Eby’okutangaaza Bya Yesu, Noobaasa Kubyegyeraho ki?

NOOBAASA kutangaara kumanya ngu Ebyahandiikirwe ebirikukwata aha buheereza bwa Yesu omu nsi tibirikukoresa ekigambo ky’Orugriika “eky’okutangaaza” omu New World Translation. Ekigambo ky’Orugriika (dyʹna·mis) obumwe ekirikuvunuurwa ‘nk’eky’okutangaaza’ amakuru gakyo genyini ‘n’amaani.’ (Luka 8:46) Nikibaasa n’okuvunuurwa ‘nk’okubaasa’ nari emirimo y’amaani. (Matayo 25:15) Kurugiirira aha mucondooza omwe, naagira ngu ekigambo ky’Orugriika “nikihamiiriza omurimo mukuru ogwaherize kukorwa, na munonga amaani agagubaasiise kukorwa. Nikikira kukoresibwa aha maani ga Ruhanga omu kukora ebintu.”

Ekindi ekigambo ky’Orugriika (teʹras) nikikira kuvunuurwa ‘nk’akamanyiso’ nari “okutangaaza.” (Yohaana 4:48; Ebyakozirwe 2:19) Ekigambo eki nikyoreka oku abareebi barikukwatwaho. Obwire obwingi, abantu n’abeegi bakaba batangaarira ebi Yesu arikukora.—Mako 2:12; 4:41; 6:51; Luka 9:43.

Ekigambo kya kashatu eky’Orugriika (se·meiʹon) ekirikukwata aha by’okutangaaza bya Yesu, nikimanyisa ekitaine amakuru aga butunu. Omucondooza Robert Deffinbaugh naagira ngu “nikihamiiriza amakuru g’omunda ag’eky’okutangaaza.” Naayongyeraho ati: “Akamanyiso n’eky’okutangaaza ekirikworeka amazima agarikukwata ahari Mukama waitu Yesu.”

Ekaba Eri Emiguruko Nari Amaani Agu Yaahairwe Ruhanga?

Baibuli terikugamba aha by’okutangaaza bya Yesu n’emiguruko y’okushemeza abantu kyonka. Bikaba nibyoreka “ekitiinisa [ky’amaani ga] Ruhanga,” nk’oku kyabaire aha mwojo ou Yesu yaabingireho daimoni. (Luka 9:37-43) Mbwenu shi eby’okutangaaza nk’ebi bikaba nibibaasa kurema Ruhanga ow’Obushoboorozi Bwona, orikugambwaho ngu ‘n’ow’amaani omu bushoboorozi’? (Isaaya 40:26) Ngaaha buzima!

Ebitabo by’Engiri nibigamba aha by’okutangaaza 35 ebya Yesu. Kwonka eby’okutangaaza byona ebi yaakozire tibirikworekwa. Nk’eky’okureeberaho, Matayo 14:14 nihagira ngu ‘[Yesu] akashangayo emitwe mingi y’abantu, yaabagirira embabazi, yaatambira abarwaire baabo.’ Titurikugambirwa abarwaire abaatambiirwe aha izooba eryo.

Eby’okutangaaza ebi bikaba nibyoreka gye ngu Yesu akaba ari Omwana wa Ruhanga, Mesia owaabaire araganisiibwe. Buzima, Ebyahandiikirwe bikooreka ngu amaani ga Ruhanga nigo gaabaasiise Yesu kukora eby’okutangaaza. Entumwa Petero akagamba ahari Yesu ngu niwe “omushaija ou Ruhanga yaabahamiize n’emirimo mikuru n’eby’okutangaaza n’obumanyiso, ebi yaamukoreise aha gati yaanyu, nk’oku mwabyereebeire.” (Ebyakozirwe 2:22) Aha izooba erindi, Petero akagira ngu ‘Ruhanga akamushukaho omwoyo gurikwera n’amaani, yaagyendagyenda naakora ebirungi, naakiza boona abaabaire nibaitwa kubi Sitaane, ahabw’okuba Ruhanga akaba ari hamwe nawe.’—Ebyakozirwe 10:37, 38.

