Men In Bwilõñ Ko An Jesus Ta Eo Kwomaroñ Katak Jeni?

KWOMAROÑ bwilõñ ñan jelã bwe bwebwenato ko ilo Bible kin mour eo an Jesus ion lal rar jab kajerbal nan in Greek eo kin “men in bwilõñ.” Nan in Greek eo (dyʹna·mis) me jet ien rej ukõte “men in bwilõñ” ej lukkun melelen “kajur.” (Luk 8:​46) Remaroñ bareinwõt ukõte einwõt “maroñ” ak “jerbal ko rekajur.”​—⁠Matu 11:20; 25:​15.

Bible eo ejjab kwalok kin men in bwilõñ ko an Jesus einwõt jibai ko ak men in mõn ko me kar eiki ñan kamõnõnõik armij. Rar kein kamol ko kin “kajur eo ekabwilõñlõñ an Anij,” einwõt kar ilo ien eo Jesus ear kajutõklok demon eo jen juõn ladik. (Luk 9:​37-​43) Anij Ekajur Bõtata​—Eo kar kwalok kake bwe ewõr “kajur elap” ibben, enaj ke kar bane ñan an kõmman jerbal kein rekajur? (Aiseia 40:26) Jaab!

 Bwebwenato ko ilo Gospel ej jitõñlok ñan enañin 35 men in bwilõñ ko an Jesus. Ak rejjab kwalok kin oran aolep men in bwilõñ ko an. Ñan wanjoñok, Matu 14:14 ej ba: “Ej [Jesus] itok im lo elap jar eo, im Ej tiriamokake ir, im Ej kemour ro re nañinmij ro ibeir.” Ejjab kwalok jete oran ro renañinmij ear kemour ir ilo ien eo.

Jerbal kein rekajur rar aorõk ñan kamol nan ko an Jesus bwe e kar Nejin Anij, Messiah eo kar kallimur kake. Jeje Ko rej kamol bwe kajur eo letok in Anij ear kamaroñ Jesus ñan an kõmmani men in bwilõñ ko. Ri jilek Peter ear konono kin Jesus einwõt “juõn eman Anij e ar kakõlõn emõn ñõn kom kin jerbal ko relap im men in bwilõñ ko im kakõle ko, men ko Anij e ar kõmõnmõni kin E iolapemi, einwõt ami jela.”​—⁠Jerbal 2:​22.

Men in bwilõñ ko an Jesus rar koba ibben ennan eo an. Mark 1:​21-​27 ej kwalok kin ewi wãwen jar eo ear emmakit ñan katak eo an Jesus im ñan juõn ian men in bwilõñ ko an. Mark 1:​22 ej ba bwe jar ko “re bwilõñ kin An nan in katak,” im eon 27 ej ba bwe armij ro rar “bwilõñ” ke ear kajutõklok juõn demon. Jerbal ko rekajur an Jesus im ennan eo an rej jimor kamol bwe e kar Messiah eo kar kallimur kake.

Men in Kamol ko

Etke jemaroñ liki bwe men in bwilõñ ko an Jesus rar lukkun mol? Lemnak kin jet ian men in kamol ko.

Ke ear kõmmani jerbal ko an rekajur, ear jab kareilok armij ñan e make. Ear kõmman bwe Anij en bõk nebar im aibujuij kin jabdewõt men in bwilõñ ko kar kõmmani. Mokta jen an kar kemour juõn emaan ebilo, ñan wanjoñok, Jesus ear kalikar bwe kemour eo enaj walok “bwe jerbal ko an Anij ren walok kin e.”​—Jon 9:​1-3; 11:​1-4.

Ear jab kitibuj jabdewõt mantin kwojkwoj ak jerbal in kemjãje. Jesus ear kõmman jerbal in kabwilõñlõñ ko an ilobwilij, ekkã an kõmmane men in iman elõñ ri kamol ro. Ear jab kajerbal kein jerbal ko ejej uair.​—Mark 5:​24-​29; Luk 7:​11-​15.

Jet ien Jesus ear kile tõmak eo an ro rar bõk tokjen jen men in bwilõñ ko an. Ak jab tõmak eo an juõn armij ear jab bõprae Jesus jen an kõmman juõn men in bwilõñ. Ke ear bed ilo Capernaum ilo Galilee, armij “rej bõktok ñõn E elõñ ro dimon r’ar miok na enbwinir: [im] Ej kajutõklok jitõb ro kin juõn nan im kemour ro otemjej re nañinmij.”​—Matu 8:​16.

Kar kõmmane men in bwilõñ ko an Jesus ñan kabwe aikwij ko an armij ilo kanniek, jab ñan kajuburu itoklimo ko air. (Mark 10:46-​52; Luk 23:8) Im Jesus ear jab kõmman men in bwilõñ ko ñan an bõk elõñ mweiuk ko ñan e make ilo jabdewõt wãwen.​—Matu 4:​2-4; 10:8.

Eo Ear Kõmmane Men in Bwilõñ ko

Juõn etale kin men in bwilõñ ko an Jesus enaj kar likjap elañe jaar etale wõt kin unin moliir. Ilo air kwalok kin jerbal ko rekajur an Jesus, Gospel ko rej kwalok kin juõn armij me emũlal eñjake ko an im elap tiriamokake ibben, im elukkun itoklimo kin emõn eo an armij ro.

Lemnak kin ri leper eo ear kebak Jesus im akwelap: “Elañe Kwo kõnan, Kwoj maroñ in karreo iõ.” “Kin an tiriamo,” Jesus ej erlokwe pein im uñur ri leper eo, im ba: “I kõnan: kwon erreo.” Ilo ien eo wõt ear erreo leo. (Mark 1:​40-​42) Ilo wãwen in Jesus ear kwalok tiriamo eo me ear kamakit e ñan kajerbal kajur eo an letok in Anij ñan kõmman men in bwilõñ ko.

Juõn men me jemaroñ katak jen men in bwilõñ ko an Jesus im ej kainemõn kij ej bwe “ej tiriamokake” im ear kõmmane men ko ñan jibañ armij. Ak men in bwilõñ kein rejjab men ko an ien ko remotlok wõt. “Jisõs Kraist ej einwõt juõn inne im ranin, im in drio,” Dri Hibru 13:8 ej ba. Ej kiõ iroij einwõt King ilañ, ebojak im emaroñ kajerbal kajur ko an rekabwilõñlõñ letok jen Anij ilo juõn wãwen elaplok jen an kar kõmmane ke ear juõn armij ion lal. Mõttan jidik, Jesus enaj kajerbal kajur eo an ñan kemour armij ro rekiblie. Ri Kennan ro an Jehovah renaj mõnõnõ in jibañ yuk ñan kalaplok am jelã kin kejatdikdik in emõn kin ilju im jeklaj.