Saray Milagro nen Jesus​—Anto so Naaralan Mo?

NAYARIN nasurprisa ka no naamtaan mon saray salaysay na Biblia nipaakar ed bilay nen Jesus diad dalin so agbalot angusar ed orihinal a lenguahe parad salitan “milagro.” Say Griegon salita (dyʹna·mis), a no maminsan et ipapatalos a “milagro” so literal a mankabaliksan na “pakapanyari.” (Lucas 8:46) Nayarin ipatalos met itan a “pakayari” odino “saray makapanyarin gawa.” (Mateo 11:20; 25:15, NW) Unong ed sakey ya iskolar, sayan Griegon termino so “mangidadanet ed agawaan a makapanyarin kimey, tan, nagkalautla, say pakapanyarin inusar diad impanggawa ed satan. Indeskribe ya agawa so ebento lapud inkurang na pakapanyari na Dios.”

Say sananey nin Griegon termino (teʹras) so kaslakan ya ipapatalos bilang “makapakelaw” odino “pakelaw.” (Juan 4:48; Gawa 2:19) Ipapabitar na sayan balikas so epekto ed saray akaimaton. Mabetbet  et say karaklan a totoo tan saray babangatan so nandinayew odino nikelawan ed makapanyari iran gawa nen Jesus.​—Marcos 2:12; 4:41; 6:51; Lucas 9:43.

Say komatlon Griegon termino (se·meiʹon) ya anukoy ed saray milagro nen Jesus et mankabaliksan na “tanda.” Satan so “mangiyaapasakey ed mas aralem a kabaliksan na milagro,” so inkuan na iskolar a si Robert Deffinbaugh. Inkuan to ni: “Say tanda et sakey a milagro a mangipapasabi na katuaan nipaakar ed Katawan tayon Jesus.”

Ilusyon Odino Inter na Dios a Pakapanyari?

Agdedeskribien na Biblia iray milagro nen Jesus bilang panagpalikdo odino ilusyon a ginetman mamaliket ed totoo. Saratan so panangipatnag ed “baleg a pakapanyari na Dios,” a singa ed kaso na sakey ya ugaw a laki a pinapaway nen Jesus ed sikato so sakey a demonyo. (Lucas 9:37-43) Kasin imposible so ontan a makapanyari iran gawa parad Makapanyarin-amin a Dios​—say Sakey a deneskribe bilang walaan na “daakan a dinamikon biskeg”? (Isaias 40:26, NW) Andin balot!

Saray salaysay na Ebanghelyo so anukoy ed manga 35 a milagro nen Jesus. Balet agniparungtal so bilang na ami-amin a ginawa ton milagro. Singa bilang, oniay imbaga na Mateo 14:14: “Anengneng to [nen Jesus] iray dakerakel a katooan, et inabagey to ra, tan pinabpaabig to’ray agmakayari ra.” Agtayo amta no pigara so pinaabig ton mansasakit diad satan ya inkagawa.

Saratan a makapanyarin gawa so makana ed pangipapabidbir nen Jesus a sikatoy Anak na Dios, say insipan a Mesias. Talagan pinekderan na Kasulatan ya akapanggawa si Jesus na saray milagro lapud pakapanyari ya inter na Dios. Tinukoy nen apostol Pedro si Jesus bilang “laki ya inabobonan na Dios ed sikayo ed panamegley na saray gawa a makapanyari, tan makapakelaw, tan saray tanda a ginawa na Dios ed panamegley to, dia ed sikayo, unong na kabat yo met la.” (Gawa 2:22) Diad sananey ya inkagawa, impabitar nen Pedro a ‘pinuyokan na Dios si Jesus na espiritu santo tan pakapanyari, a sikato so nanakarakar a nanggawa na maong, tan  tinambal to so amin a nairapan ed tukso; ta say Dios wala ed sikato.’​—Gawa 10:37, 38.