Eby’okutangaaza bya Yesu bikaba nibihikaana n’obutumwa bwe. Mako 1:21-27 nihooreka oku abantu baatwarize ahabw’enyegyesa za Yesu na kimwe aha by’okutangaaza bye. Mako 1:22 nihagira ngu abantu ‘bakatangaarira okwegyesa kwe,’ kandi omushororongo 27 nigworeka ngu abantu ‘bakatangaara’ ku yaabingire daimoni. Eby’okutangaaza bya Yesu n’obutumwa bwe bikahamya ngu niwe Mesia owaabaire araganisiibwe.

Yesu taragambire bugamba ngu ni Mesia, kureka omu bigambo bye n’ebikorwa bye, n’amaani agu Ruhanga yaamuhaire agaabaire nigareebekyera omu by’okutangaaza ebi yaakozire, bikahamya ngu niwe Mesia. Yesu ku baamubuurize omurimo gwe n’obushoboorozi bwe, akagamba n’obumanzi ati: “Nyine ebirikumpamya ebikuru ebirikukira ebya Yohaana, ahakuba emirimo ei Tata yaampaire kuhikiiriza, emirimo egyo ei ndikukora niyo erikumpamya ku Tata yantumire.”—Yoh. 5:36.

Obuhame bw’Eby’okutangaaza bya Yesu

Ahabw’enki turikubaasa kuhamya ngu eby’okutangaaza bya Yesu bikaba biri ebyabuzima, kandi bihikire? Yetegyereze bimwe ebirikuhamya ekyo.

Yesu obu yaabaire naakora eby’okutangaaza ebyo, akaba atarikwetaho omutima. Akaba naahamya ngu eky’okutangaaza kyona eki yaakora yaahimbisa Ruhanga. Nk’eky’okureeberaho Yesu akatakirize omushaija empumi, akagira ngu omushaija ogu akaba naija kutambirwa kugira “ngu emirimo ya Ruhanga eyorekyerwe ahariwe.”—Yoh. 9:1-3; 11:1-4.

Yesu okutashushana n’abarikukora emiguruko, nari abarikushabira abarwaire ngu bakire, we tarakoreise obugobya, oburyarya, nari emiguruko. Akaba atarikukoresa emigyenzo, nari ebintu ebirikutwarwa nk’ebirikwera. Yetegyereze emiringo ebiri ei Yesu yaatambiiremu abashaija empumi. Ekyahandiikirwe nikigira ngu Yesu ‘akabagirira embabazi, yaakora aha maisho gaabo, ahonaaho baahumuuka, baamukuratira.’ (Matayo 20:29-34) Hakaba hatariho mugyenzo, nari okweyoreka kwona okwabaire nikutwarirwamu. Yesu akaba naakora eby’okutangaaza bye butunu, hariho baakareebi baingi. Akaba atarikukoresa ekyererezi ky’omutaano, kukora akadaara, nari kukoresa ebindi bintu. Okutaana n’ekyo, eby’okutangaaza ebi barikugira ngu nibakora obunaku obu, tibiri mu buhandiikye.—Mako 5:24-29; Luka 7:11-15.

Yesu obumwe akaba agamba aha kwikiriza kw’abaagasiirwe omu by’okutangaaza bye. Kwonka omuntu okutagira kwikiriza kikaba kitarikuremesa Yesu kukora eky’okutangaaza. Obu yaabaire ari omuri Kaperanaumu omuri Garilaaya, ‘bakamureetera baingi abaabaire bariho baadaimoni, yaababingisa ekigambo kwonka yaakiza boona abaabaire barwaire.’—Matayo 8:16.

Yesu akaba akora eby’okutangaaza kwigutsya ebyetengo by’abantu byenyini eby’omubiri, beitu kutari kweyoreka. (Mako 10:46-52; Luka 23:8) Kandi Yesu akaba atarikukoresa eby’okutangaaza ahabw’okwenda kwegasira omu muringo gwona.—Matayo 4:2-4; 10:8.

Ebiri omu Bitabo by’Engiri shi Nibyesigwa?

Nitumanya amazima agarikukwata aha by’okutangaaza bya Yesu kurabira omu bitabo bina eby’Engiri. Mbwenu shi hariho obuhame obuhikire ngu eby’okutangaaza ebirikugambwaho omu bitabo by’Engiri buzima bikakorwa Yesu? Eego, buriho.

