Jiisusip tupinnartuliai – Qanoq ilinniarfigisinnaavigit?

IMMAQA tupaal­laatigis­savat Jiisusip inuunerata Biibilimi oqalut­tuarineqar­nerani oqaaseq grækerisooq “tupin­nar­tuliaq”-mik isumaqar­toq ator­neqan­ngim­mat. Oqaaserli alla (dynamis) ator­neqar­tar­poq, ilaan­nik­kullu “tupin­nar­tuliaq”-mik nutser­neqar­tarluni. Oqaaseq taanna nutsiin­navil­lugu isumaqar­poq “pis­saaneq”. (Luk­karsi 8:46) Aamma ima nutser­neqarsin­naavoq: “Malun­nangaar­tuliaq” aamma “pigin­naaneq”. (Matiusi 11:20; 25:15) Ilisimatuut ilaat allap­poq oqaaseq taanna ator­neqaraangat iliuutsip anner­tus­susaa aamma iliuuseqar­titsisup pis­saanera ersersin­niar­neqar­tar­tut. Tassa tupin­nar­tuliaq taamatut allaatigineqaraangat Guutip pis­saanera maluginiaq­quneqar­tar­poq.

Jiisusi tupin­nar­tulioraangat ilin­niar­titat isigin­naar­tullu allat tupigusut­tar­neran­nut tun­ngatil­lugu oqaaseq grækerisooq alla (teras) ator­neqar­tar­poq. – Mak­korsi 2:12; 4:41; 6:51; Luk­karsi 9:43; Johan­nesi 4:48; Apustilit Suliaat 2:19.

Tupin­nar­tuliat pil­lugit oqaatsit grækerisuut ator­neqar­tar­tut pingajuat (semeion) ima isumaqar­poq: ‘Guutimit oqar­tus­saas­suseqar­titaanermut ilisar­naat.’ Ilisimatooq Rober­t Def­finbaugh allap­poq oqaaseq taanna ator­neqaraangat tupin­nar­tuliap siuner­tavia pingaar­ner­tut pineqar­tar­toq. Aamma allap­poq tupin­nar­tuliamit Jiisusi pil­lugu ilumoor­toq paasisarip­put.

Piviusuusaartitat Guutimilluunniit pissaaneqartitaaneq?

Jiisusip tupin­nar­tuliai aliik­kutas­satut Biibilimi allaatigineqar­natillu piviusuusaar­titaan­ngil­lat. Tas­saap­pulli ‘Guutip pis­saaneqangaar­neranut’ ersiutaasut. Guutillu Kil­leqan­ngitsumik Pis­saanil­lip ‘nakuus­susia pis­saas­susialu angeqim­mata’ taas­sumun­nga ajor­nar­toqan­ngilaq. (Esaja 40:26) Taamaat­tumik Jiisusip Jehovamit tupin­nar­tuliorsin­naatin­neqarami ilaatigut anersaapiluk nukap­piaq­qamit anisip­paa. – Luk­karsi 9:37-43.

Jiisusip tupin­nar­tuliai 35-t mis­saat Biibilimi oqalut­tuarineqar­put. Tupin­nar­tuliaali taak­kuin­naan­ngil­lat. Assersuutigalugu Matiusi 14:14-imi allas­simasutut Jiisusip “inup­par­pas­suit takugamigit nal­ligingaaler­pai nap­parsimasor­taallu ajorun­naarsil­lugit”. Pisimasumi tamatumani ajorun­naarsitai qas­siusimanersut naluar­put.

Jiisusip tupin­nar­tuliai Guutip ernerineranut Mis­siarsiuneranullu upper­narsaataap­put. Biibilimi ersersin­neqar­poq Jiisusi Jehovamit pis­saaneqar­tin­neqarami tupin­nar­tuliorsin­naasoq. Petrusi ilaanni ima oqar­poq: “Nalun­ngilarsi Guutip Jiisusi Naazaratsimiu akun­nis­sinni tupin­nar­tulior­tit­tar­neratigut aal­lar­titaralugu ilis­sin­nut ersaris­sumik takutik­kaa.” (Apustilit Suliaat 2:22) Pisumi allami Petrusi aamma ima oqar­poq: ‘Jiisusi Naazaratsimiu anersaamik iller­nar­tumik Guutimit tanin­neqarlunilu pis­saanermillu tunineqar­poq, Guutimillu najor­neqarluni nunami tamarmi angalaar­poq Diaavulumillu naqisimaneqar­tunut tamanut ajun­ngitsulior­tarlunilu ajorun­naarsitsisarluni.’ – Apustilit Suliaat 10:37, 38.