Saray milagro nen Jesus so mikonektaan ed mensahe to. Imparungtal na Marcos 1:21-27 so reaksion na karaklan ed bangat nen Jesus tan ed sakey ed saray milagro to. Imbaga na Marcos 1:22 a saray karaklan et “nikelkelawan ira ed saray banga’to,” tan impabitar na bersikulo 27 ya “atalagnaw” iray totoo sanen pinapaway to so demonyo. Saray makapanyarin gawa nen Jesus tan say mensahe to so parehon amaneknek a sikato so insipan a Mesias.

Aglambengat inkuan nen Jesus a sikato so Mesias; nilikud ed saray salita tan arum nin gawa to, say inter na Dios a pakapanyari ya apatnagan ed saray milagro to so lalon amaneknek a sikaton talaga so Mesias. Sanen linmesa iray tepet nipaakar ed betang tan autoridad to, oniay inyebat nen Jesus: “Say pantasi a wala ed siak babaleg nen say pantasi nen Juan [a Managbautismo], ta saray kimey ya inter ed siak na Ama a sumpalen ko, saray dili a kimey a gawaen ko, mantasi ra ed siak, a say Ama imbaki to ak.”​—Juan 5:36.

Saray Prueba Nipaakar ed Inka-autentiko na Saray Milagro To

Akin a makaseguro itayo a peteg tan autentiko iray milagro nen Jesus? Konsideraen pa so pigaran paneknek nipaakar ed satan.

Diad saray makapanyarin gawa to, agbalot impaarap nen Jesus so imano ed inkasikato. Sineguro ton say resulta na antokaman a milagro to et nidayew tan nigloria so Dios. Singa bilang, antis ton pinaabig so bulag a laki, indanet nen Jesus a nagawa so panamaabig “pian saray gawa na Dios nipatnag ira ed sikato.”​—Juan 9:1-3; 11:1-4.

Aliwan singa saray ilusyonista, managsalamangka, tan saray managtambal, agbalot angusar si Jesus na hipnotismo, panamalikdo, panagparayag, panag-orasyon, odino emosyonal iran ritual. Pinaliisan to so panag-anito odino ag-angusar na saray bengatlan ipapasen a masanto. Imanoen pa so mapaabeban paraan na impamaabig nen Jesus ed duaran bulag a lalaki. Inkuan na salaysay a “dia ed impangabagey [nen Jesus], diniwit to so saray kamataan da, et tampol ya inawat da so pakanengneng da, tan tinmumbok ira ed sikato.” (Mateo 20:29-34) Anggapo so agawan ritual, seremonya, odino panangiparayag. Ginawa nen Jesus iray milagro to diad publiko, a mabetbet et diad imaton na dakel a tasi. Sikatoy ag-angusar na espisyal iran silew, entablado, odino props. Diad pidumaan, saray ibabagan milagro ed modernon-panaon so mabetbet ya agnapaneknekan.​—Marcos 5:24-29; Lucas 7:11-15.

Sagpaminsan et binidbir nen Jesus so pananisia na saraman so agunggonaan ed milmilagro to. Balet say kakulangan na pananisia na too so ag-angamper ed si Jesus pian manggawa na milagro. Legan a walad Capernaum diad Galilea, “inyakar [na totoo] ed sikato so amayamay a sinelepan day demonyos; et pinapaway to ray espiritu ed sakey a salita, tan pinaabig to’ray mabeblay.”​—Mateo 8:16.

Ginawa nen Jesus iray milagro pian peneken so aktual iran pankaukolan na totoo ed pisikal, aliwan say inkamaupapet na saray maniimaton. (Marcos 10:46-52; Lucas 23:8) Tan agbalot ginawa nen Jesus iray milagro parad antokaman a pakagunggonaan ton dili.​—Mateo 4:2-4; 10:8.

Komusta Iray Salaysay na Ebanghelyo?

Saray katuaan nipaakar ed milmilagro nen Jesus so nipasabi ed sikatayo panamegley na saray pahina na apatiran Ebanghelyo. Kasin walaray napangibasiyan ed saratan a salaysay no usisaen tayo so inka-autentiko na saray milagron ginawa nen Jesus? On, wala.

