di un ómi. Kes milagri ki Jizus faze i mensaji ki el prega prova ma el éra kel Misías ki staba pa ben.

Jizus ka sô fla ma el éra Misías, kes milagri ki el faze prova ma el éra Misías. Kantu otus algen pergunta sobri se papel i kenha ki da-l autoridadi, Jizus fla klaru: ‘N ten un tistimunhu más grandi di ki kel di Juan, pamodi kes óbra ki nha Pai manda-m pa N faze, kes óbra ki N ta faze, ta da tistimunhu ma é Pai ki manda-m.’ — João 5:36.

Próvas ki ta mostra ma kes milagri di Jizus kontise mê

Pamodi ki nu pode ten sertéza ma kes milagri di Jizus kontise mê? Nu ben odja alguns próva di kel-li.

Kantu Jizus faze milagris, nunka el ka txoma atenson pa se kabésa. El faze di tudu pa glória bai pa se Pai. Pur izénplu, antis di el kura un ómi ségu, el fla ma el staba ta kura-l pamodi ‘na se kazu é pa mostradu kes óbra di Deus.’ — João 9:1-3; 11:1-4.

Jizus éra diferenti di otus algen ki ta fla ma es ta faze milagri. Jizus ka ta ipinotizaba algen, el ka ta fazeba truki i majia, el ka ta daba spetaklu i nen el ka ta fazeba otus kuza pa txoma atenson. Jizus tanbê ka ta uzaba kuzas ki ten aver ku indís ô agoru. Odja modi ki Jizus kura dôs ómi ségu di manera sinplis. Bíblia ta fla: ‘Jizus xinti péna di es i el poi mô na ses odju, i kel óra es kumesa ta odja i dipôs es sigi-l.’ (Mateus 20:29-34) Kes milagri li ka fazedu pa txoma atenson di otus algen. I txeu bês Jizus ta fazeba milagri na meiu di otus algen, pur isu txeu algen odja-l ta faze milagri. El ka ta uzaba lus spesial ô otus kuza ki pesoas ta uza sima na un palku. Kel manera ki Jizus ta fazeba milagri é diferenti di kes algen ki oji ta fla ma es ta faze milagri, má es ka ten próva pa mostra. — Marcos 5:24-29; Lucas 7:11-15.

Alvês Jizus ta papiaba sobri fé di kes algen ki el faze milagri pa djuda-s. Má mésmu si un algen ka tinha fé, kel-la ka ta inpidiba Jizus di kura-l. Timenti el staba na Kafarnaun, na Galilea, ‘es leba-l un monti di algen ki staba ku dimónis; i el ta flaba un palavra i kes spritu ta saíba di es, i el kura tudu kes ki staba duenti’. — Mateus 8:16.

Jizus ka faze milagri pa mata kuriozidadi di otus algen, el faze milagri pa djuda pesoas. (Marcos 10:46-52; Lucas 23:8) I Jizus ka faze milagri pa se própi interesi. — Mateus 4:2-4; 10:8.

Nu pode kunfia na kuzê ki kes Ivanjélhu ta fla?

Nu ta prende sobri kes milagri di Jizus óras ki nu lé kes kuatu Ivanjélhu. Má nu pode kunfia mê na kuzê ki es ta fla sobri kes milagri ki Jizus faze? Nu pode kunfia sin.

Sima dja nu odjaba txeu algen odja milagris di Jizus. Kantu kes primeru Ivanjélhu skrebedu, maioria di kes algen ki odja kes milagri di Jizus inda staba bibu. Un livru * fla kel-li sobri onestidadi di kes ómi ki skrebe kes Ivanjélhu: “Ta sérba un injustisa grandi akuza kes ómi ki skrebe kes Ivanjélhu ma es staba ta konta mintira sobri kes milagri, sô pa es faze publisidadi di ses krénsa. Ses intenson éra skrebe kes Ivanjélhu di manera onéstu.”

Kes judeu ki éra kóntra kes ki ta sigiba Jizus nunka ka fla ma kes milagri ki sta na kes Ivanjélhu ka kontise. Envês di kel-li, es fla ma é dimónis ki djuda Jizus faze kes milagri. (Marcos 3:22-26) Mésmu más tardi, otus algen, ki éra kóntra kes ki ta sigiba Jizus, ka konsigi prova ma se milagris ka kontise. Na verdadi ten alguns kuza, ki skrebedu duránti kes primeru 200 anu dipôs ki Jizus vive na Téra, ki ta konfirma kes milagri ki el faze. Pur isu, nu ka ten dúvida ma nu pode kunfia na kuzê ki nu ta lé na kes Ivanjélhu sobri kes milagri di Jizus.

Ki tipu di algen ki Jizus éra?

Pa nu ntende dretu kes milagri ki sta na kes Ivanjélhu, nu meste konxe kel ómi ki faze kes milagri. Óras ki kes Ivanjélhu ta pâpia di kes milagri di Jizus, es ta mostra ma el éra un ómi ki ta mostraba txeu amor, konpaxon i ki ta preokupaba ku otus algen di verdadi.

Pensa na izénplu di un ómi ki tinha lépra ki inplora Jizus pa djuda-l. El fla: ‘“Si nhu krê nhu pode bira-m linpu.” Nton Jizus xinti péna i el stika mô, el toka na kel ómi i el fla-l: “N krê! Bira linpu.” Lógu kel óra lépra dizaparse di se korpu i el bira linpu.’ (Marcos 1:40-42) Kel-li ta mostra ma Jizus faze milagris pamodi el ta amaba i el ta preokupaba ku algen.

Kuzê ki kontise kantu Jizus odja un ntéru ki staba ta sai di sidadi di Nain? Kel jóven ki moreba éra úniku fidju di un viúva. Jizus ‘xinti péna’ di kel mudjer, el txiga na el i el fla-l: ‘Ka bu txora.’ Dipôs el poi se fidju ta vive otu bês. — Lucas 7:11-15.

Óras ki nu ta lé sobri kes milagri di Jizus, nu ta xinti konsoladu pamodi nu ta prende ma el krê djudaba otus algen di verdadi. Má kes milagri li é ka sô stória. Hebreus 13:8 ta fla: ‘Jizus Kristu é kel mê, onti, oji i pa tudu ténpu.’ Gósi el é Rei na Séu i el sta prontu pa faze mutu más milagri di ki kantu el staba na Téra. Ka ta dura, Jizus ta uza puder ki Deus da-l pa kura kes algen na Téra ki ta obi ku Deus. Tistimunhas di Jeová ta fika kontenti di djuda-u sabe más sobri kel speransa bunitu li.

[Fotu]

Kes milagri ki Jizus faze mostra ma el tinha ‘kel grandi puder di Deus”

[Fotu]

Jizus éra un ómi ki ta mostraba txeu amor

[Nóta di rodapé]