Jiisusip tupin­nar­tuliai ilin­niar­titsis­sutaanut ilaap­put pingaarutil­lit. Assersuutigalugu inuit Jiisusip ilin­niar­titsis­sutaanut tupin­nar­tuliaanullu assigiim­mik qisuariar­nerat Biibilimi oqalut­tuarineqar­poq. (Mak­korsi 1:21-27) Mak­korsi 1:22-mi allas­simavoq inuit Jiisusip ‘ilin­niar­titseriaasia tupigusuutigigaat’. Versilu 27-mi allas­simavoq inuit Jiisusi anersaapilum­mik anisitsisoq takugamikku ‘tupigusungaar­tut’. Jiisusip ilin­niar­titsis­sutai tupin­nar­tuliaalu tamarmik Mis­siarsiuneranut upper­narsaataap­put.

Jiisusi oqaan­nan­ngilaq Mis­siarsiul­luni, oqaasiili, iliuusii tupin­nar­tuliaalu Mis­siarsiuneranut upper­narsaataap­put. Kimit oqar­tus­saas­susiler­neqarsimanini apeq­quser­neqarmat Jiisusi sapiil­luni ima akivoq: “[Johan­nesip] ilisiman­nit­tutut nas­suiaataanit annermik upper­narsaatis­saqar­punga, Ataatamami uan­nut sulias­siis­sutitut naam­mas­seq­qusai, maanna suliakka, Ataatan­nit aal­lar­titaanin­nut upper­narsaataap­put.” – Johan­nesi 5:36.

Piviusuunerannut ersiutit

Qanoq nalun­ngis­sin­naavar­put Jiisusip tupin­nar­tuliai piviusuusut? Ersiutaasut ilaat sam­meriar­tigit.

Jiisusip tupin­nar­tuliani malugeq­qusaarutiginagit tamatigut Jehovamut ataq­qinaataatit­tar­pai. Assersuutigalugu angut tap­piitsoq ajorun­naarsilerlugu erseq­qis­sar­paa “Guutip suliai ilisimaneqaler­nias­sam­mata” taamaaliorluni. – Johan­nesi 9:1-3; 11:1-4.

Nalitsinni angak­kuar­tar­tut healerisar­tullu assiginagit Jiisusi tupin­nar­tulioraangami hypnose, pisuusaar­titsineq, angak­kuar­neq, ileq­qutoq­qat, upperisapalaat qiperuk­kal­luun­niit ator­neq ajor­pai. Assersuutigalugu angutit tap­piitsut marluk ajorun­naarsik­kamigit immik­kut ittumik ator­toris­saaruteqar­tariaqan­ngilaq. Biibilimi ima oqalut­tuarineqar­poq: “Jiisusip nal­ligingaarlugit isaasigut attormagit ingerlaan­naq isigisaqaleq­qis­sin­naan­ngor­put, maliler­paallu.” (Matiusi 20:29-34) Nalitsinni “tupin­nar­tulior­tar­tut” isigin­naar­titsisarfinni pisunillu aqutsif­figisin­naasaminni taamaal­laat tupin­nar­tulior­tuusaar­tar­put, qanor­piarlu “tupin­nar­tulior­tar­nersut” ilisimaneqan­ngilaq. Jiisusili taakku assiginagit sumiik­kaluaraangamiluun­niit iser­tor­nani isigin­naar­tor­pas­suaqarlunilu tupin­nar­tulior­tar­poq. – Mak­korsi 5:24-29; Luk­karsi 7:11-15.

Jiisusip ajorun­naarsitani ilaan­nik­kut nersualaar­tar­pai upper­nerat pil­lugu. Upper­neralli tupin­nar­tuliorsin­naaneranut aalajangiisuun­ngilaq, uppin­ngitsummi aamma ajorun­naarsis­sin­naavai. Assersuutigalugu Kaper­naamiin­nerani “anersaapilul­lit amerlasuut Jiisusimukaan­neqar­put, Jiisusillu peq­qusinerin­narmigut anersaat anisip­pai nap­parsimasullu tamaasa ajorun­naarsil­lugit”. – Matiusi 8:16.

Inuit alaper­naan­nerat pis­sutiginagu pisariaqatitaan­nilli ikiorumal­lugit Jiisusi tupin­nar­tulior­tar­poq. (Mak­korsi 10:46-52; Luk­karsi 23:8) Aamma imminut iluaqutis­sin­niaan­narluni tupin­nar­tulior­tan­ngilaq. – Matiusi 4:2-4; 10:8.