Unong a nipaimano la, ginawa nen Jesus iray milagro to ed publiko, diad imaton na dakel a tasi. Nisulat iray sankaunaan ya Ebanghelyo legan a mabilay ni so maslak ed saray akatasi. Nipaakar ed inkamatua na saray nansulat na Ebanghelyo, oniay inkuan na libron The Miracles and the Resurrection: “Say pangakusa ed saray managsulat na ebanghelyo a ginagala ran inyamot so maawaran a katuaan diad dakel ya istoryan nipaakar ed milagro pian peneken labat iray interes na teolohikon propaganda et sigpot ya agmakatunongan. . . . Getma ra so magmaliw a matuan managsulat.”

Agbalot sinuppiat na saray Judion onsusumpa ed Inkakristiano iray makapanyarin gawa ya adeskribe diad saray Ebanghelyo. Say sinuppiat da lambengat et say inkanan pakapanyari diad impanggawa ed saratan. (Marcos 3:22-26) Anggapo  ed saray agano nin managkritiko so tinmalonan mangiburi ed saray milagro nen Jesus. Diad kasunian, legan na primero tan komaduan siglo K.P., wala ra so impanukoy ed saray milagro a ginawa nen Jesus. Malinew, walaan itayo na malet a basiyan pian moriaen ya autentiko iray salaysay na Ebanghelyo nipaakar ed milmilagro to.

Say Toon Nanggawa ed Saray Milagro

Aliwan nagnap so pangusisa ed saray milagro nen Jesus no iyapasakey labat itan ed saray lohikon argumento nipaakar ed inka-autentiko na saratan. Diad panedeskribe ed makapanyari iran kimey nen Jesus, imparungtal na saray Ebanghelyo so toon walaan na aralem a liknaan tan agnaparaan a panangabagey, tekep na masimoon ya interes ed pankaabigan na kapara ton totoo.

Imanoen pay kaso na sakey ya akating ya inmasingger ed si Jesus tan akikaskasi ed sikato: “No labay mo, nayarian mo ak a linisan.” “Lapud atenyeg so panangabagey to,” inyunat nen Jesus so lima to tan diniwit to so akating, a kuan to: “Labay ko; nalinisan ka komon.” Tampol ya inmabig so laki. (Marcos 1:40-42) Diad ontan et impatnag nen Jesus so empatya ya amakiwas ed sikaton usaren so inter-Dios a pakapanyari to pian manggawa na saray milagro.

Anto so agawa sanen nabet nen Jesus so sakey a tulor a nanlapud syudad na Nain? Say inatey a balolaki so alenleneg ya anak na sakey a balo. Lapud “inabagey to” so bii, sikato so inasinggeran nen Jesus tan inkuan to: “Agka mannangis.” Insan to pinaoli so anak na balo.​—Lucas 7:11-15.

Say makaligliwan leksion a naaralan tayo ed saray milagro nen Jesus et “atenyeg so panangabagey” to tan ginawa to iray bengatla pian tulongan so totoo. Balet aliwa lambengat ya awaran iratan a milagro. “Si Jesu-Kristo sikato met lanlamang karuman, tan natan, on tan ed ando lan ando,” so kuan na Hebreos 13:8. Sikatoy manuuley la natan bilang mangatatawen ya Ari, ya akaparaan tan makayarin mangusar ed inter na Dios iran pakapanyari to a manggawa na milagro diad mas malaknab a paraan nen say ginawa to legan a wadiad dalin bilang sakey a too. Saratan so magano lan usaren nen Jesus pian paabigen so matulok a katooan. Maliket iray Tasi nen Jehova ya ontulong ed sikan manaral ni a nagkalalo nipaakar ed sayan masnag ya ilalo ed arapen.

[Saray litrato ed pahina 4, 5]

Saray milagro nen Jesus so panangipatnag ed “baleg a pakapanyari na Dios”

[Litrato ed pahina 7]

Si Jesus et sakey a toon walaan na aralem a liknaan