Nk’oku twaba twareebire, Yesu akaba naakora eby’okutangaaza bye hariho baakareebi baingi. Ebitabo by’Engiri bikahandiikwa nangwa na baingi ahari baakareebi abo bakihuriire. Aha bikwatiraine n’abahandiiki b’Engiri, ekitabo The Miracles and the Resurrection nikigira kiti: “Okucwera abahandiiki b’engiri orubanja ahabw’okwenda kushereka obuhame bw’eby’okutangaaza bingi ebirikurangirira okwikiriza kw’ediini, buzima obwo n’obutari buringaaniza. . . . Bakaba bagyendereire kuba abahandiiki ab’amazima.”

Abayudaaya abahakanisa b’Obukristaayo tibarahakaniise eby’okutangaaza by’amaani ebirikugambwaho omu bitabo by’Engiri. Kureka bakaba nibahakanisa amaani agahweraire Yesu kukora eby’okutangaaza ebi. (Mako 3:22-26) Nangwa n’abahakanisa aba bwanyima bakaba batarikubaasa kuba abasinguzi omu kuhakanisa eby’okutangaaza bya Yesu. Kureka, omu kyasha ky’okubanza n’ekya kabiri Y.A.K., hakaba hariho bingi ebirikugambwa aha by’okutangaaza ebi Yesu yaakozire. Buzima, tuhikire kureeba ebiri omu bitabo by’Engiri ebirikugamba aha by’okutangaaza bye nk’ebihikire.

Ogwo Owaakozire eby’Okutangaaza Ebyo

Okushwijuma eby’okutangaaza bya Yesu nikuba nikuburamu twagamba aha kuba ebihikire kyonka. Ebitabo by’Engiri byaba nibigamba aha by’okutangaaza bya Yesu, nibyoreka ngu akaba ari omushaija oine enyehurira nk’embabazi, kandi akaba naafayo munonga aha bantu bagyenzi be.

Teekateeka aha mubembe owaayeshengyereize Yesu ati: “Ku oraabe nookunda, noobaasa kunshemeza.” Yesu akasaasibwa omushaija ogwo, yaagorora omukono gwe yaamukwataho, reero yaagira ati: “Ninkunda; shemera!” Omushaija ogwo akatambirwa ahonaaho. (Mako 1:40-42) Omu muringo ogu, Yesu akooreka ngu embabazi nizo zaamuhigire kukoresa amaani agu Ruhanga yaamuhaire kukora eby’okutangaaza.

Hakabaho ki obu Yesu yaabugana abantu baingi barikuruga omu tauni ya Naini barikuza kuziika? Omwojo owaabaire afiire, niwe yaabaire ari omwana heza ow’omukazi efaakazi. Yesu akagirira omukazi ogwo “esaasi” reero yaamuhikaho yaamugira ngu arekyere aho kurira, kandi yaazoora omutabani.—Luka 7:11-15.

Eishomo ririkuhuumuriza eri turikwiha omu by’okutangaaza bya Yesu n’okugira ngu akaba naahigwa “esaasi,” kandi akaba naakora ebintu kuhwera abandi. Kwonka eby’okutangaaza ebyo ti byafaayo kyonka. ‘Yesu Kristo tarikuhinduka, oku abaire ari nyomwabazyo, n’eri izooba nikwo ari, kandi nikwo arikwija kuguma ebiro byona,’ Abaheburaayo 13:8, nikwo harikugira. Hati naategyeka nk’Omugabe omu iguru, kandi ayeteekateekire kukoresa amaani ge agu yaahairwe Ruhanga kukora eby’okutangaaza ebirikukirira kimwe ebi yaakozire obu yaabaire ari omu nsi. Juba, Yesu naija kubikoresa kutambira abantu abarikworobera Ruhanga. Abajurizi ba Yehova nibaija kushemererwa kukuhwera kwega ebirikukirayo aha biro birungi ebi eby’omumaisho.

[Ekishushani]

Eby’okutangaaza bya Yesu bikaba nibyoreka “ekitiinisa [ky’amaani ga] Ruhanga”

[Ekishushani]

Yesu akaba aine enyehurira z’amaani