Iivangkiiliuni allassimasut upperisinnaavagut?

Jiisusip tupin­nar­tuliai iivangkiiliuni oqalut­tuarineqar­put. Iivangkiiliuni allas­simasut sooq upperisin­naagigut maanna sam­meriar­tigu.

Paaseriik­katsitut Jiisusi isigin­naar­tor­pas­suaqar­til­lugu tupin­nar­tulior­tar­poq. Tupin­nar­tuliallu iivangkiiliuni siul­lerni allan­neqaq­qaarmata takun­nit­tut suli inuusimap­put. Jiisusip tupin­nar­tuliai pil­lugit atuak­kami (The Miracles and the Resurrection) allas­simavoq iivangkiiliunik allat­tut unneq­qaril­lutik pisimasuiit allat­taraat. Taamaat­tumillu oqarutta tupin­nar­tuliat pil­lugit allataat piviusuun­ngitsut eqqun­ngitsumik unnerluutigis­sagigut allas­simavoq.

Juutit kristumiuus­susermut akerliusut Jiisusip tupin­nar­tuliorsin­naanera apeq­quser­neq ajor­paat. Taamaal­laat kimit tupin­nar­tuliorsin­naatitaanera apeq­quser­tar­paat. (Mak­korsi 3:22-26) Ukiuni 200-ni tul­liut­tuni Jiisusip tupin­nar­tuliai atuak­kani innersuus­sutigineqar­tarmata isor­nar­torsiuisar­tut Jiisusip tupin­nar­tuliorsin­naanera miserratigisin­naan­ngilaat. Tassa tupin­nar­tuliat iivangkiiliuni oqalut­tuarineqarmata piviusuunerat upperil­luin­narsin­naavar­put.

Jiisusi ilisarisimanerulerparput

Jiisusip tupin­nar­tuliaasa ilumoor­tuunerisa paasinis­saat naam­man­ngilaq. Aamma inut­taa pil­lugu paasisagut eqqarsaatigisariaqar­pagut. Jiisusip tupin­nar­tuliaasa allan­neqar­neran­nit paasivar­put Jiisusi inun­nik asan­nit­tuul­lunilu isumas­suingaar­tuusoq.

Jiisusi Jehovamit pis­saaneqalersin­neqarluni tupin­nar­tulioraangami misigin­neqataanini ersersit­tar­paa. Assersuutigalugu maluginiaruk Jiisusip pupis­soq ajorun­naarsik­kamiuk nal­lit­tuinini qanoq ersersik­kaa, Biibilimi ima oqalut­tuarineqar­poq: “Angutip pupis­sup ornip­paa … kimigiiserfigalugu: ‘Piumaguit minguitsun­ngor­tis­sin­naavarma.’ [Jiisusip] nal­ligingaaleramiuk attor­paa oqarfigalugulu: ‘Piumavunga! Minguitsun­ngorit.’ Ingerlaan­narlu pupik­kun­naar­poq.” – Mak­korsi 1:40-42.

Jiisusip ilaanni illoqarfimmi Nainimi ilisiar­tor­tut takuai. Uil­lar­nerup ernitua toqusimavoq. Jiisusip uil­lar­neq “nal­ligingaaler­paa oqarfigalugulu: ‘Qiaqinak’”. Kingunin­ngualu ernera toqusunit makitip­paa. – Luk­karsi 7:11-15.

Jiisusip tupin­nar­tulior­nerisa allaatigineqar­neran­nit paasivar­put inuit nal­ligalugillu ikiorusut­tarai. Tamakku itsaq pisimasuugaluar­tut aamma nalitsinni iluaqutigisin­naavagut. Biibilimimi ima allas­simavoq: “Jiisusi Kristusi ippas­saq, ullumi qaqugorsuarmullu allan­ngun­ngilaq.” (Hebræerit 13:8) Jiisusi maanna qilammi kun­ngiuvoq, nunarsuarmilu inuugal­lar­nerminiit Guutimit pis­saaneqar­nerungaar­titaavoq. Taamaat­tumik qanit­tuk­kut inuit naalat­tut tamaasa ajorun­naarsis­savai. Siunis­samut neriorsuut tamanna pil­lugu paasisaqar­nerorusuk­kuit Jehovap Nalunaajaasuisa ikiorusup­paatsit.

[Assiliartaq]

Jiisusip tupin­nar­tuliai ‘Guutip pis­saaneqangaar­neranut’ ersiutaap­put

[Assiliartaq]

Jiisusi misigin­neqataangaar­tuuvoq